ภิกฺขุนีวิภงฺโค
[1964]
ภิกฺขุนีนํ หิตตฺถาย, วิภงฺคํ ยํ ชิโนพฺรวิ;
ตสฺมิํ อปิ สมาเสน, กิญฺจิมตฺตํ ภณามหํฯ
ปาราชิกกถา
[1965]
ฉนฺทโส เมถุนํ ธมฺมํ, ปฏิเสเวยฺย ยา ปน;
โหติ ปาราชิกา นาม, สมณี สา ปวุจฺจติฯ
[1966]
มนุสฺสปุริสาทีนํ, นวนฺนํ ยสฺส กสฺสจิ;
สชีวสฺสาปฺยชีวสฺส, สนฺถตํ วา อสนฺถตํฯ
[1967]
อตฺตโน ติวิเธ มคฺเค, เยภุยฺยกฺขายิตาทิกํ;
องฺคชาตํ ปเวเสนฺตี, อลฺโลกาเส ปราชิตาฯ
[1968]
อิโต ปรมวตฺวาว, สาธารณวินิจฺฉยํ;
อสาธารณเมวาหํ, ภณิสฺสามิ สมาสโตฯ
[1969]
อธกฺขกํ สรีรกํ, ยทุพฺภชาณุมณฺฑลํ;
สรีรเกน เจ เตน, ผุเสยฺย ภิกฺขุนี ปนฯ
[1970]
อวสฺสุตสฺสาวสฺสุตา, มนุสฺสปุคฺคลสฺส ยา;
สรีรมสฺส เตน วา, ผุฏฺฐา ปาราชิกา สิยาฯ
[1971]
กปฺปรสฺส ปนุทฺธมฺปิ, คหิตํ อุพฺภชาณุนา;
ยถาวุตฺตปฺปกาเรน, กาเยนาเนน อตฺตโนฯ
[1972]
ปุริสสฺส ตถา กาย- ปฏิพทฺธํ ผุสนฺติยา;
ตถา ยถาปริจฺฉินฺน- กายพทฺเธน อตฺตโนฯ
[1973]
อวเสเสน วา ตสฺส, กายํ กาเยน อตฺตโน;
โหติ ถุลฺลจฺจยํ ตสฺสา, ปโยเค ปุริสสฺส จฯ
[1974]
ยกฺขเปตติรจฺฉาน- ปณฺฑกานํ อธกฺขกํ;
อุพฺภชาณุํ ตเถวสฺสา, อุภโตวสฺสเว สติฯ
[1975]
เอกโตวสฺสเว จาปิ, ถุลฺลจฺจยมุทีริตํ;
อวเสเส จ สพฺพตฺถ, โหติ อาปตฺติ ทุกฺกฏํฯ
[1976]
อุพฺภกฺขกมโธชาณุ-มณฺฑลํ ปน ยํ อิธ;
กปฺปรสฺส จ เหฏฺฐาปิ, คตํ เอตฺเถว สงฺคหํฯ
[1977]
เกลายติ สเจ ภิกฺขุ, สทฺธิํ ภิกฺขุนิยา ปน;
อุภินฺนํ กายสํสคฺค-ราเค สติ หิ ภิกฺขุโนฯ
[1978]
โหติ สงฺฆาทิเสโสว, นาโส ภิกฺขุนิยา สิยา;
กายสํสคฺคราโค จ, สเจ ภิกฺขุนิยา สิยาฯ
[1979]
ภิกฺขุโน เมถุโน ราโค, เคหเปมมฺปิ วา ภเว;
ตสฺสา ถุลฺลจฺจยํ วุตฺตํ, ภิกฺขุโน โหติ ทุกฺกฏํฯ
[1980]
อุภินฺนํ เมถุเน ราเค, เคหเปเมปิ วา สติ;
อวิเสเสน นิทฺทิฏฺฐํ, อุภินฺนํ ทุกฺกฏํ ปนฯ
[1981]
ยสฺส ยตฺถ มโนสุทฺธํ, ตสฺส ตตฺถ น โทสตา;
อุภินฺนมฺปิ อนาปตฺติ, อุภินฺนํ จิตฺตสุทฺธิยาฯ
[1982]
กายสํสคฺคราเคน, ภินฺทิตฺวา ปฐมํ ปน;
ปจฺฉา ทูเสติ เจ เนว, โหติ ภิกฺขุนิทูสโกฯ
[1983]
อถ ภิกฺขุนิยา ผุฏฺโฐ, สาทิยนฺโตว เจตสา;
นิจฺจโล โหติ เจ ภิกฺขุ, น โหตาปตฺติ ภิกฺขุโนฯ
[1984]
ภิกฺขุนี ภิกฺขุนา ผุฏฺฐา, สเจ โหติปิ นิจฺจลา;
อธิวาเสติ สมฺผสฺสํ, ตสฺสา ปาราชิกํ สิยาฯ
[1985]
ตถา ถุลฺลจฺจยํ เขตฺเต, ทุกฺกฏญฺจ วินิทฺทิเส;
วุตฺตตฺตา ‘‘กายสํสคฺคํ, สาทิเยยฺยา’’ติ สตฺถุนาฯ
[1986]
ตสฺสา กฺริยสมุฏฺฐานํ, เอวํ สติ น ทิสฺสติ;
อิทํ ตพฺพหุเลเนว, นเยน ปริทีปิตํฯ
[1987]
อนาปตฺติ อสญฺจิจฺจ, อชานิตฺวามสนฺติยา;
สติ อามสเน ตสฺสา, ผสฺสํ วาสาทิยนฺติยาฯ
[1988]
เวทนฏฺฏาย วา ขิตฺต-จิตฺตายุมฺมตฺติกาย วา;
สมุฏฺฐานาทโย ตุลฺยา, ปฐมนฺติมวตฺถุนาฯ
อุพฺภชาณุมณฺฑลกถาฯ
[1989]
ปาราชิกตฺตํ ชานนฺติ, สลิงฺเค ตุ ฐิตาย หิ;
‘‘น กสฺสจิ ปรสฺสาหํ, อาโรเจสฺสามิ ทานิ’’ติฯ
[1990]
ธุเร นิกฺขิตฺตมตฺตสฺมิํ, สา จ ปาราชิกา สิยา;
อยํ วชฺชปฏิจฺฉาทิ- นามิกา ปน นามโตฯ
[1991]
เสสํ สปฺปาณวคฺคสฺมิํ, ทุฏฺฐุลฺเลน สมํ นเย;
วิเสโส ตตฺร ปาจิตฺติ, อิธ ปาราชิกํ สิยาฯ
วชฺชปฏิจฺฉาทิกถาฯ
[1992]
สงฺเฆนุกฺขิตฺตโก ภิกฺขุ, ฐิโต อุกฺเขปเน ปน;
ยํทิฏฺฐิโก จ โส ตสฺสา, ทิฏฺฐิยา คหเณน ตํฯ
[1993]
อนุวตฺเตยฺย ยา ภิกฺขุํ, ภิกฺขุนี สา วิสุมฺปิ จ;
สงฺฆมชฺเฌปิ อญฺญาหิ, วุจฺจมานา ตเถว จฯ
[1994]
อจชนฺตีว ตํ วตฺถุํ, คเหตฺวา ยทิ ติฏฺฐติ;
ตสฺส กมฺมสฺส โอสาเน, อุกฺขิตฺตสฺสานุวตฺติกาฯ
[1995]
โหติ ปาราชิกาปนฺนา, โหตาสากิยธีตรา;
ปุน อปฺปฏิสนฺเธยา, ทฺวิธา ภินฺนา สิลา วิยฯ
[1996]
อธมฺเม ปน กมฺมสฺมิํ, นิทฺทิฏฺฐํ ติกทุกฺกฏํ;
สมุฏฺฐานาทโย สพฺเพ, วุตฺตา สมนุภาสเนฯ
อุกฺขิตฺตานุวตฺติกกถาฯ
[1997]
อปาราชิกเขตฺตสฺส , คหณํ ยสฺส กสฺสจิ;
องฺคสฺส ปน ตํ หตฺถ-คฺคหณนฺติ ปวุจฺจติฯ
[1998]
ปารุตสฺส นิวตฺถสฺส, คหณํ ยสฺส กสฺสจิ;
เอตํ สงฺฆาฏิยา กณฺณ-คฺคหณนฺติ ปวุจฺจติฯ
[1999]
กายสํสคฺคสงฺขาต-อสทฺธมฺมสฺส การณา;
ภิกฺขุนี หตฺถปาสสฺมิํ, ติฏฺเฐยฺย ปุริสสฺส วาฯ
[2000]
สลฺลเปยฺย ตถา ตตฺถ, ฐตฺวา ตุ ปุริเสน วา;
สงฺเกตํ วาปิ คจฺเฉยฺย, อิจฺเฉยฺยา คมนสฺส วาฯ
[2001]
ตทตฺถาย ปฏิจฺฉนฺน-ฏฺฐานญฺจ ปวิเสยฺย วา;
อุปสํหเรยฺย กายํ วา, หตฺถปาเส ฐิตา ปนฯ
[2002]
อยมสฺสมณี โหติ, วินฏฺฐา อฏฺฐวตฺถุกา;
อภพฺพา ปุนรุฬฺหาย, ฉินฺโน ตาโลว มตฺถเกฯ
[2003]
อนุโลเมน วา วตฺถุํ, ปฏิโลเมน วา จุตา;
อฏฺฐมํ ปริปูเรนฺตี, ตเถกนฺตริกาย วาฯ
[2004]
อถาทิโต ปเนกํ วา, ทฺเว วา ตีณิปิ สตฺต วา;
สตกฺขตฺตุมฺปิ ปูเรนฺตี, เนว ปาราชิกา สิยาฯ
[2005]
อาปตฺติโย ปนาปนฺนา, เทเสตฺวา ตาหิ มุจฺจติ;
ธุรนิกฺเขปนํ กตฺวา, เทสิตา คณนูปิกาฯ
[2006]
น โหตาปตฺติยา องฺคํ, สอุสฺสาหาย เทสิตา;
เทสนาคณนํ เนติ, เทสิตาปิ อเทสิตาฯ
[2007]
อนาปตฺติ อสญฺจิจฺจ, อชานิตฺวา กโรนฺติยา;
สมุฏฺฐานาทโย สพฺเพ, อนนฺตรสมา มตาฯ
[2008]
‘‘อสทฺธมฺโม’’ติ นาเมตฺถ, กายสํสคฺคนามโก;
อยมุทฺทิสิโต อตฺโถ, สพฺพอฏฺฐกถาสุปิฯ
[2009]
วิญฺญู ปฏิพโล กาย-สํสคฺคํ ปฏิปชฺชิตุํ;
กายสํสคฺคภาเว ตุ, สาธกํ วจนํ อิทํฯ
อฏฺฐวตฺถุกกถาฯ
[2010]
อวสฺสุตา ปฏิจฺฉาที, อุกฺขิตฺตา อฏฺฐวตฺถุกา;
อสาธารณปญฺญตฺตา, จตสฺโสว มเหสินาฯ
ปาราชิกกถา นิฏฺฐิตาฯ
สงฺฆาทิเสสกถา
[2011]
ยา ปน ภิกฺขุนี อุสฺสยวาทา;
อฏฺฏกรี มุขรี วิหเรยฺย;
เยน เกนจิ นเรนิธ สทฺธิํ;
สา ครุกํ กิร โทสมุเปติฯ
[2012]
สกฺขิํ วาปิ สหายํ วา, ปริเยสติ ทุกฺกฏํ;
ปเท ปเท ตถา อฏฺฏํ, กาตุํ คจฺฉนฺติยาปิ จฯ
[2013]
อาโรเจติ สเจ ปุพฺพํ, ภิกฺขุนี อตฺตโน กถํ;
ทิสฺวา โวหาริกํ ตสฺสา, โหติ อาปตฺติ ทุกฺกฏํฯ
[2014]
อาโรเจติ สเจ ปจฺฉา, อิตโร อตฺตโน กถํ;
โหติ ภิกฺขุนิยา ตสฺสา, ถุลฺลจฺจยมนนฺตรํฯ
[2015]
อาโรเจติตโร ปุพฺพํ, สเจ โส อตฺตโน กถํ;
ปจฺฉา ภิกฺขุนี เจ ปุพฺพ-สทิโสว วินิจฺฉโยฯ
[2016]
‘‘อาโรเจหี’’ติ วุตฺตา เจ, ‘‘กถํ ตว มมาปิ จ’’;
อาโรเจตุ ยถากามํ, ปฐเม ทุกฺกฏํ สิยาฯ
[2017]