สานุโลมสฺส ธญฺญสฺส, ฐเปตฺวา ผลชํ รสํ;
อญฺโญ ผลรโส นตฺถิ, อยามกาลิโก อิธฯ
เภสชฺชกฺขนฺธกกถาฯ
กถินกฺขนฺธกกถา
[2697]
ภิกฺขูนํ วุฏฺฐวสฺสานํ, กถินตฺถารมพฺรวิ;
ปญฺจนฺนํ อานิสํสานํ, การณา มุนิปุงฺคโวฯ
[2698]
น อุลฺลิขิตมตฺตาทิ-จตุวีสติวชฺชิตํ;
จีวรํ ภิกฺขุนาทาย, อุทฺธริตฺวา ปุราณกํฯ
[2699]
นวํ อธิฏฺฐหิตฺวาว, วตฺตพฺพํ วจสา ปุน;
‘‘อิมินานฺตรวาเสน, กถินํ อตฺถรามิ’’ติฯ
[2700]
วุตฺเต ติกฺขตฺตุมิจฺเจวํ, กถินํ โหติ อตฺถตํ;
สงฺฆํ ปนุปสงฺกมฺม, อาทาย กถินํ อิติฯ
[2701]
‘‘อตฺถตํ กถินํ ภนฺเต, สงฺฆสฺส อนุโมทถ;
ธมฺมิโก กถินตฺถาโร’’, วตฺตพฺพํ เตน ภิกฺขุนาฯ
[2702]
‘‘สุอตฺถตํ ตยา ภนฺเต, สงฺฆสฺส กถินํ ปุน;
ธมฺมิโก กถินตฺถาโร, อนุโมทามิ’’ตีรเยฯ
[2703]
กถินสฺส จ กิํ มูลํ, กิํ วตฺถุ กา จ ภูมิโย;
กติธมฺมวิโท ภิกฺขุ, กถินตฺถารมรหติฯ
[2704]
มูลเมกํ, สิยา วตฺถุ, ติวิธํ, ภูมิโย ฉ จ;
อฏฺฐธมฺมวิโท ภิกฺขุ, กถินตฺถารมรหติฯ
[2705]
สงฺโฆ มูลนฺติ นิทฺทิฏฺฐํ, วตฺถุ โหติ ติจีวรํ;
โขมาทีนิ ฉ วุตฺตานิ, จีวรานิ ฉ ภูมิโยฯ
[2706]
ปุพฺพปจฺจุทฺธราธิฏฺฐา-นตฺถาโร มาติกาปิ จ;
ปลิโพโธ จ อุทฺธาโร, อานิสํสา ปนฏฺฐิเมฯ
[2707]
โธวนญฺจ วิจาโร จ, เฉทนํ พนฺธนมฺปิ จ;
สิพฺพนํ รชนํ กปฺปํ, ‘‘ปุพฺพกิจฺจ’’นฺติ วุจฺจติฯ
[2708]
สงฺฆาฏิ อุตฺตราสงฺโค, อโถ อนฺตรวาสโก;
ปจฺจุทฺธาโร อธิฏฺฐานํ, อตฺถาโรเปสเมว ตุฯ
[2709]
ปกฺกมนญฺจ นิฏฺฐานํ, สนฺนิฏฺฐานญฺจ นาสนํ;
สวนาสา จ สีมา จ, สหุพฺภาโรติ อฏฺฐิมาฯ
[2710]
กตจีวรมาทาย, อาวาเส นิรเปกฺขโก;
อติกฺกนฺตาย สีมาย, โหติ ปกฺกมนนฺติกาฯ
[2711]
อานิสํสมถาทาย, วิหาเร อนเปกฺขโก;
คนฺตฺวา ปน วิหารํ โส, อญฺญํ สุขวิหาริกํฯ
[2712]
ตตฺถ ตํ วิหรนฺโตว, กโรติ ยทิ จีวรํ;
นิฏฺฐิเต จีวเร ตสฺมิํ, นิฏฺฐานนฺตาติ วุจฺจติฯ
[2713]
‘‘จีวรํ น กริสฺสามิ, น ปจฺเจสฺสํ ตมสฺสมํ’’;
เอวํ ตุ ธุรนิกฺเขเป, สนฺนิฏฺฐานนฺติกา มตาฯ
[2714]
กถินจฺฉาทนํ ลทฺธา, ‘‘น ปจฺเจสฺส’’นฺติ เจ คโต;
กโรนฺตสฺเสว นฏฺฐํ วา, ทฑฺฒํ วา นาสนนฺติกาฯ
[2715]
ลทฺธานิสํโส สาเปกฺโข, พหิสีมํ คโต ปน;
สุณาติ จนฺตรุพฺภารํ, สา โหติ สวนนฺติกาฯ
[2716]
จีวราสาย ปกฺกนฺโต, พหิสีมํ คโต ปน;
‘‘ทสฺสามิ จีวรํ ตุยฺหํ’’, วุตฺโต สวติ เกนจิฯ
[2717]
ปุน วุตฺเต ‘‘น สกฺโกมิ, ทาตุนฺติ ตว จีวรํ’’;
อาสาย ฉินฺนมตฺตาย, อาสาวจฺเฉทิกา มตาฯ
[2718]
วสฺสํวุฏฺฐวิหารมฺหา , วิหารญฺญํ คโต สิยา;
อาคจฺฉํ อนฺตรามคฺเค, ตทุทฺธารมติกฺกเมฯ
[2719]
ตสฺส โส กถินุทฺธาโร, สีมาติกฺกนฺติโก มโต;
กถินานิสํสมาทาย, สาเปกฺโขว สเจ คโตฯ
[2720]
สมฺภุณาติ ปุนาคนฺตฺวา, กถินุทฺธารเมว เจ;
ตสฺส โส กถินุทฺธาโร, ‘‘สหุพฺภาโร’’ติ วุจฺจติฯ
[2721]
ปกฺกมนญฺจ นิฏฺฐานํ, สนฺนิฏฺฐานญฺจ สีมโต;
จตฺตาโร ปุคฺคลาธีนา, สงฺฆาธีนนฺตรุพฺภโรฯ
[2722]
นาสนํ สวนญฺเจว, อาสาวจฺเฉทิกาปิ จ;
ตโยปิ กถินุพฺภารา, น ตุ สงฺฆา, น ภิกฺขุโตฯ
[2723]
อาวาสปลิโพโธ จ, ปลิโพโธ จ จีวเร;
ปลิโพธา ทุเว วุตฺตา, ยุตฺตมุตฺตตฺถวาทินาฯ
[2724]
อฏฺฐนฺนํ มาติกานํ วา, อนฺตรุพฺภารโตปิ วา;
อุพฺภาราปิ ทุเว วุตฺตา, กถินสฺส มเหสินาฯ
[2725]
อนามนฺตาสมาทานํ, คณโต ยาวทตฺถิกํ;
ตตฺถ โย จีวรุปฺปาโท, อานิสํสา จ ปญฺจิเมฯ
กถินกฺขนฺธกกถาฯ
จีวรกฺขนฺธกกถา
[2726]
จีวรสฺส ปนุปฺปาทา, อฏฺฐ จีวรมาติกา;
สีมาย เทติ, กติกา, ภิกฺขาปญฺญตฺติยา, ตถาฯ
[2727]
สงฺฆสฺส, อุภโตสงฺเฆ, วสฺสํวุฏฺฐสฺส เทติ จ,;
อาทิสฺส, ปุคฺคลสฺสาติ, อฏฺฐิมา ปน มาติกาฯ
[2728]