อุภโตพฺยญฺชนา อิตฺถี, คพฺภํ คณฺหาติ อตฺตนา;
คณฺหาเปติ ปรํ คพฺภํ, ตสฺมา มาตาปิตา จ สาฯ
ญ.
คาเม วา ยทิ วารญฺเญ, ยํ ปเรสํ มมายิตํ;
น หรนฺโตว ตํ เถยฺยา, กถํ ปาราชิโก ภเว;
ฏ.
เถยฺยสํวาสโก เอโส, ลิงฺคสํวาสเถนโก;
ปรภณฺฑํ อคณฺหนฺโต, เตน โหติ ปราชิโตฯ
ฐ.
นาริํ รูปวติํ ภิกฺขุ, รตฺตจิตฺโต อสญฺญโต;
เมถุนํ ตาย กตฺวาปิ, น โส ปาราชิโก กถํ;
ฑ.
อจฺฉราสทิสํ นาริํ, สุปินนฺเตน ปสฺสติ;
ตาย เมถุนสํโยเค, กเตปิ น ภวิสฺสติฯ
ฒ.
พหิทฺธา เคหโต ภิกฺขุ, อิตฺถี คพฺภนฺตรํ คตา;
ฉิทฺทํ เคหสฺส เนวตฺถิ, กถํ เมถุนโต จุโต;
ณ.
อนฺโตทุสฺสกุฏิฏฺเฐน, มาตุคาเมน เมถุนํ;
สนฺถตาทิวเสเนว, กตฺวา โหติ ปราชิโตฯ
ต.
สุตฺเต จ วินเยเยว, ขนฺธเก สานุโลมิเก;
สพฺพตฺถ นิปุณา ธีรา, อิเม ปญฺเห ภณนฺติ เตฯ
ถ.
ขนฺธเก ปริวาเร จ, วินเย สานุโลมิเก;
อาทโร กรณีโยว, ปฏุภาวํ ปนิจฺฉิตาฯ
เสทโมจนกถาฯ
ปกิณฺณกวินิจฺฉยกถา
[3029]
ฉตฺตํ ปณฺณมยํ กิญฺจิ, พหิ อนฺโต จ สพฺพโส;
ปญฺจวณฺเณน สุตฺเตน, สิพฺพิตุํ น จ วฏฺฏติฯ
[3030]
ฉินฺทิตุํ อฑฺฒจนฺทํ วา, ปณฺเณ มกรทนฺตกํ;
ฆฏกํ วาฬรูปํ วา, เลขา ทณฺเฑ น วฏฺฏติฯ
[3031]
สิพฺพิตุํ เอกวณฺเณน, ฉตฺตํ สุตฺเตน วฏฺฏติ;
ถิรตฺถํ, ปญฺจวณฺณานํ, ปญฺชรํ วา วินนฺธิตุํฯ
[3032]
ฆฏกํ วาฬรูปํ วา, เลขา วา ปน เกวลา;
ภินฺทิตฺวา วาปิ ฆํสิตฺวา, ธาเรตุํ ปน วฏฺฏติฯ
[3033]
อหิฉตฺตกสณฺฐานํ, ทณฺฑพุนฺทมฺหิ วฏฺฏติ;
อุกฺกิริตฺวา กตา เลขา, พนฺธนตฺถาย วฏฺฏติฯ
[3034]
นานาวณฺเณหิ สุตฺเตหิ, มณฺฑนตฺถาย จีวรํ;
สมํ สตปทาทีนํ, สิพฺพิตุํ น จ วฏฺฏติฯ
[3035]
ปตฺตสฺส ปริยนฺเต วา, ตถา ปตฺตมุเขปิ วา;
เวณิํ สงฺขลิกํ วาปิ, กโรโต โหติ ทุกฺกฏํฯ
[3036]
ปฏฺฏมฺปิ คณฺฐิปาสานํ, อฏฺฐโกณาทิกํวิธิํ;
ตตฺถคฺฆิยคทารูปํ, มุคฺคราทิํ กโรนฺติ จฯ
[3037]
ตตฺถ กกฺกฏกกฺขีนิ, อุฏฺฐาเปนฺติ น วฏฺฏติ;
สุตฺตา จ ปิฬกา ตตฺถ, ทุวิญฺเญยฺยาว ทีปิตาฯ
[3038]
จตุโกณาว วฏฺฏนฺติ, คณฺฐิปาสกปฏฺฏกา;
กณฺณโกเณสุ สุตฺตานิ, รตฺเต ฉินฺเทยฺย จีวเรฯ
[3039]
สูจิกมฺมวิการํ วา, อญฺญํ วา ปน กิญฺจิปิ;
จีวเร ภิกฺขุนา กาตุํ, การาเปตุํ น วฏฺฏติฯ
[3040]
โย จ ปกฺขิปติ ภิกฺขุ จีวรํ;
กญฺชิปิฏฺฐขลิอลฺลิกาทิสุ;
วณฺณมฏฺฐมภิปตฺถยํ ปรํ;
ตสฺส นตฺถิ ปน มุตฺติ ทุกฺกฏาฯ
[3041]
สูจิหตฺถมลาทีนํ , กรเณ จีวรสฺส จ;
ตถา กิลิฏฺฐกาเล จ, โธวนตฺถํ ตุ วฏฺฏติฯ
[3042]
รชเน ปน คนฺธํ วา, เตลํ วา ลาขเมว วา;
กิญฺจิ ปกฺขิปิตุํ ตตฺถ, ภิกฺขุโน น จ วฏฺฏติฯ
[3043]
สงฺเขน มณินา วาปิ, อญฺเญนปิ จ เกนจิ;
จีวรํ น จ ฆฏฺเฏยฺย, ฆํสิตพฺพํ น โทณิยาฯ
[3044]
จีวรํ โทณิยํ กตฺวา, นาปิ ฆฏฺเฏยฺย มุฏฺฐินา;
รตฺตํ ปหริตุํ กิญฺจิ, หตฺเถเหว จ วฏฺฏติฯ
[3045]
คณฺฐิเก ปน เลขา วา, ปิฬกา วา น วฏฺฏติ;
กปฺปพินฺทุวิกาโร วา, ปาฬิกณฺณิกเภทโตฯ
[3046]
ถาลกสฺส จ ปตฺตสฺส, พหิ อนฺโตปิ วา ปน;
อารคฺเคน กตา เลขา, น จ วฏฺฏติ กาจิปิฯ
[3047]
อาโรเปตฺวา ภมํ ปตฺตํ, มชฺชิตฺวา เจ ปจนฺติ จ;
‘‘มณิวณฺณํ กริสฺสาม’’, อิติ กาตุํ น วฏฺฏติฯ
[3048]
ปตฺตมณฺฑลเก กิญฺจิ, ภิตฺติกมฺมํ น วฏฺฏติ;
น โทโส โกจิ ตตฺถสฺส, กาตุํ มกรทนฺตกํฯ
[3049]
น ธมฺมกรณจฺฉตฺเต, เลขา กาจิปิ วฏฺฏติ;
กุจฺฉิยํ วา ฐเปตฺวา ตํ, เลขํ ตุ มุขวฏฺฏิยํฯ
[3050]
สุตฺตํ วา ทิคุณํ กตฺวา, โกฏฺเฏนฺติ จ ตหิํ ตหิํ;
กายพนฺธนโสภตฺถํ, ตํ น วฏฺฏติ ภิกฺขุโนฯ
[3051]
ทสามุเข ทฬฺหตฺถาย, ทฺวีสุ อนฺเตสุ วฏฺฏติ;
มาลากมฺมลตากมฺม-จิตฺติกมฺปิ น วฏฺฏติฯ
[3052]
อกฺขีนิ ตตฺถ ทสฺเสตฺวา, โกฏฺฏิเต ปน กา กถา;
กกฺกฏกฺขีนิ วา ตตฺถ, อุฏฺฐาเปตุํ น วฏฺฏติฯ
[3053]
ฆฏํ เทฑฺฑุภสีสํ วา, มกรสฺส มุขมฺปิ วา;
วิการรูปํ ยํ กิญฺจิ, น วฏฺฏติ ทสามุเขฯ
[3054]
อุชุกํ มจฺฉกณฺฏํ วา, มฏฺฐํ วา ปน ปฏฺฏิกํ;
ขชฺชูริปตฺตกาการํ, กตฺวา วฏฺฏติ โกฏฺฏิตํฯ
[3055]
ปฏฺฏิกา สูกรนฺตนฺติ, ทุวิธํ กายพนฺธนํ;
รชฺชุกา ทุสฺสปฏฺฏาทิ, สพฺพํ ตสฺสานุโลมิกํฯ
[3056]
มุรชํ มทฺทวีณญฺจ, เทฑฺฑุภญฺจ กลาพุกํ;
รชฺชุโย น จ วฏฺฏนฺติ, ปุริมา ทฺเวทสา สิยุํฯ
[3057]
ทสา ปามงฺคสณฺฐานา, นิทฺทิฏฺฐา กายพนฺธเน;
เอกา ทฺวิติจตสฺโส วา, วฏฺฏนฺติ น ตโต ปรํฯ
[3058]
เอกรชฺชุมยํ วุตฺตํ, มุนินา กายพนฺธนํ;
ตญฺจ ปามงฺคสณฺฐานํ, เอกมฺปิ จ น วฏฺฏติฯ
[3059]
รชฺชุเก เอกโต กตฺวา, พหู เอกาย รชฺชุยา;
นิรนฺตรญฺหิ เวเฐตฺวา, กตํ วฏฺฏติ พนฺธิตุํฯ
[3060]
ทนฺตกฏฺฐวิสาณฏฺฐิ-โลหเวฬุนฬพฺภวา;
ชตุสงฺขมยาสุตฺต-ผลชา วิธกา มตาฯ
[3061]
กายพนฺธนวิเธปิ, วิกาโร น จ วฏฺฏติ;
ตตฺถ ตตฺถ ปริจฺเฉท-เลขามตฺตํ ตุ วฏฺฏติฯ
[3062]
มาลากมฺมลตากมฺม-นานารูปวิจิตฺติตา ;
น จ วฏฺฏติ ภิกฺขูนํ, อญฺชนี ชนรญฺชนีฯ
[3063]
ตาทิสํ ปน ฆํสิตฺวา, เวเฐตฺวา สุตฺตเกน วา;
วฬญฺชนฺตสฺส ภิกฺขุสฺส, น โทโส โกจิ วิชฺชติฯ
[3064]
วฏฺฏา วา จตุรสฺสา วา, อฏฺฐํสา วาปิ อญฺชนี;
วฏฺฏเตวาติ นิทฺทิฏฺฐา, วณฺณมฏฺฐา น วฏฺฏติฯ
[3065]
ตถาญฺชนิสลากาปิ , อญฺชนิถวิกาย จ;
นานาวณฺเณหิ สุตฺเตหิ, จิตฺตกมฺมํ น วฏฺฏติฯ
[3066]
เอกวณฺเณน สุตฺเตน, สิปาฏิํ เยน เกนจิ;
ยํ กิญฺจิ ปน สิพฺเพตฺวา, วฬญฺชนฺตสฺส วฏฺฏติฯ
[3067]
มณิกํ ปิฬกํ วาปิ, ปิปฺผเล อารกณฺฏเก;
ฐเปตุํ ปน ยํ กิญฺจิ, น จ วฏฺฏติ ภิกฺขุโนฯ
[3068]
ทณฺฑเกปิ ปริจฺเฉท-เลขามตฺตํ ตุ วฏฺฏติ;
วลิตฺวา จ นขจฺเฉทํ, กโรนฺตีติ หิ วฏฺฏติฯ
[3069]
อุตฺตรารณิยํ วาปิ, ธนุเก เปลฺลทณฺฑเก;
มาลากมฺมาทิ ยํ กิญฺจิ, วณฺณมฏฺฐํ น วฏฺฏติฯ
[3070]
สณฺฑาเส ทนฺตกฏฺฐานํ, ตถา เฉทนวาสิยา;
ทฺวีสุ ปสฺเสสุ โลเหน, พนฺธิตุํ ปน วฏฺฏติฯ
[3071]
ตถา กตฺตรทณฺเฑปิ, จิตฺตกมฺมํ น วฏฺฏติ;
วฏฺฏเลขาว วฏฺฏนฺติ, เอกา วา ทฺเวปิ เหฏฺฐโตฯ
[3072]
วิสาเณ นาฬิยํ วาปิ, ตเถวามณฺฑสารเก;
เตลภาชนเก สพฺพํ, วณฺณมฏฺฐํ ตุ วฏฺฏติฯ
[3073]
ปานียสฺส อุฬุงฺเกปิ, โทณิยํ รชนสฺสปิ;
ฆเฏ ผลกปีเฐปิ, วลยาธารกาทิเกฯ
[3074]
ตถา ปตฺตปิธาเน จ, ตาลวณฺเฏ จ พีชเน;
ปาทปุญฺฉนิยํ วาปิ, สมฺมุญฺชนิยเมว จฯ
[3075]
มญฺเจ ภูมตฺถเร ปีเฐ, ภิสิพิมฺโพหเนสุ จ;
มาลากมฺมาทิกํ จิตฺตํ, สพฺพเมว จ วฏฺฏติฯ
[3076]
นานามณิมยตฺถมฺภ-กวาฏทฺวารภิตฺติกํ ;
เสนาสนมนุญฺญาตํ, กา กถา วณฺณมฏฺฐเกฯ
[3077]
โสวณฺณิยํ ทฺวารกวาฏพทฺธํ;
สุวณฺณนานามณิภิตฺติภูมิํ;
น กิญฺจิ เอกมฺปิ นิเสธนียํ;
เสนาสนํ วฏฺฏติ สพฺพเมวฯ
[3078]
พุทฺธํ ธมฺมญฺจ สงฺฆญฺจ, น อุทฺทิสฺส ทวํ กเร;
มูคพฺพตาทิกํ เนว, คณฺเหยฺย ติตฺถิยพฺพตํฯ
[3079]
กายํ วา องฺคชาตํ วา, อูรุํ วา น ตุ ทสฺสเย;
ภิกฺขุนีนํ ตุ ตา วาปิ, น สิญฺเจ อุทกาทินาฯ
[3080]
วสฺสมญฺญตฺถ วุฏฺโฐ เจ, ภาคมญฺญตฺถ คณฺหติ;
ทุกฺกฏํ ปุน ทาตพฺพํ, คีวา นฏฺเฐปิ ชชฺชเรฯ
[3081]
โจทิโต โส สเจ เตหิ, ภิกฺขูหิ น ทเทยฺยตํ;
ธุรนิกฺเขปเน เตสํ, ภณฺฑคฺเฆเนว การเยฯ
[3082]
อกปฺปิยสมาทานํ, กโรโต โหติ ทุกฺกฏํ;
ทวา สิลํ ปวิชฺฌนฺโต, ทุกฺกฏา น จ มุจฺจติฯ
[3083]
คิหีโคปกทานสฺมิํ, น โทโส โกจิ คณฺหโต;
ปริจฺเฉทนโย วุตฺโต, สงฺฆเจติยสนฺตเกฯ
[3084]
ยานํ ปุริสสํยุตฺตํ, หตฺถวฏฺฏกเมว วา;
ปาฏงฺกิญฺจ คิลานสฺส, วฏฺฏเตวาภิรูหิตุํฯ
[3085]
น จ ภิกฺขุนิยา สทฺธิํ, สมฺปโยเชยฺย กิญฺจิปิ;
ทุกฺกฏํ ภิกฺขุนิํ ราคา, โอภาเสนฺตสฺส ภิกฺขุโนฯ
[3086]
ภิกฺขุนีนํ หเว ภิกฺขุ, ปาติโมกฺขํ น อุทฺทิเส;
อาปตฺติํ วา สเจ ตาสํ, ปฏิคฺคณฺเหยฺย ทุกฺกฏํฯ
[3087]
อตฺตโน ปริโภคตฺถํ, ทินฺนมญฺญสฺส กสฺสจิ;
ปริโภคมกตฺวาว, ททโต ปน ทุกฺกฏํฯ
[3088]
อสปฺปายํ สเจ สพฺพํ, อปเนตุมฺปิ วฏฺฏติ;
อคฺคํ คเหตฺวา ทาตุํ วา, ปตฺตาทีสุปฺยยํ นโยฯ
[3089]
ปญฺจวคฺคูปสมฺปทา , คุณงฺคุณอุปาหนา;
จมฺมตฺถาโร ธุวนฺหานํ, มชฺฌเทเส น วฏฺฏติฯ
[3090]
สมฺพาธสฺส จ สามนฺตา, สตฺถกมฺมํ ทุวงฺคุลา;
วาริตํ, วตฺถิกมฺมมฺปิ, สมฺพาเธเยว สตฺถุนาฯ
[3091]
ปณฺณานิ อชฺชุกาทีนํ, โลณํ วา อุณฺหยาคุยา;
ปกฺขิปิตฺวาน ปากตฺถํ, จาเลตุํ น จ วฏฺฏติฯ
[3092]
สเจ ปริสมญฺญสฺส, อุปฬาเลติ ทุกฺกฏํ;
ตตฺถ จาทีนวํ ตสฺส, วตฺตุํ ปน จ วฏฺฏติฯ
[3093]
‘‘มกฺขนํ คูถมุตฺเตหิ, คเตน นฺหายิตุํ วิย;
กตํ นิสฺสาย ทุสฺสีลํ, ตยา วิหรตา’’ติ จฯ
[3094]
ภตฺตคฺเค ยาคุปาเน จ, อนฺโตคาเม จ วีถิยํ;
อนฺธกาเร อนาวชฺโช, เอกาวตฺโต จ พฺยาวโฏฯ
[3095]
สุตฺโต ขาทญฺจ ภุญฺชนฺโต, วจฺจํ มุตฺตมฺปิ วา กรํ;
วนฺทนา เตรสนฺนํ ตุ, อยุตฺตตฺเถน วาริตาฯ
[3096]
นคฺโค อนุปสมฺปนฺโน, นานาสํวาสโกปิ จ;
โย ปจฺฉา อุปสมฺปนฺโน, อุกฺขิตฺโต มาตุคามโกฯ
[3097]
เอกาทส อภพฺพา จ, ครุกฏฺฐา จ ปญฺจิเม;
วนฺทโต ทุกฺกฏํ วุตฺตํ, พาวีสติ จ ปุคฺคเลฯ
[3098]
โย ปุเร อุปสมฺปนฺโน, นานาสํวาสวุฑฺฒโก;
ธมฺมวาที จ สมฺพุทฺโธ, วนฺทนียา ตโย อิเมฯ
[3099]
ตชฺชนาทิกเต เอตฺถ, จตุโร ปน ปุคฺคเล;
วนฺทโตปิ อนาปตฺติ, เตหิ กมฺมญฺจ กุพฺพโตฯ
[3100]
อธิฏฺฐานํ ปเนกสฺส, ทฺวินฺนํ วา ติณฺณเมว วา;
ทิฏฺฐาวิกมฺมมุทฺทิฏฺฐํ, ตโต อุทฺธํ นิวารณํฯ
[3101]
สนฺทิฏฺโฐ โหติ สมฺภตฺโต, ชีวตาลปิโตปิ จ;
คหิตตฺตมโน โหติ, วิสฺสาโส ปญฺจธา สิยาฯ
[3102]
สีลทิฏฺฐิวิปตฺติ จ, อาจาราชีวสมฺภวา;
วิปตฺติโย จตสฺโสว, วุตฺตา อาทิจฺจพนฺธุนาฯ
[3103]
ตตฺถ อปฺปฏิกมฺมา จ, ยา จ วุฏฺฐานคามินี;
อาปตฺติโย ทุเว สีล-วิปตฺตีติ ปกาสิตาฯ
[3104]
อนฺตคฺคาหิกทิฏฺฐิ จ, ยา ทิฏฺฐิ ทสวตฺถุกา;
อยํ ทิฏฺฐิวิปตฺตีติ, ทุวิธา ทิฏฺฐิ ทีปิตาฯ
[3105]
เทสนาคามินิกา ยา จ, ปญฺจ ถุลฺลจฺจยาทิกา;
วุตฺตาจารวิปตฺตีติ, อาจารกุสเลน สาฯ
[3106]
กุหนาทิปฺปวตฺโต หิ, มิจฺฉาชีโวติ ทีปิโต;
อาชีวปจฺจยาปตฺติ, ฉพฺพิธาติ ปกาสิตาฯ
[3107]
กมฺมุนา ลทฺธิสีมาหิ, นานาสํวาสกา ตโย;
อุกฺขิตฺโต ติวิโธ กมฺม-นานาสํวาสโก มโตฯ
[3108]
อธมฺมวาทิปกฺขสฺมิํ, นิสินฺโนว วิจินฺติยํ;
‘‘ธมฺมวาที ปเนเต’’ติ, อุปฺปนฺเน ปน มานเสฯ
[3109]
นานาสํวาสโก นาม, ลทฺธิยายํ ปกาสิโต;
ตตฺรฏฺโฐ ปน โส ทฺวินฺนํ, กมฺมํ โกเปติ สงฺฆิกํฯ
[3110]
พหิสีมาคโต สีมา-นานาสํวาสโก มโต;
นานาสํวาสกา เอวํ, ตโย วุตฺตา มเหสินาฯ
[3111]
จุโต อนุปสมฺปนฺโน, นานาสํวาสกา ตโย;
ภิกฺขูเนกาทสาภพฺพา, อสํวาสา อิเม สิยุํฯ
[3112]
อสํวาสสฺส สพฺพสฺส, ตถา กมฺมารหสฺส จ;
สงฺเฆ อุมฺมตฺตกาทีนํ, ปฏิกฺเขโป น รูหติฯ
[3113]
สสํวาเสกสีมฏฺฐ-ปกตตฺตสฺส ภิกฺขุโน;
วจเนน ปฏิกฺเขโป, รูหตานนฺตรสฺสปิฯ
[3114]
ภิกฺขุ อาปชฺชตาปตฺติํ, อากาเรหิ ปนจฺฉหิ;
วุตฺตา สมณกปฺปา จ, ปญฺจ, ปญฺจ วิสุทฺธิโยฯ
[3115]
นิทานํ ปุคฺคลํ วตฺถุํ, วิธิํ ปญฺญตฺติยา ปน;
วิปตฺตาปตฺตนาปตฺติ, สมุฏฺฐานนยมฺปิ จฯ
[3116]
วชฺชกมฺมกฺริยาสญฺญา, จิตฺตาณตฺติวิธิํ ปน;
ตเถวงฺควิธานญฺจ, เวทนา กุสลตฺติกํฯ
[3117]
สตฺตรสวิธํ เอตํ, ทสฺเสตฺวา ลกฺขณํ พุโธ;
สิกฺขาปเทสุ โยเชยฺย, ตตฺถ ตตฺถ ยถารหํฯ
[3118]
นิทานํ ตตฺถ เวสาลี, ตถา ราชคหํ ปุรํ;
สาวตฺถาฬวิ โกสมฺพี, สกฺกภคฺคา ปกาสิตาฯ
[3119]
ทส เวสาลิยา วุตฺตา, เอกวีสํ คิริพฺพเช;
สตานิ หิ ฉ อูนานิ, ตีณิ สาวตฺถิยา สิยุํฯ
[3120]
ฉ ปนาฬวิยํ วุตฺตา, อฏฺฐ โกสมฺพิยํ กตา;
อฏฺฐ สกฺเกสุ ปญฺญตฺตา, ตโย ภคฺเค ปกาสิตาฯ
[3121]
เตวีสติวิธา วุตฺตา, สุทินฺนธนิยาทโย;
ภิกฺขูนํ ปาติโมกฺขสฺมิํ, อาทิกมฺมิกปุคฺคลาฯ
[3122]
ภิกฺขุนีนํ ตถา ปาติ-โมกฺขสฺมิํ อาทิกมฺมิกา;
ถุลฺลนนฺทาทโย สตฺต, สพฺเพ ติํส ภวนฺติ เตฯ
[3123]
ตรุํ ติมูลํ นวปตฺตเมนํ;
ทฺวยงฺกุรํ สตฺตผลํ ฉปุปฺผํ;
ชานาติ โย ทฺวิปฺปภวํ ทฺวิสาขํ;
ชานาติ ปญฺญตฺติมเสสโต โสฯ
[3124]
อิติ ปรมมิมํ วินิจฺฉยํ;
มธุรปทตฺถมนากุลํ ตุ โย;
ปฐติ สุณติ ปุจฺฉเต จ โส;
ภวตุปาลิสโม วินิจฺฉเยฯ
อิติ วินยวินิจฺฉเย ปกิณฺณกวินิจฺฉยกถา สมตฺตาฯ
กมฺมฏฺฐานภาวนาวิธานกถา
[3125]
ปาโมกฺเข ปาติโมกฺขสฺมิํ, มุเข โมกฺขปฺปเวสเน;
สพฺพทุกฺขกฺขเย วุตฺเต, วุตฺตเมวิตรตฺตยํฯ
[3126]
อิทํ จตุพฺพิธํ สีลํ, ญตฺวา ตตฺถ ปติฏฺฐิโต;
สมาธิํ ปุน ภาเวตฺวา, ปญฺญาย ปริมุจฺจติฯ
[3127]
ทสานุสฺสติโย วุตฺตา, กสิณา จ ทสาสุภา;
จตสฺโส อปฺปมญฺญาโย, ตถารุปฺปา ปรทฺวยํฯ
[3128]
อิจฺเจวํ ปน สพฺพมฺปิ, จตฺตาลีสวิธํ สิยา;
กมฺมฏฺฐานํ สมุทฺทิฏฺฐํ, มมฺมฏฺฐานํ มโนภุโนฯ
[3129]
อุปจารปฺปนาโต จ, ฌานเภทา อติกฺกมา;
วฑฺฒนาวฑฺฒนา จาปิ, ตถารมฺมณภูมิโตฯ
[3130]
คหณา ปจฺจยา ภิยฺโย, ตถา จริยานุกูลโต;
วิเสโส อยเมเตสุ, วิญฺญาตพฺโพ วิภาวินาฯ
[3131]