เมนู

10. ทสมสิกฺขาปทวณฺณนา

[927] ทสเม เอกกุลํ เอตทโวจุนฺติ เอตฺถ กุลํ นาม ตสฺมิํ มนุสฺสา, ตสฺมา พหุวจนํฯ

ทสมสิกฺขาปทวณฺณนา นิฏฺฐิตาฯ

นคฺควคฺควณฺณนา นิฏฺฐิตาฯ

4. ตุวฏฺฏวคฺควณฺณนา

1. ปฐมสิกฺขาปทวณฺณนา

[934-5] เอกาย นิปนฺนาย อปรา นิปชฺชติ, อาปตฺติ ปาจิตฺติยสฺสาติ ‘‘อุภินฺนมฺปิ ปฐมนิปนฺนาย อนุฏฺฐาปนา’’ติ วตฺวา เอตฺถ กิริยากิริยนฺติ เอเก, ตํ อฏฺฐกถาย วิรุชฺฌติฯ ‘‘กิริย’’นฺติ หิ อฏฺฐกถายํ วุตฺตํฯ อถ กสฺสา อาปตฺตีติ? อุภินฺนมฺปิ นิปชฺชนกิริยํ ปฏิจฺจฯ อิมสฺส อนาปตฺติวาเร ‘‘ววตฺถานํ ทสฺเสตฺวา’’ติ นตฺถิ, ตสฺมา ววตฺถานํ กตฺวา นิปชฺชิตุํ น วฏฺฏตีติ เอเกฯ วิปุลตเร วฏฺฏตีติ เอเกฯ ‘‘อนฺตรํ กตฺวา นิปชฺชิตุํ วฏฺฏตี’’ติ โปราณคณฺฐิปเท ลิขิตํฯ

ปฐมสิกฺขาปทวณฺณนา นิฏฺฐิตาฯ

2. ทุติยสิกฺขาปทวณฺณนา

[940] ววตฺถานํ ทสฺเสตฺวาติ เอตฺถ อุปริ ปารุปนมฺปิ มชฺเฌ โอโภคํ กตฺวา อุภินฺนํ อนฺตเร โอตาเรติ, วฏฺฏตีติ เอเกฯ ววตฺถานญฺจ ยถา ฐาเน น ติฏฺฐติ, ตถา อติกฺกมิตฺวา ตุวฏฺเฏนฺติยา อาปตฺติเยวาติฯ ‘‘กิริยากิริย’’นฺติ จ โปราณคณฺฐิปเท วุตฺตํฯ

ทุติยสิกฺขาปทวณฺณนา นิฏฺฐิตาฯ

3. ตติยสิกฺขาปทวณฺณนา

[941] อตฺตโน สชฺฌายนฏฺฐาเน เจ วุฑฺฒตรา อาคจฺฉติ, วนฺทนกาเล วา, อาปุจฺฉนกิจฺจํ นตฺถิฯ เอกสฺมิํ โอวรเก อาปุจฺฉิตพฺพํฯ ‘‘อถ โอวรเก มหาเถรี วสติ, สมฺมุเข อิตรา, อาปุจฺฉิตพฺพา ตสฺสา อุปจารตฺตา’’ติ โปราณคณฺฐิปเท วุตฺตํฯ

ตติยสิกฺขาปทวณฺณนา นิฏฺฐิตาฯ

[946-950] จตุตฺถปญฺจมสิกฺขาปทํ อุตฺตานตฺถเมวฯ

6. ฉฏฺฐสิกฺขาปทวณฺณนา

[956] คหปติ นาม ฐเปตฺวา สหธมฺมิเก เวทิตพฺโพ, ตสฺมา ภิกฺขุนา วา สามเณเรน วา อนนุโลมิเกน สํสคฺเคน สํสฏฺฐาปิ น สมนุภาสิตพฺพาติ สมฺภวติ เอวฯ

ฉฏฺฐสิกฺขาปทวณฺณนา นิฏฺฐิตาฯ

[961-5] สตฺตมอฏฺฐม สิกฺขาปทํ อุตฺตานตฺถเมวฯ

9. นวมสิกฺขาปทวณฺณนา

[969] เอกินฺทฺริยนฺติ กายินฺทฺริเยเนว เอกินฺทฺริยํ, นิคณฺฐานํ อเจลกานํ มตํฯ กาปิลา ปน ‘‘ปญฺจินฺทฺริยา’’ติ มญฺญนฺตา เอวํ วทนฺติ ‘‘สจกฺขุกตฺตา อลาพุมาลุวาทโย ยตฺถ อาลมฺพนํ, ตตฺถ คจฺฉนฺติฯ สโสตกตฺตา กทลิโย เมฆคชฺชิตํ สุตฺวา คพฺภํ คณฺหนฺติฯ สฆานกตฺตา ปนสาทโย กุณปคนฺเธน ผลนฺติฯ สชิวฺหกตฺตา อุทกํ ปิวนฺติ เยน, สพฺเพปิ ‘ปาทปา’ติ วุจฺจนฺติฯ สกายปสาทตฺตา อิตฺถิสมฺผสฺเสน อโสกรุกฺขา ปุปฺผนฺตี’’ติฯ สงฺฆาตนฺติ วินาสํฯ