ปวาริเต จ สงฺฆสฺมิํ, กเรยฺยนาคโต ปน;

อวุฏฺโฐ ฉินฺนวสฺโส วา, ปาริสุทฺธิอุโปสถํฯ

[2640]

ปญฺจ ยสฺมิํ ปนาวาเส, จตฺตาโร วา ตโยปิ วา;

เอเกกสฺส หริตฺวาน, สมณา เต ปวารณํฯ

[2641]

อญฺญมญฺญํ ปวาเรนฺติ, สเจ อาปตฺติ ทุกฺกฏํ;

เสสํ อุโปสเถ วุตฺต-นเยนิธ นเย พุโธฯ

[2642]

ปาริสุทฺธิปฺปทาเนน, สมฺปาเทตตฺตโน สุจิํ;

ฉนฺททาเนน สงฺฆสฺส, สพฺพํ สาเธติ, นตฺตโนฯ

[2643]

ตสฺมา ปน อุภินฺนมฺปิ, กิจฺจสิทฺธตฺถเมวิธ;

ปาริสุทฺธิปิ ทาตพฺพา, ฉนฺทํ เทนฺเตน ภิกฺขุนาฯ

[2644]

ฉนฺเทเกน พหูนมฺปิ, หาตพฺโพ ปาริสุทฺธิปิ;

ปรมฺปราหโฏ ฉนฺโท, น คจฺฉติ วิสุทฺธิยาฯ

[2645]

ฉนฺทํ วา ปาริสุทฺธิํ วา, คเหตฺวา วา ปวารณํ;

สามเณราทิภาวํ วา, ปฏิชาเนยฺย หารโกฯ

[2646]

สเจ โส สงฺฆมปฺปตฺวา, วิพฺภเมยฺย มเรยฺย วา;

นาหฏญฺเจว ตํ สพฺพํ, ปตฺวา เจวํ สิยาหฏํฯ

[2647]

สงฺฆํ ปตฺวา ปมตฺโต วา, สุตฺโต วา ขิตฺตจิตฺตโก;

นาโรเจติ อนาปตฺติ, โหติ สญฺจิจฺจ ทุกฺกฏํฯ

[2648]

เย เต วิปสฺสนายุตฺตา, รตฺตินฺทิวมตนฺทิตา;

ปุพฺพรตฺตาปรรตฺตํ, วิปสฺสนปรายณาฯ

[2649]

ลทฺธผาสุวิหารานํ, สิยา น ปริหานิติ;

ปวารณาย สงฺคาโห, วุตฺโต กตฺติกมาสเกฯ

ปวารณกฺขนฺธกกถาฯ

จมฺมกฺขนฺธกกถา

[2650]

เอฬกาชมิคานํ ตุ, จมฺมํ วฏฺฏติ ภิกฺขุโน;

โรหิเตณิกุรงฺคานํ, ปสทํมิคมาตุยาฯ

[2651]

ฐเปตฺวา จมฺมเมเตสํ, อญฺญํ ทุกฺกฏวตฺถุกํ;

ถวิโกปาหเน สพฺพํ, จมฺมํ วฏฺฏตฺยมานุสํฯ

[2652]

วฏฺฏนฺติ มชฺฌิเม เทเส, น คุณงฺคุณุปาหนา;

วฏฺฏนฺติ อนฺโตอาราเม, สพฺพตฺถาปิ จ โรคิโนฯ

[2653]

ปุฏขลฺลกพทฺธา จ, ตเถว ปาลิคุณฺฐิมา;

ตูลปุณฺณา น วฏฺฏนฺติ, สพฺพนีลาทโยปิ จฯ

[2654]

จิตฺรา อุปาหนา เมณฺฑ-วิสาณูปมวทฺธิกา;

น จ วฏฺฏนฺติ โมรสฺส, ปิญฺเฉน ปริสิพฺพิตาฯ

[2655]

มชฺชารกาฬโกลูก-สีหพฺยคฺฆุทฺททีปินํ;

อชินสฺส จ จมฺเมน, น วฏฺฏติ ปริกฺขฏาฯ

[2656]

ปุฏาทิํ อปเนตฺวา วา, ฉินฺทิตฺวา วาปิ สพฺพโส;

วณฺณเภทํ ตถา กตฺวา, ธาเรตพฺพา อุปาหนาฯ

[2657]

สพฺพาปิ ปน ธาเรตุํ, น จ วฏฺฏนฺติ ปาทุกา;

ฐเปตฺวา ตตฺถ ปสฺสาว- วจฺจาจมนปาทุกาฯ

[2658]

อาสนฺทิญฺเจว ปลฺลงฺกํ, อุจฺจาสยนสญฺญิตํ;

อติกฺกนฺตปมาณํ ตุ, เสวมานสฺส ทุกฺกฏํฯ

[2659]

โคนกํ กุตฺตกํ จิตฺตํ, ปฏิกํ ปฏลิกมฺปิ จ;

เอกนฺตโลมิํ วิกติํ, ตูลิกํ อุทฺทโลมิกํฯ

[2660]

กฏฺฏิสฺสํ ปน โกเสยฺยํ, หตฺถิอสฺสรถตฺถรํ;

กทลิมิคปวร-ปจฺจตฺถรณกมฺปิ จฯ

[2661]

เหฏฺฐา รตฺตวิตานสฺส, ทฺวิธา รตฺตูปธานกํ;

อกปฺปิยมิทํ สพฺพํ, ทุกฺกฏํ ปริภุญฺชโตฯ

[2662]

เหฏฺฐา อกปฺปิเย ปจฺจตฺถเร สติ น วฏฺฏติ;

อุทฺธํ เสตวิตานมฺปิ, ตสฺมิํ อสติ วฏฺฏติฯ

[2663]

อาสนฺทิํ ปน ปลฺลงฺกํ, ฐเปตฺวา ตูลิกมฺปิ จ;

เสสํ ปน จ สพฺพมฺปิ, ลภเต คิหิสนฺตกํฯ

[2664]

ธมฺมาสเน อนาปตฺติ, ภตฺตคฺเคปิ นิสีทิตุํ;

ภูมตฺถรณเก ตตฺถ, สยิตุมฺปิ จ วฏฺฏติฯ

จมฺมกฺขนฺธกกถาฯ

เภสชฺชกฺขนฺธกกถา

[2665]

วุตฺตา คหปติสฺสาปิ, สมฺมุตุสฺสาวนนฺติกา;

โคนิสาทีติ กปฺปิยา, จตสฺโส โหนฺติ ภูมิโยฯ

[2666]

สงฺฆสฺส สนฺตกํ เคหํ, สนฺตกํ ภิกฺขุโนปิ วา;

กปฺปิยํ ปน กตฺตพฺพํ, สหเสยฺยปฺปโหนกํฯ

[2667]

ฐเปตฺวา ภิกฺขุมญฺเญหิ, ทินฺนํ กปฺปิยภูมิยา;

อตฺถาย สนฺตกํ เตสํ, เคหํ คหปเตวิทํฯ

[2668]

สา หิ สมฺมุติกา นาม, ยา หิ สงฺเฆน สมฺมตา;

กมฺมวาจมวตฺวา วา, วฏฺฏเตวาปโลกนํฯ

[2669]

ปฐมิฏฺฐกปาสาณ-ถมฺภาทิฏฺฐปเน ปน;

‘‘กปฺปิยกุฏิํ กโรมา’’ติ, วทนฺเตหิ สมนฺตโตฯ

[2670]

อุกฺขิปิตฺวา ฐเปนฺเตสุ, อามสิตฺวา ปเรสุ วา;

สยเมวุกฺขิปิตฺวา วา, ฐเปยฺยุสฺสาวนนฺติกาฯ

[2671]