คนฺถารมฺภกถา

ติโลกติลกํ พุทฺธํ, วนฺเท สุทฺธคุณากรํ;

กรุณาสีตลีภูต-หทยํ มหิโตทยํฯ

เตนาปิ ธมฺมราเชน, โลเกกาจริเยน โย;

ปูชิโต ตญฺจ สทฺธมฺมํ, วนฺเท คมฺภีรมุตฺตมํฯ

มุนินฺทจนฺทสทฺธมฺม-รํสีหิ วิมเลหิ โย;

โพธิโตหํ สทา วนฺเท, ตํ สงฺฆํ กุมุทากรํฯ

วินเย นยคมฺภีเร, สพฺพถา ปารทสฺสินา;

วาทินา ทุตฺตราคาธ-สพฺพสตฺถมหณฺณเวฯ

ยา กตา พุทฺธโฆเสน, เถเรน ถิรเจตสา;

กงฺขาวิตรณี นาม, มาติกฏฺฐกถา สุภาฯ

ถิราเนกคุโณเฆน, เถเรน วินยญฺญุนา;

กลฺยาณาจารยุตฺเตน, ธีมตา มุนิสูนุนา;

วินยฏฺฐิติกาเมน, สุเมเธนาภิยาจิโตฯ

ตมหํ วณฺณยิสฺสามิ, สุวิสุทฺธมนากุลํ;

สาธโว ตํ นิสาเมถ, สกฺกจฺจํ มม ภาสโตติฯ