ฯ นโม ตสฺส ภควโต อรหโต สมฺมาสมฺพุทฺธสฺสฯ
วินยปิฏเก
วิมติวิโนทนี-ฏีกา (ปฐโม ภาโค)
คนฺถารมฺภกถา
กรุณาปุณฺณหทยํ , สุคตํ หิตทายกํ;
นตฺวา ธมฺมญฺจ วิมลํ, สงฺฆญฺจ คุณสมฺปทํฯ
วณฺณนา นิปุณาเหสุํ, วินยฏฺฐกถาย ยา;
ปุพฺพเกหิ กตา เนกา, นานานยสมากุลาฯ
ตตฺถ กาจิ สุวิตฺถิณฺณา, ทุกฺโขคาหา จ คนฺถโต;
วิรทฺธา อตฺถโต จาปิ, สทฺทโต จาปิ กตฺถจิฯ
กาจิ กตฺถจิ อปุณฺณา, กาจิ สมฺโมหการินี;
ตสฺมา ตาหิ สมาทาย, สารํ สงฺเขปรูปโตฯ
ลีนตฺถญฺจ ปกาเสนฺโต, วิรทฺธญฺจ วิโสธยํ;
อุปฏฺฐิตนยญฺจาปิ, ตตฺถ ตตฺถ ปกาสยํฯ
วินเย วิมติํ เฉตุํ, ภิกฺขูนํ ลหุวุตฺตินํ;
สงฺเขเปน ลิขิสฺสามิ, ตสฺสา ลีนตฺถวณฺณนํฯ