โลหชํ ทารุชํ สพฺพํ, กปฺปิยํ มตฺติกามยํ;
วินา สตฺถญฺจ ปตฺตญฺจ, กตกํ กุมฺภการิกํฯ
ขุทฺทกวตฺถุกฺขนฺธกกถาฯ
เสนาสนกฺขนฺธกกถา
[2827]
อาสนฺทิโก อติกฺกนฺต-ปมาโณปิ จ วฏฺฏติ;
ตถา ปญฺจงฺคปีฐมฺปิ, สตฺตงฺคมฺปิ จ วฏฺฏติฯ
[2828]
ตูโลนทฺธา ฆเรเยว, มญฺจปีฐา นิสีทิตุํ;
สีสปาทูปธานญฺจ, อคิลานสฺส วฏฺฏติฯ
[2829]
สนฺถริตฺวา คิลานสฺส, อุปธานานิ ตตฺถ จ;
ปจฺจตฺถรณกํ ทตฺวา, นิปชฺชนฺตสฺส วฏฺฏติฯ
[2830]
ติริยํ มุฏฺฐิรตนํ, โหติ พิมฺโพหนํ มิตํ;
ทีฆโต จ ทิยฑฺฒํ วา, ทฺวิหตฺถนฺติ กุรุนฺทิยํฯ
[2831]
ปูริตา โจฬปณฺณุณฺณ-ติณวาเกหิ ปญฺจหิ;
ภิสิโย ภาสิตา ปญฺจ, ตูลานํ คณนาวสาฯ
[2832]
ภิสิตูลานิ ปญฺเจว, ตถา ตูลานิ ตีณิปิ;
โลมานิ มิคปกฺขีนํ, คพฺภา พิมฺโพหนสฺสิเมฯ
[2833]
มนุสฺสโลมํ โลเมสุ, ปุปฺเผสุ พกุลาทิกํ;
สุทฺธํ ตมาลปตฺตญฺจ, ปณฺเณสุ น จ วฏฺฏติฯ
[2834]
อุณฺณาทิกํ ปญฺจวิธญฺจ ตูลํ;
มเหสินา ยํ ภิสิยํ ปวุตฺตํ;
มสูรเก ตํ ปน วฏฺฏตีติ;
กุรุนฺทิยํ อฏฺฐกถาย วุตฺตํฯ
[2835]
ยเทตํ ติวิธํ ตูลํ, ภิสิยํ ตํ อกปฺปิยํ;
มิสฺสํ ตมาลปตฺตํ ตุ, สพฺพตฺถ ปน วฏฺฏติฯ
[2836]
รูปํ ตุ ปุริสิตฺถีนํ, ติรจฺฉานคตสฺส วา;
กาเรนฺตสฺส กโรโต วา, โหติ อาปตฺติ ทุกฺกฏํฯ
[2837]
ชาตกํ ปน วตฺถุํ วา, การาเปตุํ ปเรหิ วา;
มาลากมฺมํ ลตากมฺมํ, สยํ กาตุมฺปิ วฏฺฏติฯ
[2838]
สมานาสนิโก นาม, ทฺวีหิ วสฺเสหิ โย ปน;
วุฑฺโฒ วา ทหโร วาปิ, วสฺเสเนเกน วา ปนฯ
[2839]
สมานวสฺเส วตฺตพฺพํ, กิญฺจ นามิธ วิชฺชติ;
สตฺตวสฺสติวสฺเสหิ, ปญฺจวสฺโส นิสีทติฯ
[2840]
เหฏฺฐา ทีฆาสนํ ติณฺณํ, ยํ ปโหติ นิสีทิตุํ;
เอกมญฺเจปิ ปีเฐ วา, ทฺเว นิสีทนฺติ วฏฺฏติฯ
[2841]
อุภโตพฺยญฺชนํ อิตฺถิํ, ฐเปตฺวา ปณฺฑกํ ปน;
ทีฆาสเน อนุญฺญาตํ, สพฺเพหิปิ นิสีทิตุํฯ
[2842]
ปุริมิโก ปจฺฉิมิโก, ตเถวนฺตรมุตฺตโก;
ตโย เสนาสนคฺคาหา, สมฺพุทฺเธน ปกาสิตาฯ
[2843]
ปุพฺพารุณา ปาฏิปทสฺส ยาว;
ปุนารุโณ ภิชฺชติ เนว ตาว;
อิทญฺหิ เสนาสนคาหกสฺส;
เขตฺตนฺติ วสฺสูปคเม วทนฺติฯ
[2844]
ปาโตว คาหิเต อญฺโญ, ภิกฺขุ เสนาสเน ปน;
สเจ ยาจติ อาคนฺตฺวา, วตฺตพฺโพ คาหิตนฺติ โสฯ
[2845]
สงฺฆิกํ อปโลเกตฺวา, คหิตํ วสฺสวาสิกํ;
อนฺโตวสฺเสปิ วิพฺภนฺโต, ลภเต ตตฺรชํ สเจฯ
[2846]
วุฏฺฐวสฺโส สเจ ภิกฺขุ, กิญฺจิ อาวาสิหตฺถโต;
คเหตฺวา กปฺปิยํ ภณฺฑํ, ทตฺวา ตสฺสตฺตโน ปนฯ
[2847]
‘‘อสุกสฺมิํ กุเล มยฺหํ, วสฺสาวาสิกจีวรํ;
คาหิตํ คณฺห’’อิจฺเจวํ, วตฺวา คจฺฉติ โส ทิสํฯ
[2848]
อุปฺปพฺพชติ เจ ตตฺถ, คตฏฺฐาเน, น ลพฺภติ;
คเหตุํ ตสฺส สมฺปตฺตํ, สงฺฆิกํเยว ตํ สิยาฯ
[2849]
มนุสฺเส สมฺมุขา ตตฺถ, ปฏิจฺฉาเปติ เจ ปน;
สพฺพํ ลภติ สมฺปตฺตํ, วสฺสาวาสิกจีวรํฯ
[2850]
อาราโม จ วิหาโร จ, วตฺถูนิ ทุวิธสฺสปิ;
ภิสิ พิมฺโพหนํ มญฺจ-ปีฐนฺติ ตติยํ ปนฯ
[2851]
โลหกุมฺภี กฏาหญฺจ, ภาณโก โลหวารโก;
วาสิ ผรสุ กุทฺทาโล, กุฐารี จ นิขาทนํฯ
[2852]
วลฺลิ เวฬุ ติณํ ปณฺณํ, มุญฺชปพฺพชเมว จ;
มตฺติกา ทารุภณฺฑญฺจ, ปญฺจมํ ตุ ยถาห จฯ
[2853]
‘‘ทฺวีหิ สงฺคหิตานิ ทฺเว, ตติยํ จตุสงฺคหํ;
จตุตฺถํ นวโกฏฺฐาสํ, ปญฺจมํ อฏฺฐธา มตํฯ
[2854]
อิติ ปญฺจหิ ราสีหิ, ปญฺจนิมฺมลโลจโน;
ปญฺจวีสวิธํ นาโถ, ครุภณฺฑํ ปกาสยิ’’ฯ
[2855]
อิทญฺหิ ปน สงฺฆสฺส, สนฺตกํ ครุภณฺฑกํ;
วิสฺสชฺเชนฺโต วิภาเชนฺโต, ภิกฺขุ ถุลฺลจฺจยํ ผุเสฯ
[2856]
ภิกฺขุนา ครุภณฺฑํ ตุ, สงฺเฆน หิ คเณน วา;
วิสฺสชฺชิตมวิสฺสฏฺฐํ, วิภตฺตมวิภาชิตํฯ
[2857]
ปุริเมสุ หิ ตีสฺเวตฺถ, น จตฺถาครุภณฺฑกํ;
โลหกุมฺภี กฏาโห จ, โลหภาณกเมว จฯ
[2858]
ติวิธํ ขุทฺทกํ วาปิ, ครุภณฺฑกเมวิทํ;
ปาทคณฺหนโก โลห-วารโก ภาชิโย มโตฯ
[2859]
อุทฺธํ ปน ตโต โลห-วารโก ครุภณฺฑกํ;
ภิงฺการาทีนิ สพฺพานิ, ครุภณฺฑานิ โหนฺติ หิฯ
[2860]
ภาเชตพฺโพ อโยปตฺโต;
ตมฺพาโยถาลกาปิ จ;
ธูมเนตฺตาทิกํ เนว;
ภาเชตพฺพนฺติ ทีปิตํฯ
[2861]
อตฺตนา ปฏิลทฺธํ ตํ, โลหภณฺฑํ ตุ กิญฺจิปิ;
น ปุคฺคลิกโภเคน, ภุญฺชิตพฺพญฺหิ ภิกฺขุนาฯ
[2862]
กํสวฏฺฏกโลหานํ, ภาชนานิปิ สพฺพโส;
น ปุคฺคลิกโภเคน, วฏฺฏนฺติ ปริภุญฺชิตุํฯ
[2863]
ติปุภณฺเฑปิ เอเสว, นโย เญยฺโย วิภาวินา;
น โทโส สงฺฆิเก อตฺถิ, คิหีนํ สนฺตเกสุ วาฯ
[2864]
ขีรปาสาณสมฺภูตํ, ครุกํ ตฏฺฏกาทิกํ;
ปาทคณฺหนโต อุทฺธํ, ฆฏโก ครุภณฺฑโกฯ
[2865]
สิงฺคิสชฺฌุมยํ หาร-กูฏชํ ผลิกุพฺภวํ;
ภาชนานิ น วฏฺฏนฺติ, คิหีนํ สนฺตกานิปิฯ
[2866]
วาสิ ภาชนิยา ขุทฺทา, ครุภณฺฑํ มหตฺตรี;
ตถา ผรสุ เวชฺชานํ, สิราเวธนกมฺปิ จฯ
[2867]
กุฐาริ วาสิ กุทฺทาโล, ครุภณฺฑํ นิขาทนํ;
สิขรมฺปิ จ เตเนว, คหิตนฺติ ปกาสิตํฯ
[2868]
จตุรสฺสมุขํ โทณิ-มุขํ วงฺกมฺปิ ตตฺถ จ;
สทณฺฑํ ขุทฺทกํ สพฺพํ, ครุภณฺฑํ นิขาทนํฯ
[2869]
มุฏฺฐิกมธิกรณี , สณฺฑาโส วา ตุลาทิกํ;
กิญฺจิ สงฺฆสฺส ทินฺนํ เจ, ตํ สพฺพํ ครุภณฺฑกํฯ
[2870]
นฺหาปิตสฺส จ สณฺฑาโส, กตฺตรี จ มหตฺตรี;
มหาปิปฺผลกํ ตุนฺน-การานํ ครุภณฺฑกํฯ
[2871]
วลฺลิ สงฺฆสฺส ทินฺนา วา, ตตฺถชาตาปิ รกฺขิตา;
อฑฺฒพาหุปฺปมาณาปิ, ครุ เวตฺตลตาทิกาฯ
[2872]
สุตฺตวากาทินิพฺพตฺตา, รชฺชุกา โยตฺตกานิ วา;
สงฺฆสฺส ทินฺนกาเล ตุ, คจฺฉนฺติ ครุภณฺฑตํฯ
[2873]
นาฬิเกรสฺส หีเร วา, วาเก วา ปน เกนจิ;
วฏฺเฏตฺวา หิ กตา เอก-วฏฺฏาปิ ครุภณฺฑกํฯ
[2874]
เวฬุ สงฺฆสฺส ทินฺโน วา, รกฺขิโต ตตฺถชาตโก;
อฏฺฐงฺคุลายโต สูจิ-ทณฺฑมตฺโต ครุํ สิยาฯ
[2875]
ฉตฺตทณฺฑสลากาโย, ทณฺโฑ กตฺตรยฏฺฐิปิ;
ปาทคณฺหนกา เตล-นาฬี ภาชนิยา อิเมฯ
[2876]
มุญฺชาทีสุปิ ยํ กิญฺจิ, มุฏฺฐิมตฺตํ ครุํ สิยา;
ตาลปณฺณาทิเมกมฺปิ, ทินฺนํ วา ตตฺถชาตกํฯ
[2877]
อฏฺฐงฺคุลปฺปมาโณปิ, ครุกํ ริตฺตโปตฺถโก;
มตฺติกา ปกตี วาปิ, ปญฺจวณฺณา สุธาปิ วาฯ
[2878]
สิเลสาทีสุ วา กิญฺจิ, ทินฺนํ วา ตตฺถชาตกํ;
ตาลปกฺกปมาณํ ตุ, ครุภณฺฑนฺติ ทีปิตํฯ
[2879]
วลฺลิเวฬาทิกํ กิญฺจิ, อรกฺขิตมโคปิตํ;
ครุภณฺฑํ น โหเตว, คเหตพฺพํ ยถาสุขํฯ
[2880]
รกฺขิตํ โคปิตํ วาปิ, คเหตพฺพํ ตุ คณฺหตา;
สมกํ อติเรกํ วา, ทตฺวา ผาติกเมว วาฯ
[2881]
อญฺชนํ หริตาลญฺจ, ตถา หิงฺคุ มโนสิลา;
ภาเชตพฺพนฺติ วิญฺเญยฺยํ, วิญฺญุนา วินยญฺญุนาฯ
[2882]
ทารุภณฺเฑปิ โย โกจิ, สูจิทณฺฑปฺปมาณโก;
อฏฺฐงฺคุลายโต ทารุ-ภณฺฑโก ครุภณฺฑกํฯ
[2883]
มหาอฏฺฐกถายํ ตุ, วิภชิตฺวาว ทสฺสิตํ;
อาสนฺทิโกปิ สตฺตงฺโค, ภทฺทปีฐญฺจ ปีฐิกาฯ
[2884]
ปีฐเมฬกปาทญฺจ, ตถามณฺฑกวฏฺฏกํ;
โกจฺฉํ ปลาลปีฐญฺจ, โธวเน ผลกมฺปิ จฯ
[2885]
ภณฺฑิกา มุคฺคโร เจว, วตฺถฆฏฺฏนมุคฺคโร;
อมฺพณมฺปิ จ มญฺชูสา, นาวา รชนโทณิกาฯ
[2886]
อุฬุงฺโกปิ สมุคฺโคปิ, กรณฺฑมฺปิ กฏจฺฉุปิ;
เอวมาทิ ตุ สพฺพมฺปิ, สงฺฆิกํ ครุภณฺฑกํฯ
[2887]
สพฺพํ ทารุมยํ เคห-สมฺภารํ ครุกํ มตํ;
ภาชิยํ กปฺปิยํ จมฺมํ, อกปฺปิยมภาชิยํฯ
[2888]
เอฬจมฺมํ ครุํ วุตฺตํ, ตเถโวทุกฺขลาทิกํ;
เปสการาทิภณฺฑญฺจ, กสิภณฺฑญฺจ สงฺฆิกํฯ
[2889]
ตเถวาธารโก ปตฺต-ปิธานํ ตาลวณฺฏกํ;
พีชนี ปจฺฉิ จงฺโกฏํ, สพฺพา สมฺมุญฺชนี ครุฯ
[2890]
ยํ กิญฺจิ ภูมตฺถรณํ, โย โกจิ กฏสารโก;
จกฺกยุตฺตกยานญฺจ, สพฺพมฺปิ ครุภณฺฑกํฯ
[2891]
ฉตฺตญฺจ มุฏฺฐิปณฺณญฺจ, วิสาณํตุมฺพภาชนํ;
อุปาหนารณีธมฺม-กรณาทิ ลหุํ อิทํฯ
[2892]
หตฺถิทนฺโต วิสาณญฺจ, ยถาคตมตจฺฉิตํ;
มญฺจปาทาทิ ยํ กิญฺจิ, ภาชนียมนิฏฺฐิตํฯ
[2893]
นิฏฺฐิโต ตจฺฉิโต วาปิ, วิโธ หิงฺคุกรณฺฑโก;
อญฺชนี จ สลากาโย, ภาชนี อุทปุญฺฉนีฯ
[2894]
สพฺพํ กุลาลภณฺฑมฺปิ, ปริโภคารหํ ปน;
ปตฺตงฺคารกฏาหญฺจ, ธูมทานํ กปลฺลิกาฯ
[2895]
ถูปิกา ทีปรุกฺโข จ, จยนจฺฉทนิฏฺฐกา;
สงฺฆิกํ ปน สพฺพมฺปิ, ครุภณฺฑนฺติ ทีปิตํฯ
[2896]
ปตฺโต กญฺจนโก เจว, ถาลกํ กุณฺฑิกาปิ จ;
ฆฏโก โลหภณฺเฑปิ, กุณฺฑิกาปิ จ ภาชิยาฯ
[2897]
ครุนา ครุภณฺฑญฺจ, ถาวเรน จ ถาวรํ;
สงฺฆสฺส ปริวตฺเตตฺวา, คณฺหิตุํ ปน วฏฺฏติฯ
[2898]
อโธเตน จ ปาเทน, นกฺกเม สยนาสนํ;
อลฺลปาเทน วา ภิกฺขุ, ตเถว สอุปาหโนฯ
[2899]
ภูมิยา นิฏฺฐุภนฺตสฺส, ปริกมฺมกตาย วา;
ปริกมฺมกตํ ภิตฺติํ, อปสฺเสนฺตสฺส ทุกฺกฏํฯ
[2900]
ปริกมฺมกตํ ภูมิํ, สงฺฆิกํ มญฺจปีฐกํ;
อตฺตโน สนฺตเกเนว, ปตฺถริตฺวาน เกนจิฯ
[2901]
นิปชฺชิตพฺพํ, สหสา, ตสฺส นิทฺทายโต ยทิ;
สรีราวยโว โกจิ, มญฺจํ ผุสติ ทุกฺกฏํฯ
[2902]
โลเมสุ ปน โลมานํ, คณนาเยว ทุกฺกฏํ;
ตเลน หตฺถปาทานํ, วฏฺฏตกฺกมิตุํ ปนฯ
[2903]
สหสฺสคฺฆนโก โกจิ, ปิณฺฑปาโต สจีวโร;
ปตฺโต อวสฺสิกํ ภิกฺขุํ, ลิขิตฺวา ฐปิโตปิ จฯ
[2904]
ตาทิโส ปิณฺฑปาโตว, สฏฺฐิวสฺสานมจฺจเย;
อุปฺปนฺโน สฏฺฐิวสฺสสฺส, ฐิติกาย ทเท พุโธฯ
[2905]
อุทฺเทสภตฺตํ ภุญฺชิตฺวา, ชาโต เจ สามเณรโก;
คเหตุํ ลภติ ตํ ปจฺฉา, สามเณรสฺส ปาฬิยาฯ
[2906]
สมฺปุณฺณวีสวสฺโส โย, สฺเว อุทฺเทสํ ลภิสฺสติ;
อชฺช โส อุปสมฺปนฺโน, อตีตา ฐิติกา สิยาฯ
[2907]
สเจ ปน สลากา ตุ, ลทฺธา ภตฺตํ น ตํทิเน;
ลทฺธํ, ปุนทิเน ตสฺส, คาเหตพฺพํ, น สํสโยฯ
[2908]
อุตฺตรุตฺตริภงฺคสฺส, ภตฺตสฺเสกจรสฺส หิ;
วิสุญฺหิ ฐิติกา กตฺวา, ทาตพฺพา ตุ สลากิกาฯ
[2909]
ภตฺตเมว สเจ ลทฺธํ, น ปนุตฺตริภงฺคกํ;
ลทฺธมุตฺตริภงฺคํ วา, น ลทฺธํ ภตฺตเมว วาฯ
[2910]
เยน เยน หิ ยํ ยํ ตุ, น ลทฺธํ, ตสฺส ตสฺส จ;
ตํ ตํ ปุนทิเน จาปิ, คาเหตพฺพนฺติ ทีปิตํฯ
[2911]
สงฺฆุทฺเทสาทิกํ ภตฺตํ, อิทํ สตฺตวิธมฺปิ จ;
อาคนฺตุกาทิภตฺตญฺจ, จตุพฺพิธมุทีริตํฯ
[2912]
วิหารวารภตฺตญฺจ, นิจฺจญฺจ กุฏิภตฺตกํ;
ปนฺนรสวิธํ ภตฺตํ, อุทฺทิฏฺฐํ สพฺพเมวิธฯ
[2913]
ปาฬิมฏฺฐกถญฺเจว, โอโลเกตฺวา ปุนปฺปุนํ;
สงฺฆิเก ปจฺจเย สมฺมา, วิภเชยฺย วิจกฺขโณฯ
เสนาสนกฺขนฺธกกถาฯ
วตฺตกฺขนฺธกกถา
[2914]
อาคนฺตุกาวาสิกปิณฺฑจารี-;
เสนาสนารญฺญนุโมทนาสุ ;
วตฺตานิ ภตฺเต คมิกสฺส ชนฺตา-;
ฆเร ตถา วจฺจกุฏิปฺปเวเสฯ
[2915]