3. ตติยสงฺฆาทิเสสสิกฺขาปทวณฺณนา

[692] ตติเย ปริกฺเขปํ อติกฺกาเมนฺติยาติ คามนฺตรสฺส ปริกฺเขปํ อติกฺกาเมนฺติยาฯ ‘‘คามนฺตรํ คจฺเฉยฺยา’’ติ หิ วุตฺตํฯ วิกาลคามปฺปเวสนสิกฺขาปเท วิย ‘‘อปริกฺขิตฺตสฺส อุปจารํ โอกฺกมนฺติยา’’ติ อวตฺวา ‘‘อติกฺกาเมนฺติยา’’ติ ปาฬิยํ วุตฺตตฺตา คามํ ปวิสนฺติยา ฆรูปจาเร ฐิตสฺส ทุติยเลฑฺฑุปาตสงฺขาตสฺส อุปจารสฺส อติกฺกโม นาม ปฐมเลฑฺฑุปาตฏฺฐานสงฺขาตสฺส ปริกฺเขปารหฏฺฐานสฺส อติกฺกโม เอวาติ อาห ‘‘ปริกฺเขปารหฏฺฐานํ เอเกน ปาเทน อติกฺกมตี’’ติฯ

มชฺเฌติ คามมชฺเฌฯ ปจฺฉาติ อปรกาเลฯ ‘‘จตุคามสาธารณตฺตา’’ติ อิมินา วิหารโต จตูสุ คาเมสุ ยตฺถ กตฺถจิ ปวิสิตุํ วฏฺฏตีติ เอตฺถ การณมาหฯ

ปรตีรเมว อกฺกมนฺติยาติ นทิํ อโนตริตฺวา โอริมตีรโต ลงฺฆิตฺวา วา อากาสาทินา วา ปรตีรเมว อติกฺกาเมนฺติยาฯ โอริมตีรเมว อาคจฺฉติ, อาปตฺตีติ ปารคมนาย โอติณฺณตฺตา วุตฺตํฯ

ตาทิเส อรญฺเญติ อินฺทขีลโต พหิภาวลกฺขเณ อรญฺเญฯ ‘‘เตเนวา’’ติอาทินา ทสฺสนูปจาเร วิรหิเต สวนูปจารสฺส วิชฺชมานตฺเตปิ อาปตฺติ โหตีติ ทสฺเสติฯ อญฺญํ มคฺคํ คณฺหาตีติ มคฺคมูฬฺหตฺตา คณฺหาติ, น ทุติยิกํ โอหิยิตุํฯ ตสฺมา อนาปตฺติฯ อนนฺตราเยน เอกภาโว, อนาปทาย คามนฺตรคมนาทีสุ เอกนฺติ ทฺเว องฺคานิฯ

ตติยสงฺฆาทิเสสสิกฺขาปทวณฺณนา นิฏฺฐิตาฯ

4. จตุตฺถสงฺฆาทิเสสสิกฺขาปทวณฺณนา

[694] จตุตฺเถ การกคณสฺสาติ อิมสฺส กมฺมํ กาตพฺพนฺติ เยหิ สนฺนิฏฺฐานํ กตํ, เต สนฺธาย วุตฺตํฯ กมฺมวาจกฺขเณ สหฐิเตติ เกจิฯ เนตฺถารวตฺเตติ นิตฺถรณเหตุมฺหิ วตฺเตฯ

[698] ปาฬิยํ อสนฺเต การกสงฺเฆติ เอตฺถ วิชฺชมานํ สุทูรมฺปิ คนฺตฺวา อาปุจฺฉิตพฺพํ ฯ อนฺตราเย ปน สติ สมฺมา วตฺตนฺตํ โอสาเรตุํ วฏฺฏตีติฯ ธมฺมกมฺเมน อุกฺขิตฺตตา, อนนุญฺญาตการณา โอสารณนฺติ ทฺเว องฺคานิฯ

จตุตฺถสงฺฆาทิเสสสิกฺขาปทวณฺณนา นิฏฺฐิตาฯ

5. ปญฺจมสงฺฆาทิเสสสิกฺขาปทวณฺณนา

[701] ปญฺจเม ตนฺติ มหาอฏฺฐกถายํ อวจนํ ‘‘อนวสฺสุโตติ ชานนฺตี ปฏิคฺคณฺหาตี’’ติอาทิ ปาฬิยา สเมติฯ อุภโต อวสฺสุตภาโว, อุทกทนฺตโปนโต อญฺญํ สหตฺถา คเหตฺวา อชฺโฌหรณนฺติ ทฺเว องฺคานิฯ

ปญฺจมสงฺฆาทิเสสสิกฺขาปทวณฺณนา นิฏฺฐิตาฯ

6. ฉฏฺฐสงฺฆาทิเสสสิกฺขาปทวณฺณนา

[705] ฉฏฺเฐ ปฏิคฺคโห เตน น วิชฺชตีติ เตเนว ‘‘น เทตี’’ติ วุตฺตการเณน อุยฺโยชิตาย หตฺถโต อิตราย ปฏิคฺคโหปิ นตฺถิฯ ปริโภคปจฺจยาติ อุยฺโยชิตาย โภชนปริโยสานปจฺจยาติ อตฺโถฯ มนุสฺสปุริสสฺส อวสฺสุตตา, ตํ ญตฺวา อนนุญฺญาตการณา อุยฺโยชนา, เตน อิตริสฺสา คเหตฺวา โภชนปริโยสานนฺติ ตีณิ องฺคานิฯ

ฉฏฺฐสงฺฆาทิเสสสิกฺขาปทวณฺณนา นิฏฺฐิตาฯ

[709-727] สตฺตมโต ยาวทสมปริโยสานานิ อุตฺตานาเนวฯ

สงฺฆาทิเสสวณฺณนานโย นิฏฺฐิโตฯ