‘‘ภิกฺขุ สํวิทหติ, มาตุคาโม น สํวิทหติ, อาปตฺติ ทุกฺกฏสฺสา’’ติ หิ วุตฺตํฯ ตถา หิ อุปปริกฺขิตพฺพํฯ

สํวิธานสิกฺขาปทวณฺณนา นิฏฺฐิตาฯ

8. อริฏฺฐสิกฺขาปทวณฺณนา

[417] คหฏฺฐสฺสาปิ ภิกฺขุนีทูสกกมฺมํ โมกฺขนฺตรายิกเมว, ตสฺมา ตสฺส ปพฺพชฺชาปิ ปฏิกฺขิตฺตาฯ วิปากนฺตรายิกา อเหตุกตฺตาฯ ปุพฺเพ สญฺจิจฺจ อาปนฺนา สมฺมุฏฺฐา สุทฺธสญฺญิโน อนฺตรายิกา เอวฯ เสสาติ ชาติกาฯ รเสนาติ ภาเวนฯ อธิกุฏฺฏนฏฺเฐนาติ อธิกรณํ กตฺวา กุฏฺฏนฏฺเฐน ฉินฺทนฏฺเฐนฯ อสิสูนูปมา กุสลธมฺมจฺเฉทนฏฺเฐนฯ สตฺติสูลูปมา จิตฺตวิตุทนฏฺเฐนาติ โปราณาฯ อนาปตฺติปาฬิยํ ‘‘อาทิกมฺมิกสฺสา’’ติ มุขารุฬฺหวเสน ลิขิตํฯ

อริฏฺฐสิกฺขาปทวณฺณนา นิฏฺฐิตาฯ

9. อุกฺขิตฺตสมฺโภคสิกฺขาปทวณฺณนา

[425] ‘‘ตํ ทิฏฺฐิํ อปฺปฏินิสฺสฏฺเฐนาติ อิมินา ลทฺธินานาสํวาสกตํ ทีเปตี’’ติ วุตฺตํฯ ติจิตฺตนฺติ เอตฺถ วิปากาพฺยากตจิตฺเตน สหวาเสยฺยํ กปฺเปยฺยาติ เอวมตฺโถ ทฏฺฐพฺโพฯ อญฺญถา สจิตฺตกตฺตา สิกฺขาปทสฺส กิริยาพฺยากตํ สนฺธาย น ยุชฺชติฯ

อุกฺขิตฺตสมฺโภคสิกฺขาปทวณฺณนา นิฏฺฐิตาฯ

10. กณฺฏกสิกฺขาปทวณฺณนา

[428] ยตฺถ เต น ปสฺสามาติ เตติ ตํฯ อถ วา ตว รูปาทิํ น ปสฺสามฯ อยํ สมณุทฺเทโส ปาราชิโก โหติฯ ‘‘สเจ ตํ ทิฏฺฐิํ ปฏินิสฺสชฺชติ, สงฺฆสฺส อาโรเจตฺวา สงฺฆานุมติยา ปพฺพาเชตพฺโพ’’ติ โปราณคณฺฐิปเท วุตฺตํ, ตํ น ยุตฺตํ, ทณฺฑกมฺมนาสนา หิ อิธาธิปฺเปตาฯ ยทิ โส ปาราชิโก, ลิงฺคนาสนา นาม สิยาฯ เต ปฏิเสวโต นาลํ อนฺตรายายาติ จ ทิฏฺฐิ สตฺถริ อสตฺถาทิทิฏฺฐิ น โหติฯ สเจ สา ยสฺส อุปฺปชฺชติ, โส ปาราชิโก โหติ, ตสฺมิมฺปิ เอวเมว ปฏิปชฺชิตพฺพํ สํวเร อติฏฺฐนฺโต ลิงฺคนาสนาเยว นาเสตพฺโพติ อาจริยสฺส ตกฺโกฯ

กณฺฏกสิกฺขาปทวณฺณนา นิฏฺฐิตาฯ

สมตฺโต วณฺณนากฺกเมน สปฺปาณกวคฺโค สตฺตโมฯ

8. สหธมฺมิกวคฺโค

1. สหธมฺมิกสิกฺขาปทวณฺณนา

[434] สหธมฺมิกสิกฺขาปทํ อุตฺตานตฺถเมวฯ