ภูตาโรจนกญฺเจว , โจริวุฏฺฐาปนมฺปิ จ;
อนนุญฺญาตมตฺตญฺหิ, อสมฺภินฺนมิทํ ตยํฯ
สมุฏฺฐานสีสกถา นิฏฺฐิตาฯ
เอกุตฺตรนยกถา
[405]
กติ อาปตฺติโย โหนฺติ, สมุฏฺฐาเนน อาทินา?
ปญฺจ อาปตฺติโย โหนฺติ, กุฏิํ สํยาจิกาย ตุฯ
[406]
กโรโต ปน ติสฺโสว, ปโยเค ทุกฺกฏาทโย;
วิกาเล ปน ปาจิตฺติ, ตถา อญฺญาติหตฺถโตฯ
[407]
คเหตฺวา ภุญฺชโต วุตฺตํ, ปาฏิเทสนิยมฺปิ จ;
ปญฺจิมาปตฺติโย โหนฺติ, สมุฏฺฐาเนน อาทินาฯ
[408]
กติ =04 อาปตฺติโย โหนฺติ, ทุติเยน ตุวํ ภณ?
อาปตฺติโย จตสฺโสว, โหนฺตีติ ปริทีปเยฯ
[409]
‘‘กุฏิํ มม กโรถา’’ติ, สมาทิสติ ภิกฺขุ เจ;
กโรนฺติ เจ กุฏิํ ตสฺส, วิปนฺนํ สพฺพถา ปนฯ
[410]
ติสฺโส ปุริมนิทฺทิฏฺฐา, ปโยเค ทุกฺกฏาทโย;
ปทโสธมฺมมูเลน, จตสฺโสว ภวนฺติมาฯ
[411]
ตติเยน กติ ชายนฺติ, สมุฏฺฐาเนน เม ภณ?
ตติเยน ตุวํ พฺรูมิ, ปญฺจธาปตฺติโย สิยุํฯ
[412]
ภิกฺขุ สํวิทหิตฺวาน;
กโรติ จ กุฏิํ สเจ;
ติสฺโส อาปตฺติโย โหนฺติ;
ปโยเค ทุกฺกฏาทโยฯ
[413]
ปณีตโภชนํ วตฺวา, โหติ ปาจิตฺติ ภุญฺชโต;
ภิกฺขุนิํ น นิวาเรตฺวา, ปาฏิเทสนิยํ สิยาฯ
[414]
สิยุํ กติ จตุตฺเถน, สมุฏฺฐาเนน เม ภณ?
ฉเฬวาปตฺติโย โหนฺติ, เมถุนํ ยทิ เสวติฯ
[415]
โหติ ปาราชิกํ ตสฺส, กุฏิํ สํยาจิกาย ตุ;
กโรโต ปน ติสฺโสว, ปโยเค ทุกฺกฏาทโยฯ
[416]
วิกาเล ปน ปาจิตฺติ, ตถา อญฺญาติหตฺถโต;
คเหตฺวา ภุญฺชโต วุตฺตํ, ปาฏิเทสนิยมฺปิ จฯ
[417]
กติ อาปตฺติโย โหนฺติ, ปญฺจเมน? ฉ โหนฺติ หิ;
มนุสฺสุตฺตริธมฺมํ ตุ, วทํ ปาราชิกํ ผุเสฯ
[418]
‘‘กุฏิํ มม กโรถา’’ติ;
สมาทิสติ ภิกฺขุ เจ;
กโรนฺติ เจ กุฏิํ ติสฺโส;
โหนฺติ ตา ทุกฺกฏาทโยฯ
[419]
วาเจติ ปทโส ธมฺมํ, โหติ ปาจิตฺติ ภิกฺขุโน;
ทวกมฺยตา วทนฺตสฺส, ตสฺส ทุพฺภาสิตํ สิยาฯ
[420]
สมุฏฺฐาเนน =05 ฉฏฺเฐน, กติ อาปตฺติโย สิยุํ?
ฉ จ สํวิทหิตฺวาน, ภณฺฑํ หรติ เจ จุโตฯ
[421]
‘‘กุฏิํ มม กโรถา’’ติ;
สมาทิสติ ภิกฺขุ เจ;
กโรนฺติ เจ กุฏิํ ติสฺโส;
โหนฺติ ตา ทุกฺกฏาทโยฯ
[422]
ปณีตโภชนํ วตฺวา, โหติ ปาจิตฺติ ภุญฺชโต;
ภิกฺขุนิํ น นิวาเรตฺวา, ปาฏิเทสนิยํ สิยาฯ
[423]
อิธ โย วิมตูปรมํ ปรมํ;
อิมมุตฺตรมุตฺตรติ;
วินยํ สุนยํ สุนเยน ยุโต;
ส จ ทุตฺตรมุตฺตรมุตฺตรติฯ
อาปตฺติสมุฏฺฐานกถาฯ
[424]
อิโต ปรํ ปวกฺขามิ, ปรเมกุตฺตรํ นยํ;
อวิกฺขิตฺเตน จิตฺเตน, ตํ สุณาถ สมาหิตาฯ
[425]
เก อาปตฺติกรา ธมฺมา, อนาปตฺติกราปิ เก?
กา ปนาปตฺติโย นาม, ลหุกา ครุกาปิ กา?
[426]
สาวเสสา จ กาปตฺติ, กา นามานวเสสกา?
ทุฏฺฐุลฺลา นาม กาปตฺติ, อทุฏฺฐุลฺลาปิ นาม กา?
[427]
นิยตา นาม กาปตฺติ, กา ปนานิยตาปิ จ?
เทสนาคามินี กา จ, กา จาเทสนคามินี?
[428]
สมุฏฺฐานานิ อาปตฺติ-กรา ธมฺมาติ ทีปิตา;
อนาปตฺติกรา ธมฺมา, สมถา สตฺต ทสฺสิตาฯ
[429]
ปาราชิกาทโย สตฺต-วิธา อาปตฺติโย สิยุํ;
ลหุกา ตตฺถ ปญฺเจว, โหนฺติ ถุลฺลจฺจยาทโยฯ
[430]
ปาราชิกํ ฐเปตฺวาน, สาวเสสาวเสสกา;
เอกา ปาราชิกาปตฺติ, มตา อนวเสสกาฯ
[431]
‘‘ทุฏฺฐุลฺลา’’ติ =06 จ นิทฺทิฏฺฐา, ทุวิธาปตฺติอาทิโต;
เสสา ปญฺจวิธาปตฺติ, ‘‘อทุฏฺฐุลฺลา’’ติ ทีปิตาฯ
[432]
ปญฺจานนฺตริยสํยุตฺตา, นิยตานิยเตตรา;
เทสนาคามินี ปญฺจ, ทฺเว ปนาเทสคามิกาฯ
เอกกกถาฯ
[433]
อภพฺพาปตฺติโก โก จ, ภพฺพาปตฺติกปุคฺคโล?
อุปสมฺปทกมฺมํ ตุ, สตฺถุนา กสฺส วาริตํ?
[434]
อาปตฺติมาปชฺชิตุํ ทฺเวว โลเก;
พุทฺธา จ ปจฺเจกพุทฺธา อภพฺพา;
อาปตฺติมาปชฺชิตุํ ทฺเวว โลเก;
ภิกฺขู จ ภพฺพา อถ ภิกฺขุนี จฯ
[435]
อทฺธวิหีโน องฺควิหีโน;
วตฺถุวิปนฺโน ทุกฺกฏการี;
โน ปริปุณฺโณ ยาจติ โย โน;
ตสฺสุปสมฺปทา ปฏิสิทฺธาฯ
[436]
อตฺถาปตฺติ หเว ลทฺธ-สมาปตฺติสฺส ภิกฺขุโน;
อตฺถาปตฺติ หิ โน ลทฺธ-สมาปตฺติสฺส ทีปิตาฯ
[437]
ภูตสฺสาโรจนํ ลทฺธ-สมาปตฺติสฺส นิทฺทิเส;
อภูตาโรจนาปตฺติ, อสมาปตฺติลาภิโนฯ
[438]
อตฺถิ สทฺธมฺมสํยุตฺตา, อสทฺธมฺมยุตาปิ จ;
สปริกฺขารสํยุตฺตา, ปรสนฺตกสํยุตาฯ
[439]
ปทโสธมฺมมูลาที, สทฺธมฺมปฏิสํยุตา;
ทุฏฺฐุลฺลวาจสํยุตฺตา, อสทฺธมฺมยุตา สิยาฯ
[440]
อติเรกทสาหํ ตุ, ฐปเน จีวราทิโน;
อนิสฺสชฺชิตฺวา โภเค จ, สปริกฺขารสํยุตาฯ
[441]
สงฺฆสฺส มญฺจปีฐาทิํ, อชฺโฌกาสตฺถเรปิ จ;
อนาปุจฺฉาว คมเน, ปรสนฺตกสํยุตาฯ
[442]
กถญฺหิ =07 ภณโต สจฺจํ, ครุกํ โหติ ภิกฺขุโน?
กถํ มุสา ภณนฺตสฺส, ลหุกาปตฺติ ชายเต?
[443]
‘‘สิขรณี’’ติ สจฺจํ ตุ, ภณโต ครุกํ สิยา;
สมฺปชานมุสาวาเท, ปาจิตฺติ ลหุกา ภเวฯ
[444]
กถํ มุสา ภณนฺตสฺส, ครุกํ โหติ ภิกฺขุโน?
กถญฺจ ภณโต สจฺจํ, อาปตฺติ ลหุกา สิยา?
[445]
อภูตาโรจเน ตสฺส, ครุกาปตฺติ ทีปิตา;
ภูตสฺสาโรจเน สจฺจํ, วทโต ลหุกา สิยาฯ
[446]
กถํ ภูมิคโต โทสํ, น เวหาสคโต ผุเส?
กถํ เวหาสโค โทสํ, น จ ภูมิคโต ผุเส?
[447]
สงฺฆกมฺมํ วิโกเปตุํ, หตฺถปาสํ ชหํ ผุเส;
เกสมตฺตมฺปิ อากาเส, ติฏฺฐโต นตฺถิ วชฺชตาฯ
[448]
อาหจฺจปาทกํ มญฺจํ, เวหาสกุฏิยูปริ;
ปีฐํ วาภินิสีทนฺโต, อาปชฺชติ น ภูมิโตฯ
[449]
ปวิสนฺโต กถํ ภิกฺขุ, อาปชฺชติ, น นิกฺขมํ?
ปวิสนฺโต กถํ ภิกฺขุ, ปวิสนฺโต น เจว ตํ?
[450]
สฉตฺตุปาหโน วตฺต-มปูเรตฺวาน เกวลํ;
ปวิสนฺโต ปนาปตฺติํ, อาปชฺชติ, น นิกฺขมํฯ
[451]
คมิโก คมิกวตฺตานิ, อปูเรตฺวาน นิกฺขมํ;
นิกฺขมนฺโตว อาปตฺติํ, ผุเสยฺย, ปวิสํ น จฯ
[452]
อาทิยนฺโต ปนาปตฺติํ, อาปชฺชติ กถํ วท?
ตเถวานาทิยนฺโตปิ, อาปชฺชติ กถํ วท?
[453]
ภิกฺขุนี อติคมฺภีรํ, ยา กาจุทกสุทฺธิกํ;
อาทิยนฺตี ปนาปตฺติํ, อาปชฺชติ, น สํสโยฯ
[454]
อนาทิยิตฺวา ทุพฺพณฺณ-กรณํ ปน จีวรํ;
เยวํ อนาทิยนฺโตว, อาปชฺชติ หิ นาม โสฯ
[455]
สมาทิยนฺโต อาปตฺติํ, อาปชฺชติ กถํ ปน?
ตถาสมาทิยนฺโตปิ, อาปชฺชติ กถํ ปน?
[456]
โย =08 หิ มูคพฺพตาทีนิ, วตานิธ สมาทิยํ;
สมาทิยนฺโต อาปตฺติํ, อาปชฺชติ หิ นาม โสฯ
[457]
โย หิ กมฺมกโต ภิกฺขุ, วุตฺตํ วตฺตํ ปนตฺตโน;
ตญฺจาสมาทิยนฺโตว, อาปชฺชติ หิ นาม โสฯ
[458]
กโรนฺโตว ปนาปตฺติํ, กถมาปชฺชเต นโร?
น กโรนฺโต กถํ นาม, สมโณ โทสวา สิยา?
[459]
ภณฺฑาคาริกกมฺมญฺจ, เวชฺชกมฺมญฺจ จีวรํ;
อญฺญาติกาย สิพฺพนฺโต, กรํ อาปชฺชเต นโรฯ
[460]
อุปชฺฌายสฺส วตฺตานิ, วตฺตานิ อิตรสฺส วา;
อกโรนฺโต ปนาปตฺติํ, อาปชฺชติ หิ นาม โสฯ
[461]
เทนฺโต อาปชฺชตาปตฺติํ, น เทนฺโตปิ กถํ ภณ?
อญฺญาติกาย ยํ กิญฺจิ, ภิกฺขุ ภิกฺขุนิยา ปนฯ
[462]
จีวรํ ททมาโน หิ, เทนฺโต อาปชฺชเต ปน;
ตถนฺเตวาสิกาทีนํ, อเทนฺโต จีวราทิกํฯ
[463]
อตฺตสนฺนิสฺสิตา อตฺถิ, ตเถว ปรนิสฺสิตา;
มุทุลมฺพาทิโน อตฺตา, เสสา หิ ปรนิสฺสิตาฯ
[464]
กถญฺจ ปฏิคณฺหนฺโต, อาปชฺชติ หิ วชฺชตํ?
กถมปฺปฏิคณฺหนฺโต, อาปชฺชติ หิ วชฺชตํ?
[465]
จีวรํ ปฏิคณฺหนฺโต, ภิกฺขุ อญฺญาติหตฺถโต;
โอวาทญฺจ น คณฺหนฺโต, อาปชฺชติ หิ วชฺชตํฯ
[466]
กถญฺจ ปริโภเคน, อาปชฺชติ ตโปธโน?
กถํ น ปริโภเคน, อาปชฺชติ ตโปธโน?
[467]
โย หิ นิสฺสคฺคิยํ วตฺถุํ, อจฺจชิตฺวา นิเสวติ;
อยํ ตุ ปริโภเคน, อาปชฺชติ, น สํสโยฯ
[468]
อติกฺกเมนฺตี สงฺฆาฏิ-จารํ ปญฺจาหิกํ ปน;
อยํ ตุ ปริโภเคน, อาปชฺชติ หิ ภิกฺขุนีฯ
[469]
ทิวาปชฺชติ โน รตฺติํ, รตฺติเมว จ โน ทิวา;
ทฺวารํ อสํวริตฺวาน, เสนฺโต อาปชฺชเต ทิวาฯ
[470]
สคารเสยฺยกํ =09 รตฺติํ, อาปชฺชติ หิ โน ทิวา;
อรุณุคฺเค ปนาปตฺติ, กถํ น อรุณุคฺคเม?
[471]
เอกฉารตฺตสตฺตาห-ทสาหาทิอติกฺกเม;
ผุสนฺโต วุตฺตมาปตฺติํ, อาปชฺชตฺยรุณุคฺคเมฯ
[472]
ปวาเรตฺวาน ภุญฺชนฺโต, ผุเส น อรุณุคฺคเม;
ฉินฺทนฺตสฺส สิยาปตฺติ, กถมจฺฉินฺทโต สิยา?
[473]
ฉินฺทนฺโต ภูตคามญฺจ, องฺคชาตญฺจ อตฺตโน;
ปาราชิกญฺจ ปาจิตฺติํ, ผุเส ถุลฺลจฺจยมฺปิ จฯ
[474]
น ฉินฺทนฺโต นเข เกเส, อาปชฺชติ หิ นาม โส;
ฉาเทนฺโตปชฺชตาปตฺติํ, นจฺฉาเทนฺโต กถํ ปน?
[475]
ฉาเทนฺโต ปน อาปตฺติํ, ฉาเทนฺโตปชฺชเต นโร;
อาปชฺชติ ปนจฺฉินฺโน, นจฺฉาเทนฺโต ติณาทินาฯ
[476]
อาปชฺชติ หิ ธาเรนฺโต, น ธาเรนฺโต กถํ ปน?
ธาเรนฺโต กุสจีราทิํ, ธาเรนฺโตปชฺชเต ปนฯ
[477]
ทินฺนํ นิสฺสฏฺฐปตฺตํ ตํ, อธาเรนฺโตว โทสวา;
สจิตฺตกทุกํ สญฺญา-วิโมกฺขกทุกํ ภเวฯ
ทุกกถาฯ
[478]
อตฺถาปตฺติ หิ ติฏฺฐนฺเต, นาเถ, โน ปรินิพฺพุเต;
นิพฺพุเต น ตุ ติฏฺฐนฺเต, อตฺถาปตฺตุภยตฺถปิฯ
[479]
รุหิรุปฺปาทนาปตฺติ, ฐิเต, โน ปรินิพฺพุเต;
เถรมาวุสวาเทน, วทโต ปรินิพฺพุเตฯ
[480]
อาปตฺติโย อิมา ทฺเวปิ, ฐเปตฺวา สุคเต ปน;
อวเสสา ธรนฺเตปิ, ภวนฺติ ปรินิพฺพุเตฯ
[481]
กาเลเยว สิยาปตฺติ, วิกาเล น สิยา กถํ?
วิกาเล ตุ สิยาปตฺติ, น กาเล, อุภยตฺถปิ?
[482]
ภุญฺชโตนติริตฺตํ ตุ, กาลสฺมิํ, โน วิกาลเก;
วิกาลโภชนาปตฺติ, วิกาเล, ตุ น กาลเกฯ
[483]
อวเสสํ =10 ปนาปตฺติํ, อาปชฺชติ หิ สพฺพทา;
สพฺพํ กาเล วิกาเล จ, นตฺถิ ตตฺถ จ สํสโยฯ
[484]
รตฺติเมว ปนาปตฺติํ, อาปชฺชติ จ โน ทิวา;
ทิวาปชฺชติ โน รตฺติํ, อาปชฺชตุภยตฺถปิฯ
[485]
สหเสยฺยา สิยา รตฺติํ, ทฺวาราสํวรมูลกา;
ทิวา, เสสา ปนาปตฺติ, สิยา รตฺติํ ทิวาปิ จฯ
[486]
ทสวสฺโส ตุ โน อูน-ทสวสฺโส สิยา กถํ?
โหตูนทสวสฺโส, โน, ทสวสฺสูภยตฺถปิ?
[487]
อุปฏฺฐาเปติ เจ พาโล, ปริสํ ทสวสฺสิโก;
อาปตฺติํ ปน อพฺยตฺโต, อาปชฺชติ, น สํสโยฯ
[488]
ตถูนทสวสฺโส จ, ‘‘ปณฺฑิโตห’’นฺติ คณฺหติ;
ปริสํ, ทสวสฺโส โน, เสสมาปชฺชเต อุโภฯ
[489]
กาเฬ อาปชฺชตาปตฺติํ, น ชุณฺเห ชุณฺหเก กถํ;
อาปชฺชติ, น กาฬสฺมิํ, อาปชฺชตูภยตฺถปิ?
[490]
วสฺสํ อนุปคจฺฉนฺโต, กาเฬ, โน ชุณฺหเก ปน;
อาปชฺชตาปวาเรนฺโต, ชุณฺเห, น ปน กาฬเกฯ
[491]
อวเสสํ ตุ ปญฺญตฺต-มาปตฺติมวิปตฺตินา;
กาเฬ เจว จ ชุณฺเห จ, อาปชฺชติ, น สํสโยฯ
[492]
วสฺสูปคมนํ กาเฬ, โน ชุณฺเห, ตุ ปวารณา;
ชุณฺเห กปฺปติ, โน กาเฬ, เสสํ ปนุภยตฺถปิฯ
[493]
อตฺถาปตฺติ ตุ เหมนฺเต, น โหตีตรุตุทฺวเย;
คิมฺเหเยว น เสเสสุ, วสฺเส โน อิตรทฺวเยฯ
[494]
ทิเน ปาฬิปทกฺขาเต, กตฺติเก ปุณฺณมาสิยา;
ฐปิตํ ตุ วิกปฺเปตฺวา, วสฺสสาฏิกจีวรํฯ
[495]
อาปชฺชติ จ เหมนฺเต, นิวาเสติ จ ตํ สเจ;
ปุณฺณมาทิวสสฺมิญฺหิ, กตฺติกสฺส ตุ ปจฺฉิเมฯ
[496]
ตํ อปจฺจุทฺธริตฺวาว, เหมนฺเตเยว, เนตเร;
อาปชฺชตีติ นิทฺทิฏฺฐํ, กุรุนฺทฏฺฐกถาย ตุฯ
[497]
‘‘อติเรกมาโส =11 เสโส’’ติ;
ปริเยสนฺโต จ คิมฺหิเก;
คิมฺเห อาปชฺชตาปตฺติํ;
น ตฺเววิตรุตุทฺวเยฯ
[498]
วิชฺชมาเน สเจ นคฺโค, วสฺสสาฏิกจีวเร;
โอวสฺสาเปติ โย กายํ, วสฺเส อาปชฺชตีธ โสฯ
[499]
อาปชฺชติ หิ สงฺโฆว, น คโณ น จ ปุคฺคโล;
คโณว น จ เสสา หิ, ปุคฺคโลว น จาปเรฯ
[500]
อธิฏฺฐานํ กโรนฺโต วา, ปาริสุทฺธิอุโปสถํ;
สงฺโฆ วาปชฺชตาปตฺติํ, น คโณ น จ ปุคฺคโลฯ
[501]
สุตฺตุทฺเทสมธิฏฺฐานํ, กโรนฺโต วา อุโปสถํ;
คโณ วาปชฺชตาปตฺติํ, น สงฺโฆ น จ ปุคฺคโลฯ
[502]
สุตฺตุทฺเทสํ กโรนฺโต วา, เอโก ปน อุโปสถํ;
ปุคฺคโลปชฺชตาปตฺติํ, น จ สงฺโฆ คโณ น จฯ
[503]
อาปชฺชติ คิลาโนว, นาคิลาโน กถํ ปน;
อาปชฺชตาคิลาโนว, โน คิลาโน อุโภปิ จ?
[504]
เภสชฺเชน ปนญฺเญน, อตฺเถ สติ จ โย ปน;
วิญฺญาเปติ ตทญฺญํ โส, อาปชฺชติ อกลฺลโกฯ
[505]
น เภสชฺเชน อตฺเถปิ, เภสชฺชํ วิญฺญาเปติ เจ;
อาปชฺชตาคิลาโนว, เสสํ ปน อุโภปิ จฯ
[506]
อตฺถาปตฺติ หิ อนฺโตว, น พหิทฺธา, ตถา พหิ;
อาปชฺชติ, น เจวนฺโต, อตฺถาปตฺตุภยตฺถปิฯ
[507]
อนุปขชฺช เสยฺยํ ตุ, กปฺเปนฺโต ปน เกวลํ;
อาปชฺชติ ปนาปตฺติํ, อนฺโตเยว จ, โน พหิฯ
[508]
อชฺโฌกาเส ตุ มญฺจาทิํ, สนฺถริตฺวาน ปกฺกมํ;
พหิเยว จ, โน อนฺโต, เสสํ ปนุภยตฺถปิฯ
[509]
อนฺโตสีมาเยวาปตฺติํ, พหิสีมาย เนว จ;
พหิสีมาย, โน อนฺโต-สีมาย, อุภยตฺถปิฯ
[510]
สฉตฺตุปาหโน =12 ภิกฺขุ, ปวิสนฺโต ตโปธโน;
อุปจารสีโมกฺกนฺเต, อนฺโต อาปชฺชเต ปนฯ
[511]
คมิโก ทารุภณฺฑาทิํ, ปฏิสามนวตฺตกํ;
อปูเรตฺวาน คจฺฉนฺโต, อุปจารสฺสติกฺกเมฯ
[512]
อาปชฺชติ ปนาปตฺติํ, พหิสีมายเยว โส;
เสสมาปชฺชเต อนฺโต-พหิสีมาย สพฺพโสฯ
ติกกถาฯ
[513]
สกวาจาย อาปนฺโน, ปรวาจาย สุชฺฌติ;
ปรวาจาย อาปนฺโน, สกวาจาย สุชฺฌติฯ
[514]
สกวาจาย อาปนฺโน, สกวาจาย สุชฺฌติ;
ปรวาจาย อาปนฺโน, ปรวาจาย สุชฺฌติฯ
[515]
วจีทฺวาริกมาปตฺติํ , อาปนฺโน สกวาจโต;
ติณวตฺถารกํ คนฺตฺวา, ปรวาจาย สุชฺฌติฯ
[516]
ตถา อปฺปฏินิสฺสคฺเค, ปาปิกาย หิ ทิฏฺฐิยา;
ปรสฺส กมฺมวาจาย, อาปชฺชิตฺวาน วชฺชตํฯ
[517]
เทเสนฺโต ภิกฺขุโน มูเล, สกวาจาย สุชฺฌติ;
วจีทฺวาริกมาปตฺติํ, อาปนฺโน ภิกฺขุสนฺติเกฯ
[518]
เทเสตฺวา ตํ วิสุชฺฌนฺโต, สกวาจาย สุชฺฌติ;
สงฺฆาทิเสสมาปตฺติํ, ยาวตติยกํ ปนฯ
[519]
ปรสฺส กมฺมวาจาย, อาปชฺชิตฺวา ตถา ปุน;
ปรสฺส ปริวาสาทิ-กมฺมวาจาย สุชฺฌติฯ
[520]
กาเยนาปชฺชตาปตฺติํ, วาจาย จ วิสุชฺฌติ;
วาจายาปชฺชตาปตฺติํ, กาเยน จ วิสุชฺฌติฯ
[521]
กาเยนาปชฺชตาปตฺติํ, กาเยเนว วิสุชฺฌติ;
วาจายาปชฺชตาปตฺติํ, วาจาเยว วิสุชฺฌติฯ
[522]
กายทฺวาริกมาปตฺติํ, กาเยนาปชฺชเต, ปุน;
เทเสนฺโต ตํ ปนาปตฺติํ, วาจาเยว วิสุชฺฌติฯ
[523]
วจีทฺวาริกมาปตฺติํ =13, อาปชฺชิตฺวาน วาจโต;
ติณวตฺถารกํ คนฺตฺวา, กาเยเนว วิสุชฺฌติฯ
[524]
กายทฺวาริกมาปตฺติํ, อาปชฺชิตฺวาน กายโต;
ติณวตฺถารกํ คนฺตฺวา, กาเยเนว วิสุชฺฌติฯ
[525]
วจีทฺวาริกมาปตฺติํ, อาปชฺชิตฺวา ตโปธโน;
ตเมว ปน เทเสนฺโต, วาจาเยว วิสุชฺฌติฯ
[526]
สุตฺโต อาปชฺชตาปตฺติํ, ปฏิพุทฺโธ วิสุชฺฌติ;
อาปนฺโน ปฏิพุทฺโธว, สุตฺโต สุชฺฌติ โส กถํ?
[527]
สุตฺโต อาปชฺชตาปตฺติํ, สุตฺโตเยว วิสุชฺฌติ;
ปฏิพุทฺโธว อาปนฺโน, ปฏิพุทฺโธ วิสุชฺฌติ?
[528]
สคารเสยฺยกาทิํ ตุ, สุตฺโต อาปชฺชเต นโร;
เทเสนฺโต ปน ตํ ญตฺวา, ปฏิพุทฺโธ วิสุชฺฌติฯ
[529]
อาปชฺชิตฺวาน ชคฺคนฺโต, ติณวตฺถารเก ปน;
สมเถ ตุ สยนฺโตว, สุตฺโต วุฏฺฐาติ นาม โสฯ
[530]
สคารเสยฺยกาทิํ ตุ, สุตฺโต อาปชฺชเต นโร;
สยนฺโต ติณวตฺถาเร, สุตฺโตเยว วิสุชฺฌติฯ
[531]
อาปชฺชิตฺวา ปนาปตฺติํ, ชคฺคนฺโต ปน เกวลํ;
เทเสนฺโต ปน ตํ ปจฺฉา, ปฏิพุทฺโธ วิสุชฺฌติฯ
[532]
อาปชฺชิตฺวา อจิตฺโตว, สจิตฺโตว วิสุชฺฌติ;
อาปชฺชิตฺวา สจิตฺโตว, อจิตฺโตว วิสุชฺฌติฯ
[533]
อาปชฺชิตฺวา อจิตฺโตว, อจิตฺโตว วิสุชฺฌติ;
อาปชฺชิตฺวา สจิตฺโตว, สจิตฺโตว วิสุชฺฌติฯ
[534]
อจิตฺโต, จิตฺตกาปตฺติํ, อาปชฺชิตฺวา ตโปธโน;
ปจฺฉา ตํ ปน เทเสนฺโต, สจิตฺโตว วิสุชฺฌติฯ
[535]
ตถา สจิตฺตกาปตฺติํ, อาปชฺชิตฺวา สจิตฺตโก;
สยนฺโต ติณวตฺถาเร, อจิตฺโตว วิสุชฺฌติฯ
[536]
เอวเมวํ อมิสฺเสตฺวา, ปจฺฉิมํ ตุ ปททฺวยํ;
เอตฺถ วุตฺตานุสาเรน, เวทิตพฺพํ วิภาวินาฯ
[537]
อาปชฺชติ =14 จ กมฺเมน, อกมฺเมน วิสุชฺฌติ;
อาปชฺชติ อกมฺเมน, กมฺเมเนว วิสุชฺฌติฯ
[538]
กมฺเมนาปชฺชตาปตฺติํ, กมฺเมเนว วิสุชฺฌติ;
อาปชฺชติ อกมฺเมน, อกมฺเมน วิสุชฺฌติฯ
[539]
อจฺจชํ ปาปิกํ ทิฏฺฐิํ, อาปชฺชิตฺวาน กมฺมโต;
เทเสนฺโต ปน ตํ ปจฺฉา, อกมฺเมน วิสุชฺฌติฯ
[540]
วิสฏฺฐิอาทิกาปตฺติํ , อาปชฺชิตฺวา อกมฺมโต;
ปริสุชฺฌติ กมฺเมน, ปริวาสาทินา ปนฯ
[541]
สมนุภาสนํ ภิกฺขุ, อาปชฺชติ จ กมฺมโต;
ปริวาสาทินา ปจฺฉา, กมฺเมเนว วิสุชฺฌติฯ
[542]
อวเสสํ ปนาปตฺติํ, อาปชฺชติ อกมฺมโต;
เทเสนฺโต ปน ตํ ปจฺฉา, อกมฺเมเนว สุชฺฌติฯ
[543]
สมฺมุขาปตฺติมาปนฺโน, วิสุชฺฌติ อสมฺมุขา;
อสมฺมุขาปิ อาปนฺโน, สมฺมุขาว วิสุชฺฌติฯ
[544]
สมฺมุขาปตฺติมาปนฺโน, สมฺมุขาว วิสุชฺฌติ;
อสมฺมุขาว อาปนฺโน, วิสุชฺฌติ อสมฺมุขาฯ
[545]
อจฺจชํ ปาปกํ ทิฏฺฐิํ, อาปนฺโน สงฺฆสมฺมุเข;
วุฏฺฐานกาเล สงฺเฆน, กิญฺจิ กมฺมํ น วิชฺชติฯ
[546]
วิสฏฺฐิอาทิกาปตฺติํ, อาปชฺชิตฺวา อสมฺมุขา;
สงฺฆสมฺมุขโตเยว, วิสุชฺฌติ น จญฺญถาฯ
[547]
สมนุภาสนํ สงฺฆ-สมฺมุขาปชฺชเต, ปุน;
สงฺฆสฺส สมฺมุขาเยว, วิสุชฺฌติ, น จญฺญถาฯ
[548]
มุสาวาทาทิกํ เสสํ, อาปชฺชติ อสมฺมุขา;
ตํ ปจฺฉา ปน เทเสนฺโต, วิสุชฺฌติ อสมฺมุขาฯ
[549]
อชานนฺโตว อาปนฺโน, ชานนฺโตว วิสุชฺฌติ;
ชานนฺโต ปน อาปนฺโน, อชานนฺโต วิสุชฺฌติฯ
[550]
อชานนฺโตว อาปนฺโน, อชานนฺโต วิสุชฺฌติ;
ชานนฺโต ปน อาปนฺโน, ชานนฺโตว วิสุชฺฌติฯ
[551]
อจิตฺตกจตุกฺเกน =15, สทิสํ สพฺพถา อิทํ;
อชานนฺตจตุกฺกนฺติ, เวทิตพฺพํ วิภาวินาฯ
[552]
อาคนฺตุโกว อาปตฺติํ, อาปชฺชติ, น เจตโร;
อาวาสิโกว อาปตฺติํ, อาปชฺชติ, น เจตโรฯ
[553]
อาคนฺตุโก ตถาวาสิ-โกปิ อาปชฺชเร อุโภ;
อตฺถาปตฺติ จ เสสํ ตุ, อุโภ นาปชฺชเร ปนฯ
[554]
สฉตฺตุปาหโน เจว, สสีสํ ปารุโตปิ จ;
วิหารํ ปวิสนฺโต จ, วิจรนฺโตปิ ตตฺถ จฯ
[555]
อาคนฺตุโกว อาปตฺติํ, อาปชฺชติ, น เจตโร;
อาวาสวตฺตมาวาสี, อกโรนฺโตว โทสวาฯ
[556]
น เจวาคนฺตุโก, เสส-มาปชฺชนฺติ อุโภปิ จ;
อสาธารณมาปตฺติํ, นาปชฺชนฺติ อุโภปิ จฯ
[557]
วตฺถุนานตฺตตา อตฺถิ, นตฺถิ อาปตฺตินานตา;
อตฺถิ อาปตฺตินานตฺตํ, นตฺถิ วตฺถุสฺส นานตาฯ
[558]
วตฺถุนานตฺตตา เจว, อตฺถิ อาปตฺตินานตา;
เนวตฺถิ วตฺถุนานตฺตํ, โน จ อาปตฺตินานตาฯ
[559]
ปาราชิกจตุกฺกสฺส, วตฺถุนานตฺตตา มตา;
อาปตฺตินานตา นตฺถิ, เสสาปตฺตีสฺวยํ นโยฯ
[560]
สมโณ สมณี กาย-สํสคฺคํ ตุ กโรนฺติ เจ;
สงฺฆาทิเสโส ภิกฺขุสฺส, ภิกฺขุนิยา ปราชโยฯ
[561]
เอวํ อาปตฺตินานตฺตํ, นตฺถิ วตฺถุสฺส นานตา;
กายสฺส ปน สํสคฺโค, อุภินฺนํ วตฺถุ โหติ หิฯ
[562]
ตเถว ลสุณสฺสาปิ, ขาทเน ภิกฺขุนี ปน;
อาปชฺชติ หิ ปาจิตฺติํ, ภิกฺขุโน โหติ ทุกฺกฏํฯ
[563]
ปาราชิกานํ ปน เจ จตุนฺนํ;
สงฺฆาทิเสเสหิ จ เตรเสหิ;
โหเตว วตฺถุสฺส จ นานภาโว;
อาปตฺติยา เจว หิ นานภาโวฯ
[564]
ปาราชิกานิ =16 จตฺตาริ, อาปชฺชนฺตานเมกโต;
ภิกฺขุนีสมณานํ ตุ, อุภินฺนํ ปน สพฺพโสฯ
[565]
วตฺถุสฺส นตฺถิ นานตฺตํ, นตฺถิ อาปตฺตินานตา;
วิสุํ ปนาปชฺชนฺเตสุ, อยเมว วินิจฺฉโยฯ
[566]
อตฺถิ วตฺถุสภาคตฺตํ, นตฺถาปตฺติสภาคตา;
อตฺถาปตฺติสภาคตา, นตฺถิ วตฺถุสภาคตาฯ
[567]
อตฺถิ วตฺถุสภาคตฺตํ, อตฺถาปตฺติสภาคตา;
นตฺถิ วตฺถุสภาคตฺตํ, นตฺถาปตฺติสภาคตาฯ
[568]
ภิกฺขูนํ ภิกฺขุนีนญฺจ, กายสํสคฺคเก สติ;
อตฺถิ วตฺถุสภาคตฺตํ, นตฺถาปตฺติสภาคตาฯ
[569]
อาทิโต ปน ภิกฺขุสฺส, จตูสฺวนฺติมวตฺถุสุ;
สิยาปตฺติสภาคตฺตํ, น จ วตฺถุสภาคตาฯ
[570]
ภิกฺขูนํ ภิกฺขุนีนญฺจ, จตูสฺวนฺติ มวตฺถุสุ;
อตฺถิ วตฺถุสภาคตฺตํ, อตฺถาปตฺติสภาคตาฯ
[571]
สาธารณาสุ สพฺพาสุ, อาปตฺตีสฺวปฺยยํ นโย;
อสาธารณาสุ เนวตฺถิ, วตฺถาปตฺติสภาคตาฯ
[572]
อตฺถาปตฺติ อุปชฺฌาเย, เนว สทฺธิวิหาริเก;
อตฺถิ สทฺธิวิหารสฺมิํ, อุปชฺฌาเย น วิชฺชติฯ
[573]
อตฺถาปตฺติ อุปชฺฌาเย, ตถา สทฺธิวิหาริเก;
เนวาปตฺติ อุปชฺฌาเย, เนว สทฺธิวิหาริเกฯ
[574]
อุปชฺฌาเยน กตฺตพฺพ-วตฺตสฺสากรเณ ปน;
อุปชฺฌาโย ผุเส วชฺชํ, น จ สทฺธิวิหาริโกฯ
[575]
อุปชฺฌายสฺส กตฺตพฺพ-วตฺตสฺสากรเณ ปน;
นตฺถาปตฺติ อุปชฺฌาเย, อตฺถิ สทฺธิวิหาริเกฯ
[576]
เสสํ ปนิธ อาปตฺติํ, อาปชฺชนฺติ อุโภปิ จ;
อสาธารณมาปตฺติํ, นาปชฺชนฺติ อุโภปิ จฯ
[577]
อาทิยนฺโต ครุํ โทสํ, ปโยเชนฺโต ลหุํ ผุเส;
อาทิยนฺโต ลหุํ โทสํ, ปโยเชนฺโต ครุํ ผุเสฯ
[578]
อาทิยนฺโต =17 ปโยเชนฺโต, ครุเกเยว ติฏฺฐติ;
อาทิยนฺโต ปโยเชนฺโต, ลหุเกเยว ติฏฺฐติฯ
[579]
ปาทํ วาปิ ตโต อุทฺธํ, อาทิยนฺโต ครุํ ผุเส;
‘‘คณฺหา’’ติ อูนกํ ปาทํ, อาณาเปนฺโต ลหุํ ผุเสฯ
[580]
เอเตเนว อุปาเยน, เสสกมฺปิ ปทตฺตยํ;
อตฺถสมฺภวโตเยว, เวทิตพฺพํ วิภาวินาฯ
[581]
กาเลเยว ปนาปตฺติ, โน วิกาเล กถํ สิยา?
วิกาเลเยว อาปตฺติ, น จ กาเล กถํ สิยา?
[582]
อตฺถาปตฺติ หิ กาเล จ, วิกาเล จ ปกาสิตา?
เนว กาเล วิกาเล จ, อตฺถาปตฺติ ปกาสิตา?
[583]
ปวาเรตฺวาน ภุญฺชนฺโต, กาเล อนติริตฺตกํ;
กาเล อาปชฺชตาปตฺติํ, น วิกาเลติ ทีปเยฯ
[584]
วิกาลโภชนาปตฺติํ, วิกาเล น จ กาลเก;
เสสํ กาเล วิกาเล จ, อาปชฺชติ, น สํสโยฯ
[585]
อสาธารณมาปตฺติํ, ภิกฺขุนีนํ วสา ปน;
เนวาปชฺชติ กาเลปิ, โน วิกาเลปิ สพฺพทาฯ
[586]
กิํ ปฏิคฺคหิตํ กาเล, โน วิกาเล ตุ กปฺปติ?
วิกาเล กิญฺจ โน กาเล, คหิตํ ปน กปฺปติ?
[587]
กาเล เจว วิกาเล จ, กิํ นาม วท กปฺปติ?
เนว กาเล จ กิํ นาม, โน วิกาเล จ กปฺปติ?
[588]
อามิสํ ตุ ปุเรภตฺตํ, ปฏิคฺคหิตกํ ปน;
กาเลเยว ตุ ภิกฺขูนํ, โน วิกาเล ตุ กปฺปติฯ
[589]
ปานกํ ตุ วิกาลสฺมิํ, ปฏิคฺคหิตกํ ปน;
วิกาเลเยว กาเล จ, อปรชฺชุ น กปฺปติฯ
[590]
สตฺตาหกาลิกญฺเจว , จตุตฺถํ ยาวชีวิกํ;
กาเล เจว วิกาเล จ, กปฺปตีติ วินิทฺทิเสฯ
[591]
อตฺตโน อตฺตโน กาล-มตีตํ กาลิกตฺตยํ;
มํสํ อกปฺปิยญฺเจว, ตถา อุคฺคหิตมฺปิ จฯ
[592]
กุลทูสนกมฺมาทิํ =18, กตฺวา อุปฺปนฺนโภชนํ;
กาเล เจว วิกาเล จ, น จ กปฺปติ ภิกฺขุโนฯ
[593]
ปจฺจนฺติเมสุ เทเสสุ, อาปชฺชติ น มชฺฌิเม;
มชฺฌิเม ปน เทสสฺมิํ, น จ ปจฺจนฺติเมสุ หิฯ
[594]
ปจฺจนฺติเมสุ เทเสสุ, อาปชฺชติ จ มชฺฌิเม;
ปจฺจนฺติเมสุ เทเสสุ, นาปชฺชติ น มชฺฌิเมฯ
[595]
สีมํ สมุทฺเท พนฺธนฺโต, ภิกฺขุ ปจฺจนฺติเมสุ หิ;
อาปชฺชติ ปนาปตฺติํ, น จาปชฺชติ มชฺฌิเมฯ
[596]
คเณน ปญฺจวคฺเคน, กโรนฺโต อุปสมฺปทํ;
จมฺมตฺถรณํ ธุวนฺหานํ, สคุณงฺคุณุปาหนํฯ
[597]
ธาเรนฺโต มชฺฌิเม วชฺชํ, ผุเส ปจฺจนฺติเมสุ โน;
อวเสสํ ปนาปตฺติํ, อาปชฺชตูภยตฺถปิฯ
[598]
อสาธารณอาปตฺติํ, ภิกฺขุนีนํ วสา ปน;
ปจฺจนฺติเมสุ วา ภิกฺขุ, นาปชฺชติ น มชฺฌิเมฯ
[599]
ปจฺจนฺติเมสุ เทเสสุ, กปฺปเต น จ มชฺฌิเม;
กปฺปเต, มชฺฌิเม เทเส, โน จ ปจฺจนฺติเมสุ หิฯ
[600]
ปจฺจนฺติเมสุ เทเสสุ, กปฺปเต, มชฺฌิเมปิ กิํ?
ปจฺจนฺติเมสุ เจวาปิ, กิํ น กปฺปติ มชฺฌิเม?
[601]
ปจฺจนฺติเมสุ เทเสสุ, วุตฺตํ วตฺถุ จตุพฺพิธํ;
นิทฺทิเส กปฺปตี เจว, น จ กปฺปติ มชฺฌิเมฯ
[602]
‘‘อิทํ จตุพฺพิธํ วตฺถุ, เทสสฺมิํ ปน มชฺฌิเม;
น กปฺปตี’’ติ วุตฺตญฺหิ, ‘‘มชฺฌิเมเยว กปฺปติ’’ฯ
[603]
ปจฺจนฺติเมสุ เทเสสุ, เอวํ วุตฺตํ น กปฺปติ;
ปญฺจโลณาทิกํ เสสํ, อุภยตฺถปิ กปฺปติฯ
[604]
อกปฺปิยนฺติ ยํ นาม, ปฏิกฺขิตฺตํ มเหสินา;
อุภยตฺถปิ ตํ สพฺพํ, น จ กปฺปติ ภิกฺขุโนฯ
[605]
อนฺโต อาปชฺชตาปตฺติํ, อาปชฺชติ จ, โน พหิ;
พหิ อาปชฺชตาปตฺติํ, น จ อนฺโต กุทาจนํฯ
[606]
อาปชฺชติ =19 ปนนฺโต จ, พหิ เจวุภยตฺถปิ;
เนว อนฺโต จ อาปตฺติํ, อาปชฺชติ จ, โน พหิฯ
[607]
อนุปขชฺชเสยฺยาทิํ, อนฺโตเยว จ, โน พหิ;
สงฺฆิกํ ปน มญฺจาทิํ, อชฺโฌกาเส ตุ กิญฺจิปิฯ
[608]
นิกฺขิปิตฺวาน คจฺฉนฺโต, โน อนฺโต, พหิเยว จ;
เสสมาปชฺชตาปตฺติํ, อนฺโต เจว ตถา พหิฯ
[609]
อสาธารณมาปตฺติํ, ภิกฺขุนีนํ วสา ปน;
เนวาปชฺชติ อนฺโตปิ, น พหิทฺธาปิ สพฺพถาฯ
[610]
คาเม อาปชฺชตาปตฺติํ, โน อรญฺเญ กถํ วท?
อาปชฺชติ อรญฺญสฺมิํ, น จ คาเม กถํ วท?
[611]
อาปชฺชติ จ คาเมปิ, อรญฺเญปิ กถํ วท?
เนวาปชฺชติ คาเมปิ, โน อรญฺเญ กถํ วท?
[612]
อนฺตรฆรสํยุตฺตา, เสกฺขปญฺญตฺติโย ปน;
อาปชฺชติ หิ ตํ ภิกฺขุ, คามสฺมิํ, โน อรญฺญเกฯ
[613]
อคณา อรุณํ นาม, อุฏฺฐาเปนฺตี จ ภิกฺขุนี;
อาปชฺชติ ปนาปตฺติํ, อรญฺเญ, โน จ คามเกฯ
[614]
มุสาวาทาทิมาปตฺติํ , อาปชฺชตูภยตฺถปิ;
อสาธารณมาปตฺติํ, อาปชฺชติ น กตฺถจิฯ
[615]
อาปชฺชติ คิลาโนว, นาคิลาโน กุทาจนํ;
อคิลาโนว อาปตฺติํ, ผุเส, โน จ คิลานโกฯ
[616]
อคิลาโน คิลาโน จ, อาปชฺชนฺติ อุโภปิ จ;
นาปชฺชนฺติ คิลาโน จ, อคิลาโน อุโภปิ จฯ
[617]
เภสชฺเชน ปนญฺเญน, อตฺเถ สติ จ โย ปน;
วิญฺญาเปติ ตทญฺญํ โส, อาปชฺชติ อกลฺลโกฯ
[618]
น เภสชฺเชน อตฺเถปิ, เภสชฺชํ วิญฺญาเปติ เจ;
อาปชฺชตาคิลาโนว, อาปตฺติํ โลลมานโสฯ
[619]
มุสาวาทาทิกํ เสสํ, อาปชฺชนฺติ อุโภปิ จ;
อสาธารณมาปตฺติํ, นาปชฺชนฺติ อุโภปิ จฯ
จตุกฺกกถาฯ
[620]
ปญฺจ =20 อาปตฺติโย โหนฺติ, มุสาวาทสฺส การณา;
ปาราชิกํ ครุํถุลฺล-จฺจยํ ปาจิตฺติ ทุกฺกฏํฯ
[621]
อานิสํสา ปนุทฺทิฏฺฐา, ปญฺเจว กถินตฺถเร;
อนามนฺตาสมาทาน-จรณํ คณโภชนํฯ
[622]
โย ตตฺถ จีวรุปฺปาโท, โส จ เนสํ ภวิสฺสติ;
จีวรํ ยาวทตฺถญฺจ, คเหตุมฺปิ จ วฏฺฏติฯ
[623]
เตลํ ปญฺจวิธํ วุตฺตํ, นิปฺปปญฺเจน สตฺถุนา;
วสา มธุกเอรณฺฑ-ติลสาสปสมฺภวํฯ
[624]
อจฺฉมจฺฉวสา เจว, สุสุกา สูกรสฺส จ;
คทฺรภสฺส วสา เจติ, วสา ปญฺจวิธา มตาฯ
[625]
มูลขนฺธคฺคพีชานิ , ผฬุพีชญฺจ ปณฺฑิโต;
ปญฺจมํ พีชพีชนฺติ, ปญฺจ พีชานิ ทีปเยฯ
[626]
ผลํ สมณกปฺเปหิ, ปริภุญฺเชยฺย ปญฺจหิ;
อคฺคิสตฺถนขกฺกนฺตํ, อพีชุพฺพฏฺฏพีชกํฯ
[627]
ปณฺณุณฺณติณโจฬานํ, วากสฺส จ วเสนิธ;
ภิสิโย ภาสิตา ปญฺจ, มุนินา โมหนาสินาฯ
[628]
ปวารณาปิ ปญฺเจว, โอทนาทีหิ ปญฺจหิ;
ปฏิคฺคาหาปิ ปญฺเจว, กายาทิคหเณน จฯ
[629]
ปญฺจานิสํสา วินยญฺญุกสฺมิํ;
มเหสินา การุณิเกน วุตฺตา;
สุรกฺขิตํ โหติ สกญฺจ สีลํ;
กุกฺกุจฺจมญฺญสฺส นิรากโรติฯ
[630]
วิสารโท ภาสติ สงฺฆมชฺเฌ;
สุเขน นิคฺคณฺหติ เวริภิกฺขู;
ธมฺมสฺส เจว ฐิติยา ปวตฺโต;
ตสฺมาทรํ ตตฺถ กเรยฺย ธีโรฯ
ปญฺจกกถาฯ
[631]
ฉวจฺเฉทนกา =21 วุตฺตา, ฉฬภิญฺเญน ตาทินา;
มญฺจปีฐมติกฺกนฺต-ปมาณญฺจ นิสีทนํฯ
[632]
ตถา กณฺฑุปฏิจฺฉาที, วสฺสสาฏิกจีวรํ;
จีวรํ สุคตสฺสาปิ, จีวเรน ปมาณกํฯ
[633]
ฉหากาเรหิ อาปตฺติํ, อาปชฺชติ น อญฺญถา;
อลชฺชิตาย อญฺญาณ-กุกฺกุจฺเจหิ ตเถว จฯ
[634]
วิปริตาย สญฺญาย, กปฺปิเยปิ อกปฺปิเย;
สติสมฺโมสโต เจว, อาปชฺชติ, น สํสโยฯ
[635]
ฉหิ องฺเคหิ ยุตฺเตน;
อุปสมฺปาทนา ปน;
กาตพฺพา, นิสฺสโย เจว;
ทาตพฺโพ, สามเณรโกฯ
[636]
ภิกฺขุนาปฏฺฐเปตพฺโพ, สตตํ ธมฺมจกฺขุนา;
อาปตฺติํ ปน ชานาติ, อนาปตฺติํ ครุํ ลหุํฯ
[637]
ปาติโมกฺขานิ วิตฺถารา, อุภยานิ ปนสฺส หิ;
สฺวาคตานิ ภวนฺเตว, สุวิภตฺตานิ อตฺถโตฯ
[638]
อนุพฺยญฺชนโส เจว, สุตฺตโส สุวินิจฺฉิตา;
ทสวสฺโสปิ วา โหติติเรกทสวสฺสิโกฯ
ฉกฺกกถาฯ
[639]
สตฺต สามีจิโย วุตฺตา, สตฺเตว สมถาปิ จ;
ปญฺญตฺตาปตฺติโย สตฺต, สตฺตโพชฺฌงฺคทสฺสินาฯ
สตฺตกกถาฯ
[640]
กุลานิ อิธ ทูเสติ, อากาเรหิ ปนฏฺฐหิ;
ปุปฺเผน จ ผเลนาปิ, จุณฺเณนปิ จ ทูสโกฯ
[641]
มตฺติกาทนฺตกฏฺเฐหิ, เวฬุยา เวชฺชิกายปิ;
ชงฺฆเปสนิเกนาปิ, อาชีวสฺเสว การณาฯ
[642]
อฏฺเฐวานติริตฺตาปิ , อติริตฺตาปิ อฏฺฐ จ;
อกปฺปิยกตํ เจวาคหิตุจฺจาริตมฺปิ จฯ
[643]
กตํ อหตฺถปาเสปิ, น จ ภุตฺตาวินา กตํ;
ปวาริเตน ยญฺเจว, กตํ ภุตฺตาวินาปิ จฯ
[644]
อาสนา วุฏฺฐิเตนาปิ, อติริตฺตกตมฺปิ จ;
อวุตฺตมลเมตนฺติ, น คิลานาติริตฺตกํฯ
[645]
อิเม อฏฺเฐว นิทฺทิฏฺฐา, เญยฺยา อนติริตฺตกา;
อติริตฺตา ปเนเตสํ, ปฏิกฺเขเปน ทีปิตาฯ
[646]
สหปุพฺพปโยเคสุ, ทุกฺกฏํ ญาตญตฺติสุ;
ทุรูปจิณฺเณ อามาเส, ทุกฺกฏํ ปฏิสาวเนฯ
[647]
อฏฺฐมํ ปน นิทฺทิฏฺฐํ, ตถา วินยทุกฺกฏํ;
อิติ อฏฺฐวิธํ โหติ, สพฺพเมว จ ทุกฺกฏํฯ
[648]
เอหิภิกฺขูปสมฺปทา, สรณคมเนน จ;
ปญฺหาพฺยากรโณวาทา, ครุธมฺมปฏิคฺคโหฯ
[649]
ตถา ญตฺติจตุตฺเถน, กมฺเมเนวฏฺฐวาจิกา;
ทูเตน ภิกฺขุนีนนฺติ, อฏฺเฐว อุปสมฺปทาฯ
[650]
อสทฺธมฺมา ปนฏฺเฐว, นิทฺทิฏฺฐา สุทฺธทิฏฺฐินา;
อฏฺเฐวุโปสถงฺคานิ, เวทิตพฺพานิ วิญฺญุนาฯ
[651]
สกฺกาโร จ อสกฺกาโร;
ลาภาลาโภ ยสายโส;
ปาปิจฺฉา ปาปมิตฺตตฺตํ;
อสทฺธมฺมา ปนฏฺฐิเมฯ
[652]
ปาณํ น หเน, น จาทินฺนมาทิเย;
มุสา น ภาเส, น จ มชฺชโป สิยา;
อพฺรหฺมจริยา วิรเมยฺย เมถุนา;
รตฺติํ น ภุญฺเชยฺย วิกาลโภชนํฯ
[653]
มาลํ น ธาเร, น จ คนฺธมาจเร;
มญฺเจ ฉมายํว สเยถ สนฺถเต;
เอตญฺหิ อฏฺฐงฺคิกมาหุโปสถํ;
พุทฺเธน ทุกฺขนฺตคุนา ปกาสิตํฯ
[654]
อฏฺเฐว ปน ปานานิ, นิทฺทิฏฺฐานิ มเหสินา;
ภิกฺขุ อฏฺฐงฺคสํยุตฺโต, ภิกฺขุโนวาทมรหติฯ
อฏฺฐกกถาฯ
[655]
โภชนานิ ปณีตานิ, นว วุตฺตานิ สตฺถุนา;
ทุกฺกฏํ ปน นิทฺทิฏฺฐํ, นว มํสานิ ขาทโตฯ
[656]
ปาติโมกฺขสฺส อุทฺเทสา, นเวว ปริทีปิตา;
อุโปสถา นเวเวตฺถ, สงฺโฆ นวหิ ภิชฺชติฯ
นวกกถาฯ
[657]
ทส อกฺโกสวตฺถูนิ, ทส สิกฺขาปทานิ จ;
อกปฺปิยานิ มํสานิ, ทส สุกฺกานิ เว ทสฯ
[658]
ชาติ นามญฺจ โคตฺตญฺจ, กมฺมํ สิปฺปญฺจ โรคตา;
ลิงฺคาปตฺติ กิเลสา จ, อกฺโกเสน ทเสว หิฯ
[659]
ทส อาทีนวา รญฺโญ, อนฺเตปุรปฺปเวสเน;
ทสากาเรหิ สงฺฆาทิ-เสโส ฉนฺโนติ ทีปิโตฯ
[660]
ทส กมฺมปถา ปุญฺญา, อปุญฺญาปิ ตถา ทส;
ทเสว ทานวตฺถูนิ, ทเสว รตนานิ จฯ
[661]
อนฺนํ ปานญฺจ วตฺถญฺจ, มาลา คนฺธวิเลปนํ;
ยานญฺจ เสยฺยาวสถํ, ปทีเปยฺยนฺติเม ทสฯ
[662]
อวนฺทิยา มุนินฺเทน, ทีปิตา ทส ปุคฺคลา;
ทเสว ปํสุกูลานิ, ทส จีวรธารณาฯ
[663]
โสสานิกํ ปาปณิกํ, ตถา อุนฺทูรขายิตํ;
โคขายิตคฺคินา ทฑฺฒํ, อชิกูปจิกขายิตํฯ
[664]
ถูปจีวริกญฺเจว, ตเถว อภิเสกิยํ;
คตปจฺฉาคตญฺเจติ, ทสธา ปํสุกูลิกํฯ
[665]
สพฺพนีลาทโย วุตฺตา, ทส จีวรธารณา;
จีวรานิ นเวเวตฺถ, สทฺธิํ สํกจฺจิกาย จฯ
ทสกกถาฯ
[666]
เอกาทส ปนาภพฺพา, ปุคฺคลา ปณฺฑกาทโย;
โหนฺเตวานุปสมฺปนฺนา, อุปสมฺปาทิตาปิ จฯ
[667]
ปตฺตา อกปฺปิยา วุตฺตา, เอกาทส ภวนฺติ หิ;
ทารุเชน จ ปตฺเตน, ทเสว รตนุพฺภวาฯ
[668]
เอกาทส ตถา โหนฺติ, ปาทุกาปิ อกปฺปิยา;
เอกาทเสว สีมาโย, อสีมาติ ปกาสิตาฯ
[669]
อติขุทฺทาติมหนฺตา, ขณฺฑจฺฉายานิมิตฺตกา;
อนิมิตฺตา, พหิฏฺเฐน, สมฺมตา, นทิยํ ตถาฯ
[670]
ชาตสฺสเร, สมุทฺเท วา, สมฺภินฺนชฺโฌตฺถฏาปิ จ;
สีมายปิ อสีมาโย, เอกาทส อิมา สิยุํฯ
[671]
เอกาทเสว ปถวี, กปฺปิยา จ อกปฺปิยา;
คณฺฐิกา กปฺปิยา วุตฺตา, เอกาทส จ วีธกาฯ
[672]
เอกาทสวิธํ วุตฺตํ, อธิฏฺฐาตพฺพจีวรํ;
ติจีวรํ ตถา กณฺฑุ-ปฏิจฺฉาที, นิสีทนํฯ
[673]
ปจฺจตฺถรณํ, วสฺสิก-สาฏิกา, มุขปุญฺฉนํ;
ทกสาฏิ, ปริกฺขาร-โจฬํ, สํกจฺจิกาปิ จฯ
[674]
ยาวตติยกา สพฺเพ, เอกาทส ปกาสิตา;
อริฏฺโฐ, จณฺฑกาฬี จ, อุกฺขิตฺตสฺสานุวตฺติกาฯ
[675]
อฏฺฐ สงฺฆาทิเสเสสุ, อุภินฺนํ ตุ วสา ปน;
เอกาทส อิเม ยาว-ตติยาติ ปกาสิตาฯ
[676]
นิสฺสยสฺส ทเสกาว, ปฏิปฺปสฺสทฺธิโย ปน;
ฉธาจริยโต วุตฺตา, อุปชฺฌายา ตุ ปญฺจธาฯ
เอกาทสกกถาฯ
[677]
เตรเสว ธุตงฺคานิ, ปรมานิ จ จุทฺทส;
โสฬเสว ตุ ‘‘ชาน’’นฺติ, ปญฺญตฺตานิ มเหสินาฯ
[678]
สอุตฺตรํ วินยวินิจฺฉยํ ตุ โย;
อนุตฺตรํ สกลมปีธ ชานติ;
มหตฺตเร วินยนเย อนุตฺตเร;
นิรุตฺตโร ภวติ หิ โส, น สํสโยฯ
เอกุตฺตรนโย สมตฺโตฯ
เสทโมจนกถา
[679]
อิโต ปรํ ปวกฺขามิ, ภิกฺขูนํ สุณตํ ปุน;
เสทโมจนคาถาโย, ปฏุภาวกรา วราฯ
[680]
อุพฺภกฺขกํ วิวชฺเชตฺวา, อโธนาภิํ วิวชฺชิย;
ปฏิจฺจ เมถุนํ ธมฺมํ, กถํ ปาราชิโก สิยา?
[681]
กพนฺธสตฺตกายสฺส, อุเร โหติ มุขํ สเจ;
มุเขน เมถุนํ ธมฺมํ, กตฺวา ปาราชิโก ภเวฯ
[682]
สุญฺเญ นิสฺสตฺตเก ทีเป, เอโก ภิกฺขุ สเจ วเส;
เมถุนปจฺจยา ตสฺส, กถํ ปาราชิโก สิยา?
[683]