เมนู

อญฺญติตฺถิยปุพฺพวตฺถุกถาวณฺณนา

[86] โย โส อญฺญติตฺถิยปุพฺโพติ เอตฺถ ทฺเว อตฺถวิกปฺปา – ตสฺส ปสูรสฺส ภิกฺขุภาวํ สนฺธาย อญฺญติตฺถิยปุพฺโพ, โส ภิกฺขุ ตํเยว ติตฺถายตนํ สงฺกมีติ อยเมโก อตฺโถฯ เอวํ ติตฺถิยปกฺกนฺตโก ปุน คิหิเวเสน อาคโต อญฺญติตฺถิยปุพฺโพ, โส อาคโต น อุปสมฺปาเทตพฺโพติ อยเมโก อตฺโถฯ ตํ อญฺญติตฺถิยปกฺกนฺตกํ ฐเปตฺวา ‘‘โย โส, ภิกฺขเว, อญฺญติตฺถิยปุพฺโพ’’ติ เอตฺถ น คิหิเวสธารโณว ปุพฺพสทฺเทน วุตฺโต, กินฺตุ ตสฺมิํ อตฺตโน ยถาสมาทินฺนติตฺถิยเวเส ฐิโตปิฯ ทิฏฺฐิวเสน อติตฺถิยภูตตฺตา อติตฺถิยปุพฺโพ, โส ปนาคโต วิพฺภนฺโต อาคจฺฉติ, ตสฺส ปริวาสทานกิจฺจํ นตฺถิฯ กิํ อิมสฺส อญฺญติตฺถิยปุพฺพสฺส ภิกฺขุเวสํ คเหตฺวา สรณคมเนน สามเณรปพฺพชฺชา ชาตา, น ชาตาติ? กิญฺเจตฺถ ยทิ ชาตา, ‘‘โย โส, ภิกฺขเว, อญฺโญปิ อญฺญติตฺถิยปุพฺโพ อิมสฺมิํ ธมฺมวินเย อากงฺขติ ปพฺพชฺชํ, อากงฺขติ อุปสมฺปทํ, ตสฺส จตฺตาโร มาเส ปริวาโส ทาตพฺโพ’’ติ (มหาว. 86) วจนํ วิรุชฺฌติฯ อถ น ชาตา, ปริวาสกมฺมวาจาย ปพฺพชฺชาย อปรามสนํ วิรุชฺฌตีติฯ ตตฺถ มหาวิหารวาสิโน ‘‘สามเณรสฺเสว สโต ปริวาโส ทาตพฺโพ’’ติ วทนฺติฯ อิตเร ตถา น วทนฺติฯ เต หิ ‘‘เอวํ อาราธโก โข ภิกฺขเว อญฺญติตฺถิยปุพฺโพ อาคโต อุปสมฺปาเทตพฺโพ’ติ (มหาว. 87) สุตฺตปทํ ปริหริตพฺพํ, ปุเร จ ปจฺฉา จ ‘อญฺญติตฺถิยปุพฺโพ’ติ วจนสามญฺญโต น สามเณโร ชาโตติ เจ, ยทิ เอวํ อปพฺพาเชตฺวาว อุปสมฺปาเทตพฺโพติ อาปชฺชติฯ ตโต จ สพฺพปฐมํ วุตฺตสุตฺตํ วิรุชฺฌติฯ ‘ติตฺถายตนํ สงฺกนฺโต’ติ ปาโฐปิ น สุนฺทรํฯ ปาณาติปาตาทีสุ อญฺญตรํ สเจ ภินฺทติ, จตฺตาโร มาเส ปริปุณฺเณปิ ปุน ปริปูเรตพฺพํ วิย ทิสฺสติฯ วุตฺตมฺปิ ตสฺส สํวรํ ภิกฺขุกรณตฺถาย อนุญฺญาตตฺตา สีเล วตฺตพฺพํ นตฺถี’’ติ วทนฺติ, วิจาเรตฺวา คเหตพฺพํฯ สรณานิ สเจ ภิชฺชนฺติ สามเณรสฺเสวฯ

อญฺญติตฺถิยปุพฺพวตฺถุกถาวณฺณนา นิฏฺฐิตาฯ

ปญฺจาพาธวตฺถุกถาวณฺณนา

[88] นขปิฏฺฐีติ จูฬงฺคุลินขปิฏฺฐิ อธิปฺเปตาฯ ‘‘ปฏิจฺฉนฺเน นขปิฏฺฐิโต มหนฺตมฺปิ วฏฺฏติ, เอวํ เสเสสุปี’’ติ เกจิ วทนฺติ, ตํ อฏฺฐกถาย น สเมติ วิยฯ ปทุมกณฺณิกาปิ อารุฬฺเห รตฺตปทุมวณฺณจิตฺรํฯ

ปญฺจาพาธวตฺถุกถาวณฺณนา นิฏฺฐิตาฯ

โจรวตฺถุกถาวณฺณนา

[91-2] ธมฺมสามีติ ยสฺมา สยํ ธมฺมสามี, ตสฺมา ภิกฺขูหิ อปพฺพาเชตพฺพกมฺปิ โจรํ องฺคุลิมาลํ ปพฺพาเชตฺวา อายติํ เอวมาหาติ อตฺโถฯ ปาฬิโปตฺถเกสุ ‘‘ขรเภทโก’’ติปิ ลิขิตํฯ สนฺนิสินฺนาสูติ วูปสนฺตาสุฯ

โจรวตฺถุกถาวณฺณนา นิฏฺฐิตาฯ