ปจฺฉาภตฺตญฺจ คมิโก, ปุพฺพเคหํ ยทิ คจฺเฉ;

เอเก อาปตฺติเยวาติ, อนาปตฺตีติ เอกจฺเจฯ

กุลนฺตรสฺโสกฺกมเน , อาปตฺติมตโย หิ เต;

สมานภตฺตปจฺจาสา, อิติ อาหุ อิธาปเรฯ

มตา คณิกภตฺเตน, สเมนฺติ นํ นิมนฺตเน;

วิสฺสชฺชนํ สมานนฺติ, เอเก สมฺมุขตาปเรฯ

สนฺนิฏฺฐานตฺถิเกเหว, วิจาเรตพฺพเภทโต;

วิญฺญู จาริตฺตมิจฺเจว, สิกฺขาปทมิทํ วิทูติฯ

จาริตฺตสิกฺขาปทวณฺณนา นิฏฺฐิตาฯ

7. มหานามสิกฺขาปทวณฺณนา

[310] กาลนฺติ โสฯ ยสฺมา สงฺฆปวารณายเมวายํ วิธิ, ตสฺมา ‘‘ญาตกานํ ปวาริตาน’’นฺติ วุตฺตํฯ ‘‘อิมินา หิ ตยา ปวาริตมฺห, อมฺหากญฺจ อิมินา จ อิมินา จ อตฺโถ’’ติ ยถาภูตํ อาจิกฺขิตฺวา วิญฺญาเปตุํ คิลาโนว ลภติฯ ยํ ปน วุตฺตํ ปณีตโภชนสิกฺขาปเท ‘‘มหานามสิกฺขาปเทน กาเรตพฺโพ’’ติ, ตํ สงฺฆวเสน ปวาริตํ, เภสชฺชตฺถาย สปฺปิอาทิเภสชฺชปญฺจกํ วิญฺญาเปติ เจ, ‘‘น เภสชฺเชน กรณีเยน เภสชฺชํ วิญฺญาเปตี’ติ วจเนน ปาจิตฺติยนฺติ อตฺโถ’’ติ (ปาจิ. 309) ลิขิตํฯ

มหานามสิกฺขาปทวณฺณนา นิฏฺฐิตาฯ

8. อุยฺยุตฺตเสนาสิกฺขาปทวณฺณนา

[311-5] มํ ทิฏฺเฐนาติ มยา ทิฏฺเฐน, มม ทสฺสเนน วาฯ เอกมฺปิ สรหตฺถํ ปุริสนฺติ องฺคปริยาปนฺนํฯ

อุยฺยุตฺตเสนาสิกฺขาปทวณฺณนา นิฏฺฐิตาฯ

9. เสนาวาสสิกฺขาปทวณฺณนา

[319] นวเม เสนาปริกฺเขเปน วา ปริกฺเขปารหฏฺฐาเนน วา สญฺจรณฏฺฐานปริยนฺเตน วา ปริจฺฉินฺทิตพฺพาฯ

เสนาวาสสิกฺขาปทวณฺณนา นิฏฺฐิตาฯ

10. อุยฺโยธิกสิกฺขาปทวณฺณนา

[324] ทสเม เอกเมกํ ทสฺสนาย คจฺฉติ, อาปตฺติ ทุกฺกฏสฺสฯ ยตฺถ ฐิโต ปสฺสติ, อาปตฺติ ปาจิตฺติยสฺสาติอาทิฯ อฏฺฐเม ปน เอกเมกํ ทสฺสนาย คจฺฉติ, อาปตฺติ ทุกฺกฏสฺสฯ ยตฺถ ฐิโต ปสฺสติ, อาปตฺติ ทุกฺกฏสฺสาติ ปาฬิฯ กสฺมา? องฺคปฺปมาณาเภเทปิ อนีกวิเสสโตฯ ทสเม ปน อฏฺฐมงฺคสฺส ทสฺสเนน ทุกฺกฏํ สิยาติฯ

อุยฺโยธิกสิกฺขาปทวณฺณนา นิฏฺฐิตาฯ

สมตฺโต วณฺณนากฺกเมน อเจลกวคฺโค ปญฺจโมฯ

6. สุราปานวคฺโค

1. สุราปานสิกฺขาปทวณฺณนา

อายสฺมโต ยํ มุนิ สาคตสฺส,

มหิทฺธิกตฺตสฺส นิทสฺสเนน;

ปานสฺส โทโส ตสฺส ทสฺสนตฺถํ,

ปุพฺเพว โส ภทฺทวติํ ปยาโตฯ

ตสฺมา ปสฺสํ นาคมโปถยิตฺวา,

วินิสฺสฏํ สาคตํ อิทฺธิยา จ;

นโต สุราปานนิเสธนตฺถํ,

โกสมฺพิเมวชฺฌคมาติ เญยฺยํฯ