ภณฺฑาคารสมฺมุติอาทิกถาวณฺณนา

[343] วิหารมชฺเฌติ สพฺเพสํ ชานนตฺถาย วุตฺตํฯ วณฺณาวณฺณํ กตฺวาติ ปฏิวีสปฺปโหนกตาชานนตฺถํ หลิทฺทิยาทีหิ ขุทฺทกมหนฺตวณฺเณหิ ยุตฺเต สเม โกฏฺฐาเส กตฺวาฯ เตนาห ‘‘สเม ปฏิวีเส ฐเปตฺวา’’ติฯ อิทนฺติ สามเณรานํ อุปฑฺฒปฏิวีสทานํฯ ผาติกมฺมนฺติ ปโหนกกมฺมํฯ ยตฺตเกน วินยาคเตน สมฺมุญฺชนีพนฺธนาทิหตฺถกมฺเมน วิหารสฺส อูนกตา น โหติ, ตตฺตกํ กตฺวาติ อตฺโถฯ สพฺเพสนฺติ ตตฺรุปฺปาทวสฺสาวาสิกํ คณฺหนฺตานํ สพฺเพสํ ภิกฺขูนํ, สามเณรานญฺจฯ ภณฺฑาคาริกจีวเรปีติ อกาลจีวรํ สนฺธาย วุตฺตํฯ เอตนฺติ อุกฺกุฏฺฐิยา กตาย สมภาคทานํฯ วิรชฺฌิตฺวา กโรนฺตีติ กตฺตพฺพกาเลสุ อกตฺวา ยถารุจิตกฺขเณ กโรนฺติฯ

เอตฺตเกน มม จีวรํ ปโหตีติ ทฺวาทสคฺฆนเกเนว มม จีวรํ ปริปุณฺณํ โหติ, น ตโต อูเนนาติ สพฺพํ คเหตุกาโมติ อตฺโถฯ

ภณฺฑาคารสมฺมุติอาทิกถาวณฺณนา นิฏฺฐิตาฯ

จีวรรชนกถาทิวณฺณนา

[344] เอวญฺหิ กเตติ วฏฺฏาธารสฺส อนฺโต รชโนทกํ, พหิ ฉลฺลิกญฺจ กตฺวา วิโยชเน กเตฯ น อุตฺตรตีติ เกวลํ อุทกโต เผณุฏฺฐานาภาวา น อุตฺตรติฯ รชนกุณฺฑนฺติ ปกฺกรชนฏฺฐปนกํ มหาฆฏํฯ

[345] อนุวาตาทีนํ ทีฆปตฺตานนฺติ อายามโต, วิตฺถารโต จ อนุวาตํฯ อาทิ-สทฺเทน ทฺวินฺนํ ขนฺธานํ อนฺตรา มาติกากาเรน ฐปิตปตฺตญฺจ ‘‘ทีฆปตฺต’’นฺติ ทฏฺฐพฺพํฯ อาคนฺตุกปตฺตนฺติ ทิคุณจีวรสฺส อุปริ อญฺญํ ปฏฺฏํ อปฺเปนฺติ, ตํ สนฺธาย วุตฺตํฯ ตํ กิร อิทานิ น กโรนฺติฯ

[346] ปาฬิยํ นนฺทิมุขิยาติ ตุฏฺฐิมุขิยา, ปสนฺนทิสามุขายาติ อตฺโถฯ

[348] อจฺฉุเปยฺยนฺติ ปติฏฺฐเปยฺยํฯ หตวตฺถกานนฺติ ปุราณวตฺถานํฯ อนุทฺธริตฺวาวาติ อคฺคเฬ วิย ทุพฺพลฏฺฐานํ อนปเนตฺวาวฯ