เมนู

จตุมหาปเทสกถาวณฺณนา

[305] ปริมทฺทนฺตาติ อุปปริกฺขนฺตาฯ ทฺเว ปฏา เทสนาเมเนว วุตฺตาติ เตสํ สรูปทสฺสนปทเมตํฯ นาญฺญนิวตฺตนปทํ ปตฺตุณฺณปฏสฺสาปิ เทสนาเมน วุตฺตตฺตาฯ

ตุมฺพาติ ภาชนานิฯ ผลตุมฺโพ นาม ลาพุอาทิฯ อุทกตุมฺโพ อุทกฆโฏฯ กิลญฺชจฺฉตฺตนฺติ เวฬุวิลีเวหิ วายิตฺวา กตฉตฺตํฯ สมฺภินฺนรสนฺติ มิสฺสีภูตรสํฯ

จตุมหาปเทสกถาวณฺณนา นิฏฺฐิตาฯ

เภสชฺชกฺขนฺธกวณฺณนานโย นิฏฺฐิโตฯ

7. กถินกฺขนฺธโก

กถินานุชานนกถาวณฺณนา

[306] กถินกฺขนฺธเก สีสวเสนาติ ปธานวเสนฯ กถินนฺติ ปญฺจานิสํเส อนฺโตกรณสมตฺถตาย ถิรนฺติ อตฺโถฯ โส เนสํ ภวิสฺสตีติ ยุชฺชตีติ ‘‘โส ตุมฺหาก’’นฺติ อวตฺวา ‘‘เนส’’นฺติ วจนํ ยุชฺชติฯ เย อตฺถตกถินาติ น เกวลํ ตุมฺหากเมว, เย อญฺเญปิ อตฺถตกถินา, เตสํ ภวิสฺสตีติ อตฺโถฯ อถ วา โวติ ตทา สมฺมุขีภูเตหิ สทฺธิํ อสมฺมุขีภูเต จ อนาคเต จ ภิกฺขู สพฺเพ เอกโต สมฺปิณฺเฑตฺวา วุตฺตํ, ตุมฺหากนฺติ อตฺโถฯ โส เนสนฺติ เอตฺถ โส เตสนฺติ โยเชตพฺพํฯ เตนาห ‘‘อตฺถตกถินานํ โว, ภิกฺขเว, อิมานิ ปญฺจ กปฺปิสฺสนฺตี’’ติฯ มตกจีวรนฺติ มตสฺส จีวรํฯ ‘‘วุตฺถวสฺสวเสนา’’ติ อิทํ ปจฺฉิมวสฺสํวุตฺถานมฺปิ สาธารณนฺติ อาห ‘‘ปุริมิกาย วสฺสํ อุปคนฺตฺวา ปฐมปวารณาย ปวาริตา ลภนฺตี’’ติฯ อุปคตา วา น ลภนฺตีติ ปจฺฉิมิกาย วุตฺถวสฺเสปิ สนฺธาย วุตฺตํฯ

ขลิมกฺขิตสาฏโกติ อหตวตฺถํ สนฺธาย วุตฺตํฯ ‘‘อกาตุํ น ลพฺภตี’’ติ อิมินา อนาทริเย สติ ทุกฺกฏนฺติ ทีเปติฯ

‘‘อปโลเกตฺวา’’ติ อิทํ อญฺเญสํ วสฺสํวุตฺถภิกฺขูนํ อทตฺวา ทาตุกาเมหิ กตฺตพฺพวิธิทสฺสนํฯ ยทิ เอวํ กมฺมวาจาย เอว ทานํ อวุตฺตนฺติ อาห ‘‘กมฺมวาจา ปนา’’ติอาทิฯ กถินจีวรํ วิย กมฺมวาจาย ทาตุํ น วฏฺฏตีติ อปโลเกตฺวาว ทาตพฺพนฺติ อธิปฺปาโยฯ

[308] มหาภูมิกนฺติ มหาวิสยํ, จตุวีสติอาการวนฺตตาย มหาวิตฺถาริกนฺติ วุตฺตํ โหติฯ ปญฺจกนฺติ ปญฺจขณฺฑํฯ เอเสว นโย เสเสสุปิฯ ปฐมจิมิลิกาติ กถินวตฺถโต อญฺญา อตฺตโน ปกติจิมิลิกาฯ กุจฺฉิจิมิลิกํ กตฺวา สิพฺพิตมตฺเตนาติ ถิรชิณฺณานํ จิมิลิกานํ เอกโต กตฺวา สิพฺพนสฺเสตํ อธิวจนนฺติ วทนฺติฯ มหาปจฺจริยํ, กุรุนฺทิยญฺจ วุตฺตวจนนฺติ ทสฺสนํ, พฺยญฺชนโต เอว เภโท, น อตฺถโตติ ทสฺสนตฺถํ กตนฺติปิ วทนฺติฯ ปิฏฺฐิอนุวาตาโรปนมตฺเตนาติ ทีฆโต อนุวาตสฺส อาโรปนมตฺเตนฯ กุจฺฉิอนุวาตาโรปนมตฺเตนาติ ปุถุลโต อนุวาตสฺส อาโรปนมตฺเตนฯ รตฺตินิสฺสคฺคิเยนาติ รตฺติอติกฺกนฺเตนฯ