จตุพฺพิธกมฺมกถา
[2983]
จตฺตาริมานิ กมฺมานิ, อปโลกนสญฺญิตํ;
ญตฺติ ญตฺติทุติยญฺจ, กมฺมํ ญตฺติจตุตฺถกํฯ
[2984]
อปโลกนกมฺมํ ตุ, ปญฺจ ฐานานิ คจฺฉติ;
ญตฺติกมฺมํ นวฏฺฐานํ, ทุติยํ สตฺต คจฺฉติฯ
[2985]
ตถา ญตฺติจตุตฺถมฺปิ, สตฺต ฐานานิ คจฺฉติ;
นิสฺสารณญฺจ โอสาโร, ภณฺฑุกํ พฺรหฺมทณฺฑโกฯ
[2986]
อปโลกนกมฺมญฺหิ, กมฺมลกฺขณปญฺจมํ;
นิสฺสารณญฺจ โอสารํ, สมณุทฺเทสโต วเทฯ
[2987]
ภณฺฑุกํ ปพฺพชนฺเตน, ฉนฺเนน พฺรหฺมทณฺฑกํ;
อญฺญสฺสปิ จ กาตพฺโพ, ตถารูปสฺส ภิกฺขุโนฯ
[2988]
สพฺโพ สนฺนิปติตฺวาน, อาปุจฺฉิตฺวาน สพฺพโส;
จีวราทิปริกฺขารํ, สงฺโฆ ยํ เทติ ตสฺส หิฯ
[2989]
ติกฺขตฺตุํ อปโลเกตฺวา, ภิกฺขูนํ รุจิยา ปน;
เอวํ สงฺฆสฺส ทานํ ตุ, โหติ ตํ กมฺมลกฺขณํฯ
[2990]
นิสฺสารณมโถสาโร , อุโปสถปวารณา;
สมฺมุติ เจว ทานญฺจ, ปฏิคฺคาโห จ สตฺตโมฯ
[2991]
ปจฺจุกฺกฑฺฒนตา เจว, อฏฺฐมี ปริกิตฺติตา;
กมฺมสฺส ลกฺขณญฺจาติ, นว ฐานานิ ญตฺติยาฯ
[2992]
วินิจฺฉเย อสมฺปตฺเต, เถรสฺสาวินยญฺญุโน;
ตสฺส นิสฺสารณา วุตฺตา, ยา สา นิสฺสารณาติ หิฯ
[2993]
อุปสมฺปทาเปกฺขสฺส, อาคจฺโฉสารณาติ สา;
อุโปสถวเสนาปิ, ปวารณวเสนปิฯ
[2994]
ญตฺติยา ฐปิตตฺตา หิ, ญตฺติกมฺมานิเม ทุเว;
‘‘อุปสมฺปทาเปกฺขญฺหิ, อนุสาเสยฺยห’’นฺติ จฯ
[2995]
‘‘อิตฺถนฺนามมหํ ภิกฺขุํ, ปุจฺเฉยฺยํ วินย’’นฺติ จ;
เอวมาทิปวตฺตา หิ, เอทิสา ญตฺติ สมฺมุติฯ
[2996]
นิสฺสฏฺฐจีวราทีนํ, ทานํ ‘‘ทาน’’นฺติ วุจฺจติ;
อาปตฺตีนํ ปฏิคฺคาโห, ‘‘ปฏิคฺคาโห’’ติ วุจฺจติฯ
[2997]
ปจฺจุกฺกฑฺฒนตา นาม, ปวารุกฺกฑฺฒนา มตา;
‘‘อิมํ อุโปสถํ กตฺวา, กาเล ปวารยามิ’’ติฯ
[2998]
ติณวตฺถารเก สพฺพ-ปฐมา ญตฺติ เจตรา;
กมฺมลกฺขณเมตนฺติ, นว ฐานานิ ญตฺติยาฯ
[2999]
ญตฺติทุติยกมฺมมฺปิ, สตฺต ฐานานิ คจฺฉติ;
นิสฺสารณมโถสารํ, สมฺมุติํ ทานเมว จฯ
[3000]
อุทฺธารํ เทสนํ กมฺม-ลกฺขณํ ปน สตฺตมํ;
ปตฺตนิกฺกุชฺชนาที ตุ, นิสฺสาโรสารณา มตาฯ
[3001]
สมฺมุติ นาม สีมาทิ, สา ปญฺจทสธา มตา;
ทานํ กถินวตฺถสฺส, ทานํ มตกวาสโสฯ
[3002]
กถินสฺสนฺตรุพฺภาโร, ‘‘อุพฺภาโร’’ติ ปวุจฺจติ;
เทสนา กุฏิวตฺถุสฺส, วิหารสฺส จ วตฺถุโนฯ
[3003]
ติณวตฺถารกมฺเม จ, โมหาโรปนตาทิสุ;
กมฺมวาจาวเสเนตฺถ, กมฺมลกฺขณตา มตาฯ
[3004]
อิติ ญตฺติทุติยสฺส, อิเม สตฺต ปกาสิตา;
ตถา ญตฺติจตุตฺถมฺปิ, สตฺต ฐานานิ คจฺฉติฯ
[3005]
นิสฺสารณมโถสารํ, สมฺมุติํ ทานนิคฺคหํ;
สมนุภาสนญฺเจว, สตฺตมํ กมฺมลกฺขณํฯ
[3006]
สตฺตนฺนํ ตชฺชนาทีนํ, กมฺมานํ กรณํ ปน;
นิสฺสารณาถ ปสฺสทฺธิ, เตสํ โอสารณา มตาฯ
[3007]
โอวาโท ภิกฺขุนีนํ ตุ, สมฺมุตีติ ปกาสิตา;
มานตฺตปริวาสานํ, ทานํ ‘‘ทาน’’นฺติ วุจฺจติฯ
[3008]
ปุน มูลาปฏิกฺกสฺโส, ‘‘นิคฺคโห’’ติ ปวุจฺจติ;
อุกฺขิตฺตสฺสานุวตฺติกา, อฏฺฐ ยาวตตียกาฯ
[3009]
อริฏฺโฐ จณฺฑกาฬี จ, เอกาทส ภวนฺติเม;
อิเมสํ ตุ วสา เญยฺยา, ทเสกา สมนุภาสนาฯ
[3010]
อุปสมฺปทกมฺมญฺจ, กมฺมมพฺภานสญฺญิตํ;
อิทํ ญตฺติจตุตฺเถ ตุ, สตฺตมํ กมฺมลกฺขณํฯ
[3011]
อปโลกนกมฺมญฺจา-ปโลเกตฺวาว การเย;
ญตฺติยา ทุติเยนาปิ, จตุตฺเถน น การเยฯ
[3012]
ญตฺติทุติยกมฺมานิ, ลหุกานตฺถิ กานิจิ;
กาตพฺพานปโลเกตฺวา, สพฺพา สมฺมุติโย สิยุํฯ
[3013]
เสสานิ อปโลเกตฺวา, กาตุํ ปน น วฏฺฏติ;
ยถาวุตฺตนเยเนว, เตน เตเนว การเยฯ
จตุพฺพิธกมฺมกถาฯ
กมฺมวิปตฺติกถา
[3014]
วตฺถุโต ญตฺติโต เจว, อนุสฺสาวนสีมโต;
ปริสโตติ ปญฺเจว, กมฺมโทสา ปกาสิตาฯ
[3015]
สมฺมุขากรณียํ ยํ, ตํ กโรติ อสมฺมุขา;
กมฺมํ วตฺถุวิปนฺนํ ตํ, อธมฺมนฺติ ปวุจฺจติฯ
[3016]
อสมฺมุขากรณียานิ, อฏฺเฐว จ ภวนฺติ หิ;
ปตฺตนิกฺกุชฺชนญฺเจว, ปตฺตสฺสุกฺกุชฺชนมฺปิ จฯ
[3017]