9. อุกฺขิตฺตสมฺโภคสิกฺขาปทวณฺณนา

[424] นวเม ‘‘อุกฺขิตฺโต อโนสาริโต’’ติ วุตฺตตฺตา อริฏฺฐสฺส อุกฺเขปนียกมฺมํ กตนฺติ ทฏฺฐพฺพํฯ

[425] ปาฬิยํ ‘‘เอกจฺฉนฺเน’’ติ สามญฺญโต วุตฺตตฺตา นานูปจาเรปิ เอกจฺฉนฺเน นิปชฺชเน ปณฺณตฺติํ อชานนฺตสฺส อรหโตปิ อุกฺขิตฺตานุวตฺตกานมฺปิ ปาจิตฺติยเมวฯ อกตานุธมฺมตา, ญตฺวา สมฺโภคาทิกรณนฺติ ทฺเว องฺคานิฯ

อุกฺขิตฺตสมฺโภคสิกฺขาปทวณฺณนา นิฏฺฐิตาฯ

10. กณฺฏกสิกฺขาปทวณฺณนา

[428] ทสเม ปิเรติ สมฺโพธนตฺเถ นิปาตปทํฯ เสสํ อนนฺตรสิกฺขาปททฺวเย วุตฺตนยเมวฯ

กณฺฏกสิกฺขาปทวณฺณนา นิฏฺฐิตาฯ

นิฏฺฐิโต สปฺปาณกวคฺโค สตฺตโมฯ

8. สหธมฺมิกวคฺโค

1. สหธมฺมิกสิกฺขาปทวณฺณนา

[434] อฏฺฐมวคฺคสฺส ปฐเม อุปสมฺปนฺนสฺส ปญฺญตฺเตน วจนํ, อสิกฺขิตุกามสฺส เลเสน เอวํ วจนนฺติ ทฺเว องฺคานิฯ

สหธมฺมิกสิกฺขาปทวณฺณนา นิฏฺฐิตาฯ