เมนู

ปญฺเจว จ ยถาวุฑฺฒํ, ลภเต ปาริวาสิโก;

กาตุํ ตตฺเถว จ ฐตฺวา, อุโปสถปวารณํฯ

[2759]

วสฺสสาฏิํ ยถาวุฑฺฒํ, เทนฺติ เจ สงฺฆทายกา;

โอโณชนํ ตถา ภตฺตํ, ลภเต ปญฺจิเม ปนฯ

ปาริวาสิกกฺขนฺธกกถาฯ

สมถกฺขนฺธกกถา

[2760]

วิวาทาธารตา จานุ-วาทาธิกรณมฺปิ จ;

อาปตฺตาธารตา เจว, กิจฺจาธิกรณมฺปิ จฯ

[2761]

เอตานิ ปน จตฺตาริ, วุตฺตานิ จ มเหสินา;

เภทการกวตฺถูนิ, วิวาโท ตตฺถ นิสฺสิโตฯ

[2762]

วิปตฺติโย จตสฺโสว, อนุวาโท อุปาคโต;

อาปตฺตาธารตา นาม, สตฺต อาปตฺติโย มตาฯ

[2763]

สงฺฆกิจฺจานิ นิสฺสาย, กิจฺจาธิกรณํ สิยา;

เอเตสํ ตุ จตุนฺนมฺปิ, สมตฺตา สมถา มตาฯ

[2764]

สมฺมุขา สติ จามูฬฺโห, ปฏิญฺญาวินโยปิ จ;

ตสฺสปาปิยสี เจว, ตถา เยภุยฺยสีปิ จฯ

[2765]

ติณวตฺถารโก เจว, สตฺตโม วินโย มโต;

สตฺติเม สมถา วุตฺตา, พุทฺเธนาทิจฺจพนฺธุนาฯ

[2766]

วิวาโท สมฺมติ ทฺวีหิ, อนุวาโท จตูหิ จ;

อาปตฺติ ปน ตีเหว, กิจฺจเมเกน สมฺมติฯ

[2767]

ฉฏฺเฐน ปฐเมนาปิ, วิวาโท เอตฺถ สมฺมติ;

สมฺมุขาวินยาทีหิ, อนุปุพฺเพน ตีหิปิฯ

[2768]

ตเถว ปญฺจเมนาปิ, อนุวาโท หิ สมฺมติ;

สมฺมุเขน ปฏิญฺญาย, ติณวตฺถารเกน จฯ

[2769]

อาปตฺตูปสมํ ยาติ, ตีเหว สมเถหิ สา;

สมฺมุขาวินเยเนว, กิจฺจเมเกน สมฺมติฯ

[2770]

เยภุยฺยสิกกมฺเม ตุ, สลากํ คาหเย พุโธ;

คูฬฺเหน วิวเฏนาปิ, กณฺณชปฺเปน วา ปนฯ

[2771]

อลชฺชุสฺสเท คูฬฺเหน, วิวเฏเนว ลชฺชิสุ;

พาเลสุ กณฺณชปฺเปน, สลากํ คาหเย พุโธฯ

[2772]

ลชฺชี อลชฺชี พาโลติ, เกน สกฺกา วิชานิตุํ?

สเกน กมฺมุนาเยว, เตน สกฺกา วิชานิตุํฯ

[2773]

อาปชฺชติ จ สญฺจิจฺจ, อาปตฺติํ ปริคูหติ;

ฉนฺทาทิอคติํ ยาติ, อลชฺชี เอทิโส สิยาฯ

[2774]

นาปชฺชติ จ สญฺจิจฺจ, อาปตฺติํ น จ คูหติ;

น คจฺฉติคติญฺจาปิ, เอทิโส ลชฺชิ ปุคฺคโลฯ

[2775]

ทุจฺจินฺติโต จ ทุพฺภาสี, ตถา ทุกฺกฏการิโก;

เอทิโส ปน ‘‘พาโล’’ติ, ลกฺขเณเนว ญายติฯ

[2776]

ติธา สลากคาเหน, พหุกา ธมฺมวาทิโน;

เยภุยฺยสิกกมฺเมน, กตฺตพฺพนฺติ ชิโนพฺรวิฯ

[2777]

อลชฺชี สานุวาโท จ, อสุจี กมฺมโต จ โย;

ตสฺสปาปิยสีกมฺม-โยคฺโค โส โหติ ปุคฺคโลฯ

[2778]

ภณฺฑเน กลเห ชาเต, วิวาทสฺมิํ อนปฺปเก;

พหุอสฺสามเณ จิณฺเณ, อนคฺเคปิ จ ภสฺสเกฯ

[2779]

มูลมูลํ คเวสนฺตํ, โหติ วาฬญฺจ กกฺขฬํ;

ติณวตฺถารเกเนว, กาตพฺพนฺติ ปกาสิตํฯ

[2780]

ยถา จ ติณปณฺเณน, ฉนฺนํ คูถญฺจ มุตฺตกํ;

น จ วายติ ทุคฺคนฺธํ, วูปสมฺมติ ตงฺขเณฯ

[2781]

ฐเปตฺวา ถุลฺลวชฺชญฺจ, คิหีหิ ปฏิสํยุตํ;

ทิฏฺฐาวิกมฺมิกญฺเจว, โย จ ตตฺถ น โหติ ตํฯ

[2782]

เสสายาปตฺติยา ยาว, อุปสมฺปทมาฬโต;

สุทฺโธ โหติ นิราปตฺติ, ติณวตฺถารเก ตถาฯ

สมถกฺขนฺธกกถาฯ

ขุทฺทกวตฺถุกฺขนฺธกกถา

[2783]

รุกฺเข วา ปน กุฏฺเฏวา, อฏฺฏาเน ถมฺภเกสุ วา;

นฺหายมาโน สกํ กายํ, อุคฺฆํเสยฺยสฺส ทุกฺกฏํฯ

[2784]

กายํ คนฺธพฺพหตฺเถน, กุรุวินฺทกสุตฺติยา;

มลฺลเกน น ฆํเสยฺย, นาญฺญมญฺญญฺจ กายโตฯ

[2785]

อกตํ มลฺลกํ นาม, คิลานสฺเสว วฏฺฏติ;

กตํ ตํ มลฺลกํ นาม, สพฺเพสมฺปิ น วฏฺฏติฯ

[2786]

กปาลิฏฺฐกขณฺฑานิ, สพฺพสฺส ปุถุปาณิกํ;

คิลานสฺสาคิลานสฺส, วตฺถวฏฺฏิ จ วฏฺฏติฯ

[2787]

วุตฺตา เผณกปาสาณ-กถลา ปาทฆํสเน;

วฏฺฏํ วา จตุรสฺสํ วา, กตกํ น จ วฏฺฏติฯ

[2788]

ยํ กิญฺจิปิ อลงฺการํ, ธาเรนฺตสฺสปิ ทุกฺกฏํ;

โหติ อนฺตมโส ตาล-ปณฺณมตฺตมฺปิ ภิกฺขุโนฯ

[2789]

โอสณฺเหยฺย สเก เกเส, โย หตฺถผณเกน วา;

ผณเกนปิ โกจฺเฉน, ทุกฺกฏํ ตสฺส นิทฺทิเสฯ

[2790]