ภชติวารวณฺณนา

[318] ตทนนฺตรวาเร ปน วิวาทาธิกรณํ จตุนฺนํ อธิกรณานนฺติอาทิ อธิกรณานํ วุตฺตนเยน อญฺญมญฺญปจฺจยตฺเตปิ สํสคฺคภาวทสฺสนตฺถํ วุตฺตํฯ วิวาทาธิกรณํ จตุนฺนํ อธิกรณานํ วิวาทาธิกรณํ ภชตีติอาทีสุ วิวาทาธิกรณํ จตูสุ อธิกรเณสุ วิวาทาธิกรณภาวเมว ภชติ, นาญฺญาธิกรณภาวํ, จตูสุ อธิกรเณสุ วิวาทาธิกรณตฺตเมว นิสฺสิตํ วิวาทาธิกรณเมว ปริยาปนฺนํ วิวาทาธิกรณภาเวเนว สงฺคหิตนฺติ เอวมตฺโถ คเหตพฺโพฯ

[319] วิวาทาธิกรณํ สตฺตนฺนํ สมถานํ กติ สมเถ ภชตีติอาทิ ปน จตุนฺนํ อธิกรณานํ วูปสมเน สติ นิยตสมเถ ทสฺเสตุํ วุตฺตํฯ ตตฺถ กติ สมเถ ภชตีติ อตฺตโน อุปสมตฺถาย กิตฺตเก สมเถ อุปคจฺฉติ, กิตฺตเก สมเถ อาคมฺม วูปสมํ คจฺฉตีติ อตฺโถฯ กติ สมถปริยาปนฺนนฺติ อตฺตานํ วูปสเมตุํ กติสุ สมเถสุ เตหิ สมานวเสน ปวิฏฺฐํฯ กติหิ สมเถหิ สงฺคหิตนฺติ วูปสมํ กโรนฺเตหิ กติหิ สมเถหิ วูปสมกรณตฺถํ สงฺคหิตํฯ

ภชติวารวณฺณนา นิฏฺฐิตาฯ

ขนฺธกปุจฺฉาวาโร

ปุจฺฉาวิสฺสชฺชนาวณฺณนา

[320] อุปสมฺปทกฺขนฺธกนฺติ ปพฺพชฺชาขนฺธกํ (มหาว. 84)ฯ สห นิทฺเทเสนาติ สนิทฺเทสํฯ ‘‘สนฺนิทฺเทส’’นฺติ วา ปาโฐ, โส เอวตฺโถฯ นิทาเนน จ นิทฺเทเสน จ สทฺธินฺติ เอตฺถ ปญฺญตฺติฏฺฐานปุคฺคลาทิปฺปกาสกํ นิทานวจนํ นิทานํ นาม, ตนฺนิทานํ ปฏิจฺจ นิทฺทิฏฺฐสิกฺขาปทานิ นิทฺเทโส นาม, เตหิ อวยวภูเตหิ สหิตํ ตํสมุทายภูตํ ขนฺธกํ ปุจฺฉามีติ อตฺโถฯ อุตฺตมานิ ปทานีติ อาปตฺติปญฺญาปกานิ วจนานิ อธิปฺเปตานิฯ เตสํ…เป.… กติ อาปตฺติโย โหนฺตีติ เตหิ วจเนหิ ปญฺญตฺตา กติ อาปตฺติกฺขนฺธา โหนฺตีติ อตฺโถฯ นนุ อาปตฺติโย นาม ปุคฺคลานญฺเญว โหนฺติ, น ปทานํ, กสฺมา ปน ‘‘สมุกฺกฏฺฐปทานํ กติ อาปตฺติโย’’ติ สามิวเสน นิทฺเทโส กโตติ อาห ‘‘เยน เยน หิ ปเทนา’’ติอาทิฯ ปาฬิยํ อุโปสถนฺติอาทิ อุโปสถกฺขนฺธกาทีนญฺเญว (มหาว. 132 อาทโย) คหณํฯ

ปุจฺฉาวิสฺสชฺชนาวณฺณนา นิฏฺฐิตาฯ