เมนู

กายิกาทิอาปตฺติวณฺณนา

[474-5] นิทานุทฺเทสํ วินา เสสุทฺเทสาภาวา ‘‘สพฺพปาติโมกฺขุทฺเทสานญฺจ สงฺคโห โหตี’’ติ วุตฺตํฯ วินเย ครุกา วินยครุกาฯ อิทํ ปน ทฺวีสุ คาถาสุ กิญฺจาปิ อาคตํ, อญฺเญหิ ปน มิสฺเสตฺวา วุตฺตภาวา นานากรณํ ปจฺเจตพฺพํฯ นวสุ ฐาเนสุ กมฺมํ โหตีติ กมฺมญตฺติ โหติฯ วาจาติ วจีสมฺภวาฯ อทฺธานหีโน อูนวีสติวสฺโสฯ ‘‘อปิเจตฺถาติ กุรุนฺทิวาโท’’ติ วุตฺตํฯ วนปฺปตินฺติ เอวํ อทินฺนาทาเน อาคตํ วนปฺปติํฯ วิสฺสฏฺฐิฉฑฺฑเนติ สุกฺกวิสฺสฏฺฐิยํฯ ทุกฺกฏา กตาติ ทุกฺกฏํ วุตฺตํฯ อามกธญฺญํ วิญฺญาเปตฺวา ภุญฺชนฺติยา ปุพฺพปโยเค ทุกฺกฏํ, อชฺโฌหาเร ปาจิตฺติยํฯ

ปาจิตฺติยวณฺณนา

[476] มหาสงฺฆิกา สามเณเรปิ อาปตฺติํ เทสาเปนฺติ กิร, เตน วุตฺตํ ‘‘น เทสาเปตพฺพา’’ติ, ทณฺฑกมฺมํ ปน เตสํ กาตพฺพํ ตถารูเป โอฬาริกวีติกฺกเมฯ

อวนฺทนียปุคฺคลาทิวณฺณนา

[477] ทสสตํ อาปตฺติโยติ สหสฺสํ อาปตฺติโยฯ จมฺปายํ วินยวตฺถุสฺมินฺติ จมฺเปยฺยกฺขนฺธเกฯ อธมฺเมน วคฺคนฺติอาทีนิ จตฺตาริ กมฺมานิเยว ภควตา วุตฺตานีติ อตฺโถฯ น เกวลํ อาปตฺติเยว, อถ โข ฉ สมถา…เป.… สมฺมุขาวินเยน สมฺมนฺติ, สมาโยคํ คจฺฉนฺติ สมฺมุขาวินเยน สมฺปโยคํ คจฺฉนฺตีติ อตฺโถฯ วินา สมเถหิ สมฺมติ, สมถภาวํ คจฺฉติฯ ปฏิเสธตฺเถ สติ วินา สมเถหีติ สมเถหิ วินาติ อตฺโถฯ

โสฬสกมฺมาทิวณฺณนา

[478] อสุตฺตกนฺติ สุตฺตวิรหิตํ, อุสุตฺตํ ตตฺร นตฺถีติ อธิปฺปาโยฯ

ทุติยคาถาสงฺคณิกวณฺณนา นิฏฺฐิตาฯ

เสทโมจนคาถาวณฺณนา

อวิปฺปวาสปญฺหาวณฺณนา

[479] ตหินฺติ ตสฺมิํ ปุคฺคเลฯ อกปฺปิยสมฺโภโค นาม เมถุนธมฺมาทิฯ ‘‘วรเสนาสนรกฺขณตฺถาย วิสฺสชฺเชตฺวา ปริภุญฺชิตุํ วฏฺฏตี’’ติ ครุภณฺฑวินิจฺฉเย วุตฺโตฯ เอกาทสาวนฺทิเย ปณฺฑกาทโย เอกาทสอุเปติ สปริสํฯ น ชีวติ นิมฺมิตรูปตฺตาฯ ‘‘อุพฺภกฺขเกน วทามี’’ติ อิมินา มุเข เมถุนธมฺมาภาวํ ทีเปติฯ อโธนาภิวิวชฺชเนน วจฺจมคฺคปฺปสฺสาวมคฺเคสุ คามนฺตรปริยาปนฺนํ นทิปารํ โอกฺกนฺตภิกฺขุนิํ สนฺธายาติ ภิกฺขุนิยา คามาปริยาปนฺนปรตีเร นทิสมีปเมว สนฺธาย วุตฺตาฯ ตตฺถ ปรตีเร คามูปจาโร เอกเลฑฺฑุปาโต นทิปริยนฺเตน ปริจฺฉินฺโน, ตสฺมา ปรตีเร รตนมตฺตมฺปิ อรญฺญํ น อตฺถิ, ตญฺจ ติณาทีหิ ปฏิจฺฉนฺนตฺตา ทสฺสนูปจารวิรหิตํ กโรติฯ ตตฺถ อตฺตโน คาเม อาปตฺติ นตฺถิฯ ปรตีเร ปน เอกเลฑฺฑุปาตสงฺขาเต คามูปจาเรเยว ปทํ ฐเปติฯ อนฺตเร อภิธมฺมวเสน อรญฺญภูตํ สกคามํ อติกฺกมติ นาม, ตสฺมา คณมฺหา โอหียนา จ โหตีติ ญาตพฺพํฯ เอตฺตาวตาปิ สนฺโตสมกตฺวา วิจาเรตฺวา คเหตพฺพํฯ ภิกฺขูนํ สนฺติเก อุปสมฺปนฺนา ปญฺจสตา มหาปชาปติปฺปมุขาฯ มหาปชาปติปิ หิ อานนฺทตฺเถเรน ทินฺนโอวาทสฺส ปฏิคฺคหิตตฺตา ภิกฺขูนํ สนฺติเก อุปสมฺปนฺนา นามฯ

ปาราชิกาทิปญฺหาวณฺณนา

[480] ‘‘ทุสฺสกุฏิํ สนฺธายา’’ติ สห ทุสฺเสน วีติกฺกมนสฺส สกฺกุเณยฺยตาย วุตฺตํฯ ลิงฺคปริวตฺเต ปฏิคฺคหณสฺส วิชหนโต สามํ คเหตฺวา ภุญฺชิตุํ น วฏฺฏติฯ กากอูหทนํ วาติ กาเกน อูหทนํ วาฯ ‘‘ตโย ปุริเสปิ อุปคนฺตฺวา’’ติ ปาฐเสโสฯ