[698] ปาฬิยํ อสนฺเต การกสงฺเฆติ เอตฺถ วิชฺชมานํ สุทูรมฺปิ คนฺตฺวา อาปุจฺฉิตพฺพํ ฯ อนฺตราเย ปน สติ สมฺมา วตฺตนฺตํ โอสาเรตุํ วฏฺฏตีติฯ ธมฺมกมฺเมน อุกฺขิตฺตตา, อนนุญฺญาตการณา โอสารณนฺติ ทฺเว องฺคานิฯ

จตุตฺถสงฺฆาทิเสสสิกฺขาปทวณฺณนา นิฏฺฐิตาฯ

5. ปญฺจมสงฺฆาทิเสสสิกฺขาปทวณฺณนา

[701] ปญฺจเม ตนฺติ มหาอฏฺฐกถายํ อวจนํ ‘‘อนวสฺสุโตติ ชานนฺตี ปฏิคฺคณฺหาตี’’ติอาทิ ปาฬิยา สเมติฯ อุภโต อวสฺสุตภาโว, อุทกทนฺตโปนโต อญฺญํ สหตฺถา คเหตฺวา อชฺโฌหรณนฺติ ทฺเว องฺคานิฯ

ปญฺจมสงฺฆาทิเสสสิกฺขาปทวณฺณนา นิฏฺฐิตาฯ

6. ฉฏฺฐสงฺฆาทิเสสสิกฺขาปทวณฺณนา

[705] ฉฏฺเฐ ปฏิคฺคโห เตน น วิชฺชตีติ เตเนว ‘‘น เทตี’’ติ วุตฺตการเณน อุยฺโยชิตาย หตฺถโต อิตราย ปฏิคฺคโหปิ นตฺถิฯ ปริโภคปจฺจยาติ อุยฺโยชิตาย โภชนปริโยสานปจฺจยาติ อตฺโถฯ มนุสฺสปุริสสฺส อวสฺสุตตา, ตํ ญตฺวา อนนุญฺญาตการณา อุยฺโยชนา, เตน อิตริสฺสา คเหตฺวา โภชนปริโยสานนฺติ ตีณิ องฺคานิฯ

ฉฏฺฐสงฺฆาทิเสสสิกฺขาปทวณฺณนา นิฏฺฐิตาฯ

[709-727] สตฺตมโต ยาวทสมปริโยสานานิ อุตฺตานาเนวฯ

สงฺฆาทิเสสวณฺณนานโย นิฏฺฐิโตฯ

3. นิสฺสคฺคิยกณฺฑํ

2. ทุติยนิสฺสคฺคิยาทิปาจิตฺติยสิกฺขาปทวณฺณนา

[733] นิสฺสคฺคิเยสุปิ ปฐมํ อุตฺตานเมวฯ

[740] ทุติเย อยฺยาย ทมฺมีติ เอวํ ปฏิลทฺธนฺติ นิสฺสฏฺฐปฏิลทฺธํ, นิสฺสฏฺฐํ ปฏิลภิตฺวาปิ ยํ อุทฺทิสฺส ทายเกหิ ทินฺนํ, ตตฺเถว ทาตพฺพํฯ เตนาห ‘‘ยถาทาเนเยว อุปเนตพฺพ’’นฺติฯ อกาลจีวรตา, ตํ ญตฺวา กาลจีวรนฺติ เลเสน ภาชาปนํ, ปฏิลาโภติ ตีณิ องฺคานิฯ

[743] ตติเย เมตนฺติ มเมเวตํ จีวรํฯ อุปสมฺปนฺนตา, ปริวตฺติตวิกปฺปนุปคจีวรสฺส สกสญฺญาย อจฺฉินฺทนาทีติ ทฺเว องฺคานิฯ

[748-752] จตุตฺเถ อาหฏสปฺปิํ ทตฺวาติ อตฺตโน ทตฺวาฯ ยมกํ ปจิตพฺพนฺติ สปฺปิญฺจ เตลญฺจ เอกโต ปจิตพฺพํฯ เลเสน คเหตุกามตา, อญฺญสฺส วิญฺญตฺติ, ปฏิลาโภติ ตีณิ องฺคานิฯ

[753] ปญฺจเม สาติ ถุลฺลนนฺทาฯ อยนฺติ สิกฺขมานาฯ เจตาเปตฺวาติ ชานาเปตฺวาติ อิธ วุตฺตํ, มาติกาฏฺฐกถายํ ปน ‘‘อตฺตโน กปฺปิยภณฺเฑน ‘อิทํ นาม อาหรา’ติ อญฺญํ ปริวตฺตาเปตฺวา’’ติ (กงฺขา. อฏฺฐ. อญฺญเจตาปนสิกฺขาปทวณฺณนา) วุตฺตํฯ

[758] ฉฏฺเฐ ปาวาริกสฺสาติ ทุสฺสวาณิชกสฺสฯ

[764] สตฺตเม สญฺญาจิตเกนาติ สยํ ยาจิตเกนปีติ อตฺโถฯ

[769-789] อฏฺฐมโต ยาวทฺวาทสมา อุตฺตานเมวฯ

นิสฺสคฺคิยวณฺณนานโย นิฏฺฐิโตฯ

4. ปาจิตฺติยกณฺฑํ

1. ลสุณวคฺโค