เมนู

7. สตฺตมสงฺฆาทิเสสสิกฺขาปทวณฺณนา

[712-4] กมฺมวาจโต ปุพฺเพ อาปนฺนาปตฺติโย น ปฏิปฺปสฺสมฺภนฺติฯ ญตฺติยา ทุกฺกฏถุลฺลจฺจยา ปฏิปฺปสฺสมฺภนฺติ สงฺฆาทิเสเส ปตฺเตติ โปราณาฯ ตํ ‘‘อชฺฌาปชฺชนฺติยา’’ติ ปาฬิยา สเมติฯ ‘‘สุตฺวา น วทนฺตี’’ติ เอตฺถ สเจ ชีวิตพฺรหฺมจริยนฺตรายภยา น วทนฺติ, อนาปตฺติ ฯ ‘‘อธมฺมกมฺเม อธมฺมกมฺมสญฺญา อาปตฺติ ทุกฺกฏสฺสา’’ติ วุตฺตตฺตา ‘‘อนาปตฺติ อสมนุภาสนฺติยา’’ติ สงฺฆาทิเสสํ สนฺธาย วุตฺตํฯ

สตฺตมสงฺฆาทิเสสสิกฺขาปทวณฺณนา นิฏฺฐิตาฯ

8. อฏฺฐมสงฺฆาทิเสสสิกฺขาปทวณฺณนา

[715] ปจฺจากตาติ ปราชิตาฯ กุลทูสกสิกฺขาปทสฺส, อิมสฺส จ นิทานมตฺตเมว นานากรณํฯ วุตฺตญฺหิ ตตฺถ ‘‘ตสฺส วจนสฺส ปฏินิสฺสคฺคาย เอว วจนีโย, น กุลทูสนนิวารณตฺถายา’’ติฯ เอวํ สนฺเต อุโภเปตา อาปตฺติโย อญฺญมญฺญํ สภาคตฺถา, ตสฺมา อิทํ ตสฺส อนุปญฺญตฺติสทิสํ อาปชฺชติ, ตโต อิทํ นิรตฺถกเมว อาปชฺชตีติ? น เอวํ ทฏฺฐพฺพํฯ วตฺถุวิเสสโต, กมฺมวาจาวิเสสโต จ อุภินฺนํ นานากรณํฯ

อฏฺฐมสงฺฆาทิเสสสิกฺขาปทวณฺณนา นิฏฺฐิตาฯ

9. นวมสงฺฆาทิเสสสิกฺขาปทวณฺณนา

[723] ‘‘กายิกวาจสิเกน สํสคฺเคนา’’ติ ปาฐเสโสฯ

นวมสงฺฆาทิเสสสิกฺขาปทวณฺณนา นิฏฺฐิตาฯ

สงฺฆาทิเสสกณฺฑวณฺณนา นิฏฺฐิตาฯ

3. นิสฺสคฺคิยกณฺฑวณฺณนา

1. ปฐมนิสฺสคฺคิยปาจิตฺติยสิกฺขาปทวณฺณนา

[733] ปฐมนิสฺสคฺคิยปาจิตฺติยสิกฺขาปทํ อุตฺตานเมวฯ

2. ทุติยนิสฺสคฺคิยปาจิตฺติยสิกฺขาปทวณฺณนา

[740] วตฺถุสมฺปตฺตตฺตา วา น ตสฺสา อนาปนฺนกามตาย วา อนาณตฺติกตาย วา อกาลจีวรมทํสุฯ ยถาทาเน เอว อุปเนตพฺพํ, น ภาเชตพฺพํ ปุคฺคลิกตฺตาติ อธิปฺปาโยฯ อตฺถโต หิ อิตรมฺปิ ยถาทาเน เอว อุปเนตพฺพเมวฯ คณฺฐิปเท ปน ‘‘อยฺยาย ทมฺมีติ เอวํ ปฏิลทฺธนฺติ นิสฺสฏฺฐปฏิลทฺธํฯ ยถาทาเนติ ทายเกหิ ปริจฺจตฺตวิธาเนนฯ อุปเนตพฺพนฺติ อกาลจีวรภาเวน ภาเชตพฺพนฺติ อธิปฺปาโยฯ อิธ ภาชาปิตาย ลทฺธจีวรเมว นิสฺสคฺคิยํ โหติ, ตํ วินยกมฺมํ กตฺวาปิ อตฺตนา น ลภตี’’ติ ลิขิตํฯ ยทิ นิสฺสฏฺฐปฏิลทฺธํ สนฺธาย อิทํ วุตฺตํ สิยา, ‘‘นิสฺสชฺชิตพฺพํ สงฺฆสฺส วา คณสฺส วา ปุคฺคลสฺส วา ทเทยฺย, ทเทยฺยุํ, อยฺยาย ทมฺมี’’ติ วุตฺตตฺตา ตีณิเปตานิ ปทานิ วตฺตพฺพานิ สิยุํ, ตสฺมา น เกวลํ นิสฺสฏฺฐปฏิลทฺธเมว ยถาทาเน อุปเนตพฺพํ, อญฺญาหิ ภิกฺขุนีหิ ลทฺธโกฏฺฐาสมฺปิ ยถาทาเนเยว อุปเนตพฺพํฯ

[741] ‘‘อกาลจีวเร กาลจีวรสญฺญาย อนาปตฺตี’’ติ ปน ภาชนปจฺจยา อาปชฺชิตพฺพาปตฺติํ นาปชฺชตีติ เอตฺตกเมว ทีเปติ, น ปฏิลทฺธํ, น ยถาทาเน ทาตพฺพนฺติ อิมมตฺถํ ทีเปติฯ เลเสน ปน คณฺหาติ เจ, ภณฺฑคฺเฆน กาเรตพฺพาฯ

ทุติยนิสฺสคฺคิยปาจิตฺติยสิกฺขาปทวณฺณนา นิฏฺฐิตาฯ

3. ตติยนิสฺสคฺคิยปาจิตฺติยสิกฺขาปทวณฺณนา

[744] สกสญฺญาย คหิตตฺตา ปาจิตฺติยํ, ทุกฺกฏญฺจ วุตฺตํฯ อิตรถา ภณฺฑคฺเฆน กาเรตพฺพํฯ

ตติยนิสฺสคฺคิยปาจิตฺติยสิกฺขาปทวณฺณนา นิฏฺฐิตาฯ