อุทฺเทสภตฺตํ ภุญฺชิตฺวา, ชาโต เจ สามเณรโก;

คเหตุํ ลภติ ตํ ปจฺฉา, สามเณรสฺส ปาฬิยาฯ

[2906]

สมฺปุณฺณวีสวสฺโส โย, สฺเว อุทฺเทสํ ลภิสฺสติ;

อชฺช โส อุปสมฺปนฺโน, อตีตา ฐิติกา สิยาฯ

[2907]

สเจ ปน สลากา ตุ, ลทฺธา ภตฺตํ น ตํทิเน;

ลทฺธํ, ปุนทิเน ตสฺส, คาเหตพฺพํ, น สํสโยฯ

[2908]

อุตฺตรุตฺตริภงฺคสฺส, ภตฺตสฺเสกจรสฺส หิ;

วิสุญฺหิ ฐิติกา กตฺวา, ทาตพฺพา ตุ สลากิกาฯ

[2909]

ภตฺตเมว สเจ ลทฺธํ, น ปนุตฺตริภงฺคกํ;

ลทฺธมุตฺตริภงฺคํ วา, น ลทฺธํ ภตฺตเมว วาฯ

[2910]

เยน เยน หิ ยํ ยํ ตุ, น ลทฺธํ, ตสฺส ตสฺส จ;

ตํ ตํ ปุนทิเน จาปิ, คาเหตพฺพนฺติ ทีปิตํฯ

[2911]

สงฺฆุทฺเทสาทิกํ ภตฺตํ, อิทํ สตฺตวิธมฺปิ จ;

อาคนฺตุกาทิภตฺตญฺจ, จตุพฺพิธมุทีริตํฯ

[2912]

วิหารวารภตฺตญฺจ, นิจฺจญฺจ กุฏิภตฺตกํ;

ปนฺนรสวิธํ ภตฺตํ, อุทฺทิฏฺฐํ สพฺพเมวิธฯ

[2913]

ปาฬิมฏฺฐกถญฺเจว, โอโลเกตฺวา ปุนปฺปุนํ;

สงฺฆิเก ปจฺจเย สมฺมา, วิภเชยฺย วิจกฺขโณฯ

เสนาสนกฺขนฺธกกถาฯ

วตฺตกฺขนฺธกกถา

[2914]

อาคนฺตุกาวาสิกปิณฺฑจารี-;

เสนาสนารญฺญนุโมทนาสุ ;

วตฺตานิ ภตฺเต คมิกสฺส ชนฺตา-;

ฆเร ตถา วจฺจกุฏิปฺปเวเสฯ

[2915]

อาจริยุปชฺฌายกสิสฺสสทฺธิ- ;

วิหาริวตฺตานิปิ สพฺพโสว;

วตฺตานิ วุตฺตานิ จตุทฺทเสว;

วิสุทฺธจิตฺเตน วินายเกนฯ

[2916]

อาคนฺตุเกน อารามํ, ปวิสนฺเตน ภิกฺขุนา;

ฉตฺตํ ปนาปเนตพฺพํ, มุญฺจิตพฺพา อุปาหนาฯ

[2917]

โอคุณฺฐนํ น กาตพฺพํ, สีเส จีวรเมว วา;

น หิ เตน จ โธตพฺพา, ปาทา ปานียวารินาฯ

[2918]

วนฺทิตพฺพาว ปุจฺฉิตฺวา, วิหาเร วุฑฺฒภิกฺขุโน;

กาเล เสนาสนํ เตน, ปุจฺฉิตพฺพญฺจ ภิกฺขุนาฯ

[2919]

วจฺจฏฺฐานญฺจ ปสฺสาว-ฏฺฐานํ ปานียเมว จ;

ปริโภชนียํ สงฺฆ-กติกํ โคจราทิกํฯ

[2920]

วุฑฺฒมาคนฺตุกํ ทิสฺวา, ภิกฺขุนาวาสิเกนปิ;

ปตฺตํ ปฏิคฺคเหตพฺพํ, ปจฺจุคฺคนฺตฺวาน จีวรํฯ

[2921]

อาสนํ ปญฺญเปตพฺพํ, ตสฺส ปาโททกมฺปิ จ;

อุปนิกฺขิปิตพฺพญฺจ, ปุจฺฉิตพฺพญฺจ วารินาฯ

[2922]

วนฺเทยฺโย ปญฺญเปตพฺพํ, ตสฺส เสนาสนมฺปิ จ;

อชฺฌาวุตฺถมวุตฺถํ วา, โคจราโคจรมฺปิ จฯ

[2923]

วจฺจฏฺฐานญฺจ ปสฺสาว-ฏฺฐานํ เสกฺขกุลานิ จ;

ปเวเส นิกฺขเม กาโล, วตฺตพฺโพ ปานิยาทิกํฯ

[2924]

สเจ โส นวโก โหติ;

อาคตาคนฺตุโก ยถา;

นิสินฺเนเนว เตนสฺส;

สพฺพมาวาสิภิกฺขุนาฯ

[2925]

‘‘อตฺร ปตฺตํ ฐเปหีติ, นิสีทาหีทมาสนํ’’;

อิจฺเจวํ ปน วตฺตพฺพํ, เทยฺยํ เสนาสนมฺปิ จฯ

[2926]

ทารุมตฺติกภณฺฑานิ, คนฺตุกาเมน ภิกฺขุนา;

คนฺตพฺพํ ปฏิสาเมตฺวา, ถเกตฺวาวสถมฺปิ จฯ

[2927]

อาปุจฺฉิตฺวาปิ คนฺตพฺพํ, ภิกฺขุนา สยนาสนํ;

ปุจฺฉิตพฺเพ อสนฺเตปิ, โคเปตฺวา วาปิ สาธุกํฯ

[2928]

สหสา ปวิเส นาปิ, สหสา น จ นิกฺขเม;

นาติทูเร นจฺจาสนฺเน, ฐาตพฺพํ ปิณฺฑจารินาฯ

[2929]

วามหตฺเถน สงฺฆาฏิํ, อุจฺจาเรตฺวาถ ภาชนํ;

ทกฺขิเณน ปณาเมตฺวา, ภิกฺขํ คณฺเหยฺย ปณฺฑิโตฯ

[2930]

สูปํ วา ทาตุกามาติ, สลฺลกฺเขยฺย มุหุตฺตกํ;

โอโลเกยฺยนฺตรา ภิกฺขุ, น ภิกฺขาทายิกามุขํฯ

[2931]

ปานียาทิ ปนาเนยฺยํ, ภิกฺขุนารญฺญเกนปิ;

นกฺขตฺตํ เตน โยโค จ, ชานิตพฺพา ทิสาปิ จฯ

[2932]

วจฺจปสฺสาวติตฺถานิ, ภวนฺติ ปฏิปาฏิยา;

กโรนฺตสฺส ยถาวุฑฺฒํ, โหติ อาปตฺติ ทุกฺกฏํฯ

[2933]

สหสา อุพฺภชิตฺวา วา, น จ วจฺจกุฏิํ วิเส;

อุกฺกาสิตฺวา พหิ ฐตฺวา, ปวิเส สณิกํ ปนฯ

[2934]

วจฺจํ น นิตฺถุนนฺเตน, กาตพฺพํ ปน ภิกฺขุนา;

ขาทโต ทนฺตกฏฺฐํ วา, กโรโต โหติ ทุกฺกฏํฯ

[2935]

วจฺจํ ปน น กาตพฺพํ, พหิทฺธา วจฺจโทณิยา;

ปสฺสาโวปิ น กาตพฺโพ, พหิ ปสฺสาวโทณิยาฯ

[2936]

ขเรน นาวเลเขยฺย, น กฏฺฐํ วจฺจกูปเก;

ฉฑฺเฑยฺย น จ ปาเตยฺย, เขฬํ ปสฺสาวโทณิยาฯ

[2937]

ปาทุกาสุ ฐิโตเยว, อุพฺภเชยฺย วิจกฺขโณ;

ปฏิจฺฉาเทยฺย ตตฺเถว, ฐตฺวา นิกฺขมเน ปนฯ

[2938]

นาจเมยฺย สเจ วจฺจํ, กตฺวา โย สลิเล สติ;

ตสฺส ทุกฺกฏมุทฺทิฏฺฐํ, มุนินา โมหนาสินาฯ

[2939]

สสทฺทํ นาจเมตพฺพํ, กตฺวา จปุ จปูติ จ;

อาจมิตฺวา สราเวปิ, เสเสตพฺพํ น ตูทกํฯ

[2940]

อูหตมฺปิ อโธวิตฺวา, นิกฺขมนฺตสฺส ทุกฺกฏํ;

อุกฺลาปาปิ สเจ โหนฺติ, โสเธตพฺพํ อเสสโตฯ

[2941]

อวเลขนกฏฺเฐน, ปูโร เจ ปีฐโร ปน;

ฉฑฺเฑยฺย กุมฺภิ ริตฺตา เจ, กุมฺภิํ ปูเรยฺย วารินาฯ

[2942]

อนชฺฌิฏฺโฐ หิ วุฑฺเฒน, ปาติโมกฺขํ น อุทฺทิเส;

ธมฺมํ น จ ภเณ, ปญฺหํ, น ปุจฺเฉยฺย น วิสฺสเชฯ

[2943]

อาปุจฺฉิตฺวา กเถนฺตสฺส, วุฑฺฒํ วุฑฺฒตราคเม;

ปุน อาปุจฺฉเน กิจฺจํ, นตฺถีติ ปริทีปิตํฯ

[2944]

วุฑฺเฒเนกวิหารสฺมิํ, สทฺธิํ วิหรตา ปน;

อนาปุจฺฉา หิ สชฺฌาโย, น กาตพฺโพ กทาจิปิฯ

[2945]

อุทฺเทโสปิ น กาตพฺโพ, ปริปุจฺฉาย กา กถา;

น จ ธมฺโม กเถตพฺโพ, ภิกฺขุนา ธมฺมจกฺขุนาฯ

[2946]

น ทีโป วิชฺฌาเปตพฺโพ, กาตพฺโพ วา น เจว โส;

วาตปานกวาฏานิ, ถเกยฺย วิวเรยฺย โนฯ

[2947]

จงฺกเม จงฺกมนฺโต จ, วุฑฺฒโต ปริวตฺตเย;

ตมฺปิ จีวรกณฺเณน, กาเยน น จ ฆฏฺฏเยฯ

[2948]

ปุรโต เนว เถรานํ, นฺหาเยยฺย น ปนูปริ;

อุตฺตรํ โอตรนฺตานํ, ทเท มคฺคํ, น ฆฏฺฏเยฯ

[2949]

วตฺตํ อปริปูเรนฺโต, น สีลํ ปริปูรติ;

อสุทฺธสีโล ทุปฺปญฺโญ, จิตฺเตกคฺคํ น วินฺทติฯ

[2950]

วิกฺขิตฺตจิตฺโตเนกคฺโค, สทฺธมฺมํ น จ ปสฺสติ;

อปสฺสมาโน สทฺธมฺมํ, ทุกฺขา น ปริมุจฺจติฯ

[2951]

ตสฺมา หิ วตฺตํ ปูเรยฺย, ชินปุตฺโต วิจกฺขโณ;

โอวาทํ พุทฺธเสฏฺฐสฺส, กตฺวา นิพฺพานเมหิติฯ

วตฺตกฺขนฺธกกถาฯ

ภิกฺขุนิกฺขนฺธกกถา

[2952]

กายํ อูรุํ ถนํ วาปิ, วิวริตฺวาน ภิกฺขุนี;

อตฺตโน องฺคชาตํ วา, ภิกฺขุสฺส น จ ทสฺสเยฯ

[2953]

ภิกฺขุนา สห ยํ กิญฺจิ, สมฺปโยเชนฺติยาปิ จ;

ตโต ภาสนฺติยา ภิกฺขุํ, โหติ อาปตฺติ ทุกฺกฏํฯ

[2954]

น จ ภิกฺขุนิยา ทีฆํ, ธาเรยฺย กายพนฺธนํ;

เตเนว กายพนฺเธน, ถนปฏฺเฏน วา ปนฯ

[2955]

วิลีเวน จ ปฏฺเฏน, จมฺมปฏฺเฏน วา ตถา;

ทุสฺสปฏฺเฏน วา ทุสฺส-เวณิยา ทุสฺสวฏฺฏิยาฯ

[2956]

น ผาสุกา นเมตพฺพา, ทุกฺกฏํ ตุ นเมนฺติยา;

น ฆํสาเปยฺย สมณี, ชฆนํ อฏฺฐิกาทินาฯ

[2957]

หตฺถํ วา หตฺถโกจฺฉํ วา, ปาทํ วา มุขมูรุกํ;

โกฏฺฏาเปติ สเจ ตสฺสา, โหติ อาปตฺติ ทุกฺกฏํฯ

[2958]

น มุขํ ลิมฺปิตพฺพํ ตุ, น จุณฺเณตพฺพเมว จ;

มโนสิลาย วาปตฺติ, มุขํ ลญฺชนฺติยา สิยาฯ

[2959]