เมนู

โอวาโท ภิกฺขุนีนํ ตุ, สมฺมุตีติ ปกาสิตา;

มานตฺตปริวาสานํ, ทานํ ‘‘ทาน’’นฺติ วุจฺจติฯ

[3008]

ปุน มูลาปฏิกฺกสฺโส, ‘‘นิคฺคโห’’ติ ปวุจฺจติ;

อุกฺขิตฺตสฺสานุวตฺติกา, อฏฺฐ ยาวตตียกาฯ

[3009]

อริฏฺโฐ จณฺฑกาฬี จ, เอกาทส ภวนฺติเม;

อิเมสํ ตุ วสา เญยฺยา, ทเสกา สมนุภาสนา

[3010]

อุปสมฺปทกมฺมญฺจ, กมฺมมพฺภานสญฺญิตํ;

อิทํ ญตฺติจตุตฺเถ ตุ, สตฺตมํ กมฺมลกฺขณํ

[3011]

อปโลกนกมฺมญฺจา-ปโลเกตฺวาว การเย;

ญตฺติยา ทุติเยนาปิ, จตุตฺเถน น การเยฯ

[3012]

ญตฺติทุติยกมฺมานิ, ลหุกานตฺถิ กานิจิ;

กาตพฺพานปโลเกตฺวา, สพฺพา สมฺมุติโย สิยุํฯ

[3013]

เสสานิ อปโลเกตฺวา, กาตุํ ปน น วฏฺฏติ;

ยถาวุตฺตนเยเนว, เตน เตเนว การเยฯ

จตุพฺพิธกมฺมกถาฯ

กมฺมวิปตฺติกถา

[3014]

วตฺถุโต ญตฺติโต เจว, อนุสฺสาวนสีมโต;

ปริสโตติ ปญฺเจว, กมฺมโทสา ปกาสิตาฯ

[3015]

สมฺมุขากรณียํ ยํ, ตํ กโรติ อสมฺมุขา;

กมฺมํ วตฺถุวิปนฺนํ ตํ, อธมฺมนฺติ ปวุจฺจติฯ

[3016]

อสมฺมุขากรณียานิ, อฏฺเฐว จ ภวนฺติ หิ;

ปตฺตนิกฺกุชฺชนญฺเจว, ปตฺตสฺสุกฺกุชฺชนมฺปิ จฯ

[3017]

ปกาสนียกมฺมญฺจ , เสกฺขอุมฺมตฺตสมฺมุติ;

อวนฺทิโย ตถา พฺรหฺม-ทณฺโฑ ทูตูปสมฺปทาฯ

[3018]

อิมานฏฺฐ ฐเปตฺวาน, เสสานิ ปน สพฺพโส;

สมฺมุขากรณียานิ, กมฺมานิ สุคโตพฺรวิฯ

[3019]

ญตฺติโต ปน ปญฺเจว, วิปชฺชนนยา มตา;

น ปรามสติ วตฺถุญฺจ, สงฺฆํ ปุคฺคลเมว วาฯ

[3020]

น ปรามสติ ญตฺติํ วา, ปจฺฉา ญตฺติํ ฐเปติ วา;

ปญฺจเหเตหิ กมฺมานิ, ญตฺติโตว วิปชฺชเรฯ

[3021]

อนุสฺสาวนโต ปญฺจ, กมฺมโทสา ปกาสิตา;

น ปรามสติ วตฺถุํ วา, สงฺฆํ ปุคฺคลเมว วาฯ

[3022]

หาเปติ สาวนํ วาปิ, สาเวตสมเยปิ วา;

เอวํ ปน วิปชฺชนฺติ, อนุสฺสาวนโตปิ จฯ

[3023]

เอกาทสหิ สีมาหิ, สีมโต กมฺมโทสตา;

วุตฺตา อุโปสเถ ตาว, ขนฺธเก สพฺพโส มยาฯ

[3024]

จตุวคฺเคน กาตพฺเพ, กมฺมปฺปตฺตา อนาคตา;

ฉนฺโท จ น ปนานีโต, ปฏิกฺโกสนฺติ สมฺมุขาฯ

[3025]

เอวํ ติวงฺคิโก โทโส, ปริสาย วสา สิยา;

อาคตา กมฺมปตฺตา จ, ฉนฺโท จ น ปนาคโตฯ

[3026]

สมฺมุขา ปฏิเสเธนฺติ, ทุติเย จตุวคฺคิเก;

อาคตา กมฺมปตฺตา จ, ฉนฺโทปิ จ สมาหโฏฯ

[3027]

ปฏิกฺโกโสว เอตฺถตฺถิ, ตติเย จตุวคฺคิเก;

เอวํ ปญฺจาทิวคฺเคสุ, สงฺเฆสุ ติวิเธสุปิฯ

[3028]

จตุตฺถิกา สิยุํ โทสา, ทส ทฺเว ปริสาวสา;

เอวํ ทฺวาทสธา เอตฺถ, กมฺมานิ หิ วิปชฺชเรฯ

กมฺมวิปตฺติกถาฯ

เสทโมจนกถา

ก.

โสฬสปริวารสฺส , ปริวารสฺส สาทรา;

สุณาถ นิปุเณ ปญฺเห, คูฬฺหตฺเถ ภณโต มมฯ

ข.

ทิวาปชฺชติ โน รตฺติํ, รตฺติํเยว จ โน ทิวา;

กถญฺจ ปฏิคฺคณฺหนฺโต, น คณฺหนฺโต กถํ ปนฯ

ค.

ฉินฺทนฺตสฺส สิยาปตฺติ, ตเถวาฉินฺทโตปิ จ;

ฉาเทนฺตสฺส ตถาปตฺติ-น ฉาเทนฺตสฺส ภิกฺขุโนฯ

ฆ.

กา จาปตฺติ สมาปตฺติ-ลาภิโนเยว ภิกฺขุโน;

อสมาปตฺติลาภิสฺส, กา จ นามสฺส สา ภเวฯ

ง.

ครุกํ ภณโต สจฺจํ, อลิกํ ภณโต สิยุํ;

ลหุํ สจฺจํ ภณนฺตสฺส, มุสา จ ภณโต ครุํฯ

จ.

ปวิสนฺโต จ อารามํ, อาปชฺชติ น นิกฺขมํ;

นิกฺขมนฺโตว อาปตฺติ, น เจว ปวิสํ ปน;

ฉ.

สมาทิยนฺโต อสมาทิยนฺโต;

อนาทิยนฺโตปิ จ อาทิยนฺโต;

เทนฺโต อเทนฺโตปิ สิยา สโทโส;

ตถา กโรนฺโตปิ จ โน กโรนฺโตฯ

ช.

อาปชฺชติ จ ธาเรนฺโต, อธาเรนฺโต ตเถว จ;

ทฺวินฺนํ มาตา ปิตา สาว, กถํ โหติ? ภณาหิ เมฯ

ฌ.