อาคนฺตุกวตฺตกถาวณฺณนา

[357] เอกสฺมิํ คาเม อญฺญวิหารโต อาคโตปิ อาคนฺตุโกวฯ ตตฺถ เกจิ เอวํ วทนฺติ ‘‘อาวาสิโก กตฺถจิ คนฺตฺวา สเจ อาคโต, ‘เตนาปิ อาคนฺตุกภตฺตํ ภุญฺชิตพฺพ’นฺติ วุตฺตตฺตา ทูราคมนํ วุตฺตํ โหติ, น คาเม, ตสฺมา น ยุตฺต’’นฺติฯ เต วตฺตพฺพา ‘‘อาคนฺตุกภตฺตํ นาม คหฏฺเฐหิ ฐปิตํฯ ยสฺมิํ นิพทฺธํ, ตโต อญฺญคามโตติ อาปนฺนํฯ ตถา วิหาราธิการตฺตา อญฺญวิหารโต อาคโตปิ อาคนฺตุโก วา’’ติ อาจริยานํ สนฺนิฏฺฐานํฯ ปานียํ ปุจฺฉิตพฺพํ, ปริโภชนียํ ปุจฺฉิตพฺพนฺติ อุทฺธริตฺวา ฆฏสราวาทิคตํ สนฺธาย ปฐมํ, ทุติยํ กูปตฬากาทิคตนฺติ อาจริโยฯ ทุติยวาเร อตฺตโน วสนฏฺฐานตฺตา วิสุํ ปุจฺฉิตพฺพเมว, ตสฺมา วุตฺตํ เอตํ ‘‘ปริจฺฉินฺนภิกฺโข วา คาโม’’ติฯ พหูสุ โปตฺถเกสุ ทุวิธาปิ ยุชฺชติฯ

อนุโมทนวตฺตกถาวณฺณนา

[362-4] ปญฺจเม อนุโมทนตฺถาย นิสินฺเนฯ ‘‘มนุสฺสานํ ปริวิสนฏฺฐานนฺติ ยตฺถ มนุสฺสา สปุตฺตทารา อาวสิตฺวา เทนฺตี’’ติ ลิขิตํฯ อิมสฺมิํ ขนฺธเก อาคนฺตุกาวาสิกคมิกานุโมทนภตฺตคฺคปิณฺฑจาริการญฺญกเสนาสนชนฺตาฆรวจฺจกุฏิอุปชฺฌาจริยสทฺธิวิหาริกนฺเตวาสิกวตฺตานิ จุทฺทส มหาวตฺตานิ นามฯ อคฺคหิตคฺคหเณน คณิยมานานิ อสีติ ขนฺธกวตฺตานิ นาม โหนฺติฯ

วตฺตกฺขนฺธกวณฺณนา นิฏฺฐิตาฯ

9. ปาติโมกฺขฏฺฐปนกฺขนฺธกวณฺณนา

ปาติโมกฺขุทฺเทสยาจนกถาวณฺณนา

[383-4] ‘‘นนฺทิมุขี’’ติ ลิขิตํฯ อายตเกเนวาติ อาทิมฺหิ เอวฯ ยนฺติ ยสฺมาฯ สวนฺติโย มหานทิโยฯ ‘‘มหนฺตภูตาน’’นฺติ ปาโฐฯ ปตฺตาติ ปตฺวาฯ ‘‘สมูลิกาย ฐเปติ อกตายา’’ติ ฐปนกสฺส สญฺญามูลวเสน วุตฺตํฯ ตํ วตฺถุํ อวินิจฺฉินิตฺวาว ปริสา วุฏฺฐาติฯ

อตฺตาทานองฺคกถาวณฺณนา

[398-9] ‘‘อตฺตาทานนฺติ สยํ ปเรหิ โจทิโต อตฺตานํ โสเธตุํ อนาทิยิตฺวา ปเรสํ วิปฺปฏิปตฺติํ ทิสฺวา สาสนํ โสเธตุํ อตฺตนา อาทิตพฺพ’’นฺติ ลิขิตํฯ วสฺสารตฺโตติ วสฺสกาโลฯ สปฺปฏิมาโสติ อากฑฺฒนยุตฺโตติ อธิปฺปาโยฯ

[401] อุปทหาตพฺโพติ อุปฺปาเทตพฺโพ, วิปฺปฏิสารมุเขน ธาเรตพฺโพติ อธิปฺปาโยฯ

ปาติโมกฺขฏฺฐปนกฺขนฺธกวณฺณนา นิฏฺฐิตาฯ

10. ภิกฺขุนิกฺขนฺธกวณฺณนา