เมนู

7. นิสีทนสิกฺขาปทวณฺณนา

[531] กิญฺจาปิ นิสีทนสฺส ชาติ น ทิสฺสติ เอตฺถ, ตถาปิ จีวรกฺขนฺธเก อนุญฺญาตตฺตา, ‘‘นว จีวรานิ อธิฏฺฐาตพฺพานี’’ติ เอตฺถ จ ปริยาปนฺนตฺตา จีวรชาติเยวสฺส ชาตีติ เวทิตพฺพาฯ ‘‘สนฺถตสทิสํ สนฺถริตฺวาติ สทส’’นฺติ ปุพฺเพ วุตฺตนิสีทนสนฺถตตฺตา อุปเมติฯ ลาเภ สทสํ, อลาเภ อทสมฺปิ วฏฺฏตีติ เอเก, ตํ น ยุตฺตํฯ ‘‘นิสีทนํ นาม สทสํ วุจฺจตี’’ติ ตสฺส สณฺฐานนิยมนโตฯ

นิสีทนสิกฺขาปทวณฺณนา นิฏฺฐิตาฯ

8. กณฺฑุปฏิจฺฉาทิสิกฺขาปทวณฺณนา

[539] ยทิ กณฺฑุปฏิจฺฉาทิ นาม อโธนาภิ อุพฺภชาณุมณฺฑลา อุปฺปนฺนกณฺฑุปีฬกาทิปฏิจฺฉาทิกา อธิปฺเปตา, ตสฺส สุคตสฺส สุคตวิทตฺถิยา ทีฆโส จตสฺโส วิทตฺถิโย ติริยํ ทฺเวติ อิทมฺปิ อติมหนฺตํ ปมาณํ ทิสฺสติฯ สพฺโพ หิ ปุริโส อตฺตโน อตฺตโน วิทตฺถิยา สตฺตวิทตฺถิโก โหติ, สุคตสฺส จ เอกาวิทตฺถิ มชฺฌิมสฺส ปุริสสฺส ติสฺโส วิทตฺถิโย โหนฺติ, ตสฺมา กณฺฑุปฏิจฺฉาทิ ปกติปุริสสฺส ปมาณํ อาปชฺชติ ติริยํ, ทีฆโส ปน ทิคุณํ อาปชฺชตีติฯ อาปชฺชตุ, อุกฺกฏฺฐปริจฺเฉโท ตสฺสา, เจ อิจฺฉติ, สพฺพมฺปิ สรีรํ ปฏิจฺฉาเทสฺสติ, สพฺพสรีรคตสงฺฆาฏิ วิย พหุคุณํ กตฺวา นิวาเสตุกาโม นิวาเสสฺสตีติ อยํ ภควโต อธิปฺปาโย สิยาฯ

กณฺฑุปฏิจฺฉาทิสิกฺขาปทวณฺณนา นิฏฺฐิตาฯ

9. วสฺสิกสาฏิกสิกฺขาปทวณฺณนา

[542] วสฺสิกสาฏิกาปิ อุกฺกฏฺฐปฏิจฺเฉทวเสน อนุญฺญาตาฯ วสฺสกาเล เกจิ สงฺฆาฏิปริโภเคเนว ปริภุญฺชิสฺสนฺตีติ อยํ ภควโต อธิปฺปาโย สิยาฯ กิญฺจาปิ อิมินา ตกฺเกน อนุญฺญาตา, ‘‘อปฺปมาณิกาโย กณฺฑุปฏิจฺฉาทิโย ธาเรนฺติ, วสฺสิกสาฏิกาโย ธาเรนฺตี’’ติ อิมสฺมิํ วตฺถุสฺมิํ ปญฺญตฺตตฺตา ปน อญฺญถา ปุณฺณปริจฺเฉทโต อธิกปฺปมาณาโย เต ภิกฺขู ธาเรสุนฺติ กตฺวา เอตปรมตา ตาสํ อนุญฺญาตาติ เวทิตพฺพาฯ เอเสว นโย ทสเมปิฯ

วสฺสิกสาฏิกสิกฺขาปทวณฺณนา นิฏฺฐิตาฯ