ลิงฺคาทิทสฺสนกถาทิวณฺณนา
[179] อญฺญาตกํ นาม อทิฏฺฐปุพฺพนฺติ อาห ‘‘อญฺเญสํ สนฺตก’’นฺติฯ อญฺเญสนฺติ อตฺตนา อทิฏฺฐปุพฺพานํฯ นานาสํวาสกภาวนฺติ ลทฺธินานาสํวาสกภาวํฯ
[180] ปาฬิยํ อภิวิตรนฺติ สมานสํวาสกาภาวํ นิจฺฉินนฺติฯ
[181] อุโปสถการกาติ สงฺฆุโปสถการกาฯ เตเนว ‘‘อญฺญตฺร สงฺเฆนา’’ติ วุตฺตํฯ สงฺฆุโปสถฏฺฐานโต หิ คจฺฉนฺเตน อตฺตจตุตฺเถเนว คนฺตพฺพํ, ติณฺณํ ภิกฺขูนํ นิสินฺนฏฺฐานโต ปน คจฺฉนฺเตน เอเกน ภิกฺขุนาปิ สห คนฺตุมฺปิ วฏฺฏติฯ ปาฬิยํ ‘‘อภิกฺขุโก อาวาโส’’ติ อิทํ นิทสฺสนมตฺตํ, สงฺฆุโปสถฏฺฐานโต คณปุคฺคเลหิ สภิกฺขุโกปิ อาวาโส น คนฺตพฺโพ ‘‘อญฺญตฺร สงฺเฆนา’’ติ วุตฺตตฺตาติ วทนฺติฯ อุโปสถํ กโรนฺตีติ สงฺฆุโปสถํ วา คณุโปสถํ วาฯ ‘‘ตสฺส สนฺติก’’นฺติ อิทํ คณุโปสถฏฺฐานโต คจฺฉนฺตํ สนฺธาย วุตฺตํ, อญฺญถา ‘‘สพฺพนฺติเมน ปริจฺเฉเทน อตฺตจตุตฺเถน วา’’ติ วจเนน วิรุชฺฌนโตฯ อารญฺญเกนาติ เอกจารินาฯ อุโปสถนฺตราโยติ อตฺตโน อุโปสถนฺตราโยฯ
[183] ปาฬิยํ ภิกฺขุนิยา นิสินฺนปริสายาติอาทีสุ ภิกฺขุนิยาติอาทิ กรณตฺเถ สามิวจนํฯ
ลิงฺคาทิทสฺสนกถาทิวณฺณนา นิฏฺฐิตาฯ
อุโปสถกฺขนฺธกวณฺณนานโย นิฏฺฐิโตฯ
3. วสฺสูปนายิกกฺขนฺธโก
วสฺสูปนายิกอนุชานนกถาทิวณฺณนา
[184] วสฺสูปนายิกกฺขนฺธเก อปรสฺมิํ ทิวเสติ ทุติเย ปาฏิปททิวเสฯ
[185] อญฺญตฺถ อรุณํ อุฏฺฐาปเนน วาติ สาเปกฺขสฺส อกรณีเยน คนฺตฺวา อญฺญตฺถ อรุณํ อุฏฺฐาปเนน วาฯ ปริหานีติ คุณปริหานิฯ
[187] ปาฬิยํ สตฺตาหํ สนฺนิวตฺโต กาตพฺโพติ สกลํ สตฺตาหํ พหิ เอว อวีตินาเมตฺวา สตฺตาหปริโยสานภูตํ อรุณุฏฺฐานกาลํ ปุน วิหาเรว สมฺพนฺธวเสน สตฺตาหํ วิหาเร สนฺนิวตฺตํ กาตพฺพํฯ สตฺตาหปริโยสานกาโล หิ อิธ สตฺตาห-สทฺเทน วุตฺโต, ตทเปกฺขาย จ ‘‘สนฺนิวตฺโต’’ติ ปุลฺลิงฺเคน วุตฺตํฯ ตีณิ ปริหีนานีติ ภิกฺขุนีนํ วจฺจกุฏิอาทีนํ ปฏิกฺขิตฺตตฺตา ปริหีนานิฯ
[189] น ปลุชฺชตีติ อญฺเญสํ อปฺปคุณตฺตา, มม จ มรเณน น วินสฺสติฯ
วสฺสูปนายิกอนุชานนกถาทิวณฺณนา นิฏฺฐิตาฯ
ปหิเตเยวอนุชานนกถาวณฺณนา
[199] ภิกฺขูหิ สทฺธิํ วสนกปุริโสติ อนญฺญคติโกติ ทสฺเสติฯ คนฺตพฺพนฺติ สงฺฆกรณีเยน อปฺปหิเตปิ คนฺตพฺพํฯ เอตฺถ จ อนุปาสเกหิปิ สาสนภาวํ ญาตุกาเมหิ ปหิเต เตสํ ปสาทวฑฺฒิํ สมฺปสฺสนฺเตหิปิ สตฺตาหกรณีเยน คนฺตุํ วฏฺฏตีติ คเหตพฺพํฯ
รตฺติจฺเฉทวินิจฺฉโยติ สตฺตาหกรณีเยน คนฺตฺวา พหิทฺธา อรุณุฏฺฐาปนสงฺขาตสฺส รตฺติจฺเฉทสฺส วินิจฺฉโยฯ คนฺตุํ วฏฺฏตีติ อนฺโตอุปจารสีมายํ ฐิเตเนว สตฺตาหกรณียนิมิตฺตํ สลฺลกฺเขตฺวา อิมินา นิมิตฺเตน คนฺตฺวา ‘‘อนฺโตสตฺตาเห อาคจฺฉิสฺสามี’’ติ อาโภคํ กตฺวา คนฺตุํ วฏฺฏติฯ
