ขนฺธกปุจฺฉากถา

[298]

ขนฺธเกสุปิ อาปตฺติ-ปเภทํ อาคตํ ปน;

ปาฏวตฺถาย ภิกฺขูนํ, ปวกฺขามิ นิโพธถฯ

[299]

ขนฺธเก ปฐเม ตาว, กติ อาปตฺติโย สิยุํ?

ขนฺธเก ปฐเม ตาว, ทฺเว ปนาปตฺติโย สิยุํฯ

[300]

อูนวีสติวสฺสํ ตุ, กโรโต อุปสมฺปทํ;

โหติ ปาจิตฺติยํ ตสฺส, เสเสสุ ปน ทุกฺกฏํฯ

[301]

กติ อาปตฺติโย โหนฺติ;

ขนฺธเก ตุ อุโปสเถ?

ติสฺโส อาปตฺติโย โหนฺติ;

ขนฺธเก ตุ อุโปสเถฯ

[302]

‘‘นสฺสนฺเตเต วินสฺสนฺตุ’’, อิติ เภทปุรกฺขกา;

อุโปสถสฺส กรเณ, ถุลฺลจฺจยมุทีริตํฯ

[303]

อุกฺขิตฺตเกน สทฺธิํ ตุ, กโรนฺตสฺส อุโปสถํ;

โหติ ปาจิตฺติยํ ตสฺส, เสเสสุ ปน ทุกฺกฏํฯ

[304]

กติ อาปตฺติโย วุตฺตา, วท วสฺสูปนายิเก?

เอกาว ทุกฺกฏาปตฺติ, วุตฺตา วสฺสูปนายิเกฯ

[305]

กติ อาปตฺติโย วุตฺตา, ขนฺธเก ตุ ปวารเณ?

ติสฺโส อาปตฺติโย วุตฺตา, อุโปสถสมา มตาฯ

[306]

กติ อาปตฺติโย วุตฺตา, จมฺเม? ติสฺโสว ทีปิตา;

มาเรนฺตานํ ตุ ปาจิตฺติ, คเหตฺวา วจฺฉตริํ ปนฯ

[307]

องฺคชาตํ ฉุปนฺตสฺส, รตฺเตน ปน เจตสา;

ตสฺส ถุลฺลจฺจยํ วุตฺตํ, เสเสสุ ปน ทุกฺกฏํฯ

[308]

กติ อาปตฺติโย วุตฺตา, เภสชฺชกฺขนฺธเก ปน?

ติสฺโส อาปตฺติโย วุตฺตา, เภสชฺชกฺขนฺธเก ปนฯ

[309]

สมนฺตา ทฺวงฺคุเล ตตฺถ, ถุลฺลจฺจยมุทีริตํ;

โภชฺชยาคูสุ ปาจิตฺติ, เสเสสุ ปน ทุกฺกฏํฯ

[310]

กถิเน นตฺถิ อาปตฺติ, ปญฺญตฺตํ เกวลํ ปน;

กติ จีวรสํยุตฺเต, วุตฺตา อาปตฺติโย ปน?

[311]

ติสฺโส จีวรสํยุตฺเต, วุตฺตา อาปตฺติโย ปน;

กุสวากมเย จีเร, ถุลฺลจฺจยมุทีริตํฯ

[312]

สนิสฺสคฺคาว ปาจิตฺติ, อติเรเก ตุ จีวเร;

เสเสสุ ทุกฺกฏํ วุตฺตํ, พุทฺเธนาทิจฺจพนฺธุนาฯ

[313]

จมฺเปยฺยเก จ โกสมฺเพ, กมฺมสฺมิํ ปาริวาสิเก;

ตถา สมุจฺจเย เอกา, ทุกฺกฏาปตฺติ ทีปิตาฯ

[314]

กติ อาปตฺติโย วุตฺตา, สมถกฺขนฺธเก ปน?

ทฺเวเยวาปตฺติโย วุตฺตา, สมถกฺขนฺธเก ปนฯ

[315]

ฉนฺทสฺส ทายโก ภิกฺขุ, ปาจิตฺติ ยทิ ขียติ;

เสเสสุ ปน สพฺพตฺถ, ทุกฺกฏํ สมุทาหฏํฯ

[316]

กติ ขุทฺทกวตฺถุสฺมิํ, วุตฺตา อาปตฺติโย ปน?

ติสฺโส ขุทฺทกวตฺถุสฺมิํ, วุตฺตา อาปตฺติโย ปนฯ

[317]

อตฺตโน องฺคชาตํ ตุ, ฉินฺทํ ถุลฺลจฺจยํ ผุเส;

โรมนฺเถ โหติ ปาจิตฺติ, เสเส อาปตฺติ ทุกฺกฏํฯ

[318]

ตถา เสนาสนสฺมิํ ตุ, ติสฺโส อาปตฺติโย สิยุํ;

วิสฺสชฺชเน จ ครุโน, ถุลฺลจฺจยมุทีริตํฯ

[319]

นิกฺกฑฺฒเน จ ปาจิตฺติ, สงฺฆิกมฺหา วิหารโต;

เสเสสุ ปน สพฺพตฺถ, ทุกฺกฏํ สมุทาหฏํฯ

[320]

กติ อาปตฺติโย สงฺฆ-เภเท วุตฺตา มเหสินา?

ทฺเว ปนาปตฺติโย สงฺฆ-เภเท วุตฺตา มเหสินาฯ

[321]

เภทานุวตฺตกานํ ตุ, ถุลฺลจฺจยมุทีริตํ;

คณโภเค ตุ ภิกฺขูนํ, ปาจิตฺติ ปริทีปิตาฯ

[322]

ขนฺธเก วตฺตสํยุตฺเต, กติ อาปตฺติโย มตา?

ขนฺธเก วตฺตสํยุตฺเต, ทุกฺกฏาปตฺติเยว สาฯ

[323]

ฐปเน ปาติโมกฺขสฺส, ตถา เอกาว ทีปิตา;

ภิกฺขุนิกฺขนฺธเก จาปิ, กติ อาปตฺติโย มตา?

[324]

ภิกฺขุนิกฺขนฺธเก จาปิ, ทฺเว ปนาปตฺติโย มตา;

อปวารณาย ปาจิตฺติ, เสเสสุ ปน ทุกฺกฏํฯ

ขนฺธกปุจฺฉากถา นิฏฺฐิตาฯ

สมุฏฺฐานสีสกถา

[325]

วิภงฺเคสุ ปน ทฺวีสุ, ปญฺญตฺตานิ มเหสินา;

ยานิ ปาราชิกาทีนิ, อุทฺทิสนฺติ อุโปสเถฯ

[326]

เตสํ ทานิ ปวกฺขามิ, สมุฏฺฐานมิโต ปรํ;

ปาฏวตฺถาย ภิกฺขูนํ, ตํ สุณาถ สมาหิตาฯ

[327]

กาโย จ วาจาปิ จ กายวาจา;

ตาเนว จิตฺเตน ยุตานิ ตีณิ;

เอกงฺคิกํ ทฺวงฺคิติวงฺคิกนฺติ;

ฉธา สมุฏฺฐานวิธิํ วทนฺติฯ

[328]

เตสุ เอเกน วา ทฺวีหิ, ตีหิ วาถ จตูหิ วา;

ฉหิ วาปตฺติโย นานา-สมุฏฺฐาเนหิ ชายเรฯ

[329]

ตตฺถ ปญฺจสมุฏฺฐานา, กา จาปตฺติ น วิชฺชติ;

โหติ เอกสมุฏฺฐานา, ปจฺฉิเมเหว ตีหิปิฯ

[330]