เมนู

ปฐมปาราชิกกถา

[6]

ติวิเธ ติลมตฺตมฺปิ, มคฺเค เสวนเจตโน;

องฺคชาตํ ปเวเสนฺโต, อลฺโลกาเส ปราชิโตฯ

[7]

ปเวสนํ ปวิฏฺฐํ วา, ฐิตมุทฺธรณมฺปิ วา;

สสิกฺโข สาทิยนฺโต โส, ฐเปตฺวา กิริยํ จุโตฯ

[8]

สนฺถเตนงฺคชาเตน, สนฺถตํ วา อสนฺถตํ;

มคฺคํ ปน ปเวเสนฺโต, ตเถวาสนฺถเตน จฯ

[9]

อุปาทินฺเนนุปาทินฺเน, อนุปาทินฺนเกน วา;

ฆฏฺฏิเต อนุปาทินฺเน, สเจ สาทิยเตตฺถ โสฯ

[10]

โหติ ปาราชิกกฺเขตฺเต, ปวิฏฺเฐ ตุ ปราชิโต;

เขตฺเต ถุลฺลจฺจยํ ตสฺส, ทุกฺกฏญฺจ วินิทฺทิเสฯ

[11]

มเต อกฺขายิเต จาปิ, เยภุยฺยกฺขายิเตปิ จ;

เมถุนํ ปฏิเสวนฺโต, โหติ ปาราชิโก นโรฯ

[12]

เยภุยฺยกฺขายิเต จาปิ, อุปฑฺฒกฺขายิเตปิ จ;

โหติ ถุลฺลจฺจยาปตฺติ, เสเส อาปตฺติ ทุกฺกฏํฯ

[13]

นิมิตฺตมตฺตํ เสเสตฺวา, ขายิเตปิ สรีรเก;

นิมิตฺเต เมถุนํ ตสฺมิํ, เสวโตปิ ปราชโยฯ

[14]

อุทฺธุมาตาทิสมฺปตฺเต, สพฺพตฺถาปิ จ ทุกฺกฏํ;

ขายิตากฺขายิตํ นาม, สพฺพํ มตสรีรเกฯ

[15]

ฉินฺทิตฺวา ปน ตจฺเฉตฺวา, นิมิตฺตุปฺปาฏิเต ปน;

วณสงฺเขปโต ตสฺมิํ, เสวํ ถุลฺลจฺจยํ ผุเสฯ

[16]

ตโต เมถุนราเคน, ปติตาย นิมิตฺตโต;

ตายํ อุปกฺกมนฺตสฺส, ทุกฺกฏํ มํสเปสิยํฯ

[17]

นขปิฏฺฐิปฺปมาเณปิ, มํเส นฺหารุมฺหิ วา สติ;

เมถุนํ ปฏิเสวนฺโต, ชีวมาเน ปราชิโตฯ

[18]

กณฺณจฺฉิทฺทกฺขินาสาสุ, วตฺถิโกเส วเณสุ วา;

องฺคชาตํ ปเวเสนฺโต, ราคา ถุลฺลจฺจยํ ผุเสฯ

[19]

อวเสสสรีรสฺมิํ, อุปกจฺฉูรุกาทิสุ;

วสา เมถุนราคสฺส, เสวมานสฺส ทุกฺกฏํฯ

[20]

อสฺสโคมหิสาทีนํ, โอฏฺฐคทฺรภทนฺตินํ;

นาสาสุ วตฺถิโกเสสุ, เสวํ ถุลฺลจฺจยํ ผุเสฯ

[21]

ตถา สพฺพติรจฺฉานํ, อกฺขิกณฺณวเณสุปิ;

อวเสสสรีเรสุ, เสวมานสฺส ทุกฺกฏํฯ

[22]

เตสํ อลฺลสรีเรสุ, มตานํ เสวโต ปน;

ติวิธาปิ สิยาปตฺติ, เขตฺตสฺมิํ ติวิเธ สติฯ

[23]

พหิ เมถุนราเคน, นิมิตฺตํ อิตฺถิยา ปน;

นิมิตฺเตน ฉุปนฺตสฺส, ตสฺส ถุลฺลจฺจยํ สิยาฯ

[24]

กายสํสคฺคราเคน, นิมิตฺเตน มุเขน วา;

นิมิตฺตํ อิตฺถิยา ตสฺส, ฉุปโต ครุกํ สิยาฯ

[25]

ตเถโวภยราเคน, นิมิตฺตํ ปุริสสฺสปิ;

นิมิตฺเตน ฉุปนฺตสฺส, โหติ อาปตฺติ ทุกฺกฏํฯ

[26]

นิมิตฺเตน นิมิตฺตํ ตุ, ติรจฺฉานคติตฺถิยา;

ถุลฺลจฺจยํ ฉุปนฺตสฺส, โหติ เมถุนราคโตฯ

[27]

กายสํสคฺคราเคน, ติรจฺฉานคติตฺถิยา;

นิมิตฺเตน นิมิตฺตสฺส, ฉุปเน ทุกฺกฏํ มตํฯ

[28]

องฺคชาตํ ปเวเสตฺวา, ตมาวฏฺฏกเต มุเข;

ตตฺถากาสคตํ กตฺวา, นีหรนฺตสฺส ทุกฺกฏํฯ

[29]

ตถา จตูหิ ปสฺเสหิ, อิตฺถิยา เหฏฺฐิมตฺตลํ;

อฉุปนฺตํ ปเวเสตฺวา, นีหรนฺตสฺส ทุกฺกฏํฯ

[30]

อุปฺปาฏิโตฏฺฐมํเสสุ , พหิ นิกฺขนฺตเกสุ วา;

ทนฺเตสุ วายมนฺตสฺส, ตสฺส ถุลฺลจฺจยํ สิยาฯ

[31]

อฏฺฐิสงฺฆฏฺฏนํ กตฺวา, มคฺเค ทุวิธราคโต;

สุกฺเก มุตฺเตปิ วามุตฺเต, วายมนฺตสฺส ทุกฺกฏํฯ

[32]

อิตฺถิํ เมถุนราเคน, อาลิงฺคนฺตสฺส ทุกฺกฏํ;

หตฺถคฺคาหปรามาส-จุมฺพนาทีสฺวยํ นโยฯ

[33]

อปเท อหโย มจฺฉา, กโปตา ทฺวิปเทปิ จ;

โคธา จตุปฺปเท เหฏฺฐา, วตฺถุ ปาราชิกสฺสิเมฯ

[34]

เสเวตุกามตาจิตฺตํ, มคฺเค มคฺคปฺปเวสนํ;

อิทมงฺคทฺวยํ วุตฺตํ, ปฐมนฺติมวตฺถุโนฯ

[35]

ทุกฺกฏํ ปฐมสฺเสว, สามนฺตมิติ วณฺณิตํ;

เสสานํ ปน ติณฺณมฺปิ, ถุลฺลจฺจยมุทีริตํฯ

[36]

‘‘อนาปตฺตี’’ติ ญาตพฺพํ, อชานนฺตสฺส ภิกฺขุโน;

ตเถวาสาทิยนฺตสฺส, ชานนฺตสฺสาทิกมฺมิโนฯ

[37]

วินเย อนยูปรเม ปรเม;

สุชนสฺส สุขานยเน นยเน;

ปฏุ โหติ ปธานรโต น รโต;

อิธ โย ปน สารมเต รมเตฯ

[38]

อิมํ หิตวิภาวนํ ภาวนํ;

อเวทิ สุรสมฺภวํ สมฺภวํ;

ส มารพฬิสาสเน สาสเน;

สโม ภวตุปาลินา ปาลินาฯ

อิติ วินยวินิจฺฉเย ปฐมปาราชิกกถา นิฏฺฐิตาฯ

ทุติยปาราชิกกถา

[39]

อาทิยนฺโต หรนฺโตว-หรนฺโต อิริยาปถํ;

วิโกเปนฺโต ตถา ฐานา, จาเวนฺโตปิ ปราชิโตฯ

[40]

ตตฺถ นาเนกภณฺฑานํ, ปญฺจกานํ วสา ปน;

อวหารา ทเสเวเต, วิญฺญาตพฺพา วิภาวินาฯ

[41]

สาหตฺถาณตฺติโก เจว, นิสฺสคฺโค อตฺถสาธโก;

ธุรนิกฺเขปนญฺจาติ, อิทํ สาหตฺถปญฺจกํฯ

[42]

ปุพฺพสหปโยโค จ, สํวิทาหรณมฺปิ จ;

สงฺเกตกมฺมํ เนมิตฺตํ, ปุพฺพโยคาทิปญฺจกํฯ

[43]

เถยฺยปสยฺหปริกปฺป-ปฏิจฺฉนฺนกุสาทิกา;

อวหารา อิเม ปญฺจ, เวทิตพฺพาว วิญฺญุนาฯ

[44]

วตฺถุกาลคฺฆเทเส จ, ปริโภคญฺจ ปญฺจปิ;

ญตฺวา เอตานิ กาตพฺโพ, ปณฺฑิเตน วินิจฺฉโยฯ

[45]

ทุติยํ วาปิ กุทฺทาลํ, ปิฏกํ ปริเยสโต;

คจฺฉโต เถยฺยจิตฺเตน, ทุกฺกฏํ ปุพฺพโยคโตฯ

[46]

ตตฺถชาตกกฏฺฐํ วา, ลตํ วา ฉินฺทโต ปน;

ทุกฺกฏํ อุภยตฺถาปิ, วุตฺตํ สหปโยคโตฯ

[47]

ปถวิํ ขณโต วาปิ, พฺยูหโต ปํสุเมว วา;

อามสนฺตสฺส วา กุมฺภิํ, โหติ อาปตฺติ ทุกฺกฏํฯ

[48]

มุเข ปาสํ ปเวเสตฺวา, ขาณุเก พทฺธกุมฺภิยา;

พนฺธนานํ วสา เญยฺโย, ฐานเภโท วิชานตาฯ

[49]

ทฺเว ฐานานิ ปเนกสฺมิํ, ขาณุเก พทฺธกุมฺภิยา;

วลยํ รุกฺขมูลสฺมิํ, ปเวเสตฺวา กตาย วาฯ

[50]

อุทฺธรนฺตสฺส ขาณุํ วา, ฉินฺทโต สงฺขลิมฺปิ วา;

ถุลฺลจฺจยํ ตโต กุมฺภิํ, ฐานา จาเวติ เจ จุโตฯ

[51]