ปญฺญตฺตา กายสํสคฺคํ, สมาปชฺชนปจฺจยา;
กติ อาปตฺติโย โหนฺติ? ปญฺจ อาปตฺติโย สิยุํฯ
[166]
อวสฺสุตสฺส โปสสฺส, ตถา ภิกฺขุนิยาปิ จ;
ปาราชิกมธกฺขาทิ-คหณํ สาทิยนฺติยาฯ
[167]
กาเยน ผุสโต กายํ, ภิกฺขุสฺส ครุกํ สิยา;
กาเยน กายพทฺธํ ตุ, ผุสํ ถุลฺลจฺจยํ สิยาฯ
[168]
ปฏิพทฺเธน กาเยน, ปฏิพทฺธํ ตุ ทุกฺกฏํ;
ปาจิตฺติยํ ปนุทฺทิฏฺฐํ, ตสฺสงฺคุลิปโตทเกฯ
[169]
เสเสสุ เสขิยนฺเตสุ, อาปตฺตีนํ วินิจฺฉโย;
เหฏฺฐา วุตฺตนเยเนว, เวทิตพฺโพ วิภาวินาฯ
มหาวิภงฺคสงฺคโห นิฏฺฐิโตฯ
ภิกฺขุนีวิภงฺโค
[170]
ภิกฺขูนํ ปาฏวตฺถาย, วินยสฺส วินิจฺฉเย;
ภิกฺขุนีนํ วิภงฺโคปิ, กิญฺจิมตฺตํ ภณามหํฯ
[171]
อวสฺสุตสฺส โปสสฺส, ภิกฺขุนีปิ อวสฺสุตา;
นนฺทนฺตี กายสํสคฺคํ, กติ อาปตฺติโย ผุเส;
[172]
ติสฺโส อาปตฺติโย อุพฺภ-ชาณุสฺสาธกฺขกสฺส จ;
โหติ ปาราชิกํ ตสฺสา, คหณํ สาทิยนฺติยาฯ
[173]
อุพฺภกฺขกํ อโธชาณุ-คหณํ สาทิยนฺติยา;
ถุลฺลจฺจยํ สิยา, กาย-ปฏิพทฺเธ ตุ ทุกฺกฏํฯ
[174]
ฉาเทนฺตี ภิกฺขุนี วชฺชํ, ติสฺโส อาปตฺติโย ผุเส;
ชานํ ปาราชิกํ ธมฺมํ, ฉาเทนฺตี สา ปราชิกาฯ
[175]
ถุลฺลจฺจยํ เวมติกา, ปฏิจฺฉาเทติ เจ ปน;
อถาจารวิปตฺติํ เจ, ปฏิจฺฉาเทติ ทุกฺกฏํฯ
[176]
นิสฺสชฺชนฺตี น ตํ ลทฺธิํ, อุกฺขิตฺตสฺสานุวตฺติกา;
สมนุภาสนาเยว, ติสฺโส อาปตฺติโย ผุเสฯ
[177]
ญตฺติยา ทุกฺกฏํ, ทฺวีหิ, กมฺมวาจาหิ ถุลฺลตา;
กมฺมวาจาย โอสาเน, ปาราชิกมุทีริตํฯ
[178]
ปูเรนฺตี อฏฺฐมํ วตฺถุํ, ติสฺโส อาปตฺติโย ผุเส;
ปุริเสนิธาคจฺฉาติ, วุตฺตาคจฺฉติ ทุกฺกฏํฯ
[179]
ถุลฺลจฺจยํ ตุ โปสสฺส, หตฺถปาสปฺปเวสเน;
ปูเรนฺตี อฏฺฐมํ วตฺถุํ, สมณี สา ปราชิตาฯ
ปาราชิกกถาฯ
[180]
อุสฺสยวาทิกา อฏฺฏํ, กโรนฺตี ติวิธํ ผุเส;
เอกสฺสาโรจเน ตสฺสา, โหติ อาปตฺติ ทุกฺกฏํฯ
[181]
ทุติยาโรจเน ตสฺสา, ถุลฺลจฺจยมุทีริตํ;
อฏฺฏสฺส ปริโยสาเน, โหติ สงฺฆาทิเสสตาฯ
[182]
โจริวุฏฺฐาปิกา วาปิ, ญตฺติยา ทุกฺกฏํ ผุเส;
ทฺวีหิ ถุลฺลจฺจยํ กมฺม-วาโจสาเน ครุํ สิยาฯ
[183]
เอกา คามนฺตรํ คจฺเฉ, คมเน ทุกฺกฏํ สิยา;
ปริกฺเขเป อติกฺกนฺเต, ปาเทน ปฐเมน ตุฯ
[184]
โหติ ถุลฺลจฺจยาปตฺติ, ตสฺสา สมณิยา ปน;
ทุติเยน อติกฺกนฺเต, ครุเก ปน ติฏฺฐติฯ
[185]
จตุตฺเถ ทุติเย วุตฺต-สทิโสว วินิจฺฉโย;
อาปตฺตีนํ ปเภเท ตุ, กาจิ นตฺถิ วิเสสตาฯ
[186]
อวสฺสุตา สยํ หุตฺวา, ตาทิสสฺเสว หตฺถโต;
คเหตฺวา ปน ภุญฺชนฺตี, โภชนาทีสุ กิญฺจิปิฯ
[187]
ผุเส อาปตฺติโย ติสฺโส, โภชนาทีสุ กิญฺจิปิ;
ปฏิคฺคณฺหนฺติยา ตสฺสา, โหติ ถุลฺลจฺจยํ ปนฯ
[188]
อชฺโฌหาเรสุ สพฺเพสุ, โหติ สงฺฆาทิเสสตา;
อุทกํ ทนฺตโปนํ วา, ปฏิคฺคณฺหาติ ทุกฺกฏํฯ
[189]
‘‘สหตฺเถน คเหตฺวา ตฺวํ, ขาท วา ภุญฺช วา’’ติปิ;
อุยฺโยเชนฺตี ปเนวํ ตุ, ติสฺโส อาปตฺติโย ผุเสฯ
[190]
ทุกฺกฏํ วจเน ตสฺสา, ‘‘ภุญฺชิสฺสามี’’ติ คณฺหติ;
อชฺโฌหาเรสุ สพฺเพสุ, ตสฺสา ถุลฺลจฺจยํ สิยาฯ
[191]
โภชนสฺส ปโนสาเน, โหติ สงฺฆาทิเสสตา;
อุยฺโยเชติ จ ยา ตสฺสา, อิมา ติสฺโสติ ทีปเยฯ
[192]
สตฺตเม อฏฺฐเม จาปิ, นวเม ทสเมปิ จ;
โจริวุฏฺฐาปเนเนว, สมาโนว วินิจฺฉโยฯ
สงฺฆาทิเสสกถาฯ
[193]
ปตฺตสนฺนิจยํ ยิห, กโรนฺตี ภิกฺขุนี ปน;
เอกํ นิสฺสคฺคิยํเยว, ผุเส ปาจิตฺติยํ ตุ สาฯ
[194]
อกาลจีวรํ กาล-จีวรํ ภาชาเปนฺติยา;
ปโยเค ทุกฺกฏํ วุตฺตํ, ลาเภ นิสฺสคฺคิยํ สิยาฯ
[195]
จีวรํ ปริวตฺเตตฺวา, อจฺฉินฺทติ สเจ ปน;
ปโยเค ทุกฺกฏํ, ฉินฺเน, ตสฺสา นิสฺสคฺคิยํ สิยาฯ
[196]
วิญฺญาเปตฺวาว อญฺญํ เจ, วิญฺญาเปติ ตโต ปรํ;
ปโยเค ทุกฺกฏํ, วิญฺญา-ปิเต นิสฺสคฺคิยํ สิยาฯ
[197]
เจตาเปตฺวา หิ อญฺญํ เจ, เจตาเปติ ตโต ปรํ;
ปโยเค ทุกฺกฏํ, เจตา-ปิเต นิสฺสคฺคิยํ สิยาฯ
[198]
เอวเมว จ เสเสสุ, ฉฏฺฐาทีสุ จ สตฺตสุ;
อนนฺตรสมาโนว, อาปตฺตีนํ วินิจฺฉโยฯ
นิสฺสคฺคิยกถาฯ
[199]
ลสุณํ ขาทติ ทฺเว เจ, ทุกฺกฏํ คหเณ สิยา;
อชฺโฌหารปโยเคสุ, ปาจิตฺติ ปริยาปุตาฯ
[200]
สํหราเปนฺติยา โลมํ, สมฺพาเธ ทฺเวว โหนฺติ หิ;
ปโยเค ทุกฺกฏํ วุตฺตํ, โหติ ปาจิตฺติ สํหเฏฯ
[201]
กโรนฺตี ตลฆาตํ ตุ, ทฺเว ปนาปตฺติโย ผุเส;
ปโยเค ทุกฺกฏํ โหติ, กเต ปาจิตฺติยํ สิยาฯ
[202]
ชตุนา มฏฺฐกํ กิญฺจิ, สาทิยนฺตี ทุเว ผุเส;
ปโยเค ทุกฺกฏาทินฺเน, ตสฺสา ปาจิตฺติยํ สิยาฯ
[203]
ปญฺจมํ ตุ จตุตฺเถน, สมานมิติ ทีปเย;
อาปตฺตีนํ วิภาคสฺมิํ, วิเสโส นตฺถิ โกจิปิฯ
[204]
ภิกฺขุสฺส ภุญฺชมานสฺส, ปานีเยนุปติฏฺฐติ;
หตฺถปาเส ตุ ปาจิตฺติ, หิตฺวา ติฏฺฐติ ทุกฺกฏํฯ
[205]
วิญฺญาเปตฺวามกํ ธญฺญํ, ‘‘ภุญฺชิสฺสามี’’ติ คณฺหติ;
ทุกฺกฏํ โหติ ปาจิตฺติ, อชฺโฌหาเรสุ ทีปเยฯ
[206]
อุจฺจาราทิํ ติโรกุฏฺเฏ, ฉฑฺเฑนฺตี ทฺเว ผุเส หเว;
ปโยเค ทุกฺกฏํ วุตฺตํ, ปาจิตฺติ ฉฑฺฑิเต สิยาฯ
[207]
อุจฺจาราทิจตุกฺกํ ตุ, ฉฑฺเฑติ หริเต สเจ;
ปโยเค ทุกฺกฏํ ตสฺสา, ปาจิตฺติ ฉฑฺฑิเต สิยาฯ
[208]
นจฺจาทิํ ทสฺสนตฺถาย, สเจ คจฺฉติ ทุกฺกฏํ;
ปสฺสนฺติยาปิ ปาจิตฺติ, ตเถว จ สุณนฺติยาฯ
ลสุณวคฺโค ปฐโมฯ
[209]
ปฐเม ทุติเย เจว, ตติเย จ จตุตฺถเก;
ตุลฺโย ลสุณวคฺคสฺส, ฉฏฺเฐนิธ วินิจฺฉโยฯ
[210]
กุลานิ อุปสงฺกมฺม, นิสีทิตฺวา ปนาสเน;
สามิเก ตุ อนาปุจฺฉา, ปกฺกมนฺตี ทุเว ผุเสฯ
[211]
ปฐเมน จ ปาเทน, อโนวสฺสมติกฺกเม;
ทุกฺกฏํ โหติ, ปาจิตฺติ, ทุติยาติกฺกเม สิยาฯ
[212]
สามิเก ตุ อนาปุจฺฉา, อาสเน เจ นิสีทติ;
ปโยเค ทุกฺกฏํ โหติ, ปาจิตฺติ จ นิสีทิเตฯ
[213]
ฉฏฺเฐน สตฺตมํ สพฺพํ, สมานํ อฏฺฐเม ปน;
ปโยเค ทุกฺกฏํ, อุชฺฌา-ปิเต ปาจิตฺติยํ สิยาฯ
[214]
อตฺตานํ จาภิสปฺเปนฺตี, ทฺเว ผุเส นิรยาทินา;
ปโยเค ทุกฺกฏํ วุตฺตํ, ปาจิตฺติ อภิสปฺปิเตฯ
[215]
วธิตฺวา ปน อตฺตานํ, โรทนฺตี ตุ ทุเว ผุเส;
วธติ โรทติ ปาจิตฺติ, กโรเตกํ ตุ ทุกฺกฏํฯ
รตฺตนฺธการวคฺโค ทุติโยฯ
[216]
นคฺคา นฺหายติ ทฺเว เจว, ปโยเค ทุกฺกฏํ สิยา;
นฺหานสฺส ปริโยสาเน, ตสฺสา ปาจิตฺติยํ สิยาฯ
[217]
การาเปติ ปมาณาติ-กฺกนฺตํ อุทกสาฏิกํ;
ปโยเค ทุกฺกฏํ, การา-ปิเต ปาจิตฺติยํ สิยาฯ
[218]
จีวรํ ตุ วิสิพฺเพตฺวา, วิสิพฺพาเปตฺว วา ปน;
เนว สิพฺพนฺติยา วุตฺต-เมกํ ปาจิตฺติยํ ปนฯ
[219]
ปญฺจาหิกํ ตุ สงฺฆาฏิ-จารํ ปน อติกฺกเม;
เอกาวสฺสา ปนาปตฺติ, ปาจิตฺติ ปริทีปิตาฯ
[220]
สเจ สงฺกมนียํ ตุ, ธาเรติ ปน จีวรํ;
ปโยเค ทุกฺกฏํ วุตฺตํ, ปาจิตฺติ ปน ธาริเตฯ
[221]
คณจีวรลาภสฺส, อนฺตรายํ กโรติ เจ;
ปโยเค ทุกฺกฏํ โหติ, กเต ปาจิตฺติยํ สิยาฯ
[222]
วิภงฺคํ ปฏิพาหนฺตี, จีวรานํ ตุ ธมฺมิกํ;
ปโยเค ทุกฺกฏํ วุตฺตํ, ปาจิตฺติ ปฏิพาหิเตฯ
[223]
อคาริกาทิโน เทติ, สเจ สมณจีวรํ;
ปโยเค ทุกฺกฏํ, ทินฺเน, ปาจิตฺติ ปริยาปุตาฯ
[224]
จีวเร ทุพฺพลาสาย, กาลํ เจ สมติกฺกเม;
ปโยเค ทุกฺกฏํ วุตฺตํ, ปาจิตฺติ สมติกฺกเมฯ
[225]
ธมฺมิกํ กถินุทฺธารํ, ปฏิพาหนฺติยา ทุเว;
ปโยเค ทุกฺกฏํ โหติ, ปาจิตฺติ ปฏิพาหิเตฯ
นฺหานวคฺโค ตติโยฯ
[226]
ทุเว ภิกฺขุนิโย เอก-มญฺจสฺมิํ เจ ตุวฏฺเฏยฺยุํ;
ปโยเค ทุกฺกฏํ ตาสํ, นิปนฺเน อิตรํ สิยาฯ
[227]
ทุติยํ ปฐเมเนว, สทิสํ ตติเย ปน;
ปโยเค ทุกฺกฏํ โหติ, กเต ปาจิตฺติยํ สิยาฯ
[228]
นุปฏฺฐาเปนฺติยา วาปิ, ทุกฺขิตํ สหชีวินิํ;
เอกาเยว ปนาปตฺติ, ปาจิตฺติ ปริทีปิตาฯ
[229]
สเจ อุปสฺสยํ ทตฺวา, นิกฺกฑฺฒติ จ ภิกฺขุนิํ;
ปโยเค ทุกฺกฏํ ตสฺสา, โหติ ปาจิตฺติ กฑฺฒิเตฯ
[230]
ฉฏฺเฐ ปน จ สํสฏฺฐา, ญตฺติยา ทุกฺกฏํ ผุเส;
กมฺมวาจาย โอสาเน, ปาจิตฺติ ปริทีปิตาฯ
[231]
อนฺโตรฏฺเฐ ตุ สาสงฺเก, จาริกํ ตุ จรนฺติยา;
ปโยเค ทุกฺกฏํ วุตฺตํ, ปฏิปนฺนาย เสสกํฯ
[232]
อฏฺฐมํ นวมญฺเจว, สตฺตเมน สมํ มตํ;
ทสเม ปน เอกาว, ปาจิตฺติ ปริทีปิตาฯ
ตุวฏฺฏวคฺโค จตุตฺโถฯ
[233]
ราชาคาราทิกํ สพฺพํ, ทสฺสนตฺถาย คจฺฉติ;
ปโยเค ทุกฺกฏํ ตสฺสา, ปาจิตฺติ ยทิ ปสฺสติฯ
[234]
อาสนฺทิํ วาปิ ปลฺลงฺกํ, ปริภุญฺชนฺติยา ทุเว;
ปโยเค ทุกฺกฏํ วุตฺตํ, ภุตฺเต ปาจิตฺติยํ สิยาฯ
[235]
สุตฺตํ กนฺตนฺติยา ทฺเวว, ปโยเค ทุกฺกฏํ มตํ;
อุชฺชวุชฺชวเน ตสฺสา, ปาจิตฺติ สมุทาหเรฯ
[236]
เวยฺยาวจฺจํ คิหีนํ ตุ, ทฺเวว โหนฺติ กโรนฺติยา;
ปโยเค ทุกฺกฏํ วุตฺตํ, กเต ปาจิตฺติยํ สิยาฯ
[237]
ปญฺจเม ปน เอกาว, ปาจิตฺติ ปริทีปิตา;
ปโยเค ทุกฺกฏํ ฉฏฺเฐ, ทินฺเน ปาจิตฺติยํ สิยาฯ
[238]
สตฺตมํ ทุติเยเนว, สมาปตฺติปเภทโต;
อฏฺฐมํ ทุติเย วคฺเค, ปญฺจเมน สมํ มตํฯ
[239]
ติรจฺฉานคตํ วิชฺชํ, ทฺเวว โหนฺติ ปฐนฺติยา;
ปโยเค ทุกฺกฏํ โหติ, ปาจิตฺติ หิ ปเท ปเทฯ
[240]
ทสมํ นวเมเนว, สมานํ สพฺพถา ปน;
‘‘ปริยาปุณาติ, วาเจติ’’, ปทมตฺตํ วิเสสกํฯ
จิตฺตาคารวคฺโค ปญฺจโมฯ
[241]
สภิกฺขุกํ ตมารามํ, ชานนฺตี ปน ภิกฺขุนี;
ปวิสนฺตี อนาปุจฺฉา, ทฺเว ปนาปตฺติโย ผุเสฯ
[242]
ปฐเมน จ ปาเทน, ปริกฺเขปสฺสติกฺกเม;
ทุกฺกฏํ ปิฏเก วุตฺตํ, ปาจิตฺติ ทุติเยน ตุฯ
[243]
อกฺโกสติ จ ยา ภิกฺขุํ, ภิกฺขุนี ปริภาสติ;
ปโยเค ทุกฺกฏํ ตสฺสา, ปาจิตฺตกฺโกสิเต สิยาฯ
[244]
ยา หิ จณฺฑิกภาเวน, คณํ ตุ ปริภาสติ;
ปโยเค ทุกฺกฏํ ตสฺสา, ปริภฏฺเฐ ปเนตรํฯ
[245]
นิมนฺติตา ปวาริตา, ขาทนํ โภชนมฺปิ วา;
ภุญฺชนฺตี ภิกฺขุนี สา หิ, ทฺเว ปนาปตฺติโย ผุเสฯ
[246]
‘‘ภุญฺชิสฺสามี’’ติ ยํ กิญฺจิ, ปฏิคฺคณฺหาติ ทุกฺกฏํ;
อชฺโฌหารปโยเคสุ, ปาจิตฺติ ปริทีปเยฯ
[247]
กุลํ ตุ มจฺฉรายนฺตี, ทฺเว ปนาปตฺติโย ผุเส;
ปโยเค ทุกฺกฏํ วุตฺตํ, เสสา มจฺฉริเต สิยาฯ
[248]
อภิกฺขุเก ปนาวาเส, ภเว วสฺสํ วสนฺติยา;
ทุกฺกฏํ ปุพฺพกิจฺเจสุ, ปาจิตฺติ อรุณุคฺคเมฯ
[249]
ภิกฺขุนี อุภโตสงฺเฆ, วสฺสํวุฏฺฐา ตุ ตีหิปิ;
ฐาเนหิ อปฺปวาเรนฺตี, เอกํ ปาจิตฺติยํ ผุเสฯ
[250]
โอวาทตฺถาย วา ภิกฺขุํ, สํวาสตฺถาย วา ตถา;
น คจฺฉติ สเจ ตสฺสา, เอกํ ปาจิตฺติยํ สิยาฯ
[251]
โอวาทมฺปิ น ยาจนฺตี, น คจฺฉนฺตี อุโปสถํ;
เอกํ ปาจิตฺติยาปตฺติ-มาปชฺชติ, น สํสโยฯ
[252]
อปุจฺฉิตฺวาว สงฺฆํ วา, เภทาเปติ ปสาขชํ;
ปโยเค ทุกฺกฏํ, ภินฺเน, ปาจิตฺติ ปริยาปุตาฯ
อารามวคฺโค ฉฏฺโฐฯ
[253]
คพฺภินิํ วุฏฺฐเปนฺตี หิ, ทฺเว ปนาปตฺติโย ผุเส;
ปโยเค ทุกฺกฏํ, วุฏฺฐา-ปิเต ปาจิตฺติยํ สิยาฯ
[254]
ทุติยํ ตติยญฺเจว, จตุตฺถํ ปญฺจมมฺปิ จ;
ฉฏฺฐญฺจ สตฺตมญฺเจว, ปฐเมน สมํ มตํฯ
[255]
ภิกฺขุนี วุฏฺฐเปตฺวาน, ภิกฺขุนิํ สหชีวินิํ;
ทฺเววสฺสํ นานุคฺคณฺหนฺตี, เอกํ ปาจิตฺติยํ ผุเสฯ
[256]
นวมํ ทสมญฺเจว, อฏฺฐเมน สมํ มตํ;
ทฺวีสุ อาปตฺติเภทสฺมิํ, นานตฺตํ นตฺถิ กิญฺจิปิฯ
คพฺภินีวคฺโค สตฺตโมฯ
[257]
กุมารีภูตวคฺคสฺส, อาทิโต ปน ปญฺจปิ;
สมานา คพฺภินีวคฺเค, ปฐเมเนว สพฺพโสฯ
[258]
‘‘อลํ วุฏฺฐาปิเตนา’’ติ, วุจฺจมานา หิ ขียติ;
ปโยเค ทุกฺกฏํ, ปจฺฉา, โหติ ปาจิตฺติ ขียิเตฯ
[259]
สตฺตเม อฏฺฐเม เจว, เอกํ ปาจิตฺติยํ มตํ;
อาทินาว สมานานิ, นวมาทีนิ ปญฺจปิฯ
กุมารีภูตวคฺโค อฏฺฐโมฯ
[260]
อาปตฺติโย ผุเส ทฺเวปิ, ธาเรนฺตี ฉตฺตุปาหนํ;
ปโยเค ทุกฺกฏํ วุตฺตํ, โหติ ปาจิตฺติ ธาริเตฯ
[261]
ยาเนน ปน ยายนฺตี, ทฺเว กิราปตฺติโย ผุเส;
ปโยเค ทุกฺกฏํ โหติ, ปาจิตฺติ ยทิ ยายิเตฯ
[262]
ธาเรนฺติยา ตุ สงฺฆาณิํ, ปโยเค ทุกฺกฏํ สิยา;
ธาริเต ปน ปาจิตฺติ, จตุตฺเถปิ อยํ นโยฯ
[263]
นฺหายนฺตี คนฺธวณฺเณน, ปโยเค ทุกฺกฏํ ผุเส;
นฺหานสฺส ปริโยสาเน, ตสฺสา ปาจิตฺติยํ สิยาฯ
[264]
ฉฏฺฐมฺปิ ปญฺจเมเนว, สมานํ สพฺพถา ปน;
สตฺตเม อฏฺฐเม เจว, นวเม ทสเมปิ จฯ
[265]
ปโยเค ทุกฺกฏํ วุตฺตํ, ปาจิตฺตุมฺมทฺทิเต สิยา;
อาปตฺตีนํ วิภาคสฺมิํ, นตฺถิ กาจิ วิเสสตาฯ
[266]
อนาปุจฺฉา ตุ ภิกฺขุสฺส, ปุรโต ยา นิสีทติ;
ปโยเค ทุกฺกฏํ ตสฺสา, ปาจิตฺติ ตุ นิสีทิเตฯ
[267]
อโนกาสกตํ ภิกฺขุํ, ปญฺหํ ปุจฺฉนฺติยา ปน;
ปโยเค ทุกฺกฏํ โหติ, วุตฺตา ปาจิตฺติ ปุจฺฉิเตฯ
[268]
สํกจฺจิกํ วินา คามํ, ปทสา ปวิสนฺติยา;
ปฐเมเนว อาราม-วคฺคสฺส สทิสํ วเทฯ
ฉตฺตุปาหนวคฺโค นวโมฯ
ปาจิตฺติยกถาฯ
[269]
อฏฺฐสุ ทุวิธาปตฺติ, ปาฏิเทสนิเยสุปิ;
วิญฺญาเปตฺวา สเจ สปฺปิํ, ‘‘ภุญฺชิสฺสามี’’ติ คณฺหติฯ
[270]
ตโต ภิกฺขุนิยา ตสฺสา, โหติ อาปตฺติ ทุกฺกฏํ;
อชฺโฌหาเรสุ สพฺเพสุ, ปาฏิเทสนิยํ สิยาฯ
ปาฏิเทสนียกถาฯ
[271]
อิมํ วิทิตฺวา ปรมํ ปนุตฺตรํ;
นิรุตฺตรํ อตฺถวเสน ภิกฺขุ;
สุเขน ปญฺญตฺตมหาสมุทฺทํ;
ทุรุตฺตรํ อุตฺตรเตว ธีโรฯ
[272]
ยสฺมา ตสฺมา อสฺมิํ โยคํ;
อุสฺมายุตฺโต ยุตฺโต กาตุํ;
สตฺโต สตฺโต กงฺขจฺเฉเท;
สตฺเถ สตฺเถ นิจฺจํ นิจฺจํฯ
ภิกฺขุนีวิภงฺโค นิฏฺฐิโตฯ
จตุวิปตฺติกถา
[273]
กติ อาปตฺติโย สีล-วิปตฺติปจฺจยา ปน;
จตสฺโสว สิยุํ สีล-วิปตฺติปจฺจยา ปนฯ
[274]
ชานํ ปาราชิกํ ธมฺมํ, สเจ ฉาเทติ ภิกฺขุนี;
จุตา, ถุลฺลจฺจยํ โหติ, สเจ เวมติกา สิยาฯ
[275]
ปาจิตฺติ ภิกฺขุ สงฺฆาทิ-เสสํ ฉาเทติ เจ ปน;
อตฺตโน ปน ทุฏฺฐุลฺลํ, ฉาเทนฺโต ทุกฺกฏํ ผุเสฯ
[276]