ติกปาจิตฺติยํ วุตฺตํ, ปุจฺฉิเต ทุกฺกฏทฺวยํ;
อาปทาสุ คิลานาย, น โทสุมฺมตฺติกาย วาฯ
[2425]
อิทํ ปน สมุฏฺฐานํ, กถิเนน สมํ มตํ;
กฺริยากฺริยมจิตฺตญฺจ, ติจิตฺตญฺจ ติเวทนํฯ
เอกาทสมํฯ
[2426]
อโนกาสกตํ ภิกฺขุํ, ปญฺหํ ปุจฺเฉยฺย โทสตา;
วินเย จ กโตกาสํ, สุตฺตํ ปุจฺฉนฺติยาปิ จฯ
[2427]
กาเรตฺวา ปน โอกาสํ, อโนทิสฺสาปิ ปุจฺฉติ;
น โทโส ปทโสธมฺม-สมุฏฺฐานมิทํ ปนฯ
ทฺวาทสมํฯ
[2428]
สํกจฺจิกํ วินา คามํ, ปทสา ปวิสนฺติยา;
ปริกฺขิตฺตสฺส คามสฺส, ปริกฺเขโปกฺกเม ปนฯ
[2429]
ทุกฺกฏํ ปฐเม ปาเท, ปาจิตฺติ ทุติเย สิยา;
อุปจาโรกฺกเมเปตฺถ, เอเสว จ นโย มโตฯ
[2430]
ยสฺสา สํกจฺจิกํ นฏฺฐํ, อจฺฉินฺนํ วาปิ เกนจิ;
อนาปตฺติ สิยา ตสฺสา, คิลานายาปทาสุปิฯ
[2431]
อิทเมฬกโลเมน, สมุฏฺฐานาทินา สมํ;
เสสํ วุตฺตนเยเนว, วิญฺญาตพฺพํ วิภาวินาฯ
เตรสมํฯ
ฉตฺตุปาหนวคฺโค นวโมฯ
อิติ วินยวินิจฺฉเย ปาจิตฺติยกถา นิฏฺฐิตาฯ
ปาฏิเทสนียกถา
[2432]
อคิลานา สเจ สปฺปิํ, ลทฺธํ วิญฺญตฺติยา สยํ;
‘‘ภุญฺชิสฺสามี’’ติ คหเณ, ทุกฺกฏํ ปริทีปิตํฯ
[2433]
อชฺโฌหารวเสเนว, ปาฏิเทสนิยํ สิยา;
ติปาฏิเทสนียํ ตุ, คิลานาย ทฺวิทุกฺกฏํฯ
[2434]
คิลานา วิญฺญาเปตฺวาน, ปจฺฉา เสวนฺติยาปิ จ;
คิลานายาวเสสํ วา, วิญฺญตฺตํ ญาตกาทิโตฯ
[2435]
อญฺญสฺสตฺถาย วา อตฺต-ธเนนุมฺมตฺติกาย วา;
อนาปตฺติ สมุฏฺฐานํ, อทฺธานสทิสํ มตํฯ
ปฐมํฯ
[2436]
อยเมว จ เสเสสุ, ทุติยาทีสุ นิจฺฉโย;
สมุฏฺฐานาทินา สทฺธิํ, นตฺถิ กาจิ วิเสสตาฯ
[2437]
อนาคเตสุ สพฺเพสุ, สปฺปิอาทีสุ ปาฬิยํ;
ภุญฺชนฺติยา ตุ วิญฺญตฺวา, อฏฺฐสุปิ จ ทุกฺกฏํฯ
อิติ วินยวินิจฺฉเย
ปาฏิเทสนียกถา นิฏฺฐิตาฯ
[2438]
เสขิยา ปน เย ธมฺมา, อุทฺทิฏฺฐา ปญฺจสตฺตติ;
เตสํ มหาวิภงฺเค ตุ, วุตฺโต อตฺถวินิจฺฉโยฯ
อิติ วินยวินิจฺฉเย
สิกฺขากรณียกถา นิฏฺฐิตาฯ
[2439]
อุภโตปาติโมกฺขานํ ;
สวิภงฺคานเมว โย;
อตฺโถ อฏฺฐกถาสาโร;
โส จ วุตฺโต วิเสสโตฯ
[2440]
ตญฺจ สพฺพํ สมาทาย, วินยสฺส วินิจฺฉโย;
ภิกฺขูนํ ภิกฺขุนีนญฺจ, หิตตฺถาย กโต มยาฯ
[2441]
อิมํ ปฏิภานชนฺตุ โน ชนฺตุโน;
สุณนฺติ วินเย หิ เต เย หิเต;
ชนสฺส สุมตายเน ตายเน;
ภวนฺติ ปกตญฺญุโน ตญฺญุโนฯ
[2442]
พหุสารนเย วินเย ปรเม;
อภิปตฺถยตา หิ วิสารทตํ;
ปรมา ปน พุทฺธิมตา มหตี;
กรณียตมา ยตินาทรตาฯ
[2443]
อวคจฺฉติ โย ปน ภิกฺขุ อิมํ;
วินยสฺส วินิจฺฉยมตฺถยุตํ;
อมรํ อชรํ อรชํ อรุชํ;
อธิคจฺฉติ สนฺติปทํ ปน โสฯ
อิติ วินยวินิจฺฉเย
ภิกฺขุนีวิภงฺคกถา นิฏฺฐิตาฯ
ขนฺธกกถา
มหาวคฺโค
มหาขนฺธกกถา