วิญฺญู ปฏิพโล กาย-สํสคฺคํ ปฏิปชฺชิตุํ;
กายสํสคฺคภาเว ตุ, สาธกํ วจนํ อิทํฯ
อฏฺฐวตฺถุกกถาฯ
[2010]
อวสฺสุตา ปฏิจฺฉาที, อุกฺขิตฺตา อฏฺฐวตฺถุกา;
อสาธารณปญฺญตฺตา, จตสฺโสว มเหสินาฯ
ปาราชิกกถา นิฏฺฐิตาฯ
สงฺฆาทิเสสกถา
[2011]
ยา ปน ภิกฺขุนี อุสฺสยวาทา;
อฏฺฏกรี มุขรี วิหเรยฺย;
เยน เกนจิ นเรนิธ สทฺธิํ;
สา ครุกํ กิร โทสมุเปติฯ
[2012]
สกฺขิํ วาปิ สหายํ วา, ปริเยสติ ทุกฺกฏํ;
ปเท ปเท ตถา อฏฺฏํ, กาตุํ คจฺฉนฺติยาปิ จฯ
[2013]
อาโรเจติ สเจ ปุพฺพํ, ภิกฺขุนี อตฺตโน กถํ;
ทิสฺวา โวหาริกํ ตสฺสา, โหติ อาปตฺติ ทุกฺกฏํฯ
[2014]
อาโรเจติ สเจ ปจฺฉา, อิตโร อตฺตโน กถํ;
โหติ ภิกฺขุนิยา ตสฺสา, ถุลฺลจฺจยมนนฺตรํฯ
[2015]
อาโรเจติตโร ปุพฺพํ, สเจ โส อตฺตโน กถํ;
ปจฺฉา ภิกฺขุนี เจ ปุพฺพ-สทิโสว วินิจฺฉโยฯ
[2016]
‘‘อาโรเจหี’’ติ วุตฺตา เจ, ‘‘กถํ ตว มมาปิ จ’’;
อาโรเจตุ ยถากามํ, ปฐเม ทุกฺกฏํ สิยาฯ
[2017]
ทุติยาโรจเน ตสฺสา, ถุลฺลจฺจยมุทีริตํ;
อุปาสเกน วุตฺเตปิ, อยเมว วินิจฺฉโยฯ
[2018]
อาโรจิตกถํ สุตฺวา, อุภินฺนมฺปิ ยถา ตถา;
วินิจฺฉเย กเต เตหิ, อฏฺเฏ ปน จ นิฏฺฐิเตฯ
[2019]
อฏฺฏสฺส ปริโยสาเน, ชเย ภิกฺขุนิยา ปน;
ปราชเยปิ วา ตสฺสา, โหติ สงฺฆาทิเสสตาฯ
[2020]
ทูตํ วาปิ ปหิณิตฺวา, อาคนฺตฺวาน สยมฺปิ วา;
ปจฺจตฺถิกมนุสฺเสหิ, อากฑฺฒียติ ยา ปนฯ
[2021]
อาราเม ปน อญฺเญหิ, อนาจารํ กตํ สเจ;
อโนทิสฺส ปรํ กิญฺจิ, รกฺขํ ยาจติ ตตฺถ ยาฯ
[2022]
ยาย กิญฺจิ อวุตฺตาว, ธมฺมฏฺฐา สยเมว ตุ;
สุตฺวา ตํ อญฺญโต อฏฺฏํ, นิฏฺฐาเปนฺติ สเจ ปนฯ
[2023]
ตสฺสา, อุมฺมตฺติกาทีน-มนาปตฺติ ปกาสิตา;
กถิเนน สมุฏฺฐานํ, ตุลฺยํ สกิริยํ อิทํฯ
อฏฺฏการิกถาฯ
[2024]
ชานนฺตี ภิกฺขุนี โจริํ, วชฺฌํ วิทิตเมว ยา;
สงฺฆํ อนปโลเกตฺวา, ราชานํ คณเมว วาฯ
[2025]
วุฏฺฐาเปยฺย วินา กปฺปํ, โจริวุฏฺฐาปนํ ปน;
สงฺฆาทิเสสมาปตฺติ-มาปนฺนา นาม โหติ สาฯ
[2026]
ปญฺจมาสคฺฆนํ ยาย, หริตํ ปรสนฺตกํ;
อติเรกคฺฆนํ วาปิ, อยํ ‘‘โจรี’’ติ วุจฺจติฯ
[2027]
ภิกฺขุนีสุ ปนญฺญาสุ, ติตฺถิเยสุปิ วา ตถา;
ยา ปพฺพชิตปุพฺพา สา, อยํ ‘‘กปฺปา’’ติ วุจฺจติฯ
[2028]
วุฏฺฐาเปติ จ ยา โจริํ, ฐเปตฺวา กปฺปเมวิทํ;
สเจ อาจรินิํ ปตฺตํ, จีวรํ ปริเยสติฯ
[2029]
สมฺมนฺนติ จ สีมํ วา, ตสฺสา อาปตฺติ ทุกฺกฏํ;
ญตฺติยา ทุกฺกฏํ ทฺวีหิ, กมฺมวาจาหิ จ ทฺวยํฯ
[2030]
ถุลฺลจฺจยสฺส, กมฺมนฺเต, ครุกํ นิทฺทิเส พุโธ;
คโณ อาจรินี เจว, น จ มุจฺจติ ทุกฺกฏํฯ
[2031]
อนาปตฺติ อชานนฺตี, วุฏฺฐาเปติ, ตเถว จ;
กปฺปํ วา อปโลเกตฺวา, ตสฺสา อุมฺมตฺติกาย วาฯ
[2032]
โจริวุฏฺฐาปนํ นาม, ชายเต วาจจิตฺตโต;
กายวาจาทิโต เจว, สจิตฺตญฺจ กฺริยากฺริยํฯ
โจริวุฏฺฐาปนกถาฯ
[2033]
คามนฺตรํ นทีปารํ, คจฺเฉยฺเยกาว ยา สเจ;
โอหีเยยฺย คณมฺหา วา, รตฺติํ วิปฺปวเสยฺย วาฯ
[2034]
ปฐมาปตฺติกํ ธมฺมํ, สาปนฺนา ครุกํ สิยา;
สกคามา อนาปตฺติ, ญาตพฺพา นิกฺขมนฺติยาฯ
[2035]
นิกฺขมิตฺวา ตโต อญฺญํ, คามํ คจฺฉนฺติยา ปน;
ทุกฺกฏํ ปทวาเรน, เวทิตพฺพํ วิภาวินาฯ
[2036]
เอเกน ปทวาเรน, คามสฺส อิตรสฺส จ;
ปริกฺเขเป อติกฺกนฺเต, อุปจาโรกฺกเมปิ วาฯ
[2037]
ถุลฺลจฺจยํ อติกฺกนฺเต, โอกฺกนฺเต ทุติเยน ตุ;
ปาเทน ครุกาปตฺติ, โหติ ภิกฺขุนิยา ปนฯ
[2038]
นิกฺขมิตฺวา สเจ ปจฺฉา, สกํ คามํ วิสนฺติยา;
อยเมว นโย เญยฺโย, วติจฺฉิทฺเทน วา ตถาฯ
[2039]
ปากาเรน วิหารสฺส, ภูมิํ ตุ ปวิสนฺติยา;
กปฺปิยนฺติ ปวิฏฺฐตฺตา, น โทโส โกจิ วิชฺชติฯ
[2040]
ภิกฺขุนีนํ วิหารสฺส, ภูมิ ตาสํ ตุ กปฺปิยา;
โหติ ภิกฺขุวิหารสฺส, ภูมิ ตาสมกปฺปิยาฯ
[2041]
หตฺถิอสฺสรถาทีหิ, อิทฺธิยา วา วิสนฺติยา;
อนาปตฺติ สิยาปตฺติ, ปทสา คมเน ปนฯ
[2042]
ยํ กิญฺจิ สกคามํ วา, ปรคามมฺปิ วา ตถา;
พหิคาเม ปน ฐตฺวา, อาปตฺติ ปวิสนฺติยาฯ
[2043]
ลกฺขเณนุปปนฺนาย, นทิยา ทุติยํ วินา;
ปารํ คจฺฉติ ยา ตีรํ, ตสฺสา สมณิยา ปนฯ
[2044]
ปฐมํ อุทฺธริตฺวาน, ปาทํ ตีเร ฐเปนฺติยา;
โหติ ถุลฺลจฺจยาปตฺติ, ทุติยาติกฺกเม ครุฯ
[2045]
อนฺตรนทิยํเยว, สทฺธิํ ทุติยิกาย หิ;
ภณฺฑิตฺวา โอริมํ ตีรํ, ตถา ปจฺจุตฺตรนฺติยาฯ
[2046]
อิทฺธิยา เสตุนา นาวา-ยานรชฺชูหิ วา ปน;
เอวมฺปิ จ ปรํ ตีรํ, อนาปตฺตุตฺตรนฺติยาฯ
[2047]
นฺหายิตุํ ปิวิตุํ วาปิ, โอติณฺณาถ นทิํ ปุน;
ปทสาโวริมํ ตีรํ, ปจฺจุตฺตรติ วฏฺฏติฯ
[2048]
ปทสา โอตริตฺวาน, นทิํ อุตฺตรเณ ปน;
อาโรหิตฺวา ตถา เสตุํ, อนาปตฺตุตฺตรนฺติยาฯ
[2049]
เสตุนา อุปคนฺตฺวา วา, ยานากาเสหิ วา สเจ;
ยาติ อุตฺตรเณ กาเล, ปทสา ครุกํ ผุเสฯ
[2050]
นทิยา ปาริมํ ตีรํ, อิโต โอริมตีรโต;
อุลฺลงฺฆิตฺวาน เวเคน, อนาปตฺตุตฺตรนฺติยาฯ
[2051]
ปิฏฺฐิยํ วา นิสีทิตฺวา, ขนฺเธ วา อุตฺตรนฺติยา;
หตฺถสงฺฆาตเน วาปิ, ทุสฺสยาเนปิ วฏฺฏติฯ
[2052]
‘‘ปุเรรุโณทยาเยว , ปาสํ ทุติยิกาย หิ;
คมิสฺสามี’’ติ อาโภคํ, วินา ภิกฺขุนิยา ปนฯ
[2053]
เอกคพฺเภปิ วา หตฺถ-ปาสํ ทุติยิกาย หิ;
อติกฺกมฺม สิยาปตฺติ, อรุณํ อุฏฺฐเปนฺติยาฯ
[2054]
‘‘คมิสฺสามี’’ติ อาโภคํ, กตฺวา คจฺฉนฺติยา ปน;
น โทโส ทุติยา ปาสํ, อุฏฺเฐติ อรุณํ สเจฯ
[2055]
อินฺทขีลมติกฺกมฺม, อรญฺญํ เอตฺถ ทีปิตํ;
คามโต พหิ นิกฺขมฺม, ตสฺสา ทุติยิกาย ตุฯ
[2056]
ทสฺสนสฺสุปจารํ ตุ, ชานิตฺวา วิชหนฺติยา;
โหติ ถุลฺลจฺจยาปตฺติ, ชหิเต ครุกํ สิยาฯ
[2057]
สาณิปาการปาการ-ตรุอนฺตริเต ปน;
สวนสฺสุปจาเรปิ, สติ อาปตฺติ โหติ หิฯ
[2058]
อชฺโฌกาเส ตุ ทูเรปิ, ทสฺสนสฺสุปจารตา;
โหติ, เอตฺถ กถํ ธมฺม-สวนาโรจเน วิยฯ
[2059]
มคฺคมูฬฺหสฺส สทฺเทน, วิย กูชนฺติยา ปน;
‘‘อยฺเย’’ติ ตสฺสา สทฺทสฺส, สวนาติกฺกเมปิ จฯ
[2060]
โหติ, ภิกฺขุนิยาปตฺติ, ครุกา เอวรูปเก;
เอตฺถ ภิกฺขุนี เอกาปิ, คณาเยวาติ วุจฺจติฯ
[2061]
โอหียิตฺวาถ คจฺฉนฺตี, ‘‘ปาปุณิสฺสามิ ทานิหํ’’;
อิจฺเจวํ ตุ สอุสฺสาหา, อนุพนฺธติ วฏฺฏติฯ
[2062]
ทฺวินฺนํ มคฺคํ คจฺฉนฺตีนํ, เอกา คนฺตุํ โน สกฺโกติ;
อุสฺสาหสฺสจฺเฉทํ กตฺวา, โอหีนา เจ ตสฺสาปตฺติฯ
[2063]
อิตราปิ สเจ ยาติ, ‘‘โอหียตุ อย’’นฺติ จ;
โหติ ตสฺสาปิ อาปตฺติ, สอุสฺสาหา น โหติ เจฯ
[2064]
คจฺฉนฺตีสุ ตถา ทฺวีสุ, ปุริมา ยาติ เอกกํ;
อญฺญํ ปน สเจ มคฺคํ, ปจฺฉิมาปิ จ คณฺหติฯ
[2065]
เอกิสฺสา ปน ปกฺกนฺต-ฏฺฐาเน ติฏฺฐติ เจตรา;
ตสฺมา ตตฺถ อุภินฺนมฺปิ, อนาปตฺติ ปกาสิตาฯ
[2066]
อรุณุคฺคมนา ปุพฺเพ, นิกฺขมิตฺวา สคามโต;
อรุณุคฺคมเน กาเล, คามนฺตรคตาย หิฯ
[2067]
อติกฺกมนฺติยา ปารํ, นทิยา ทุติยิกํ วินา;
อาปตฺติโย จตสฺโสปิ, โหนฺติ เอกกฺขเณ ปนฯ
[2068]
ปกฺกนฺตา วาปิ วิพฺภนฺตา, ยาตา เปตานํ โลกํ วา;
ปกฺขสงฺกนฺตา วา นฏฺฐา, สทฺธิํ ยาตา สา เจ โหติฯ
[2069]
คามนฺตโรกฺกมาทีนิ, จตฺตาริปิ กโรนฺติยา;
อนาปตฺตีติ ญาตพฺพํ, เอวํ อุมฺมตฺติกายปิฯ
[2070]
รตฺติยํ วิปฺปวาสํ ตุ, หตฺถปาโสว รกฺขติ;
อคามเก อรญฺเญ ตุ, คณา โอหียนํ มตํฯ
[2071]
สกคาเม ยถากามํ, ทิวา จ วิจรนฺติยา;
จตฺตาโรปิ จ สงฺฆาทิ-เสสา ตสฺสา น วิชฺชเรฯ
[2072]
สมุฏฺฐานาทโย ตุลฺยา, ปฐมนฺติมวตฺถุนา;
สจิตฺตํ กายกมฺมญฺจ, ติจิตฺตญฺจ ติเวทนํฯ
คามนฺตรคมนกถาฯ
[2073]
สีมาสมฺมุติยา เจว, คณสฺส ปริเยสเน;
ญตฺติยา ทุกฺกฏํ, ทฺวีหิ, โหนฺติ ถุลฺลจฺจยา ทุเวฯ
[2074]
กมฺมสฺส ปริโยสาเน, โหติ สงฺฆาทิเสสตา;
ติกสงฺฆาทิเสสํ ตุ, อธมฺเม ติกทุกฺกฏํฯ
[2075]
ปุจฺฉิตฺวา การกํ สงฺฆํ, ฉนฺทํ ทตฺวา คณสฺส วา;
วตฺเต วา ปน วตฺตนฺติํ, อสนฺเต การเกปิ วาฯ
[2076]
ภิกฺขุนิํ ปน อุกฺขิตฺตํ, ยา โอสาเรติ ภิกฺขุนี;
ตสฺสา อุมฺมตฺติกาทีน-มนาปตฺติ ปกาสิตาฯ
[2077]
สงฺฆเภทสมา วุตฺตา, สมุฏฺฐานาทโย นยา;
กฺริยากฺริยมิทํ วุตฺตํ, อยเมว วิเสสตาฯ
จตุตฺถํฯ
[2078]
สยํ อวสฺสุตา ตถา, อวสฺสุตสฺส หตฺถโต;
มนุสฺสปุคฺคลสฺส เจ, ยเทว กิญฺจิ คณฺหติฯ
[2079]
อามิสํ, คหเณ ตสฺสา;
ถุลฺลจฺจยมุทีริตํ;
อชฺโฌหาเรสุ สงฺฆาทิ-;
เสสา โหนฺติ ปโยคโตฯ
[2080]
เอกโตวสฺสุเต กิญฺจิ, ปฏิคฺคณฺหติ, ทุกฺกฏํ;
อชฺโฌหารปฺปโยเคสุ, ถุลฺลจฺจยจโย สิยาฯ
[2081]
ยกฺขเปตติรจฺฉาน-ปณฺฑกานญฺจ หตฺถโต;
มนุสฺสวิคฺคหานมฺปิ, อุภโตวสฺสุเต ตถาฯ
[2082]
เอกโตวสฺสุเต เอตฺถ, อุทเก ทนฺตกฏฺฐเก;
คหเณ ปริโภเค จ, สพฺพตฺถาปิ จ ทุกฺกฏํฯ
[2083]
อุภยาวสฺสุตาภาเว, น โทโส ยทิ คณฺหติ;
‘‘อวสฺสุโต น จาย’’นฺติ, ญตฺวา คณฺหติ ยา ปนฯ
[2084]
ตสฺสา อุมฺมตฺติกาทีน-มนาปตฺติ ปกาสิตา;
สมุฏฺฐานาทโย ตุลฺยา, ปฐมนฺติมวตฺถุนาฯ
ปญฺจมํฯ
[2085]
อุยฺโยชเน ปเนกิสฺสา, อิตริสฺสา ปฏิคฺคเห;
ทุกฺกฏานิ จ โภเคสุ, ถุลฺลจฺจยคโณ สิยาฯ
[2086]
โภชนสฺสาวสานสฺมิํ , โหติ สงฺฆาทิเสสตา;
ยกฺขาทีนํ จตุนฺนมฺปิ, ตเถว ปุริสสฺส จฯ
[2087]
ทนฺตกฏฺฐุทกานญฺจ, คหณุยฺโยชเน ปน;
เตสญฺจ ปริโภเคปิ, ทุกฺกฏํ ปริกิตฺติตํฯ
[2088]
ยกฺขาทีนํ ตุ เสสสฺส, คหณุยฺโยชเน ปน;
โภเค จ ทุกฺกฏํ, ภุตฺเต, ถุลฺลจฺจยมุทีริตํฯ
[2089]
‘‘นาวสฺสุโต’’ติ ญตฺวา วา, กุปิตา วา น คณฺหติ;
กุลานุทฺทยตา วาปิ, อุยฺโยเชติ จ ยา ปนฯ
[2090]
ตสฺสา อุมฺมตฺติกาทีน-มนาปตฺติ ปกาสิตา;
อทินฺนาทานตุลฺยาว, สมุฏฺฐานาทโย นยาฯ
ฉฏฺฐํฯ
[2091]
สตฺตมํ อฏฺฐมํ สงฺฆ-เภเทน สทิสํ มตํ;
สมุฏฺฐานาทินา สทฺธิํ, นตฺถิ กาจิ วิเสสตาฯ
สตฺตมฏฺฐมานิฯ
[2092]
นวเม ทสเม วาปิ, วตฺตพฺพํ นตฺถิ กิญฺจิปิ;
อนนฺตรสมาเยว, สมุฏฺฐานาทโย นยาฯ
นวมทสมานิฯ
[2093]
ทุฏฺฐโทสทฺวเยนาปิ, สญฺจริตฺเตน เตน ฉ;
ยาวตติยกา อฏฺฐ, จตฺตาริ จ อิโต ตโตฯ
สงฺฆาทิเสสกถาฯ
นิสฺสคฺคิยกถา
[2094]