ปฏิสํวิทิเต ตสฺส, คิลานสฺสาวเสสเก;
พหาราเม คเหตฺวา วา, อนฺโตเยวสฺส ภุญฺชโตฯ
[1869]
ตตฺถชาตผลาทีนิ, อนาปตฺเตว ขาทโต;
สมุฏฺฐานาทโย สพฺเพ, กถิเนน สมา มตาฯ
จตุตฺถปาฏิเทสนียกถาฯ
อิติ วินยวินิจฺฉเย ปาฏิเทสนียกถา นิฏฺฐิตาฯ
เสขิยกถา
[1870]
โย อนาทริเยเนว, ปุรโต ปจฺฉโตปิ วา;
โอลมฺเพตฺวา นิวาเสยฺย, ตสฺส จาปตฺติ ทุกฺกฏํฯ
[1871]
หตฺถิโสณฺฑาทิตุลฺยํ ตุ, นิวาเสนฺตสฺส ทุกฺกฏํ;
อาปตฺติภีรุนา นิจฺจํ, วตฺถพฺพํ ปริมณฺฑลํฯ
[1872]
ชาณุมณฺฑลโต เหฏฺฐา, อฏฺฐงฺคุลปฺปมาณกํ;
โอตาเรตฺวา นิวตฺถพฺพํ, ตโต อูนํ น วฏฺฏติฯ
[1873]
อสญฺจิจฺจาสติสฺสาปิ, อชานนฺตสฺส เกวลํ;
อนาปตฺติ คิลานสฺสา-ปทาสุมฺมตฺตกาทิโนฯ
ปริมณฺฑลกถาฯ
[1874]
อุโภ โกเณ สมํ กตฺวา, สาทรํ ปริมณฺฑลํ;
กตฺวา ปารุปิตพฺเพวํ, อกโรนฺตสฺส ทุกฺกฏํฯ
[1875]
อวิเสเสน วุตฺตํ ตุ, อิทํ สิกฺขาปททฺวยํ;
ตสฺมา ฆเร วิหาเร วา, กตฺตพฺพํ ปริมณฺฑลํฯ
ทุติยํฯ
[1876]
คณฺฐิกํ ปฏิมุญฺจิตฺวา, กตฺวา โกเณ อุโภ สมํ;
ฉาเทตฺวา มณิพนฺธญฺจ, คนฺตพฺพํ คีวเมว จฯ
[1877]
ตถา อกตฺวา ภิกฺขุสฺส, ชตฺตูนิปิ อุรมฺปิ จ;
วิวริตฺวา ยถากามํ, คจฺฉโต โหติ ทุกฺกฏํฯ
ตติยํฯ
[1878]
คลวาฏกโต อุทฺธํ, สีสญฺจ มณิพนฺธโต;
หตฺเถ ปิณฺฑิกมํสมฺหา, เหฏฺฐา ปาเท อุโภปิ จฯ
[1879]
วิวริตฺวาวเสสญฺจ , ฉาเทตฺวา เจ นิสีทติ;
โหติ โส สุปฺปฏิจฺฉนฺโน, โทโส วาสูปคสฺส นฯ
จตุตฺถํฯ
[1880]
หตฺถํ วา ปน ปาทํ วา, อจาเลนฺเตน ภิกฺขุนา;
สุวินีเตน คนฺตพฺพํ, ฉฏฺเฐ นตฺถิ วิเสสตาฯ
ปญฺจมฉฏฺฐานิฯ
[1881]
สตีมตาวิกาเรน, ยุคมตฺตญฺจ เปกฺขินา;
สุสํวุเตน คนฺตพฺพํ, ภิกฺขุโนกฺขิตฺตจกฺขุนาฯ
[1882]
ยตฺถ กตฺถจิ หิ ฏฺฐาเน, เอกสฺมิํ อนฺตเร ฆเร;
ฐตฺวา ปริสฺสยาภาวํ, โอโลเกตุมฺปิ วฏฺฏติฯ
[1883]
โย อนาทริยํ กตฺวา, โอโลเกนฺโต ตหิํ ตหิํ;
สเจนฺตรฆเร ยาติ, ทุกฺกฏํ อฏฺฐมํ ตถาฯ
สตฺตมฏฺฐมานิฯ
[1884]
เอกโต อุภโต วาปิ, หุตฺวา อุกฺขิตฺตจีวโร;
อินฺทขีลกโต อนฺโต, คจฺฉโต โหติ ทุกฺกฏํฯ
นวมํฯ
[1885]
ตถา นิสินฺนกาเลปิ, นีหรนฺเตน กุณฺฑิกํ;
อนุกฺขิปิตฺวา ทาตพฺพา, โทโส วาสูปคสฺส นฯ
ทสมํฯ
ปฐโม วคฺโคฯ
[1886]
น วฏฺฏติ หสนฺเตน, คนฺตุญฺเจว นิสีทิตุํ;
วตฺถุสฺมิํ หสนียสฺมิํ, สิตมตฺตํ ตุ วฏฺฏติฯ
ปฐมทุติยานิฯ
[1887]
อปฺปสทฺเทน คนฺตพฺพํ, จตุตฺเถปิ อยํ นโย;
มหาสทฺทํ กโรนฺตสฺส, อุภยตฺถาปิ ทุกฺกฏํฯ
ตติยจตุตฺถานิฯ
[1888]
กายปฺปจาลกํ กตฺวา, พาหุสีสปฺปจาลกํ;
คจฺฉโต ทุกฺกฏํ โหติ, ตเถว จ นิสีทโตฯ
[1889]
กายํ พาหุญฺจ สีสญฺจ, ปคฺคเหตฺวา อุชุํ ปน;
คนฺตพฺพมาสิตพฺพญฺจ, สเมนิริยาปเถน ตุฯ
[1890]
นิสีทเนน ยุตฺเตสุ, ตีสุ วาสูปคสฺส หิ;
อนาปตฺตีติ ญาตพฺพํ, วิญฺญุนา วินยญฺญุนาฯ
ทุติโย วคฺโคฯ
[1891]
ขมฺภํ กตฺวา สสีสํ วา, ปารุปิตฺวาน คจฺฉโต;
ทุกฺกฏํ มุนินา วุตฺตํ, ตถา อุกฺกุฏิกาย วาฯ
[1892]
หตฺถปลฺลตฺถิกายาปิ, ทุสฺสปลฺลตฺถิกาย วา;
ตสฺสนฺตรฆเร โหติ, นิสีทนฺตสฺส ทุกฺกฏํฯ
[1893]
ทุติเย จ จตุตฺเถ จ, ฉฏฺเฐ วาสูปคสฺส ตุ;
อนาปตฺตีติ สารุปฺปา, ฉพฺพีสติ ปกาสิตาฯ
ฉฏฺฐํฯ
[1894]
สกฺกจฺจํ สติยุตฺเตน, ภิกฺขุนา ปตฺตสญฺญินา;
ปิณฺฑปาโต คเหตพฺโพ, สมสูโปว วิญฺญุนาฯ
[1895]
สูโป ภตฺตจตุพฺภาโค, ‘‘สมสูโป’’ติ วุจฺจติ;
มุคฺคมาสกุลตฺถานํ, สูโป ‘‘สูโป’’ติ วุจฺจติฯ
[1896]
อนาปตฺติ อสญฺจิจฺจ, คิลานสฺส รเสรเส;
ตเถว ญาตกาทีนํ, อญฺญตฺถาย ธเนน วาฯ
สตฺตมฏฺฐมนวมานิฯ
[1897]
อนฺโตเลขาปมาเณน , ปตฺตสฺส มุขวฏฺฏิยา;
ปูริโตว คเหตพฺโพ, อธิฏฺฐานูปคสฺส ตุฯ
[1898]
ตตฺถ ถูปีกตํ กตฺวา, คณฺหโต ยาวกาลิกํ;
ยํ กิญฺจิ ปน ภิกฺขุสฺส, โหติ อาปตฺติ ทุกฺกฏํฯ
[1899]
อธิฏฺฐานูปเค ปตฺเต, กาลิกตฺตยเมว จ;
เสเส ถูปีกตํ สพฺพํ, วฏฺฏเตว น สํสโยฯ
[1900]
ทฺวีสุ ปตฺเตสุ ภตฺตํ ตุ, คเหตฺวา ปตฺตเมกกํ;
ปูเรตฺวา ยทิ เปเสติ, ภิกฺขูนํ ปน วฏฺฏติฯ
[1901]
ปตฺเต ปกฺขิปฺปมานํ ยํ, อุจฺฉุขณฺฑผลาทิกํ;
โอโรหติ สเจ เหฏฺฐา, น ตํ ถูปีกตํ สิยาฯ
[1902]
ปุปฺผตกฺโกลกาทีนํ, ฐเปตฺวา เจ วฏํสกํ;
ทินฺนํ อยาวกาลิตฺตา, น ตํ ถูปีกตํ สิยาฯ
[1903]
วฏํสกํ ตุ ปูวสฺส, ฐเปตฺวา โอทโนปริ;
ปิณฺฑปาตํ สเจ เทนฺติ, อิทํ ถูปีกตํ สิยาฯ
[1904]
ภตฺตสฺสูปริ ปณฺณํ วา, ถาลกํ วาปิ กิญฺจิปิ;
ฐเปตฺวา ปริปูเรตฺวา, สเจ คณฺหาติ วฏฺฏติฯ
[1905]
ปฏิคฺคเหตุเมวสฺส, ตํ ตุ สพฺพํ น วฏฺฏติ;
คหิตํ สุคหิตํ, ปจฺฉา, ภุญฺชิตพฺพํ ยถาสุขํฯ
ตติโย วคฺโคฯ
[1906]
ปฐมํ ทุติยํ วุตฺต-นยํ ตุ ตติเย ปน;
อุปโรธิมทสฺเสตฺวา, โภตฺตพฺพํ ปฏิปาฏิยาฯ
[1907]
อญฺเญสํ อตฺตโน ภตฺตํ, อากิรํ ปน ภาชเน;
นตฺโถมสติ เจ โทโส, ตถา อุตฺตริภงฺคกํฯ
ตติยํฯ
[1908]
จตุตฺเถ ยํ ตุ วตฺตพฺพํ, วุตฺตํ ปุพฺเพ อเสสโต;
ปญฺจเม มตฺถกํ โทโส, มทฺทิตฺวา ปริภุญฺชโตฯ
[1909]
อนาปตฺติ คิลานสฺส, ปริตฺเตปิ จ เสสเก;
เอกโต ปน มทฺทิตฺวา, สํกฑฺฒิตฺวาน ภุญฺชโตฯ
จตุตฺถปญฺจมานิฯ
[1910]
โย ภิยฺโยกมฺยตาเหตุ, สูปํ วา พฺยญฺชนมฺปิ วา;
ปฏิจฺฉาเทยฺย ภตฺเตน, ตสฺส จาปตฺติ ทุกฺกฏํฯ
ฉฏฺฐํฯ
[1911]
วิญฺญตฺติยํ ตุ วตฺตพฺพํ, อปุพฺพํ นตฺถิ กิญฺจิปิ;
อฏฺฐเม ปน อุชฺฌาเน, คิลาโนปิ น มุจฺจติฯ
[1912]
‘‘ทสฺสามิ ทาเปสฺสามี’’ติ, โอโลเกนฺตสฺส ภิกฺขุโน;
อนาปตฺตีติ ญาตพฺพํ, น จ อุชฺฌานสญฺญิโนฯ
อฏฺฐมํฯ
[1913]
มหนฺตํ ปน โมรณฺฑํ, กุกฺกุฏณฺฑญฺจ ขุทฺทกํ;
เตสํ มชฺฌปฺปมาเณน, กตฺตพฺโพ กพโฬ ปนฯ
[1914]
ขชฺชเก ปน สพฺพตฺถ, มูลขาทนิยาทิเก;
ผลาผเล อนาปตฺติ, คิลานุมฺมตฺตกาทิโนฯ
นวมํฯ
[1915]
อทีโฆ ปน กาตพฺโพ, อาโลโป ปริมณฺฑโล;
ขชฺชตุตฺตริภงฺคสฺมิํ, อนาปตฺติ ผลาผเลฯ
ทสมํฯ
จตุตฺโถ วคฺโคฯ
[1916]
อนาหเฏ มุขทฺวารํ, อปฺปตฺเต กพเฬ ปน;
อตฺตโน จ มุขทฺวารํ, วิวรนฺตสฺส ทุกฺกฏํฯ
ปฐมํฯ
[1917]
มุเข จ สกลํ หตฺถํ, ปกฺขิปนฺตสฺส ทุกฺกฏํ;
มุเข จ กพฬํ กตฺวา, กเถตุํ น จ วฏฺฏติฯ
[1918]
วจนํ ยตฺตเกนสฺส, ปริปุณฺณํ น โหติ หิ;
มุขสฺมิํตตฺตเก สนฺเต, พฺยาหรนฺตสฺส ทุกฺกฏํฯ
[1919]
มุเข หรีตกาทีนิ, ปกฺขิปิตฺวา กเถติ โย;
วจนํ ปริปุณฺณํ เจ, กเถตุํ ปน วฏฺฏติฯ
ทุติยตติยานิฯ
[1920]
โย ปิณฺฑุกฺเขปกํ ภิกฺขุ, กพฬจฺเฉทกมฺปิ วา;
มกฺกโฏ วิย คณฺเฑ วา, กตฺวา ภุญฺเชยฺย ทุกฺกฏํฯ
จตุตฺถปญฺจมฉฏฺฐานิฯ
[1921]
นิทฺธุนิตฺวาน หตฺถํ วา, ภตฺตํ สิตฺถาวการกํ;
ชิวฺหานิจฺฉารกํ วาปิ, ตถา ‘‘จปุ จปู’’ติ วาฯ
[1922]
อนาทรวเสเนว, ภุญฺชโต โหติ ทุกฺกฏํ;
สตฺตเม อฏฺฐเม นตฺถิ, โทโส กจวรุชฺฌเนฯ
สตฺตมทสมานิฯ
ปญฺจโม วคฺโคฯ
[1923]
กตฺวา เอวํ น โภตฺตพฺพํ, สทฺทํ ‘‘สุรุ สุรู’’ติ จ;
หตฺถนิลฺเลหกํ วาปิ, น จ วฏฺฏติ ภุญฺชิตุํฯ
[1924]
ผาณิตํ ฆนยาคุํ วา, คเหตฺวา องฺคุลีหิ ตํ;
มุเข องฺคุลิโย โภตฺตุํ, ปเวเสตฺวาปิ วฏฺฏติฯ
[1925]
น ปตฺโต เลหิตพฺโพว, เอกายงฺคุลิกาย วา;
เอกโอฏฺโฐปิ ชิวฺหาย, น จ นิลฺเลหิตพฺพโกฯ
จตุตฺถํฯ
[1926]
สามิเสน ตุ หตฺเถน, น จ ปานียถาลกํ;
คเหตพฺพํ, ปฏิกฺขิตฺตํ, ปฏิกฺกูลวเสน หิฯ
[1927]
ปุคฺคลสฺส จ สงฺฆสฺส, คหฏฺฐสฺสตฺตโนปิ จ;
สนฺตโก ปน สงฺโข วา, สราวํ วาปิ ถาลกํฯ
[1928]
ตสฺมา น จ คเหตพฺพํ, คณฺหโต โหติ ทุกฺกฏํ;
อนามิเสน หตฺเถน, คหณํ ปน วฏฺฏติฯ
ปญฺจมํฯ
[1929]
อุทฺธริตฺวาปิ ภินฺทิตฺวา, คเหตฺวา วา ปฏิคฺคเห;
นีหริตฺวา อนาปตฺติ, ฉฑฺเฑนฺตสฺส ฆรา พหิฯ
ฉฏฺฐํฯ
[1930]
ฉตฺตํ ยํ กิญฺจิ หตฺเถน, สรีราวยเวน วา;
สเจ ธารยมานสฺส, ธมฺมํ เทเสติ ทุกฺกฏํฯ
สตฺตมํฯ
[1931]
อยเมว นโย วุตฺโต, ทณฺฑปาณิมฺหิ ปุคฺคเล;
จตุหตฺถปฺปมาโณว, ทณฺโฑ มชฺฌิมหตฺถโตฯ
อฏฺฐมํฯ
[1932]
ตเถว สตฺถปาณิสฺส, ธมฺมํ เทเสติ ทุกฺกฏํ;
สตฺถปาณี น โหตาสิํ, สนฺนยฺหิตฺวา ฐิโต ปนฯ
นวมํฯ
[1933]
ธนุํ สเรน สทฺธิํ วา, ธนุํ วา สรเมว วา;
สชิยํ นิชิยํ วาปิ, คเหตฺวา ธนุทณฺฑกํฯ
[1934]
ฐิตสฺสปิ นิสินฺนสฺส, นิปนฺนสฺสาปิ วา ตถา;
สเจ เทเสติ สทฺธมฺมํ, โหติ อาปตฺติ ทุกฺกฏํฯ
[1935]
ปฏิมุกฺกมฺปิ กณฺฐมฺหิ, ธนุํ หตฺเถน ยาวตา;
น คณฺหาติ นโร ตาว, ธมฺมํ เทเสยฺย วฏฺฏติฯ
ฉฏฺโฐ วคฺโคฯ
[1936]
ปาทุการุฬฺหกสฺสาปิ, ธมฺมํ เทเสติ ทุกฺกฏํ;
อกฺกมิตฺวา ฐิตสฺสาปิ, ปฏิมุกฺกสฺส วา ตถาฯ
ปฐมํฯ
[1937]
อุปาหนคตสฺสาปิ, อยเมว วินิจฺฉโย;
สพฺพตฺถ อคิลานสฺส, ยาเน วา สยเนปิ วาฯ
[1938]
นิปนฺนสฺสาคิลานสฺส, กฏสาเร ฉมาย วา;
ปีเฐ มญฺเจปิ วา อุจฺเจ, นิสินฺเนน ฐิเตน วาฯ
[1939]
น จ วฏฺฏติ เทเสตุํ, ฐตฺวา วา อุจฺจภูมิยํ;
สยเนสุ คเตนาปิ, สยเนสุ คตสฺส จฯ
[1940]
สมาเน วาปิ อุจฺเจ วา, นิปนฺเน เนว วฏฺฏติ;
นิปนฺเนน ฐิตสฺสาปิ, นิปนฺนสฺสปิ วฏฺฏติฯ
[1941]
นิสินฺเนน นิสินฺนสฺส, ฐิตสฺสาปิ จ วฏฺฏติ;
ฐิตสฺเสว ฐิเตนาปิ, เทเสตุมฺปิ ตเถว จฯ
ทุติยตติยจตุตฺถานิฯ
[1942]
ปลฺลตฺถิกา นิสินฺนสฺส, อคิลานสฺส เทหิโน;
ตถา เวฐิตสีสสฺส, ธมฺมํ เทเสติ ทุกฺกฏํฯ
[1943]
เกสนฺตํ วิวราเปตฺวา, เทเสติ ยทิ วฏฺฏติ;
สสีสํ ปารุตสฺสาปิ, อยเมว วินิจฺฉโยฯ
ปญฺจมฉฏฺฐสตฺตมานิฯ
[1944]
อฏฺฐเม นวเม วาปิ, ทสเม นตฺถิ กิญฺจิปิ;
สเจปิ เถรุปฏฺฐานํ, คนฺตฺวาน ทหรํ ฐิตํฯ
[1945]
ปญฺหํ ปุจฺฉติ เจ เถโร, กเถตุํ น จ วฏฺฏติ;
ตสฺส ปสฺเส ปนญฺญสฺส, กเถตพฺพํ วิชานตาฯ
อฏฺฐมนวมทสมานิฯ
สตฺตโม วคฺโคฯ
[1946]
คจฺฉโต ปุรโต ปญฺหํ, น วตฺตพฺพํ ตุ ปจฺฉโต;
‘‘ปจฺฉิมสฺส กเถมี’’ติ, วตฺตพฺพํ วินยญฺญุนาฯ
[1947]
สทฺธิํ อุคฺคหิตํ ธมฺมํ, สชฺฌายติ หิ วฏฺฏติ;
สมเมว ยุคคฺคาหํ, กเถตุํ คจฺฉโตปิ จฯ
ปฐมํฯ
[1948]
เอเกกสฺสาปิ จกฺกสฺส, ปเถนาปิ จ คจฺฉโต;
อุปฺปเถน สมํ วาปิ, คจฺฉนฺตสฺเสว วฏฺฏติฯ
ทุติยํฯ
[1949]
ตติเย นตฺถิ วตฺตพฺพํ, จตุตฺเถ หริเต ปน;
อุจฺจาราทิจตุกฺกํ ตุ, กโรโต ทุกฺกฏํ สิยาฯ
[1950]
ชีวรุกฺขสฺส ยํ มูลํ, ทิสฺสมานํ ตุ คจฺฉติ;
สาขา วา ภูมิลคฺคา ตํ, สพฺพํ หริตเมว หิฯ
[1951]
สเจ อหริตํ ฐานํ, เปกฺขนฺตสฺเสว ภิกฺขุโน;
วจฺจํ นิกฺขมเตวสฺส, สหสา ปน วฏฺฏติฯ
[1952]
ปลาลณฺฑุปเก วาปิ, โคมเย วาปิ กิสฺมิจิ;
กตฺตพฺพํ, หริตํ ปจฺฉา, ตโมตฺถรติ วฏฺฏติฯ
[1953]
กโต อหริเต ฐาเน, หริตํ เอติ วฏฺฏติ;
สิงฺฆาณิกา คตา เอตฺถ, เขเฬเนว จ สงฺคหํฯ
จตุตฺถํฯ
[1954]
วจฺจกุฏิสมุทฺทาทิ-อุทเกสุปิ ภิกฺขุโน;
เตสํ อปริโภคตฺตา, กโรโต นตฺถิ ทุกฺกฏํฯ
[1955]
เทเว ปน จ วสฺสนฺเต, อุทโกเฆ สมนฺตโต;
อชลํ อลภนฺเตน, ชเล กาตุมฺปิ วฏฺฏติฯ
ปญฺจมํฯ
อฏฺฐโม วคฺโคฯ
[1956]
สมุฏฺฐานาทโย เญยฺยา, เสขิยานํ ปเนตฺถ หิ;
อุชฺชคฺฆิกาทิจตฺตาริ, กพเฬน มุเขน จฯ
[1957]
ฉมานีจาสนฏฺฐาน-ปจฺฉา อุปฺปถวา ทส;
สมุฏฺฐานาทโย ตุลฺยา, วุตฺตา สมนุภาสเนฯ
[1958]
ฉตฺตํ ทณฺฑาวุธํ สตฺถํ, ปาทุการุฬฺหุปาหนา;
ยานํ สยนปลฺลตฺถ-เวฐิโตคุณฺฐิตานิ จฯ
[1959]
ธมฺมเทสนาตุลฺยาว, สมุฏฺฐานาทินา ปน;
สูโปทเนน วิญฺญตฺติ, เถยฺยสตฺถสมํ มตํฯ
[1960]
อวเสสา ติปญฺญาส, สมานา ปฐเมน ตุ;
เสขิเยสุปิ สพฺเพสุ, อนาปตฺตาปทาสุปิฯ
[1961]
อุชฺฌานสญฺญิเก ถูปี-กเต สูปปฏิจฺฉเท;
ตีสุ สิกฺขาปเทสฺเวว, คิลาโน น ปนาคโตฯ
เสขิยกถาฯ
[1962]
อิมํ วิทิตฺวา วินเย วินิจฺฉยํ;
วิสารโท โหติ, วินีตมานโส;
ปเรหิ โส โหติ จ ทุปฺปธํสิโย;
ตโต หิ สิกฺเข สตตํ สมาหิโตฯ
[1963]
อิมํ ปรมสํกรํ สํกรํ;
อเวจฺจ สวนามตํ นามตํ;
ปฏุตฺตมธิเก หิเต เก หิ เต;
น ยนฺติ กลิสาสเน สาสเนฯ
อิติ วินยวินิจฺฉเย
ภิกฺขุวิภงฺคกถา นิฏฺฐิตาฯ
ภิกฺขุนีวิภงฺโค
[1964]
ภิกฺขุนีนํ หิตตฺถาย, วิภงฺคํ ยํ ชิโนพฺรวิ;
ตสฺมิํ อปิ สมาเสน, กิญฺจิมตฺตํ ภณามหํฯ
ปาราชิกกถา
[1965]
ฉนฺทโส เมถุนํ ธมฺมํ, ปฏิเสเวยฺย ยา ปน;
โหติ ปาราชิกา นาม, สมณี สา ปวุจฺจติฯ
[1966]
มนุสฺสปุริสาทีนํ, นวนฺนํ ยสฺส กสฺสจิ;
สชีวสฺสาปฺยชีวสฺส, สนฺถตํ วา อสนฺถตํฯ
[1967]
อตฺตโน ติวิเธ มคฺเค, เยภุยฺยกฺขายิตาทิกํ;
องฺคชาตํ ปเวเสนฺตี, อลฺโลกาเส ปราชิตาฯ
[1968]
อิโต ปรมวตฺวาว, สาธารณวินิจฺฉยํ;
อสาธารณเมวาหํ, ภณิสฺสามิ สมาสโตฯ
[1969]
อธกฺขกํ สรีรกํ, ยทุพฺภชาณุมณฺฑลํ;
สรีรเกน เจ เตน, ผุเสยฺย ภิกฺขุนี ปนฯ
[1970]
อวสฺสุตสฺสาวสฺสุตา, มนุสฺสปุคฺคลสฺส ยา;
สรีรมสฺส เตน วา, ผุฏฺฐา ปาราชิกา สิยาฯ
[1971]
กปฺปรสฺส ปนุทฺธมฺปิ, คหิตํ อุพฺภชาณุนา;
ยถาวุตฺตปฺปกาเรน, กาเยนาเนน อตฺตโนฯ
[1972]
ปุริสสฺส ตถา กาย- ปฏิพทฺธํ ผุสนฺติยา;
ตถา ยถาปริจฺฉินฺน- กายพทฺเธน อตฺตโนฯ
[1973]
อวเสเสน วา ตสฺส, กายํ กาเยน อตฺตโน;
โหติ ถุลฺลจฺจยํ ตสฺสา, ปโยเค ปุริสสฺส จฯ
[1974]