เหฏฺฐา รตฺตวิตานสฺส, ทฺวิธา รตฺตูปธานกํ;
อกปฺปิยมิทํ สพฺพํ, ทุกฺกฏํ ปริภุญฺชโตฯ
[2662]
เหฏฺฐา อกปฺปิเย ปจฺจตฺถเร สติ น วฏฺฏติ;
อุทฺธํ เสตวิตานมฺปิ, ตสฺมิํ อสติ วฏฺฏติฯ
[2663]
อาสนฺทิํ ปน ปลฺลงฺกํ, ฐเปตฺวา ตูลิกมฺปิ จ;
เสสํ ปน จ สพฺพมฺปิ, ลภเต คิหิสนฺตกํฯ
[2664]
ธมฺมาสเน อนาปตฺติ, ภตฺตคฺเคปิ นิสีทิตุํ;
ภูมตฺถรณเก ตตฺถ, สยิตุมฺปิ จ วฏฺฏติฯ
จมฺมกฺขนฺธกกถาฯ
เภสชฺชกฺขนฺธกกถา
[2665]
วุตฺตา คหปติสฺสาปิ, สมฺมุตุสฺสาวนนฺติกา;
โคนิสาทีติ กปฺปิยา, จตสฺโส โหนฺติ ภูมิโยฯ
[2666]
สงฺฆสฺส สนฺตกํ เคหํ, สนฺตกํ ภิกฺขุโนปิ วา;
กปฺปิยํ ปน กตฺตพฺพํ, สหเสยฺยปฺปโหนกํฯ
[2667]
ฐเปตฺวา ภิกฺขุมญฺเญหิ, ทินฺนํ กปฺปิยภูมิยา;
อตฺถาย สนฺตกํ เตสํ, เคหํ คหปเตวิทํฯ
[2668]
สา หิ สมฺมุติกา นาม, ยา หิ สงฺเฆน สมฺมตา;
กมฺมวาจมวตฺวา วา, วฏฺฏเตวาปโลกนํฯ
[2669]
ปฐมิฏฺฐกปาสาณ-ถมฺภาทิฏฺฐปเน ปน;
‘‘กปฺปิยกุฏิํ กโรมา’’ติ, วทนฺเตหิ สมนฺตโตฯ
[2670]
อุกฺขิปิตฺวา ฐเปนฺเตสุ, อามสิตฺวา ปเรสุ วา;
สยเมวุกฺขิปิตฺวา วา, ฐเปยฺยุสฺสาวนนฺติกาฯ
[2671]
อิฏฺฐกาทิปติฏฺฐานํ , ภิกฺขูนํ วทตํ ปน;
วาจาย ปริโยสานํ, สมกาลํ ตุ วฏฺฏติฯ
[2672]
อาราโม อปริกฺขิตฺโต, สกโล ภุยฺยโตปิ วา;
ทุวิโธปิ จ วิญฺญูหิ, โคนิสาทีติ วุจฺจติฯ
[2673]
เอตา ปน จตสฺโสปิ, โหนฺติ กปฺปิยภูมิโย;
เอตฺถ ปกฺกญฺจ วุตฺถญฺจ, สพฺพํ วฏฺฏติ อามิสํฯ
[2674]
อุสฺสาวนนฺติกา ยา สา, ถมฺภาทีสุ อธิฏฺฐิตา;
ถมฺภาทีสฺวปนีเตสุ, ตทญฺเญสุปิ ติฏฺฐติฯ
[2675]
อปนีเตสุ สพฺเพสุ, สิยา ชหิตวตฺถุกา;
โคนิสาที ปริกฺขิตฺตา, เสสา ฉทนนาสโตฯ
[2676]
ภิกฺขุํ ฐเปตฺวา อญฺเญสํ, หตฺถโต จ ปฏิคฺคโห;
เตสญฺจ สนฺนิธิ อนฺโต- วุตฺตํ ภิกฺขุสฺส วฏฺฏติฯ
[2677]
ภิกฺขุสฺส ภิกฺขุนิยา วา, สนฺตกํ สงฺฆิกมฺปิ วา;
อนฺโตวุตฺถญฺจ ปกฺกญฺจ, อุภินฺนํ น จ วฏฺฏติฯ
[2678]
อกปฺปกุฏิยา วุตฺถํ, สปฺปิอาทิวิมิสฺสิตํ;
‘‘อนฺโตวุตฺถ’’นฺติ นิทฺทิฏฺฐํ, ปฐมํ กาลิกทฺวยํฯ
[2679]
เตเหว สปฺปิอาทีหิ, ภิกฺขุนา ยาวชีวิกํ;
ปกฺกํ ตํ ปน สตฺตาหํ, วฏฺฏเตว นิรามิสํฯ
[2680]
สเจ อามิสสํสฏฺฐํ, ปกฺกํ ตํ ปริภุญฺชติ;
อนฺโตวุตฺถญฺจ ภิยฺโยปิ, สามปกฺกญฺจ ภุญฺชติฯ
[2681]
ยาวกาลิกมาหาโร, ปานกํ ยามกาลิกํ;
สตฺตาหกาลิกํ นาม, สปฺปิอาทิกปญฺจกํฯ
[2682]
เสสํ ปน หลิทฺทาทิ, เภสชฺชํ ยาวชีวิกํ;
จตุธา กาลิกา วุตฺตา, อุทกํ โหตฺยกาลิกํฯ
[2683]
ปฏิคฺคหวเสเนว, กาลาตีตา ติกาลิกา;
โหนฺติ โทสกรา ภุตฺตา, อภุตฺตํ ตติยมฺปิ จฯ
[2684]
อมฺพํ ชมฺพุ จ โจจญฺจ, โมจญฺจ มธุ มุทฺทิกา;
สาลุ ผารุสกญฺจาติ, ปานกํ อฏฺฐธา มตํฯ
[2685]
ปานกตฺถมนุญฺญาตํ, ผลํ ปกฺกญฺจ อามกํ;
ปานเหตุ ปฏิกฺขิตฺโต, สวตฺถุกปฏิคฺคโหฯ
[2686]
อมฺพปกฺกํ สุโกฏฺเฏตฺวา, มทฺทิตฺวา อุทเก ปน;
ปจฺฉา ปริสฺสวํ กตฺวา, ปาตุํ วฏฺฏติ ปานกํฯ
[2687]
วฏฺฏตาทิจฺจปากํ ตุ, อคฺคิปกฺกํ น วฏฺฏติ;
เอเสว จ นโย เสส-ปานเกสุปิ ทีปิโตฯ
[2688]
ปุปฺผปตฺตผลุจฺฉูนํ, จตฺตาโร ปนิเม รสา;
อนุญฺญาตา อิมานฏฺฐ, ปานานิ อนุชานตาฯ
[2689]
สพฺโพ ปุปฺผรโส วุตฺโต, มธุกสฺส รสํ วินา;
สพฺโพ ปตฺตรโส วุตฺโต, ปกฺกฑากรสํ วินาฯ
[2690]
สตฺตนฺนํ สานุโลมานํ, ธญฺญานํ ผลชํ รสํ;
ฐเปตฺวานุมโต สพฺโพ, วิกาเล ผลโช รโสฯ
[2691]
ยาวกาลิกปตฺตาน-มปิ สีตุทเก กโต;
มทฺทิตฺวาทิจฺจปาโกปิ, วิกาเล ปน วฏฺฏติฯ
[2692]
ตาลญฺจ นาฬิเกรญฺจ, ปนสํ ลพุชมฺปิ จ;
ติปุสาลาพุกุมฺภณฺฑํ, ตถา ปุสฺสผลมฺปิ จฯ
[2693]
เอวเมฬาลุกญฺจาติ, นเวตานิ ผลานิ หิ;
อปรณฺณญฺจ สพฺพมฺปิ, สตฺตธญฺญานุโลมิกํฯ
[2694]
พทรํ ติมฺพรู เสลุ, โกสมฺพํ กรมทฺทกํ;
มาตุลุงฺคกปิตฺถญฺจ, เวตฺตํ จิญฺจผลมฺปิ จฯ
[2695]
ผลานํ เอวมาทีนํ, ขุทฺทกานํ รโส ปน;
อฏฺฐปานานุโลมตฺตา, นิทฺทิฏฺโฐ อนุโลมิเกฯ
[2696]
สานุโลมสฺส ธญฺญสฺส, ฐเปตฺวา ผลชํ รสํ;
อญฺโญ ผลรโส นตฺถิ, อยามกาลิโก อิธฯ
เภสชฺชกฺขนฺธกกถาฯ
กถินกฺขนฺธกกถา
[2697]
ภิกฺขูนํ วุฏฺฐวสฺสานํ, กถินตฺถารมพฺรวิ;
ปญฺจนฺนํ อานิสํสานํ, การณา มุนิปุงฺคโวฯ
[2698]
น อุลฺลิขิตมตฺตาทิ-จตุวีสติวชฺชิตํ;
จีวรํ ภิกฺขุนาทาย, อุทฺธริตฺวา ปุราณกํฯ
[2699]
นวํ อธิฏฺฐหิตฺวาว, วตฺตพฺพํ วจสา ปุน;
‘‘อิมินานฺตรวาเสน, กถินํ อตฺถรามิ’’ติฯ
[2700]
วุตฺเต ติกฺขตฺตุมิจฺเจวํ, กถินํ โหติ อตฺถตํ;
สงฺฆํ ปนุปสงฺกมฺม, อาทาย กถินํ อิติฯ
[2701]
‘‘อตฺถตํ กถินํ ภนฺเต, สงฺฆสฺส อนุโมทถ;
ธมฺมิโก กถินตฺถาโร’’, วตฺตพฺพํ เตน ภิกฺขุนาฯ
[2702]
‘‘สุอตฺถตํ ตยา ภนฺเต, สงฺฆสฺส กถินํ ปุน;
ธมฺมิโก กถินตฺถาโร, อนุโมทามิ’’ตีรเยฯ
[2703]
กถินสฺส จ กิํ มูลํ, กิํ วตฺถุ กา จ ภูมิโย;
กติธมฺมวิโท ภิกฺขุ, กถินตฺถารมรหติฯ
[2704]
มูลเมกํ, สิยา วตฺถุ, ติวิธํ, ภูมิโย ฉ จ;
อฏฺฐธมฺมวิโท ภิกฺขุ, กถินตฺถารมรหติฯ
[2705]
สงฺโฆ มูลนฺติ นิทฺทิฏฺฐํ, วตฺถุ โหติ ติจีวรํ;
โขมาทีนิ ฉ วุตฺตานิ, จีวรานิ ฉ ภูมิโยฯ
[2706]