อาปตฺติโย กตาจาร-วิปตฺติปจฺจยา ปน;
เอกาเยว สิยาจาร-วิปตฺติปจฺจยา ปนฯ
[277]
ปฏิจฺฉาเทติ อาจาร-วิปตฺติํ ปน ภิกฺขุ เจ;
เอกเมวสฺส ภิกฺขุสฺส, โหติ อาปตฺติ ทุกฺกฏํฯ
[278]
กติ อาปตฺติโย ทิฏฺฐิ-วิปตฺติปจฺจยา ปน?
ทฺเว ปนาปตฺติโย ทิฏฺฐิ-วิปตฺติปจฺจยา สิยุํฯ
[279]
อจฺจชํ ปาปิกํ ทิฏฺฐิํ, ญตฺติยา ทุกฺกฏํ ผุเส;
กมฺมวาจาย โอสาเน, ปาจิตฺติ ปริยาปุตาฯ
[280]
อาปตฺติโย กตาชีว-วิปตฺติปจฺจยา ปน?
ฉเฬวาปชฺชตาชีว-วิปตฺติปจฺจยา ปนฯ
[281]
อาชีวเหตุ ปาปิจฺโฉ, อสนฺตํ ปน อตฺตนิ;
มนุสฺสุตฺตริธมฺมํ ตุ, วทํ ปาราชิกํ ผุเสฯ
[282]
สญฺจริตฺตํ สมาปนฺโน, โหติ สงฺฆาทิเสสตา;
ปริยายวจเน ญาเต, ตสฺส ถุลฺลจฺจยํ สิยาฯ
[283]
ปณีตโภชนํ วตฺวา, ปาจิตฺติ ปริภุญฺชโต;
ภิกฺขุนี ตุ สเจ โหติ, ปาฏิเทสนิยํ สิยาฯ
[284]
อาชีวเหตุ สูปํ วา, โอทนํ วา ปนตฺตโน;
อตฺถาย วิญฺญาเปตฺวาน, ทุกฺกฏํ ปริภุญฺชโตฯ
จตุวิปตฺติกถาฯ
อธิกรณปจฺจยกถา
[285]
วิวาทาธิกรณมฺหา, กติ อาปตฺติโย สิยุํ?
วิวาทาธิกรณมฺหา, ทฺเว ปนาปตฺติโย สิยุํฯ
[286]
ปาจิตฺติ อุปสมฺปนฺนํ, โหติ โอมสโต ปน;
ภิกฺขุสฺสานุปสมฺปนฺนํ, โอมสนฺตสฺส ทุกฺกฏํฯ
[287]
อนุวาทาธิกรณ-ปจฺจยาปตฺติโย กติ?
อนุวาทาธิกรณ-ปจฺจยา ติวิธา สิยุํฯ
[288]
อนุทฺธํเสติ เจ ภิกฺขุํ, อมูลนฺติมวตฺถุนา;
สงฺฆาทิเสสมาปตฺติ-มาปชฺชติ, น สํสโยฯ
[289]
ตถา สงฺฆาทิเสเสน, อนุทฺธํเสติ เจ ปน;
ปาจิตฺติ, ทุกฺกฏํ วุตฺตํ, ตถาจารวิปตฺติยาฯ
[290]
อาปตฺติปจฺจยา วุตฺตา, กติ อาปตฺติโย ปน?
อาปตฺติปจฺจยา วุตฺตา, จตสฺโสว มเหสินาฯ
[291]
ชานํ ปาราชิกํ ธมฺมํ, สเจ ฉาเทติ ภิกฺขุนี;
จุตา, ถุลฺลจฺจยํ โหติ, สเจ เวมติกา สิยาฯ
[292]
ปาจิตฺติ ภิกฺขุ สงฺฆาทิ-เสสํ ฉาเทติ เจ ปน;
ตถาจารวิปตฺติํ ตุ, สเจ ฉาเทติ ทุกฺกฏํฯ
[293]
อาปตฺติโย หิ กิจฺจาธิ-กรณปจฺจยา กติ?
ปญฺเจว โหนฺติ กิจฺจาธิ-กรณปจฺจยา ปนฯ
[294]
สมนุภาสนาเยว, ญตฺติยา ทุกฺกฏํ ผุเส;
สมณี อจฺจชนฺตีว, อุกฺขิตฺตสฺสานุวตฺติกาฯ
[295]
ถุลฺลจฺจยํ ทฺวยํ ทฺวีหิ, กมฺมวาจาหิ สา ผุเส;
กมฺมวาจาย โอสาเน, ตสฺสา ปาราชิกํ สิยาฯ
[296]
สมนุภาสนาเยว, เภทกสฺสานุวตฺติกา;
น ปริจฺจชติ ตํ ลทฺธิํ, โหติ สงฺฆาทิเสสตาฯ
[297]
สมนุภาสนาเยว, ปาปิกาย จ ทิฏฺฐิยา;
ยาวตติยกํ ตสฺสา, ปาจิตฺตจฺจชโตปิ จฯ
อธิกรณปจฺจยกถาฯ
ขนฺธกปุจฺฉากถา
[298]
ขนฺธเกสุปิ อาปตฺติ-ปเภทํ อาคตํ ปน;
ปาฏวตฺถาย ภิกฺขูนํ, ปวกฺขามิ นิโพธถฯ
[299]
ขนฺธเก ปฐเม ตาว, กติ อาปตฺติโย สิยุํ?
ขนฺธเก ปฐเม ตาว, ทฺเว ปนาปตฺติโย สิยุํฯ
[300]
อูนวีสติวสฺสํ ตุ, กโรโต อุปสมฺปทํ;
โหติ ปาจิตฺติยํ ตสฺส, เสเสสุ ปน ทุกฺกฏํฯ
[301]
กติ อาปตฺติโย โหนฺติ;
ขนฺธเก ตุ อุโปสเถ?
ติสฺโส อาปตฺติโย โหนฺติ;
ขนฺธเก ตุ อุโปสเถฯ
[302]
‘‘นสฺสนฺเตเต วินสฺสนฺตุ’’, อิติ เภทปุรกฺขกา;
อุโปสถสฺส กรเณ, ถุลฺลจฺจยมุทีริตํฯ
[303]
อุกฺขิตฺตเกน สทฺธิํ ตุ, กโรนฺตสฺส อุโปสถํ;
โหติ ปาจิตฺติยํ ตสฺส, เสเสสุ ปน ทุกฺกฏํฯ
[304]
กติ อาปตฺติโย วุตฺตา, วท วสฺสูปนายิเก?
เอกาว ทุกฺกฏาปตฺติ, วุตฺตา วสฺสูปนายิเกฯ
[305]
กติ อาปตฺติโย วุตฺตา, ขนฺธเก ตุ ปวารเณ?
ติสฺโส อาปตฺติโย วุตฺตา, อุโปสถสมา มตาฯ
[306]
กติ อาปตฺติโย วุตฺตา, จมฺเม? ติสฺโสว ทีปิตา;
มาเรนฺตานํ ตุ ปาจิตฺติ, คเหตฺวา วจฺฉตริํ ปนฯ
[307]
องฺคชาตํ ฉุปนฺตสฺส, รตฺเตน ปน เจตสา;
ตสฺส ถุลฺลจฺจยํ วุตฺตํ, เสเสสุ ปน ทุกฺกฏํฯ
[308]
กติ อาปตฺติโย วุตฺตา, เภสชฺชกฺขนฺธเก ปน?
ติสฺโส อาปตฺติโย วุตฺตา, เภสชฺชกฺขนฺธเก ปนฯ
[309]