เมนู

เอเตเนว สุตฺเตน อญฺญถา อตฺถํ วตฺวา ‘‘ปาวาราทิปจฺจตฺถรณํ น ครุภณฺฑํ, ภาชนียเมว, เสนาสนตฺถาย ทินฺนปจฺจตฺถรณเมว ครุภณฺฑ’’นฺติ วทนฺติ, อุปปริกฺขิตพฺพํฯ คณฺฐิกาติ จีวรคณฺฐิกาฯ ภญฺจโก นาม สรโกฯ

นวกมฺมทานกถาวณฺณนา

[323-4] อคฺคฬพนฺธสูจิทฺวารกรณมตฺเตนปิฯ ‘‘กโปตภณฺฑิกา นาม วฬภิยา อุปริ ฐเปตพฺพวลยํ วา ติณจฺฉทนเคหสฺส ปิฏฺฐิวํสสฺส เหฏฺฐา ฐเปตพฺพํ วา อุภยมสฺส คตา ทารู’’ติ ลิขิตํฯ การนฺตราติ ตทา ปุน ปวิสฏฺฐํ ปุพฺพปโยชิตานานํ วจนปาตเสนาสนวาโสฯ น ปน ปติสฏฺฐโตติ ทฏฺฐพฺพํฯ สพฺพตฺถ วินฏฺฐวาโส น จ ปฏิเสธโก โหตีติ ทฏฺฐพฺโพฯ ทฺวารวาตปานาทีนิ อปหริตฺวา ทาตุํ อสกฺกุเณยฺยโต ‘‘ปฏิทาตพฺพานิเยวา’’ติ วุตฺตํฯ โคปานสิอาทโย เทนฺตสฺส วิหาโร ปลุชฺชตีติ ‘‘มูลํ วา ทาตพฺพ’’นฺติอาทิ วุตฺตนฺติ เอเกฯ ‘‘เนวาสิกา ปกติยา อนตฺถตาย ภูมิยา ฐเปนฺติ เจ, เตสมฺปิ อนาปตฺติเยวา’’ติ ลิขิตํฯ ‘‘ทฺวารวาตปานาทโย อปริกมฺมกตาปิ อปฏิจฺฉาเทตฺวา น อปสฺสยิตพฺพา’’ติ ลิขิตํฯ

สงฺฆภตฺตาทิอนุชานนกถาวณฺณนา

อุทฺเทสภตฺตกถาวณฺณนา

[325] ยา ภตฺตุทฺเทสฏฺฐานภูตาย โภชนสาลาย ปกติฐิติกาทินฺนํ ปนาติ ยถา โส ทายโก เทติ, ตํ ทสฺเสนฺโต ‘‘สงฺฆโต ภนฺเต’’ติอาทิมาหฯ เอกวฬญฺชนฺติ เอกทฺวาเรน วฬญฺชิตพฺพํ ติจีวรปริวารนฺติ เอตฺถ ‘‘อุทกมตฺตลาภี วิย อญฺโญปิ อุทฺเทสภตฺตํ อลภิตฺวา วตฺถาทิมเนกปฺปการํ ลภติ เจ, ตสฺเสว ต’’นฺติ ลิขิตํฯ ‘‘อุทฺเทสปตฺเต เทถา’ติ วตฺวา คเหตฺวา อาคตภาเวน สงฺฆสฺส ปริจฺจตฺตํ น โหติเยว ตสฺเสว หตฺเถ คตตฺตา, ตสฺมา เตหิ วุตฺตกฺกเมน สพฺเพหิ ภาเชตฺวา ภุญฺชิตพฺพ’’นฺติ วุตฺตํฯ ปฏิปาฏิปตฺตํ วา ฐิติกาย ฐิตปตฺตํ วาฯ ‘‘กูฏฏฺฐิติกา นาม อคฺคเหตพฺพานมฺปิ คาหิตตฺตา’’ติ ลิขิตํ, ‘‘ปณีตภตฺตฏฺฐิติกญฺจ อชานิตฺวา มิสฺเสตฺวา คาหิเตปิ เอวเมว ปฏิปชฺชิตพฺพ’’นฺติ จ ลิขิตํฯ ตญฺเจ เถยฺยาย หรนฺติ ปตฺตหารกา, อาณาปกสฺส คีวา โหติฯ อติกฺกนฺตมฺปิ ฐิติกํ ฐเปตฺวาติ เอตฺถ ‘‘ตํทิวสเมว เจ ภิกฺขา ลพฺภติ, อปรทิวสโต ปฏฺฐาย น ลพฺภติ กิรา’’ติ ลิขิตํฯ ปจฺฉา ‘‘สพฺโพ สงฺโฆ ปริภุญฺชตู’’ติ อวุตฺเตปิ ภาเชตฺวา ปริภุญฺชิตพฺพํฯ ‘‘เอตฺตเก ภิกฺขู สงฺฆโต อุทฺทิสิตฺวา เทถา’ติ อวตฺวา ‘เอตฺตกานํ ภิกฺขูนํ ภตฺตํ คณฺหถา’ติ ทินฺนํ สงฺฆิกนิมนฺตนํ นามา’’ติ ลิขิตํฯ

นิมนฺตนภตฺตกถาวณฺณนา

ปฏิปาฏิยาติ ยถาลทฺธปฏิปาฏิยาฯ วิจฺฉินฺทิตฺวาติ ภตฺตํ คณฺหถาติ ปทํ อวตฺวาฯ อาโลปสงฺเขเปนาติ อยํ นโย นิมนฺตนายเมว, อุทฺเทสภตฺเต ปน เอกสฺส ปโหนกปฺปมาเณ เอว ฐิติกา ติฏฺฐติฯ ‘‘เอกวารนฺติ ยาว ตสฺมิํ อาวาเส วสนฺติ ภิกฺขู, สพฺเพว ลภนฺตี’’ติ ลิขิตํฯ