ปฏิญฺญาย กาเรตพฺพํฯ

เยภุยฺยสิกาฯ

ตสฺสปาปิยสิกาฯ

ติณวตฺถารโกติฯ

อุทฺทิฏฺฐา โข อายสฺมนฺโต สตฺต อธิกรณสมถา ธมฺมาฯ ตตฺถายสฺมนฺเต, ปุจฺฉามิ กจฺจิตฺถ ปริสุทฺธา, ทุติยมฺปิ ปุจฺฉามิ, กจฺจิตฺถ ปริสุทฺธา, ตติยมฺปิ ปุจฺฉามิ, กจฺจิตฺถ ปริสุทฺธา, ปริสุทฺเธตฺถายสฺมนฺโต, ตสฺมา ตุณฺหี, เอวเมตํ ธารยามีติฯ

อธิกรณสมถา นิฏฺฐิตาฯ

อุทฺทิฏฺฐํ โข อายสฺมนฺโต นิทานํ,

อุทฺทิฏฺฐา จตฺตาโร ปาราชิกา ธมฺมา,

อุทฺทิฏฺฐา เตรส สงฺฆาทิเสสา ธมฺมา,

อุทฺทิฏฺฐา ทฺเว อนิยตา ธมฺมา,

อุทฺทิฏฺฐา ติํส นิสฺสคฺคิยา ปาจิตฺติยา ธมฺมา,

อุทฺทิฏฺฐา ทฺเวนวุติ ปาจิตฺติยา ธมฺมา,

อุทฺทิฏฺฐา จตฺตาโร ปาฏิเทสนียา ธมฺมา,

อุทฺทิฏฺฐา เสขิยา ธมฺมา,

อุทฺทิฏฺฐา สตฺต อธิกรณสมถา ธมฺมา, เอตฺตกํ ตสฺส ภควโต สุตฺตาคตํ สุตฺตปริยาปนฺนํ อนฺวทฺธมาสํ อุทฺเทสํ อาคจฺฉติ, ตตฺถ สพฺเพเหว สมคฺเคหิ สมฺโมทมาเนหิ อวิวทมาเนหิ สิกฺขิตพฺพนฺติฯ

วิตฺถารุทฺเทโส ปญฺจโมฯ

ภิกฺขุปาติโมกฺขํ นิฏฺฐิตํฯ

ฯ นโม ตสฺส ภควโต อรหโต สมฺมาสมฺพุทฺธสฺสฯ

ภิกฺขุนีปาติโมกฺขปาฬิ

ปุพฺพกรณํ-4

สมฺมชฺชนี ปทีโป จ, อุทกํ อาสเนน จ;

อุโปสถสฺส เอตานิ, ‘‘ปุพฺพกรณ’’นฺติ วุจฺจติฯ

ปุพฺพกิจฺจํ-5

ฉนฺท, ปาริสุทฺธิ, อุตุกฺขานํ, ภิกฺขุนิคณนา จ โอวาโท;

อุโปสถสฺส เอตานิ, ‘‘ปุพฺพกิจฺจ’’นฺติ วุจฺจติฯ

ปตฺตกลฺลองฺคา-4

อุโปสโถ, ยาวติกา จ ภิกฺขุนี กมฺมปฺปตฺตา;

สภาคาปตฺติโย จ น วิชฺชนฺติ;

วชฺชนียา จ ปุคฺคลา ตสฺมิํ น โหนฺติ, ‘‘ปตฺตกลฺล’’นฺติ วุจฺจติฯ

ปุพฺพกรณปุพฺพกิจฺจานิ สมาเปตฺวา เทสิตาปตฺติกสฺส สมคฺคสฺส ภิกฺขุนิสงฺฆสฺส อนุมติยา ปาติโมกฺขํ อุทฺทิสิตุํ อาราธนํ กโรมฯ

นิทานุทฺเทโส

สุณาตุ เม อยฺเย สงฺโฆ, อชฺชุโปสโถ ปนฺนรโส, ยทิ สงฺฆสฺส ปตฺตกลฺลํ, สงฺโฆ อุโปสถํ กเรยฺย, ปาติโมกฺขํ อุทฺทิเสยฺยฯ

กิํ สงฺฆสฺส ปุพฺพกิจฺจํ? ปาริสุทฺธิํ อยฺยาโย อาโรเจถ, ปาติโมกฺขํ อุทฺทิสิสฺสามิ, ตํ สพฺพาว สนฺตา สาธุกํ สุโณม มนสิ กโรมฯ ยสฺสา สิยา อาปตฺติ, สา อาวิกเรยฺย, อสนฺติยา อาปตฺติยา ตุณฺหี ภวิตพฺพํ, ตุณฺหีภาเวน โข ปนายฺยาโย, ‘‘ปริสุทฺธา’’ติ เวทิสฺสามิฯ ยถา โข ปน ปจฺเจกปุฏฺฐสฺสา เวยฺยากรณํ โหติ, เอวเมวํ เอวรูปาย ปริสาย ยาวตติยํ อนุสาวิตํ โหติฯ ยา ปน ภิกฺขุนี ยาวตติยํ อนุสาวิยมาเน สรมานา สนฺติํ อาปตฺติํ นาวิกเรยฺย, สมฺปชานมุสาวาทสฺสา โหติฯ