3. หสธมฺมสิกฺขาปทวณฺณนา

[338] ตติเย ปาฬิยํ หสธมฺเม หสธมฺมสญฺญีติอาทีสุ อุปฺลวาทิมตฺตํ กิํ หสธมฺโม โหตีติ คหณวเสน สติ กรณีเย กริยมานํ หสธมฺมํ หสธมฺโมติ คหณวเสน อตฺโถ เวทิตพฺโพฯ อุสฺสาเรนฺโตติ อุทเก ฐิตํ นาวํ ตีเร อาโรเปนฺโตฯ

ปตนุปฺปตนวาเรสูติ อุทกสฺส อุปริตเล มณฺฑูกคติยา ปตนุปฺปตนวเสน คมนตฺถํ ขิตฺตาย เอกิสฺสา กถลาย วเสน วุตฺตํฯ อุทกสฺส อุปริโคปฺผกตา, หสาธิปฺปาเยน กีฬนนฺติ ทฺเว องฺคานิฯ

หสธมฺมสิกฺขาปทวณฺณนา นิฏฺฐิตาฯ

4. อนาทริยสิกฺขาปทวณฺณนา

[344] จตุตฺเถ สุตฺตานุโลมนฺติ มหาปเทสาฯ อฏฺฐกถาติปิ วทนฺติฯ อุปสมฺปนฺนสฺส ปญฺญตฺเตน วจนํ, อนาทริยกรณนฺติ ทฺเว องฺคานิฯ

อนาทริยสิกฺขาปทวณฺณนา นิฏฺฐิตาฯ

5. ภิํสาปนสิกฺขาปทวณฺณนา

[345] ปญฺจเม อุปสมฺปนฺนตา, ตสฺส ทสฺสนสวนวิสเย ภิํสาเปตุกามตาย วายมนนฺติ ทฺเว องฺคานิฯ

ภิํสาปนสิกฺขาปทวณฺณนา นิฏฺฐิตาฯ

6. โชติสิกฺขาปทวณฺณนา

[354] ฉฏฺเฐ อลาตํ ปติตนฺติ อคฺคิกปาลโต พหิ ปติตํฯ วิชฺฌาตนฺติ วิชฺฌาตํ อลาตํ กปาลคฺคิมฺหิ ปกฺขิปิตฺวา ชาเลนฺตสฺส ปาจิตฺติยํ, ตถา เกวลํ อินฺธนํ ปาเตนฺตสฺสปิ วิชฺฌาตํ กปาลคฺคิํ มุขวาตาทินา อุชฺชาเลนฺตสฺสปิฯ คิลานตาทิการณาภาโว, วิสิพฺเพตุกามตา, สมาทหนนฺติ ตีณิ องฺคานิฯ

โชติสิกฺขาปทวณฺณนา นิฏฺฐิตาฯ

7. นหานสิกฺขาปทวณฺณนา

[357] สตฺตเม ปาฬิยํ นคเร ถกิเตติ เอตฺถ รญฺญา จิรํ นหายิตุกาเมน ‘‘อหํ พหิ อุยฺยาเน กตารกฺโข วสิสฺสามิ, นครํ ถเกตฺวา โคเปถา’’ติ อนุญฺญาตา, เต ถกิํสูติ ทฏฺฐพฺพํฯ อสมฺภินฺเนนาติ อนฏฺเฐน, ตํ ทิวสํ ปุน อคฺคหิตาลงฺกาเรน ปพุทฺธมตฺเตนาติ อธิปฺปาโยฯ มชฺฌิมเทเส อูนกทฺธมาสนหานํ, สมยาทีนํ อภาโวติ ทฺเว องฺคานิฯ

นหานสิกฺขาปทวณฺณนา นิฏฺฐิตาฯ

8. ทุพฺพณฺณกรณสิกฺขาปทวณฺณนา

[368] อฏฺฐเม ปฏิลทฺธนวจีวเรนาติ เอตฺถ ปุพฺเพ อกตกปฺปํ กติปาหํ นิวาสนตฺถาย ตาวกาลิกวเสน ลทฺธมฺปิ สงฺคยฺหตีติ วทนฺติฯ

[369] ‘‘นวํ นาม อกตกปฺป’’นฺติ สามญฺญโต วุตฺตตฺตา อญฺเญน ภิกฺขุนา กปฺปพินฺทุํ ทตฺวา ปริภุตฺตํ จีวรํ, เตน วา, ตโต ลภิตฺวา อญฺเญน วา เกนจิ ทินฺนมฺปิ กตกปฺปเมว นวํ นาม น โหตีติ ทฏฺฐพฺพํฯ ‘‘นิวาเสตุํ วา ปารุปิตุํ วา’’ติ วุตฺตตฺตา อํสพทฺธกาสาวมฺปิ ปารุปิตพฺพโต กปฺปํ กาตพฺพนฺติ วทนฺติฯ จมฺมการนีลํ นาม จมฺมํ นีลวณฺณํ กาตุํ โยชิยมานํ นีลํฯ ปกตินีลเมวาติ เกจิฯ ยถาวุตฺตจีวรสฺส อกตกปฺปตา, อนฏฺฐจีวราทิตา, นิวาสนาทิตาติ ตีณิ องฺคานิฯ

ทุพฺพณฺณกรณสิกฺขาปทวณฺณนา นิฏฺฐิตาฯ

9. วิกปฺปนสิกฺขาปทวณฺณนา

[374] นวเม เยนาติ เยน สทฺธิํ, ยสฺส สนฺติเกติ อตฺโถฯ สามํ วิกปฺปิตสฺส อปจฺจุทฺธาโร, วิกปฺปนุปคจีวรตา, อวิสฺสาเสน ปริโภโคติ ตีณิ องฺคานิฯ

วิกปฺปนสิกฺขาปทวณฺณนา นิฏฺฐิตาฯ