ยาวตติยกา สพฺเพ, เอกาทส ปกาสิตา;

อริฏฺโฐ, จณฺฑกาฬี จ, อุกฺขิตฺตสฺสานุวตฺติกาฯ

[675]

อฏฺฐ สงฺฆาทิเสเสสุ, อุภินฺนํ ตุ วสา ปน;

เอกาทส อิเม ยาว-ตติยาติ ปกาสิตาฯ

[676]

นิสฺสยสฺส ทเสกาว, ปฏิปฺปสฺสทฺธิโย ปน;

ฉธาจริยโต วุตฺตา, อุปชฺฌายา ตุ ปญฺจธาฯ

เอกาทสกกถาฯ

[677]

เตรเสว ธุตงฺคานิ, ปรมานิ จ จุทฺทส;

โสฬเสว ตุ ‘‘ชาน’’นฺติ, ปญฺญตฺตานิ มเหสินาฯ

[678]

สอุตฺตรํ วินยวินิจฺฉยํ ตุ โย;

อนุตฺตรํ สกลมปีธ ชานติ;

มหตฺตเร วินยนเย อนุตฺตเร;

นิรุตฺตโร ภวติ หิ โส, น สํสโยฯ

เอกุตฺตรนโย สมตฺโตฯ

เสทโมจนกถา

[679]

อิโต ปรํ ปวกฺขามิ, ภิกฺขูนํ สุณตํ ปุน;

เสทโมจนคาถาโย, ปฏุภาวกรา วราฯ

[680]

อุพฺภกฺขกํ วิวชฺเชตฺวา, อโธนาภิํ วิวชฺชิย;

ปฏิจฺจ เมถุนํ ธมฺมํ, กถํ ปาราชิโก สิยา?

[681]

กพนฺธสตฺตกายสฺส, อุเร โหติ มุขํ สเจ;

มุเขน เมถุนํ ธมฺมํ, กตฺวา ปาราชิโก ภเวฯ

[682]

สุญฺเญ นิสฺสตฺตเก ทีเป, เอโก ภิกฺขุ สเจ วเส;

เมถุนปจฺจยา ตสฺส, กถํ ปาราชิโก สิยา?

[683]

ลมฺพี วา มุทุปิฏฺฐี วา, วจฺจมคฺเค มุเขปิ วา;

องฺคชาตํ ปเวเสนฺโต, สเก ปาราชิโก ภเวฯ

[684]

สยํ นาทิยเต กิญฺจิ, ปรญฺจ น สมาทเป;

สํวิธานญฺจ เนวตฺถิ, กถํ ปาราชิโก สิยา?

[685]

สุงฺกฆาเต อติกฺกนฺเต, นาทิยนฺโต ปรสฺส ตุ;

อาณตฺติญฺจ วินาเยว, โหติ ปาราชิโก ยติฯ

[686]

หรนฺโต ครุกํ ภณฺฑํ, เถยฺยจิตฺเตน ปุคฺคโล;

ปรสฺส ตุ ปริกฺขารํ, น จ ปาราชิโก กถํ?

[687]

ติรจฺฉานคตานํ ตุ, ปุคฺคโล ครุภณฺฑกํ;

คณฺหนฺโต เถยฺยจิตฺเตน, น จ ปาราชิโก สิยาฯ

[688]

อตฺตโน สนฺตกํ ทตฺวา, ภิกฺขุ ปาราชิโก กถํ?

‘‘มรตู’’ติ อสปฺปาย-โภชนํ เทติ เจ จุโตฯ

[689]

ปิตริ ปิตุสญฺญี จ, มาตุสญฺญี จ มาตริ;

หนฺตฺวานนฺตริยํ กมฺมํ, น ผุเสยฺย กถํ นโร?

[690]

ติรจฺฉานคตา มาตา, ติรจฺฉานคโต ปิตา;

ตสฺมานนฺตริยํ นตฺถิ, มาริเตสุ อุโภสุปิฯ

[691]

อนาทิยนฺโต ครุกํ, ปรญฺจ น สมาทเป;

คจฺฉํ ฐิโต นิสินฺโน วา, กถํ ปาราชิโก ภณ?

[692]

มนุสฺสุตฺตริเก ธมฺเม, กตฺวาน กติกํ ตโต;

สมฺภาวนาธิปฺปาโย โส, อติกฺกมติ เจ จุโตฯ

[693]

สงฺฆาทิเสสา จตฺตาโร, ภเวยฺยุํ เอกวตฺถุกา;

กถํ? กเถหิ เม ปุฏฺโฐ, วินเย เจ วิสารโทฯ

[694]

สญฺจริตฺตญฺจ ทุฏฺฐุลฺลํ, สํสคฺคํ อตฺตกามตํ;

อิตฺถิยา ปฏิปชฺชนฺโต, ผุเสยฺย จตุโร อิเมฯ

[695]

สงฺฆาทิเสสมาปนฺโน, ฉาเทตฺวา สุจิรํ ปน;

อจริตฺวา ยถาวุตฺตํ, วตฺตํ โส วุฏฺฐิโต กถํ?

[696]

สุกฺกวิสฺสฏฺฐิมาปนฺโน , ภิกฺขุภาเว ฐิโต ปน;

ปริวตฺเต ตุ ลิงฺคสฺมิํ, นตฺถิ สงฺฆาทิเสสตาฯ

[697]

กุทฺโธ อาราธโก โหติ;

กุทฺโธ โหติ จ นินฺทิโต;

อถ โก นาม โส ธมฺโม;

เยน กุทฺโธ ปสํสิโต?

[698]

วณฺณสฺมิํ ภญฺญมาเน โย, ติตฺถิยานํ ตุ กุชฺฌติ;

อาราธโก, สมฺพุทฺธสฺส, ยทิ กุชฺฌติ นินฺทิโตฯ

[699]

อตฺถงฺคเต ตุ สูริเย, โภชนํ ภิกฺขุ ภุญฺชติ;

น ขิตฺตจิตฺโตนุมฺมตฺโต, นิราปตฺติ กถํ ภเว?

[700]

โย จ โรมนฺถยิตฺวาน, รตฺติํ ฆสติ โภชนํ;

นตฺถิ ตสฺส ปนาปตฺติ, วิกาลโภชเนน หิฯ

[701]

อตฺถงฺคเต จ สูริเย, คเหตฺวา ภิกฺขุ โภชนํ;

สเจ ภุญฺเชยฺย อาปตฺติ, อนาปตฺติ กถํ ภเว?

[702]

วิกาลุตฺตรกุรุํ คนฺตฺวา, ตตฺถ ลทฺธาน โภชนํ;

อาคนฺตฺวา อิธ กาเลน, นตฺถิ อาปตฺติ ภุญฺชโตฯ

[703]

คาเม วา ยทิ วารญฺเญ, ยํ ปเรสํ มมายิตํ;

น หรนฺโตว ตํ เถยฺยา, กถํ ปาราชิโก สิยา?

[704]

เถยฺยสํวาสโก นาม, ลิงฺคสํวาสเถนโก;

ปรภณฺฑํ อคณฺหนฺโต, โหติ เอส ปราชิโตฯ

[705]

นารี รูปวตี พาลา, ภิกฺขุ รตฺเตน เจตสา;

เมถุนํ ตาย กตฺวาปิ, โส น ปาราชิโก กถํ?

[706]

ภิกฺขุ รูปวติํ นาริํ, สุปินนฺเตน ปสฺสติ;

ตาย เมถุนสํโยเค, กเตปิ น วินสฺสติฯ

[707]

เอกิสฺสา ทฺเว สิยุํ ปุตฺตา, ชาตา อิธ ปนิตฺถิยา;

ทฺวินฺนํ มาตา ปิตา สาว, กถํ โหติ ภณาหิ เม?

[708]

อุภโตพฺยญฺชนา อิตฺถี, คพฺภํ คณฺหาติ อตฺตนา;

คณฺหาเปติ ปรํ คพฺภํ, ตสฺมา มาตา ปิตา จ สาฯ

[709]

ปุริเสน สหาคาเร, รโห วสติ ภิกฺขุนี;

ปรามสติ ตสฺสงฺคํ, อนาปตฺติ กถํ สิยา?

[710]

สหาคาริกเสยฺยญฺจ, สพฺพญฺจ ปฏิชคฺคนํ;

ทารกสฺส จ มาตา หิ, กาตุํ ลภติ ภิกฺขุนีฯ

[711]

โก จ ภิกฺขูหิ สิกฺขาสุ, อสาธารณตํ คโต;

น ปาริวาสิโก พฺรูหิ, น อุกฺขิตฺตาทิโกปิ จ?

[712]

คเหตุํ ขุรภณฺฑํ ตุ, สเจ นฺหาปิตปุพฺพโก;

น โส ลภติ อญฺเญสํ, กปฺปตีติ จ นิทฺทิเสฯ

[713]

กเถติ กุสลํ ธมฺมํ, ปรมํ อตฺถสํหิตํ;

กตโม ปุคฺคโล พฺรูหิ, น มโต น จ ชีวติ?

[714]

กเถติ กุสลํ ธมฺมํ, ปรมํ อตฺถสํหิตํ;

โหติ นิมฺมิตพุทฺโธ โส, น มโต น จ ชีวติฯ

[715]

สํยาจิกํ กโรนฺตสฺส, กุฏิํ เทสิตวตฺถุกํ;

ปมาณิกมนารมฺภํ, อาปตฺติ สปริกฺกมํฯ

[716]

นโร กโรติ เจ กุฏิํ, ส สพฺพมตฺติกามยํ;

น มุจฺจเตว วชฺชโต, ชิเนน วุตฺตโต ตโตฯ

[717]

สํยาจิกาย ภิกฺขุสฺส, อนาปตฺติ กถํ สิยา;

สพฺพลกฺขณหีนํ ตุ, กโรนฺตสฺส กุฏิํ ปน?

[718]

สํยาจิกํ กโรนฺตสฺส, ติณจฺฉทนกํ กุฏิํ;

ภิกฺขุโน ชินจนฺเทน, อนาปตฺติ ปกาสิตาฯ

[719]

น กายิกํ กญฺจิ ปโยคมาจเร;

น กิญฺจิ วาจาย ปรํ ภเณยฺย;

ผุเส ครุํ อนฺติมวตฺถุเหตุกํ;

วิสารโท เจ วินเย ภณาหิ ตฺวํ?

[720]

ปรสฺสา ปน ยา วชฺชํ, ปฏิจฺฉาเทติ ภิกฺขุนี;

อยํ ปาราชิกาปตฺติํ, ตนฺนิมิตฺตํ ครุํ ผุเสฯ

[721]

น กายิกํ กิญฺจิปิ ปาปมาจเร;

น กิญฺจิ วาจาย จเรยฺย ปาปกํ;

สุนาสิโตเยว จ นาสิโต สิยา;

กถํ ตุวํ พฺรูหิ มยาสิ ปุจฺฉิโต?

[722]

อภพฺพา ปน เย วุตฺตา, ปุคฺคลา ปณฺฑกาทโย;

เอกาทส มุนินฺเทน, นาสิตา เต สุนาสิตาฯ

[723]

อนุคฺคิรํ คิรํ กิญฺจิ, สุภํ วา ยทิ วาสุภํ;

ผุเส วาจสิกํ วชฺชํ, กถํ เม ปุจฺฉิโต ภณ?

[724]

สนฺติเมว ปนาปตฺติํ, ภิกฺขุ นาวิกเรยฺย โย;

สมฺปชานมุสาวาเท, ทุกฺกฏํ ตสฺส วณฺณิตํฯ

[725]

เอกโตอุปสมฺปนฺนา, อุโภ ตาสํ ตุ หตฺถโต;

จีวรํ คณฺหโต โหนฺติ, นานาอาปตฺติโย กถํ?

[726]

เอกโตอุปสมฺปนฺนา , ภิกฺขูนํ ตุ วเสน ยา;

จีวรํ หตฺถโต ตสฺสา, ปาจิตฺติ ปฏิคณฺหโตฯ

[727]

เอกโตอุปสมฺปนฺนา, ภิกฺขุนีนํ วเสน ยา;

จีวรํ หตฺถโต ตสฺสา, ทุกฺกฏํ ปฏิคณฺหโตฯ

[728]

สํวิธาย จ จตฺตาโร, ครุํ เถนิํสุ ภณฺฑกํ;

เถโร ถุลฺลจฺจยํ เตสุ, ปตฺโต, เสสา ปราชยํฯ

[729]

กถํ ? ฉมาสกํ ภณฺฑํ, ตตฺถ สาหตฺถิกา ตโย;

หฏา เถเรน มาสา ตุ, ตโย อาณตฺติยาปิ จฯ

[730]

ตีหิ สาหตฺถิโกเกโก;

ปญฺจ อาณตฺติยา หฏา;

ตสฺมา ถุลฺลจฺจยํ เถโร;

ปตฺโต, เสสา ปราชยํฯ

[731]

พหิทฺธา เคหโต ภิกฺขุ, อิตฺถี คพฺภนฺตรํ คตา;

ฉิทฺทํ เคหสฺส โน อตฺถิ, เมถุนปจฺจยา จุโตฯ

[732]

อนฺโตทุสฺสกุฏิฏฺเฐน, มาตุคาเมน เมถุนํ;

สนฺถตาทิวเสเนว, กตฺวา โหติ ปราชิโตฯ

[733]

สปฺปิอาทิํ ตุ เภสชฺชํ, คเหตฺวา สามเมว ตํ;

อวีติวตฺเต สตฺตาเห, กถํ อาปตฺติ เสวโต?

[734]

ปริวตฺติตลิงฺคสฺส, ภิกฺขุโน อิตราย วา;

อวีติวตฺเต สตฺตาเห, โหติ อาปตฺติ เสวโตฯ

[735]

นิสฺสคฺคิเยน ปาจิตฺติ, สุทฺธปาจิตฺติยมฺปิ จ;

เอกโตว กถํ ภิกฺขุ, อาปชฺเชยฺย ภณาหิ เม?

[736]

สงฺเฆ ปริณตํ ลาภํ, อตฺตโน จ ปรสฺส จ;

เอกโต ปริณาเมนฺโต, ปโยเคน ทฺวยํ ผุเสฯ

[737]

ภิกฺขู สมาคมฺม สมคฺคสญฺญา;

สพฺเพ กเรยฺยุํ ปน สงฺฆกมฺมํ;

ภิกฺขุฏฺฐิโต ทฺวาทสโยชนสฺมิํ;

กถํ กตํ กุปฺปติ วคฺคเหตุ?

[738]

อตฺถิ สเจ ปน ภิกฺขุ นิสินฺโน;

ทฺวาทสโยชนิเก นคเร ตุ;

ตตฺถ กตํ ปน กมฺมมกมฺมํ;

นตฺถิ วิหารคตา ยทิ สีมาฯ

[739]

สงฺฆาฏิ ปารุตา กาเย, นิวตฺโถนฺตรวาสโก;

นิสฺสคฺคิยานิ สพฺพานิ, กถํ โหนฺติ กเถหิ เม?

[740]

กณฺณํ คเหตฺวา ตตฺเถว, กทฺทมํ ยทิ โธวติ;

ภิกฺขุนี กายงฺคาเนว, ตานิ นิสฺสคฺคิยานิ หิฯ

[741]

ปุริสํ อปิตรํ หนฺตฺวา, อิตฺถิํ หนฺตฺวา อมาตรํ;

อานนฺตริยกํ กมฺมํ, อาปชฺชติ กถํ นโร?

[742]

ปริวตฺเต ตุ ลิงฺคสฺมิํ, ปิตรํ อิตฺถิตํ คตํ;

มาตรํ ปุริสตฺตํ ตุ, คตํ หนฺตฺวา ครุํ ผุเสฯ

[743]

มาตรํ ปน มาเรตฺวา, มาเรตฺวา ปิตรมฺปิ จ;

อานนฺตริยกํ กมฺมํ, นาปชฺเชยฺย กถํ นโร?

[744]

ติรจฺฉานคตา มาตา, ติรจฺฉานคโต ปิตา;

มาตรํ ปิตรํ หนฺตฺวา, นานนฺตริยกํ ผุเสฯ

[745]

โจเทตฺวา สมฺมุขีภูตํ, สงฺโฆ กมฺมํ กเรยฺย เจ;

กถํ กมฺมํ อกมฺมํ ตํ, สงฺโฆ สาปตฺติโก สิยา?

[746]

วุตฺตํ ตุ ปณฺฑกาทีนํ, สนฺธาย อุปสมฺปทํ;

อนาปตฺติสฺส กมฺมํ ตุ, สนฺธายาติ กุรุนฺทิยํฯ

[747]

กปฺปพินฺทุกตํ รตฺตํ, จีวรํ ตุ อธิฏฺฐิตํ;

กถมสฺส สิยาปตฺติ, เสวมานสฺส ทุกฺกฏํ?

[748]

สกํ อนิสฺสชิตฺวาน, โย นิสฺสคฺคิยจีวรํ;

ปริภุญฺชติ ตสฺสาย-มาปตฺติ ปริทีปิตาฯ

[749]

ปญฺจ ปาจิตฺติยาเนว, นานาวตฺถุกตานิ หิ;

อปุพฺพํ อจริมํ เอก-กฺขเณ อาปชฺชเต กถํ?

[750]

เภสชฺชานิ หิ ปญฺเจว, คเหตฺวา ภาชเน วิสุํ;

ฐปิเตสุ จ สตฺตาหา-ติกฺกเม โหนฺติ ปญฺจปิฯ

[751]

น รตฺตจิตฺโต น จ เถยฺยจิตฺโต;

น จาปิ จิตฺตํ มรณาย ตสฺส;

เทนฺตสฺส ปาราชิกมาห สตฺถา;

ถุลฺลจฺจยํ ตํ ปฏิคณฺหโตปิฯ

[752]

สลากํ สงฺฆเภทาย, ปเทนฺตสฺส ปราชโย;

โหติ ถุลฺลจฺจยํ ตสฺส, สลากํ ปฏิคณฺหโตฯ

[753]

เอกตฺถ นิกฺขิปิตฺวาน, จีวรํ อทฺธโยชเน;

อรุณํ อุฏฺฐาเปนฺตสฺส, อนาปตฺติ กถํ สิยา?

[754]

สุปฺปติฏฺฐิตนิคฺโรธ-สทิเส รุกฺขมูลเก;

อนาปตฺติ หิ โส รุกฺโข, โหติ เอกกุลสฺส เจฯ

[755]

กถํ อาปตฺติโย นานา-;

วตฺถุกาโย หิ กายิกา;

อปุพฺพํ อจริมํ เอก-;

กฺขเณ สมฺพหุลา ผุเส?

[756]

นานิตฺถีนํ ตุ เกเส วา, ตาสํ องฺคุลิโยปิ วา;

เอกโต คหเณ ตสฺส, โหนฺติ สมฺพหุลา ปนฯ

[757]

กถํ วาจสิกา นานา-วตฺถุกาโย น กายิกา;

อปุพฺพํ อจริมํ เอก-กฺขเณ อาปตฺติโย ผุเส?

[758]

ทุฏฺฐุลฺลํ โย วทติ จ วาจํ;

‘‘สพฺพา ตุมฺเห สิขรณิโย’’ติ;

วุตฺตา โทสา วินยนสตฺเถ;

ตสฺสิตฺถีนํ คณนวเสนฯ

[759]

อิตฺถิยา ปุริเสนาปิ, ปณฺฑเกน นิมิตฺตเก;

เมถุนํ น จ เสวนฺโต, เมถุนปฺปจฺจยา จุโต?

[760]

เมถุเน ปุพฺพภาคํ ตุ, กายสํสคฺคตํ คตา;

เมถุนปฺปจฺจยา เฉชฺชํ, อาปนฺนา อฏฺฐวตฺถุกํฯ

[761]

มาตรํ จีวรํ ยาเจ, สงฺเฆ ปริณตํ น จ;

เกนสฺส โหติ อาปตฺติ, อนาปตฺติ จ ญาตเก?

[762]

วสฺสสาฏิกลาภตฺถํ , สมเย ปิฏฺฐิสญฺญิเต;

สิยาปตฺติ สตุปฺปาทํ, กโรโต มาตรมฺปิ จฯ

[763]

สงฺฆาทิเสสมาปตฺติํ, ปาจิตฺติํ ทุกฺกฏํ กถํ;

ปาฏิเทสนิยํ ถุลฺล-จฺจยํ เอกกฺขเณ ผุเส?

[764]

อวสฺสุตาวสฺสุตหตฺถโต หิ;

ปิณฺฑํ คเหตฺวา ลสุณํ ปณีตํ;

มนุสฺสมํสญฺจ อกปฺปมญฺญํ;

สพฺเพกโต ขาทติ, โหนฺติ ตสฺสาฯ

[765]

เอโก อุปชฺฌายกปุคฺคเลโก;

อาจริยโก ทฺเวปิ จ ปุณฺณวสฺสา;

เอกาว เตสํ ปน กมฺมวาจา;

เอกสฺส กมฺมํ ตุ น รูหเต กิํ?

[766]

เกสคฺคมตฺตมฺปิ มหิทฺธิเกสุ;

อากาสโค โหติ สเจ ปเนโก;

กตมฺปิ ตํ รูหติ เนว กมฺมํ;

อากาสคสฺเสว, น ภูมิคสฺสฯ

[767]

สงฺเฆนปิ หิ อากาเส, ฐิเตน ปน อิทฺธิยา;

ภูมิคสฺส น กาตพฺพํ, กโรติ ยทิ กุปฺปติฯ

[768]

น จ กปฺปกตํ วตฺถํ, น จ รตฺตํ อกปฺปิยํ;

นิวตฺถสฺส ปนาปตฺติ, อนาปตฺติ กถํ สิยา?

[769]

อจฺฉินฺนจีวรสฺเสตฺถ, ภิกฺขุสฺส ปน กิญฺจิปิ;

น จสฺสากปฺปิยํ นาม, จีวรํ ปน วิชฺชติฯ

[770]

น กุโตปิ จ คณฺหติ กิญฺจิ หเว;

น ตุ เทติ จ กิญฺจิปิ โภชนโต;

ครุกํ ปน วชฺชมุเปติ กถํ;

วท เม วินเย กุสโลสิ ยทิ?

[771]

อาทาย ยํ กิญฺจิ อวสฺสุตมฺหา;

อุยฺโยชิตา ภุญฺชติ โภชนญฺเจ;

อุยฺโยชิตา ยา ปน ยาย ตสฺสา;

สงฺฆาทิเสสํ กถยนฺติ ธีราฯ

[772]

กสฺสจิ กิญฺจิ น เทติ สหตฺถา;

เนว จ คณฺหติ กิญฺจิ กุโตจิ;

วชฺชมุเปติ ลหุํ, น ครุํ ตุ;

พฺรูหิ กถํ ยทิ พุชฺฌสิ สาธุ?

[773]

ทนฺตโปโนทกานํ ตุ, คหเณ ปน ภิกฺขุนี;

อุยฺโยเชนฺตี ลหุํ วชฺชํ, อาปชฺชติ นิเสวิเตฯ

[774]

อาปชฺชติ ปนาปตฺติํ, ครุกํ สาวเสสกํ;

ฉาเทติ, น ผุเส วชฺชํ, กถํ ชานาสิ เม วท?

[775]

สงฺฆาทิเสสมาปตฺติํ, อาปชฺชิตฺวา อนาทโร;

ฉาเทนฺโตปิ ตมาปตฺติํ, นาญฺญํ อุกฺขิตฺตโก ผุเสฯ

[776]

สปฺปาณปฺปาณชํ เนว, ชงฺคมํ น วิหงฺคมํ;

ทฺวิชํ กนฺตมกนฺตญฺจ, สเจ ชานาสิ เม วท?

[777]

สปฺปาณปฺปาณโช วุตฺโต;

จิตฺตโช อุตุโชปิ จ;

ทฺวีเหว ปน ชาตตฺตา;

มโต สทฺโท ทฺวิโชติ หิฯ

[778]

วินเย อนยูปรเม ปรเม;

สุชนสฺส สุขานยเน นยเน;

ปฏุ โหติ ปธานรโต น รโต;

อิธ โย ปน สารมเต รมเตฯ

เสทโมจนคาถาโย สมตฺตาฯ

สาธารณาสาธารณกถา

[779]

สพฺพสิกฺขาปทานาหํ , นิทานํ คณนมฺปิ จ;

ภิกฺขูหิ ภิกฺขุนีนญฺจ, ภิกฺขูนํ ภิกฺขุนีหิ จฯ

[780]

อสาธารณปญฺญตฺตํ, ตถา สาธารณมฺปิ จ;

ปวกฺขามิ สมาเสน, ตํ สุณาถ สมาหิตาฯ

[781]

นิทานํ นาม เวสาลี, ตถา ราชคหํ ปุรํ;

สาวตฺถาฬวิ โกสมฺพี, สกฺกภคฺคา ปกาสิตาฯ

[782]

กติ เวสาลิยา วุตฺตา, กติ ราชคเห กตา?

กติ สาวตฺถิปญฺญตฺตา, กติ อาฬวิยํ กตา?

[783]

กติ โกสมฺพิปญฺญตฺตา, กติ สกฺเกสุ ภาสิตา?

กติ ภคฺเคสุ ปญฺญตฺตา, ตํ เม อกฺขาหิ ปุจฺฉิโต?

[784]

ทส เวสาลิยา วุตฺตา, เอกวีส คิริพฺพเช;

ฉอูนานิ สตาเนว, ตีณิ สาวตฺถิยํ กตาฯ

[785]

ฉ ปนาฬวิยํ วุตฺตา, อฏฺฐ โกสมฺพิยํ กตา;

อฏฺฐ สกฺเกสุ ปญฺญตฺตา, ตโย ภคฺเคสุ ทีปิตาฯ

[786]

เมถุนํ วิคฺคโห เจว, จตุตฺถนฺติมวตฺถุกํ;

อติเรกจีวรํ สุทฺธ-กาฬเกฬกโลมกํฯ

[787]