ปริวาสาทิกมฺเมปิ , ตตฺรฏฺฐํ คณปูรกํ;
กตฺวา ปน กโรนฺตานํ, ตถา, เสสํ ตุ วฏฺฏติฯ
อุโปสถกฺขนฺธกกถาฯ
วสฺสูปนายิกกฺขนฺธกกถา
[2608]
ปุริมา ปจฺฉิมา จาติ, ทุเว วสฺสูปนายิกา;
อาลโย วา วจีเภโท, กตฺตพฺโพ อุปคจฺฉตาฯ
[2609]
วสฺสูปคมนํ วาปิ, ชานํ อนุปคจฺฉโต;
เตมาสมวสิตฺวา วา, จรนฺตสฺสปิ ทุกฺกฏํฯ
[2610]
รุกฺขสฺส สุสิเร ฉตฺเต, จาฏิฉวกุฏีสุ วา;
อชฺโฌกาเสปิ วา วสฺสํ, อุปคนฺตุํ น วฏฺฏติฯ
[2611]
วสฺสจฺเฉเท อนาปตฺติ, อนฺตราโย สเจ สิยา;
ฉินฺนวสฺสสฺส ภิกฺขุสฺส, วาริตาว ปวารณาฯ
[2612]
มาตาปิตูนํ ปน ทสฺสนตฺถํ;
ปญฺจนฺนมตฺเถ สหธมฺมิกานํ;
ทฏฺฐุํ คิลานํ ตทุปฏฺฐกานํ;
ภตฺตาทิ เนสํ ปริเยสนตฺถํฯ
[2613]
ตถานภิรตํ คนฺตฺวา, วูปกาเสสฺสมุฏฺฐิตํ;
ทิฏฺฐิํ วา ตสฺส กุกฺกุจฺจํ, วิโนเทสฺสามหนฺติ วาฯ
[2614]
เอวํ สตฺตาหกิจฺเจน, ภิกฺขุนา วินยญฺญุนา;
อเปสิเตปิ คนฺตพฺพํ, ปเคว ปหิเต ปนฯ
[2615]
วสฺสํ อุปคเตเนตฺถ, อนิมนฺติตภิกฺขุนา;
ธมฺมสฺส สวนตฺถาย, คนฺตุํ ปน น วฏฺฏติฯ
[2616]
‘‘อสุกํ นาม ทิวสํ, สนฺนิปาโต ภวิสฺสติ’’;
อิจฺเจวํ กติกา ปุพฺพํ, กตา เจ ปน วฏฺฏติฯ
[2617]
‘‘โธวิสฺสามิ รชิสฺสามิ, ภณฺฑก’’นฺติ น วฏฺฏติ;
สจาจริยุปชฺฌายา, ปหิณนฺติ จ วฏฺฏติฯ
[2618]
อุทฺเทสาทีนมตฺถาย, คนฺตุํ เนว จ วฏฺฏติ;
ครูนํ ทสฺสนตฺถาย, คนฺตุํ ลภติ ปุคฺคโลฯ
[2619]
สเจ อาจริโย ‘‘อชฺช, มา คจฺฉาหี’’ติ ภาสติ;
รตฺติจฺเฉเท อนาปตฺติ, โหตีติ ปริทีปิตาฯ
[2620]
ยสฺส กสฺสจิ ญาติสฺส, อุปฏฺฐากกุลสฺส วา;
คจฺฉโต ทสฺสนตฺถาย, รตฺติจฺเฉเท จ ทุกฺกฏํฯ
[2621]
‘‘อาคมิสฺสามิ อชฺเชว, คนฺตฺวาหํ คามก’’นฺติ จ;
สเจ ปาปุณิตุํ คจฺฉํ, น สกฺโกเตว วฏฺฏติฯ
[2622]
วเช สตฺเถปิ นาวายํ, ตีสุ ฐาเนสุ ภิกฺขุโน;
วสฺสจฺเฉเท อนาปตฺติ, ปวาเรตุญฺจ วฏฺฏติฯ
[2623]
สติ ปจฺจยเวกลฺเล, สรีราผาสุตาย วา;
เอเสว อนฺตราโยติ, วสฺสํ เฉตฺวาปิ ปกฺกเมฯ
[2624]
เยน เกนนฺตราเยน, วสฺสํ โนปคโต หิ โย;
ทุติยา อุปคนฺตพฺพา, ฉินฺนวสฺเสน วา ปนฯ
[2625]
วสฺสํ อนุปคนฺตฺวา วา, ตทเหว จ คจฺฉติ;
พหิทฺธา เอว สตฺตาหํ, อุปคนฺตฺวาปิ วา ปนฯ
[2626]
วีตินาเมติ เจ ตสฺส, ปุริมาปิ น วิชฺชติ;
ปฏิสฺสเว จ ภิกฺขุสฺส, โหติ อาปตฺติ ทุกฺกฏํฯ
[2627]
วสฺสํ ปนุปคนฺตฺวา จ, อุฏฺฐาเปตฺวา น จารุณํ;
คจฺฉโต ปน สตฺตาห-กรเณเนว ภิกฺขุโนฯ
[2628]
อนฺโตเยว จ สตฺตาหํ, นิวตฺตนฺตสฺส ตสฺส ตุ;
อนาปตฺตีติ โก วาโท, วสิตฺวา พหิ คจฺฉโตฯ
[2629]
‘‘วสิสฺสามีธ วสฺส’’นฺติ, อาลโย ยทิ วิชฺชติ;
โนเปตสติยา วสฺสํ, เตน เสนาสนํ ปนฯ
[2630]
คหิตํ สุคฺคหิตํ โหติ, ฉินฺนวสฺโส น โหติ โส;
ลภเตว ปวาเรตุํ, น โทโส โกจิ วิชฺชติฯ
[2631]
‘‘อิมสฺมิํ วิหาเร เตมาสํ, อิมํ วสฺสํ อุเปมิ’’ติ;
นิจฺฉาริเต จ ติกฺขตฺตุํ, วสฺสํ อุปคโต สิยาฯ
[2632]
อาทิํ ตุ นวมิํ กตฺวา, คนฺตุํ วฏฺฏติ ภิกฺขุโน;
อาคจฺฉตุ จ ปจฺฉา โส, มา วา โทโส น วิชฺชติฯ
วสฺสูปนายิกกฺขนฺธกกถาฯ
ปวารณกฺขนฺธกกถา
[2633]
จาตุทฺทสี ปญฺจทสี, สามคฺคี จ ปวารณา;
เตวาจี ทฺเวกวาจี จ, สงฺเฆ จ คณปุคฺคเลฯ
[2634]
เอตา ปน มุนินฺเทน, วุตฺตา นว ปวารณา;
ตีณิ กมฺมานิ มุญฺจิตฺวา, อนฺเตเนว ปวารเยฯ
[2635]
ปุพฺพกิจฺจํ สมาเปตฺวา, ปตฺตกลฺเล สมานิเต;
ญตฺติํ ฐเปตฺวา สงฺเฆน, กตฺตพฺพา หิ ปวารณาฯ
[2636]
ปวาเรนฺเตสุ เถเรสุ, นิสีเทยฺย นโว ปน;
สยํ ยาว ปวาเรยฺย, ตาว อุกฺกุฏิกญฺหิ โสฯ
[2637]
ญตฺติํ วตฺวา ปวาเรยฺยุํ, จตฺตาโร วา ตโยปิ วา;
ปุพฺพกิจฺจํ สมาเปตฺวา, เอกาวาเส วสนฺติ เจฯ
[2638]
อญฺญมญฺญํ ปวาเรยฺยุํ, วินา ญตฺติํ ทุเว ชนา;
อธิฏฺเฐยฺย ปเนโกปิ, เสสา สงฺฆปวารณาฯ
[2639]