เสนาสนวตฺตกถาวณฺณนา

[191] เสนาสนวตฺเต สยนฺติ เอตฺถาติ เสนํ, สยนนฺติ อตฺโถฯ อาวสนฺติ เอตฺถาติ อาสนํฯ เสนญฺจ อาสนญฺจ เสนาสนํฯ เสนาสเนสุ กตฺตพฺพํ วตฺตํ เสนาสนวตฺตํ ฯ อิธ ปน ยํ วตฺตพฺพํ, ตํ อุปชฺฌายวตฺตกถายํ (วิ. สงฺค. อฏฺฐ. 183 ) วุตฺตเมวฯ ตตฺถ ปน อุปชฺฌาเยน วุตฺถวิหาโร วุตฺโต, อิธ ปน อตฺตนา วุตฺถวิหาโรติ อยเมว วิเสโสฯ น วุฑฺฒํ อนาปุจฺฉาติ เอตฺถ ตสฺส โอวรเก ตทุปจาเร จ อาปุจฺฉิตพฺพนฺติ วทนฺติฯ โภชนสาลาทีสุปิ เอวเมว ปฏิปชฺชิตพฺพนฺติ โภชนสาลาทีสุปิ อุทฺเทสทานาทิ อาปุจฺฉิตฺวาว กาตพฺพนฺติ อตฺโถฯ

เสนาสนวตฺตกถาวณฺณนา นิฏฺฐิตาฯ

ชนฺตาฆรวตฺตกถาวณฺณนา

[192] ชนฺตาฆรวตฺเต ชายตีติ ชํ, กิํ ตํ? สรีรํฯ ชํ ตายติ รกฺขตีติ ชนฺตา, กา สา? ติกิจฺฉาฯ คยฺหเตติ ฆรํ, กิํ ตํ? นิเวสนํ, ชนฺตาย สรีรติกิจฺฉาย กตํ ฆรํ ชนฺตาฆรํ, ชนฺตาฆเร กตฺตพฺพํ วตฺตํ ชนฺตาฆรวตฺตํฯ ตตฺถ ปริภณฺฑนฺติ พหิชคติฯ เสสํ อุปชฺฌายวตฺเต วุตฺตนยตฺตา สุวิญฺเญยฺยเมวฯ

ชนฺตาฆรวตฺตกถาวณฺณนา นิฏฺฐิตาฯ

วจฺจกุฏิวตฺตกถาวณฺณนา

[193] วจฺจกุฏิวตฺเต วจฺจยเต อูหทยเตติ วจฺจํ, กรีสํฯ กุฏียติ ฉินฺทียติ อาตโป เอตายาติ กุฏิ, วจฺจตฺถาย กตา กุฏิ วจฺจกุฏิ, วจฺจกุฏิยา วตฺติตพฺพํ วตฺตํ วจฺจกุฏิวตฺตํ, อิธ จ วตฺตกฺขนฺธเก อาจมนวตฺตํ ปฐมํ อาคตํ, ปจฺฉา วจฺจกุฏิวตฺตํฯ อิมสฺมิํ ปน ปกรเณ ปฐมํ วจฺจํ กตฺวา ปจฺฉา อาจมตีติ อธิปฺปาเยน วจฺจกุฏิวตฺตํ ปฐมํ อาคตํ, ตสฺมา ตทนุกฺกเมน กถยิสฺสามฯ ทนฺตกฏฺฐํ ขาทนฺเตนาติ อยํ วจฺจกุฏิยาปิ สพฺพตฺเถว ปฏิกฺเขโปฯ นิพทฺธคมนตฺถายาติ อตฺตนา นิพทฺธคมนตฺถายฯ ปุคฺคลิกฏฺฐานํ วาติ อตฺตโน วิหารํ สนฺธาย วุตฺตํฯ เสสํ สุวิญฺเญยฺยเมวาติฯ

วจฺจกุฏิวตฺตกถาวณฺณนา นิฏฺฐิตาฯ

อิติ วินยสงฺคหสํวณฺณนาภูเต วินยาลงฺกาเร

อุปชฺฌายวตฺตาทิวตฺตวินิจฺฉยกถาลงฺกาโร นาม

สตฺตวีสติโม ปริจฺเฉโทฯ