[970] อิธ จ วสฺสจฺเฉเทน ทุกฺกฏํฯ ปฐมํ อาวสิตฺวา ปจฺฉา จาริกา จรณปจฺจยา ปาจิตฺติยํ อาปชฺชตีติ เวทิตพฺพํฯ อถ วสฺสํ อวสิตฺวา จรติ, อวสฺสุปคมนปจฺจยา ทุกฺกฏํ อาปชฺชติฯ โปราณคณฺฐิปเท ปน ‘‘อนฺโตสตฺตาเห อนฺโตวสฺเส จาริกํ จรนฺติยา ปาจิตฺติยํฯ สตฺตาหกรณีเยน ปน วฏฺฏติ, ภิกฺขุโน ทุกฺกฏํ โหตี’’ติ วุตฺตํฯ

[972] เกนจิ อุพฺพาฬฺหาติ วสฺสจฺเฉทการเณนาติ โน ตกฺโกติ อาจริโยฯ กิตฺตาวตา จาริกา โหตีติ? อิทํ น สพฺพตฺถ วิจาริตํฯ อนนฺตรสิกฺขาปเท ‘‘อนฺตมโส ฉปฺปญฺจโยชนานิปี’’ติ วุตฺตตฺตา โส จ มญฺเญ เหฏฺฐิมปริจฺเฉโทติฯ

นวมสิกฺขาปทวณฺณนา นิฏฺฐิตาฯ

10. ทสมสิกฺขาปทวณฺณนา

[973] ทสเม ‘‘อาหุนฺทริกา’’ติ ปฐนฺติ กิรฯ

ทสมสิกฺขาปทวณฺณนา นิฏฺฐิตาฯ

ตุวฏฺฏวคฺควณฺณนา นิฏฺฐิตาฯ

5. จิตฺตาคารวคฺควณฺณนา

1. ปฐมสิกฺขาปทวณฺณนา

[978] กีฬนอุปวนํ นาม กญฺจินครสฺส นครุปวนํ วิย ทฏฺฐพฺพํฯ อุยฺยานํ นาม ตตฺเถว นนฺทวนอุยฺยานํ วิย ทฏฺฐพฺพํฯ ‘‘ตตฺเถว ฐตฺวา ตํ ตํ ทิสาภาคํ วิโลเกตฺวา ปสฺสนฺติยา ปน ปาเฏกฺกา อาปตฺติโย’’ติ ปาโฐฯ เอวํ วุตฺเต ยํ ปุพฺเพ วุตฺตํ ปทํ ‘‘อนุทฺธรมานา’’ติ, ตํ เอกสฺมิํเยว ทิสาภาเคติ สิทฺธนฺติ เอเกฯ อุปจาโร ทฺเว เลฑฺฑุปาโตติ จฯ

ปฐมสิกฺขาปทวณฺณนา นิฏฺฐิตาฯ

2. ทุติยสิกฺขาปทวณฺณนา

[984] ‘‘อาหริเมหิ วาเฬหี’’ติ ‘‘อสํหาริเมนา’’ติ จ ทุวิโธ ปาโฐฯ ‘‘วิสุํ กตฺวา ปจฺฉา สทฺธิํ เตหิ วาเฬหี’’ติ ลิขิตํฯ ยถา ตถา วาฬรูเป อุฏฺฐเปตฺวา กตปาทํ ‘‘ปลฺลงฺก’’นฺติ วุจฺจติ อนาปตฺติวาเร ‘‘อสํหาริเมหิ วาเฬหิ กตํ ปริภุญฺชตี’’ติ วจนาภาวโตฯ

ทุติยสิกฺขาปทวณฺณนา นิฏฺฐิตาฯ

3. ตติยสิกฺขาปทวณฺณนา

[988] ‘‘อุชฺชวุชฺชเวติ หตฺถปฺปสารเณ’’ติ ลิขิตํ, ตํ น ยุตฺตํ ‘‘ยตฺตกํ หตฺเถน อญฺฉิตํ โหติ, ตสฺมิํ ตกฺกมฺหิ เวฐิเต เอกาปตฺตี’’ติ วจนโตฯ

ตติยสิกฺขาปทวณฺณนา นิฏฺฐิตาฯ

4. จตุตฺถสิกฺขาปทวณฺณนา

[993] ‘‘ยาคุปาเนติ ยาคุทาเน’’ติ ลิขิตํฯ โปราณคณฺฐิปเท ‘‘มาตาปิตูนํ ทาตุํ วฏฺฏตี’’ติ วุตฺตํฯ

จตุตฺถสิกฺขาปทวณฺณนา นิฏฺฐิตาฯ

[994] ปญฺจมสิกฺขาปทํ อุตฺตานตฺถเมวฯ

6. ฉฏฺฐสิกฺขาปทวณฺณนา

[1001] ฉฏฺเฐ ภิกฺขุวิภงฺเค อเจลกสิกฺขาปเทน เอกปริจฺเฉทํฯ อิธ อคาริโก วิเสโส, ตสฺมา ‘‘อสาธารณ’’นฺติ วทนฺติฯ

ฉฏฺฐสิกฺขาปทวณฺณนา นิฏฺฐิตาฯ

[1003-8] สตฺตมฏฺฐเมสุ วตฺตพฺพํ นตฺถิฯ