นิคมนกถาวณฺณนา

อวสานคาถาสุ อุภโตวิภงฺค-ขนฺธก-ปริวาเรหิ วิภตฺตตฺตา วิภาคปฏิเทสนา ยสฺมิํ วินยปิฏเกฯ โส อุภโตวิภงฺค-ขนฺธก-ปริวารวิภตฺตเทสโน อาหาติ โยชนาฯ ตสฺสาติ วินยปิฏกสฺสฯ

สตฺถุ มหาโพธีติ ทกฺขิณสาขํ สนฺธาย วทติฯ ยํ ปธานฆรํ นาม ปริเวณํ, ตตฺถ จารุปากาเรน สญฺจิตํ ปริกฺขิตฺตํ ยํ ปาสาทํ การยิ, ตตฺร ตสฺมิํ มหานิคมสามิโน ปาสาเท วสตาติ โยเชตพฺพาฯ

พุทฺธสิริํ อุทฺทิสิตฺวา นิสฺสาย, ตสฺส วา อชฺเฌสนมฺปิ ปฏิจฺจ ยา อิทฺธา ปริปุณฺณวินิจฺฉยตาย สมิทฺธา วินยสํวณฺณนา อารทฺธาติ โยชนาฯ

สิรินิวาสสฺสาติ สิริยา นิวาสนฏฺฐานภูตสฺส สิริปาลนามกสฺส รญฺโญฯ ชยสํวจฺฉเรติ วิชยยุตฺเต สํวจฺฉเรฯ อารทฺธกาลทสฺสนตฺถํ ปุน ‘‘ชยสํวจฺฉเร อยํ อารทฺธา’’ติ วุตฺตํฯ

กาเล วสฺสนฺติ ยุตฺตกาเล วสฺสนสีโลฯ เทโวติ เมโฆฯ

นิคมนกถาวณฺณนา นิฏฺฐิตาฯ

นิคมนกถา

เอตฺตาวตา จ อารทฺธา, วินยฏฺฐกถาย ยา;

วณฺณนา นาติวิตฺถิณฺณา, ปริปุณฺณวินิจฺฉยาฯ

ปญฺญาสภาณวาราย, ตนฺติยา ปริมาณโต;

สมิชฺฌนิฏฺฐิปรมา, ยา วิมติวิโนทนีฯ

อนนฺตราเยน กตา, อยํ นิฏฺฐมุปาคตา;

ยํ ตํ นิฏฺฐํ ตถา สพฺเพ, ปาณิโน สมโนรถาฯ

เถเรหิ วินยญฺญูหิ, สุจิสลฺเลขวุตฺติหิ;

อวิสฺสตฺถาติวิตฺถิณฺณ-คนฺถภีรู หิปตฺถิตํฯ

กโรนฺเตน มยา เอวํ, วินยอตฺถวณฺณนํ;

ยํ ปตฺตํ กุสลํ เตน, ปตฺวา สมฺโพธิมุตฺตมํฯ

วินยตฺถํ ปกาเสตฺวา, โย โสปาเยน ลกฺขณํ;

โสปายํ วิมติจฺเฉท-ญาณจกฺขุปทายกํฯ

วิรทฺธตฺถวิปลฺลาส-คนฺถวิตฺถารหานิยา;

วิสุทฺธิํ ปาปยิสฺสามิ, สตฺเต สํสารทุกฺขโตฯ

โลกิเยหิ จ โภเคหิ, คุเณหิ นิขิลา ปชา;

สพฺเพหิ สหิตา โหนฺตุ, รตา สมฺพุทฺธสาสเนติฯ

วิมติวิโนทนีฏีกา นิฏฺฐิตาฯ