นิคมนกถา
เอตฺตาวตา จ –
วินเย ปาฏวตฺถาย, สาสนสฺส จ วุฑฺฒิยา;
วณฺณนา ยา สมารทฺธา, วินยฏฺฐกถาย สาฯ
สารตฺถทีปนี นาม, สพฺพโส ปรินิฏฺฐิตา;
ติํสสหสฺสมตฺเตหิ, คนฺเถหิ ปริมาณโตฯ
อชฺเฌสิโต นรินฺเทน, โสหํ ปรกฺกมพาหุนา;
สทฺธมฺมฏฺฐิติกาเมน, สาสนุชฺโชตการินาฯ
เตเนว การิเต รมฺเม, ปาสาทสตมณฺฑิเต;
นานาทุมคณากิณฺเณ, ภาวนาภิรตาลเยฯ
สีตลูทกสมฺปนฺเน, วสํ เชตวเน อิมํ;
อตฺถพฺยญฺชนสมฺปนฺนํ, อกาสิํ สุวินิจฺฉยํฯ
ยํ สิทฺธํ อิมินา ปุญฺญํ, ยํ จญฺญํ ปสุตํ มยา;
เอเตน ปุญฺญกมฺเมน, ทุติเย อตฺตสมฺภเวฯ
ตาวติํเส ปโมเทนฺโต, สีลาจารคุเณ รโต;
อลคฺโค ปญฺจกาเมสุ, ปตฺวาน ปฐมํ ผลํฯ
อนฺติเม อตฺตภาวมฺหิ, เมตฺเตยฺยํ มุนิปุงฺควํ;
โลกคฺคปุคฺคลํ นาถํ, สพฺพสตฺตหิเต รตํฯ
ทิสฺวาน ตสฺส ธีรสฺส, สุตฺวา สทฺธมฺมเทสนํ;
อธิคนฺตฺวา ผลํ อคฺคํ, โสเภยฺยํ ชินสาสนํฯ
สทา รกฺขนฺตุ ราชาโน, ธมฺเมเนว อิมํ ปชํ;
นิรตา ปุญฺญกมฺเมสุ, โชเตนฺตุ ชินสาสนํฯ
อิเม จ ปาณิโน สพฺเพ, สพฺพทา นิรุปทฺทวา;
นิจฺจํ กลฺยาณสงฺกปฺปา, ปปฺโปนฺตุ อมตํ ปทนฺติฯ
สารตฺถทีปนี นาม วินยฏีกา นิฏฺฐิตาฯ