[257-8] ปาตีติ ปฏิคฺคหสณฺฐานํฯ ปฏิคฺคหตฺถวิกนฺติ องฺคุลิโกสตฺถวิกํฯ สูจิสตฺถกานํ ปุพฺเพ อาเวสนตฺถวิกาย อนุญฺญาตตฺตา ‘‘อนุชานามิ, ภิกฺขเว, เภสชฺชตฺถวิก’’นฺติ วุตฺตํฯ เอตฺถ สูจิสตฺถกาทีนิปิ ฐเปตพฺพานีติ นิทานํ สูเจติฯ สเจปิ อุปนนฺโท ภิกฺขุ อลชฺชี, ตถาปิ สนฺตกเมตํ อมูลจฺเฉทกตภิกฺขุโน ลชฺชิโนปิ สมานสฺส กปฺปตีติ ยุชฺชติฯ น สมฺมตีติ น ปโหติฯ

[260-1] พหิ กุฏฺฏสฺส สมนฺตโต นีจวตฺถุกํ กตฺวา ฐิตํ ‘‘มณฺฑลิก’’นฺติ วุจฺจติฯ ชนฺตาฆรปฺปฏิจฺฉาทินา ฉนฺนสฺส นคฺคิยํ ยสฺส น ปญฺญายติ, ตสฺเสว ปริกมฺมํ กาตพฺพํฯ เอส นโย อุทกวตฺถปฏิจฺฉาทีสุปิฯ

[262-3] ปณิยา นาม ปณิยการกาฯ อากฑฺฒนยนฺตํ อากฑฺฒิยมานํ กูปสฺส อุปริภาเค ปริพฺภมติฯ อรหฏฆฏิยนฺตํ สกฏจกฺกสณฺฐานยนฺตํฯ ตสฺส อเร อเร ฆฏิกานิ พนฺธิตฺวา เอเกน, ทฺวีหิ วา ปริพฺภมิยมานสฺส อุทกนิพฺพาหนํ เวทิตพฺพํฯ อาวิทฺธปกฺขปาสํ นาม ยตฺถ มณฺฑลากาเรน ปกฺขปาสา พชฺฌนฺติ อาวิทฺธวตฺถตา วิย อาวิทฺธปกฺขปาสกาฯ ปุพฺเพ ปตฺตสงฺโคปนตฺถํ, อิทานิ ฐเปตพฺพํ ภุญฺชิตุํ อาธารโก อนุญฺญาโตฯ

[273] ปรคลํ คจฺฉตีติ อิมสฺส ปโยคาภาวา วฏฺฏติฯ กมฺมสเตนาติ มหตา อุสฺสาเหนฯ

[277-8] โลหภณฺฑํ นาม กํสโต เสสโลหภณฺฑํฯ มุทฺทิกกายพนฺธนํ นาม จตุรสฺสํ อกตฺวา สชฺชิตํฯ ปามงฺคทสา จตุรสฺสาฯ มุทิงฺคสณฺฐาเนนาติ สงฺฆาฏิยา มุทิงฺคสิพฺพนากาเรน วรกสีสากาเรนฯ ปวนนฺโตติ ปาสนฺโตฯ ‘‘ทสามูล’’นฺติ จ ลิขิตํฯ อกายพนฺธเนน สญฺจิจฺจ วา อสญฺจิจฺจ วา คามปฺปเวสเน อาปตฺติฯ ‘‘สริตฏฺฐานโต พนฺธิตฺวา ปวิสิตพฺพํ, นิวตฺติตพฺพํ วา’’ติ ลิขิตํฯ

[279] สตฺตงฺคุลํ วา อฏฺฐงฺคุลํ วาติ เอตฺถ ‘‘สุคตงฺคุเลนา’’ติ อวุตฺตตฺตา ปกติองฺคุเลน สารุปฺปตฺถาย วฑฺเฒตฺวาปิ กโรนฺติ เจ, น โทโสฯ

[280] ตาลวณฺฏากาเรน สีหฬิตฺถีนํ วิยฯ

ขุทฺทกวตฺถุกฺขนฺธกวณฺณนา นิฏฺฐิตาฯ

6. เสนาสนกฺขนฺธกวณฺณนา

วิหารานุชานนกถาวณฺณนา

[294] นิลียนฺติ ภิกฺขู เอตฺถาติ วิหาราทโย เลณานิ นามฯ อาคต-วจเนน ตสฺสาคตสงฺโฆว สามี, น อนาคโตติ เกจิ, ตํ น ยุชฺชติ สมานลาภกติกาย สิทฺธตฺตาฯ

[296-7] ทีปินงฺคุฏฺเฐนาติ เอตฺถ ‘‘ทีปินา อกปฺปิยจมฺมํ ทสฺเสตี’’ติ ลิขิตํฯ ถมฺภกวาตปานํ นาม ติริยํ ทารูนิ อทตฺวา อุชุกํ ฐิเตเหว ทารูหิ กตฺตพฺพํฯ ภิสีนํ อนุญฺญาตํ วฏฺฏตีติ พิมฺโพหเน วฏฺฏตีติ อตฺโถฯ ตูลปูริตํ ภิสิํ อปสฺสยิตุํ น วฏฺฏติ อุณฺณาทีนํเยว อนุญฺญาตตฺตาฯ นิสีทนนิปชฺชนํ สนฺธาย วุตฺตํ, ตสฺมา อปสฺสยิตุํ วฏฺฏตีติ เจ? อกปฺปิยนฺติ น วฏฺฏตีติ เกจิฯ ยทิ เอวํ อกปฺปิยมญฺจญฺจ อปสฺสยิตุํ น วฏฺเฏยฺยฯ ยสฺมา วฏฺฏติ, ตสฺมา โทโส นตฺถิฯ อปิจ คิลานสฺส พิมฺโพหนํ นิปชฺชิตุมฺปิ อนุญฺญาตํ, ตสฺมา ภิสิปิ วฏฺฏติ อปสฺสยิตุํฯ อาจริยา จ อนุชานนฺติ, วฬญฺเชนฺติ จาติ เอเกฯ สิมฺพลิตูลสุตฺเตน สิพฺพิตํ จีวรํ วฏฺฏติฯ กสฺมา? กปฺปาสสฺส อนุโลมโตฯ ‘‘อกฺกผลสุตฺตมยมฺปิ อกฺกวากมยเมว ปฏิกฺขิตฺต’’นฺติ เต เอว วทนฺติฯ

[298] อนิพนฺธนีโย อลคฺโคฯ ปฏิพาเหตฺวาติ มฏฺฐํ กตฺวาฯ ‘‘เสตวณฺณาทีนํ ยถาสงฺขฺยํ อิกฺกาสาทโย พนฺธนตฺถํ วุตฺตา’’ติ ลิขิตํฯ

[300] ปกุฏฺฏํ สมนฺตโต อาวิทฺธปมุขํฯ

[303] สุธาเลโปติ สุธามตฺติกาเลโปฯ

[305] อาสตฺติ ตณฺหาฯ สนฺติํ อทรํฯ

[307] เกตุนฺติ กเยน คเหตุํฯ

[308] จิตาติ อิฏฺฐกาโย กพเฬน นิทฺธมนวเสน ฉินฺทิตฺวา กตาติ อตฺโถฯ