เมนู

1. ปฐมปาฏิเทสนียสิกฺขาปทวณฺณนา

[553-5] ‘‘ปฏิเทเสตพฺพาการทสฺสน’’นฺติ อฏฺฐกถายํ วุตฺตตฺตา ปาฬิยํ อาคตวเสเนว อาปตฺติ เทเสตพฺพา, น อญฺญถาฯ ‘‘อนฺตรฆเร อนฺตรฆรสญฺญี’’ติอาทินา จ ‘‘ขาทนียโภชนีเย อขาทนียอโภชนียสญฺญี’’ติอาทินา จ ‘‘ภิกฺขุนิยา อภิกฺขุนิสญฺญี’’ติอาทินา จ นเยน อปเรปิ ตโย ติกจฺเฉทา โยเชตฺวา ทสฺเสตพฺพาฯ

ปฐมปาฏิเทสนียสิกฺขาปทวณฺณนา นิฏฺฐิตาฯ

2. ทุติยปาฏิเทสนียสิกฺขาปทวณฺณนา

[559] ‘‘นิมนฺติตา ภุญฺชนฺตีติ ปญฺจนฺนํ โภชนานํ อญฺญตเรน โภชเนน นิมนฺติตา ภุญฺชนฺตี’’ติ กิญฺจาปิ วุตฺตํ, อถ โข อกปฺปิยนิมนฺตเนน นิมนฺติตตา เอตฺถ น องฺคํ, มาติกาฏฺฐกถายํ วา อิธ วา อนาปตฺติวาเร เลสาภาวโต, ตสฺมา ‘‘นิมนฺติตา’’ติ ปทสฺส อตฺโถ ปุพฺเพ อาจิณฺณวเสเนว วุตฺโตฯ อปเรปิ ตโย ติกจฺเฉทา โยเชตฺวา ทสฺเสตพฺพา ปทภาชเน วุตฺตตฺตาติ เวทิตพฺพํฯ ยถา ตถา หิ ภุญฺชนฺตานํ ตาทิสํ ภิกฺขุนิํ อวาเรนฺตานํ ปาฏิเทสนียเมวฯ ‘‘เอสา โวสาสติ นาม, โวสาสนฺตี’’ติ จ ทุวิโธ ปาโฐฯ ‘‘อชฺโฌหาเร อชฺโฌหาเร’’ติ วจเนน ปุน ‘‘คารยฺหํ อาวุโส ธมฺม’’นฺติ เอกวจนํ วิรุทฺธนฺติฯ ปฐมํ อชฺโฌหาเรเยว อาปนฺนํ สนฺธาย วุตฺตํ, ตถา อญฺญตฺราปิ อาคจฺฉติ ‘‘อาปชฺชิมฺหา’’ติ วจนโตฯ เอเกน พหูนมฺปิ วฏฺฏตีติ เกจิ, ตํ น สุนฺทรํฯ ‘‘เตหิ ภิกฺขูหี’’ติอาทินา ปาเฐ วุตฺตตฺตาติ มม ตกฺโกฯ เอเกน สเหว ‘‘อหํ อาปชฺชิ’’นฺติปิ วตฺตพฺพนฺติ เอเกน ทฺวีหิ ตีหิ เทเสตพฺพโต, สพฺเพหิ เอวํ วตฺตุํ วฏฺฏติฯ ‘‘อาปชฺชิมฺหาติ สเหวา’’ติ วทนฺติฯ เอเกน เจ อวาริโต, ‘‘อหํ, อาวุโส, คารยฺหํ ธมฺมํ อาปชฺชิ’’นฺติปิ วตฺตพฺพํฯ

ทุติยปาฏิเทสนียสิกฺขาปทวณฺณนา นิฏฺฐิตาฯ

[562-570] ตติยจตุตฺถสิกฺขาปทานิ อุตฺตานตฺถานิเยวฯ

ปาฏิเทสนียกณฺฑวณฺณนา นิฏฺฐิตาฯ

7. เสขิยกณฺโฑ