จีวเรน สเจ ตุลฺย-ปฺปมาณํ สุคตสฺส ตุ;
จีวรํ ภิกฺขุ กาเรยฺย, กรเณ ทุกฺกฏํ สิยาฯ
[1827]
ปฏิลาเภน สจฺเฉทํ, ปาจิตฺติยมุทีริตํ;
อนนฺตรสโมเยว, อนาปตฺตินโย มโตฯ
[1828]
ทีฆโส จ ปมาเณน, นว ตสฺส วิทตฺถิโย;
ติริยํ ฉ วินิทฺทิฏฺฐา, สุคตสฺส วิทตฺถิยาฯ
[1829]
อญฺเญน จ กตํ ลทฺธา, เสวโต ทุกฺกฏํ ภเว;
สมุฏฺฐานาทโย สพฺเพ, สญฺจริตฺตสมา มตาฯ
นนฺทกถาฯ
ราชวคฺโค นวโมฯ
อิติ วินยวินิจฺฉเย ปาจิตฺติยกถา นิฏฺฐิตาฯ
ปาฏิเทสนียกถา
[1830]
โย จนฺตรฆรํ ภิกฺขุ, ปวิฏฺฐาย ตุ หตฺถโต;
อญฺญาติกาย ยํ กิญฺจิ, ตสฺส ภิกฺขุนิยา ปนฯ
[1831]
สหตฺถา ปฏิคฺคณฺเหยฺย, ขาทนํ โภชนมฺปิ วา;
คหเณ ทุกฺกฏํ โภเค, ปาฏิเทสนิยํ สิยาฯ
[1832]
รถิกายปิ วา พฺยูเห, สนฺธิสิงฺฆาฏเกสุ วา;
หตฺถิสาลาทิเก ฐตฺวา, คณฺหโตปิ อยํ นโยฯ
[1833]
รถิกาย สเจ ฐตฺวา, เทติ ภิกฺขุนิ โภชนํ;
อาปตฺติ อนฺตราราเม, ฐตฺวา คณฺหาติ ภิกฺขุ เจฯ
[1834]
เอตฺถนฺตรฆรํ ตสฺสา, ปวิฏฺฐาย หิ วากฺยโต;
ภิกฺขุสฺส จ ฐิตฏฺฐานํ, นปฺปมาณนฺติ วณฺณิตํฯ
[1835]
ตสฺมา ภิกฺขุนิยา ฐตฺวา, อารามาทีสุ เทนฺติยา;
วีถิยาทีสุ เจ ฐตฺวา, น โทโส ปฏิคณฺหโตฯ
[1836]
ยามกาลิกสตฺตาห-กาลิกํ ยาวชีวิกํ;
อาหารตฺถาย คหเณ, อชฺโฌหาเร จ ทุกฺกฏํฯ
[1837]
อามิเสน อสมฺภินฺน-รสํ สนฺธาย ภาสิตํ;
ปาฏิเทสนิยาปตฺติ, สมฺภินฺเนกรเส สิยาฯ
[1838]
เอกโตอุปสมฺปนฺน-หตฺถโต ปฏิคณฺหโต;
กาลิกานํ จตุนฺนมฺปิ, อาหารตฺถาย ทุกฺกฏํฯ
[1839]
ญาติกายปิ อญฺญาติ-สญฺญิโน วิมติสฺส วา;
ทุกฺกฏํ ญาติสญฺญิสฺส, ตถา อญฺญาติกาย วาฯ
[1840]
ทาเปนฺติยา อนาปตฺติ, ททมานาย วา ปน;
นิกฺขิปิตฺวานฺตรารามา-ทีสุ ฐตฺวาปิ เทนฺติยาฯ
[1841]
คามโต นีหริตฺวา วา, เทติ เจ พหิ วฏฺฏติ;
‘‘ปจฺจเย สติ ภุญฺชา’’ติ, เทติ เจ กาลิกตฺตยํฯ
[1842]
หตฺถโต สามเณรีนํ, สิกฺขมานาย วา ตถา;
อิทํ เอฬกโลเมน, สมุฏฺฐานํ สมํ มตํฯ
ปฐมปาฏิเทสนียกถาฯ
[1843]
อวุตฺเต ‘‘อปสกฺกา’’ติ, เอเกนาปิ จ ภิกฺขุนา;
สเจชฺโฌหรณตฺถาย, อามิสํ ปฏิคณฺหติฯ
[1844]
คหเณ ทุกฺกฏํ โภเค, ปาฏิเทสนิยํ สิยา;
เอกโตอุปสมฺปนฺนํ, น วาเรนฺตสฺส ทุกฺกฏํฯ
[1845]
ตเถวานุปสมฺปนฺนา-ยุปสมฺปนฺนสญฺญิโน;
ตตฺถ เวมติกสฺสาปิ, โหติ อาปตฺติ ทุกฺกฏํฯ
[1846]
อนาปตฺติตฺตโน ภตฺตํ, ปทาเปติ น เทติ เจ;
ตถา อญฺญสฺส ภตฺตํ วา, น ทาเปติ ปเทติ เจฯ
[1847]
ยํ น ทินฺนํ ตํ ทาเปติ, น ทินฺนํ ยตฺถ วาปิ จ;
ตตฺถ ตมฺปิ จ สพฺเพสํ, สมํ ทาเปติ ภิกฺขุนีฯ
[1848]
โวสาสนฺตี ฐิตา สิกฺข-มานา วา สามเณริกา;
โภชนานิ จ ปญฺเจว, วินา, อุมฺมตฺตกาทิโนฯ
[1849]
กถิเนน สมุฏฺฐานํ, สมานนฺติ ปกาสิตํ;
กฺริยากฺริยมิทํ วุตฺตํ, ติจิตฺตญฺจ ติเวทนํฯ
ทุติยปาฏิเทสนียกถาฯ
[1850]
เสกฺขนฺติ สมฺมเต ภิกฺขุ, ลทฺธสมฺมุติเก กุเล;
ฆรูปจาโรกฺกมนา, ปุพฺเพว อนิมนฺติโตฯ
[1851]
อคิลาโน คเหตฺวา เจ, ปริภุญฺเชยฺย อามิสํ;
คหเณ ทุกฺกฏํ โภเค, ปาฏิเทสนิยํ สิยาฯ
[1852]
ยามกาลิกสตฺตาห-กาลิเก ยาวชีวิเก;
คหเณ ปริโภเค จ, โหติ อาปตฺติ ทุกฺกฏํฯ
[1853]
อเสกฺขสมฺมเต เสกฺข-สมฺมตนฺติ จ สญฺญิโน;
ตตฺถ เวมติกสฺสาปิ, ตเถว ปริทีปิตํฯ
[1854]
อนาปตฺติ คิลานสฺส, คิลานสฺสาวเสสเก;
นิมนฺติตสฺส วา ภิกฺขา, อญฺเญสํ ตตฺถ ทียติฯ
[1855]
ฆรโต นีหริตฺวา วา, เทนฺติ เจ ยตฺถ กตฺถจิ;
นิจฺจภตฺตาทิเก วาปิ, ตถา อุมฺมตฺตกาทิโนฯ
[1856]
อนาคเต หิ ภิกฺขุมฺหิ, ฆรโต ปฐมํ ปน;
นีหริตฺวา สเจ ทฺวาเร, สมฺปตฺเต เทนฺติ วฏฺฏติฯ
[1857]
ภิกฺขุํ ปน จ ทิสฺวาว, นีหริตฺวาน เคหโต;
น วฏฺฏติ สเจ เทนฺติ, สมุฏฺฐาเนฬกูปมํฯ
ตติยปาฏิเทสนียกถาฯ
[1858]
คหฏฺเฐนาคหฏฺเฐน , อิตฺถิยา ปุริเสน วา;
อารามํ อุปจารํ วา, ปวิสิตฺวา สเจ ปนฯ
[1859]
‘‘อิตฺถนฺนามสฺส เต ภตฺตํ, ยาคุ วา อาหรียติ’’;
เอวมาโรจิตํ วุตฺตํ, ปฏิสํวิทิตนฺติ หิฯ
[1860]
อาหรียตุ ตํ ปจฺฉา, ยถาโรจิตเมว วา;
ตสฺส วา ปริวารมฺปิ, อญฺญํ กตฺวา พหุํ ปนฯ
[1861]
ยาคุยา วิทิตํ กตฺวา, ปูวํ ภตฺตํ หรนฺติ เจ;
อิทมฺปิ วิทิตํ วุตฺตํ, วฏฺฏตีติ กุรุนฺทิยํฯ
[1862]
กุลานิ ปน อญฺญานิ, เทยฺยธมฺมํ ปนตฺตโน;
หรนฺติ เตน สทฺธิํ เจ, สพฺพํ วฏฺฏติ ตมฺปิ จฯ
[1863]
อนาโรจิตเมวํ ยํ, ยํ อารามมนาภตํ;
ตํ อสํวิทิตํ นาม, สหธมฺมิกญาปิตํฯ
[1864]
ยํ อสํวิทิตํ กตฺวา, อาภตํ ปน ตํ พหิ;
อารามํ ปน เปเสตฺวา, การาเปตฺวา ตมาหเรฯ
[1865]
คนฺตฺวา วา อนฺตรามคฺเค, คเหตพฺพํ ตุ ภิกฺขุนา;
สเจ เอวมกตฺวา ตํ, อาราเม อุปจารโตฯ
[1866]
คเหตฺวาชฺโฌหรนฺตสฺส, คหเณ ทุกฺกฏํ สิยา;
อชฺโฌหารปโยเคสุ, ปาฏิเทสนิยํ มตํฯ
[1867]
ปฏิสํวิทิเตเยว, อสํวิทิตสญฺญิโน;
ตตฺถ เวมติกสฺสาปิ, โหติ อาปตฺติ ทุกฺกฏํฯ
[1868]
ปฏิสํวิทิเต ตสฺส, คิลานสฺสาวเสสเก;
พหาราเม คเหตฺวา วา, อนฺโตเยวสฺส ภุญฺชโตฯ
[1869]
ตตฺถชาตผลาทีนิ, อนาปตฺเตว ขาทโต;
สมุฏฺฐานาทโย สพฺเพ, กถิเนน สมา มตาฯ
จตุตฺถปาฏิเทสนียกถาฯ
อิติ วินยวินิจฺฉเย ปาฏิเทสนียกถา นิฏฺฐิตาฯ
เสขิยกถา
[1870]
โย อนาทริเยเนว, ปุรโต ปจฺฉโตปิ วา;
โอลมฺเพตฺวา นิวาเสยฺย, ตสฺส จาปตฺติ ทุกฺกฏํฯ
[1871]
หตฺถิโสณฺฑาทิตุลฺยํ ตุ, นิวาเสนฺตสฺส ทุกฺกฏํ;
อาปตฺติภีรุนา นิจฺจํ, วตฺถพฺพํ ปริมณฺฑลํฯ
[1872]
ชาณุมณฺฑลโต เหฏฺฐา, อฏฺฐงฺคุลปฺปมาณกํ;
โอตาเรตฺวา นิวตฺถพฺพํ, ตโต อูนํ น วฏฺฏติฯ
[1873]
อสญฺจิจฺจาสติสฺสาปิ, อชานนฺตสฺส เกวลํ;
อนาปตฺติ คิลานสฺสา-ปทาสุมฺมตฺตกาทิโนฯ
ปริมณฺฑลกถาฯ
[1874]
อุโภ โกเณ สมํ กตฺวา, สาทรํ ปริมณฺฑลํ;
กตฺวา ปารุปิตพฺเพวํ, อกโรนฺตสฺส ทุกฺกฏํฯ
[1875]
อวิเสเสน วุตฺตํ ตุ, อิทํ สิกฺขาปททฺวยํ;
ตสฺมา ฆเร วิหาเร วา, กตฺตพฺพํ ปริมณฺฑลํฯ
ทุติยํฯ
[1876]