3. ตติยสิกฺขาปทวณฺณนา

[941] อตฺตโน สชฺฌายนฏฺฐาเน เจ วุฑฺฒตรา อาคจฺฉติ, วนฺทนกาเล วา, อาปุจฺฉนกิจฺจํ นตฺถิฯ เอกสฺมิํ โอวรเก อาปุจฺฉิตพฺพํฯ ‘‘อถ โอวรเก มหาเถรี วสติ, สมฺมุเข อิตรา, อาปุจฺฉิตพฺพา ตสฺสา อุปจารตฺตา’’ติ โปราณคณฺฐิปเท วุตฺตํฯ

ตติยสิกฺขาปทวณฺณนา นิฏฺฐิตาฯ

[946-950] จตุตฺถปญฺจมสิกฺขาปทํ อุตฺตานตฺถเมวฯ

6. ฉฏฺฐสิกฺขาปทวณฺณนา

[956] คหปติ นาม ฐเปตฺวา สหธมฺมิเก เวทิตพฺโพ, ตสฺมา ภิกฺขุนา วา สามเณเรน วา อนนุโลมิเกน สํสคฺเคน สํสฏฺฐาปิ น สมนุภาสิตพฺพาติ สมฺภวติ เอวฯ

ฉฏฺฐสิกฺขาปทวณฺณนา นิฏฺฐิตาฯ

[961-5] สตฺตมอฏฺฐม สิกฺขาปทํ อุตฺตานตฺถเมวฯ

9. นวมสิกฺขาปทวณฺณนา

[969] เอกินฺทฺริยนฺติ กายินฺทฺริเยเนว เอกินฺทฺริยํ, นิคณฺฐานํ อเจลกานํ มตํฯ กาปิลา ปน ‘‘ปญฺจินฺทฺริยา’’ติ มญฺญนฺตา เอวํ วทนฺติ ‘‘สจกฺขุกตฺตา อลาพุมาลุวาทโย ยตฺถ อาลมฺพนํ, ตตฺถ คจฺฉนฺติฯ สโสตกตฺตา กทลิโย เมฆคชฺชิตํ สุตฺวา คพฺภํ คณฺหนฺติฯ สฆานกตฺตา ปนสาทโย กุณปคนฺเธน ผลนฺติฯ สชิวฺหกตฺตา อุทกํ ปิวนฺติ เยน, สพฺเพปิ ‘ปาทปา’ติ วุจฺจนฺติฯ สกายปสาทตฺตา อิตฺถิสมฺผสฺเสน อโสกรุกฺขา ปุปฺผนฺตี’’ติฯ สงฺฆาตนฺติ วินาสํฯ