8. ทุพฺพณฺณกรณสิกฺขาปทวณฺณนา

[368] อลภีติ ลโภฯ ยถา ‘‘ปจตีติ ปโจ, ปถตีติ ปโถ’’ติ วุจฺจติ, เอวํ ‘‘ลภตีติ ลโภ’’ติ กสฺมา น วุตฺตํ? ปรินิฏฺฐิตลาภสฺเสว อิธาธิปฺเปตตฺตาฯ มคฺเคติ สิพฺพินิมคฺเคฯ กปฺปกเตน สทฺธิํ อกปฺปกตํ สิพฺเพติฯ ยาวตา อธิฏฺฐานํ น วิชหติ, ตาวตา ปุพฺพํ กปฺปเมวฯ กปฺปํ น วิชหติ เจ, ปุน กปฺปํ ทาตพฺพนฺติ อาจริยสฺส ตกฺโกฯ

ทุพฺพณฺณกรณสิกฺขาปทวณฺณนา นิฏฺฐิตาฯ

9. วิกปฺปนสิกฺขาปทวณฺณนา

[374] ปริโภโค เอตฺถ กายกมฺมํฯ อปจฺจุทฺธารณํ วจีกมฺมํฯ

วิกปฺปนสิกฺขาปทวณฺณนา นิฏฺฐิตาฯ

10. จีวราปนิธานสิกฺขาปทวณฺณนา

[379] ทสเม ยสฺมา นิสีทนสนฺถตํ จีวรนิสีทนมฺปีติ อุภยมฺปิ สทสเมว, ตสฺมา ตํ อุภยมฺปิ เอกโต กตฺวา ‘‘นิสีทนํ นาม สทสํ วุจฺจตี’’ติ อาหฯ ตตฺถาปิ จีวรคฺคหเณน จีวรนิสีทนํ คหิตเมวาติ อตฺถโต สนฺถตนิสีทนเมว วุตฺตํ โหติฯ ยทิ เอวํ ‘‘นิสีทนสนฺถตํ นาม สทสํ วุจฺจตี’’ติ วตฺตพฺพนฺติ? น, อิตรสฺส อนิสีทนอทสภาวปฺปสงฺคโตฯ เอตฺถ นิสีทนสนฺถตสฺส ปาจิตฺติยวตฺถุตฺตา อิตรมฺปิ ปาจิตฺติยวตฺถุเมวาติ เวทิตพฺพํ ตชฺชาติกตฺตาฯ สสฺสามิเก สูจิฆเร สูจิคณนาย อาปตฺติโยติ โปราณาฯ

จีวราปนิธานสิกฺขาปทวณฺณนา นิฏฺฐิตาฯ

สมตฺโต วณฺณนากฺกเมน สุราปานวคฺโค ฉฏฺโฐฯ

7. สปฺปาณกวคฺโค

1. สญฺจิจฺจปาณสิกฺขาปทวณฺณนา

[382] สญฺจิจฺจปาณสิกฺขาปทํ อุตฺตานตฺถเมวฯ

2. สปฺปาณกสิกฺขาปทวณฺณนา

[387] ‘‘ปาโณ อตฺถี’’ติ ชานนฺโตปิ ‘‘มริสฺสนฺตี’’ติ อวิจาเรตฺวา ปิวติเจ, อนาปตฺติฯ

ชเล ปกฺขิปนํ ปุปฺผํ, ชลปฺปเวสนํ อิทํ;

เอวํ อุภินฺนํ นานตฺตํ, เญยฺยํ ญาณวตา สทาติฯ

สปฺปาณกสิกฺขาปทวณฺณนา นิฏฺฐิตาฯ

3. อุกฺโกฏนสิกฺขาปทวณฺณนา

[392] ตติเย ทฺวาทส อุกฺโกฏา เวทิตพฺพาฯ ตตฺถ อกตํ กมฺมํ, ทุกฺกฏํ กมฺมํ, ปุน กาตพฺพํ กมฺมนฺติ อนุวาทาธิกรเณ ลพฺภนฺติฯ อนิหฏํ, ทุนฺนิหฏํ, น ปุน หริตพฺพนฺติ วิวาทาธิกรเณ ลพฺภนฺติ, อวินิจฺฉิตํ, ทุวินิจฺฉิตํ, ปุน วินิจฺฉิตพฺพนฺติ อาปตฺตาธิกรเณ ลพฺภนฺติฯ อวูปสนฺตํ, ทุวูปสนฺตํ, ปุน วูปสเมตพฺพนฺติ กิจฺจาธิกรเณ ลพฺภนฺตีติ อฏฺฐกถานโย, ปาฬิยํ ปเนตฺถ มุขมตฺตเมว ทสฺสิตํฯ

อุกฺโกฏนสิกฺขาปทวณฺณนา นิฏฺฐิตาฯ