สตฺตกวารวณฺณนา

[327] ฉกฺเก วุตฺตานิเยว สตฺตกวเสน โยเชตพฺพานีติ ฉกฺเก วุตฺตจุทฺทสปรมานิ สตฺตกวเสน โยเชตพฺพานิฯ สตฺตเม อรุณุคฺคมเน นิสฺสคฺคิยนฺติ ‘‘ฉารตฺตปรมํ เตน ภิกฺขุนา เตน จีวเรน วิปฺปวสิตพฺพํ, ตโต เจ อุตฺตริ วิปฺปวเสยฺยา’’ติ เอวํ วุตฺตํ นิสฺสคฺคิยํ โหติฯ จมฺเปยฺยกฺขนฺธเก สุคตจีวรภาณวารสฺส ปรโต ‘‘อิธ ปน, ภิกฺขเว, ภิกฺขุสฺส น โหติ อาปตฺติ ทฏฺฐพฺพา, ตเมนํ โจเทติ สงฺโฆ วา สมฺพหุลา วา เอกปุคฺคโล วา’’ติอาทินา นเยน วุตฺตสตฺตกาติฯ

อฏฺฐกวารวณฺณนา

[328] เตน สทฺธิํ อุโปสถาทิกรณํ อานิสํโส, อกรณํ อาทีนโว, ตสฺมา เอเต อฏฺฐานิสํเส สมฺปสฺสมาเนนาติ อตฺโถฯ ‘‘อยโส อกฺโกโส’’ติ วุตฺตํฯ ปุพฺเพวสฺส โหติ ‘‘มุสา ภณิสฺส’’นฺติ, ภณนฺตสฺส โหติ ‘‘มุสา ภณามี’’ติ, ภณิตสฺส โหติ ‘‘มุสา มยา ภณิต’’นฺติ, วินิธาย ทิฏฺฐิํ ขนฺติํ รุจิํ ภาวํ สญฺญนฺติ เอวํ อกปฺปิยกตํ โหติ อปฺปฏิคฺคหิตกตนฺติอาทโย อฏฺฐ อนติริตฺตาฯ สปฺปิอาทิ อฏฺฐเม อรุณุคฺคมเน นิสฺสคฺคิยํ โหติฯ อฏฺฐวาจิกา ภิกฺขุนีนํ อุปสมฺปทา อุภโตญตฺติจตุตฺถตฺตาฯ วสฺสิกสาฏิกทานาทีนิ อฏฺฐ วรานิฯ

นวกวารวณฺณนา

[329] นวหิ ภิกฺขูหิ ภิชฺชติฯ มนุสฺสมํสวชฺเชหิ นว มํเสหิ วินิจฺฉโยฯ สุนฺทรํ น สุนฺทรนฺติ สงฺฆาฏิอาทีนิ นว จีวรานิฯ ตาเนว อธิฏฺฐิตกาลโต ปฏฺฐาย น วิกปฺเปตพฺพานิ, อธิฏฺฐิตกาลโต ปฏฺฐาย อปจฺจุทฺธริตฺวา น วิกปฺเปตพฺพานีติ อธิปฺปาโยฯ นว วิทตฺถิโย สุคตจีวรสฺสฯ ‘‘วคฺคํ ภิกฺขุนิสงฺฆํ วคฺคสญฺญี โอวทตี’’ติอาทินา นเยน อธมฺมกมฺเม ทฺเว นวกานิ ปาจิตฺติยวเสน วุตฺตานิฯ

ทสกวารวณฺณนา

[330] ‘‘โอรมตฺตกญฺจ อธิกรณํ โหติ, น จ คติคต’’นฺติอาทินา (จูฬว. 204) ทส อธมฺมิกา สลากคฺคาหาฯ วิปรีตา ธมฺมิกาฯ สมถกฺขนฺธเก วุตฺเตหิ สมนฺนาคโต โหตีติ สมฺพนฺโธฯ ‘‘สํกจฺจิกํ วา ปกฺขิปิตฺวา ทสา’’ติ วุตฺตํ กปฺปิยตฺตา เอเตสํฯ มาตุรกฺขิตาทโย ทส อิตฺถิโยฯ ธนกฺกีตาทโย ทส ภริยาฯ ‘‘สิกฺขาสมฺมุติํ ทตฺวา ทสวสฺสาย ตสฺสา ทฺวาทสวสฺสกาเล สยมฺปิ ทฺวาทสวสฺสา ภวิสฺสตี’’ติ วุฏฺฐาปนสมฺมุติ สาทิตพฺพาฯ ‘‘วินยธรสฺเสว ‘อาปตฺตานาปตฺติํ น ชานาตี’ติ อารพฺภ ยาว ‘อุภยานิ โข ปนสฺส…เป.… อนุพฺยญฺชนโส’ติ ปญฺจงฺคานิ วตฺวา ปุนปิ ‘อาปตฺตานาปตฺติํ น ชานาติ’จฺเจว อารพฺภ ยาว ‘อธิกรเณ จ น วินิจฺฉยกุสโล โหตี’ติ ปญฺจ วุตฺตา, เต ตถา ตถา ปญฺจ ปญฺจ กตฺวา ทส โหนฺตี’’ติ ลิขิตํฯ ‘‘ทสวสฺสาย ภิกฺขุนิยา นิสฺสโย ทาตพฺโพ’’ติ เอกจฺเจสุ โปตฺถเกสุ นตฺถิ, กิญฺจาปิ นตฺถิ, ปาโฐ เอว ปน โหติฯ

เอกาทสกวารวณฺณนา

[331] น โวทายนฺติ น ปกาเสนฺติฯ โรคเมว โรคาตงฺกํฯ โรคนฺตรายํ วาฯ

เอกุตฺตริกนยวณฺณนา นิฏฺฐิตาฯ

อุโปสถาทิปุจฺฉาวิสฺสชฺชนาวณฺณนา

[332] ‘‘สงฺฆํ, ภนฺเต, ปวาเรมี’’ติอาทิ ปวารณกถา นาม วินีตคาถาสุ วิยฯ